អភិបាលរាជធានីភ្នំពេញថ្មីព្រមានចាត់វិធានការក្រុមដែលលោកចាត់ទុកថាអគតិ ចង់បង្កចលាចលដល់សង្គមជាតិ និងអនុវត្តតាមការណែនាំរបស់រដ្ឋាភិបាលឲ្យខ្ជាប់ខ្ជួន រួមនឹងការលុបបំបាត់គ្រឿងញៀន និងអនុវត្តគោលនយោបាយភូមិ-ឃុំមានសុវត្ថិភាពជាដើម។
នេះជាការប្ដេជ្ញាចិត្តរបស់អភិបាលរាជធានីភ្នំពេញថ្មីគឺលោក ឃួង ស្រេង កាលពីថ្ងៃទី២៨ មិថុនា ក្នុងពិធីប្រកាសចូលកាន់តំណែងជាផ្លូវការរបស់លោក បន្ទាប់ពីរដ្ឋាភិបាលដាក់អតីតអភិបាលរាជធានីភ្នំពេញចាស់គឺលោក ប៉ា សុជាតិវង្ស ឲ្យចូលនិវត្តន៍ នឹងតែងតាំងជាទីប្រឹក្សាផ្ទាល់នាយករដ្ឋមន្ត្រី ឋានៈស្មើទេសរដ្ឋមន្ត្រី។
ថ្លែងប្រាប់អាស៊ីសេរីតាមទូរស័ព្ទនៅថ្ងៃទី២៩ មិថុនា នេះ លោក ឃួង ស្រេង មិនពន្យល់ពាក្យ "ក្រុមអគតិ" ដែលលោកប្ដេជ្ញា លុបបំបាត់ឲ្យខាងតែបាននោះទេ ក្នុងអាណត្តិរបស់លោក។ លោកថា ដើម្បីច្បាស់ពីពាក្យនេះ ឲ្យទៅមើលក្នុងវចនានុក្រម៖ «បើបងជាខ្មែរ សូមទៅមើលវចនានុក្រមសម្ដេច ជួន ណាត ក៏មាន វចនានុក្រមថ្មីក៏មាន។ បងឆ្កឹះឆ្កៀលខ្ញុំអ៊ីចឹង។ ប៉ុន្តែខ្ញុំសំដៅទៅលើការលុបបំបាត់ដើម្បីសន្តិភាព បើអត់អគតិទាំងបួន (ទោសាគតិ លម្អៀងព្រោះស្អប់ មោហាគតិ លម្អៀងព្រោះល្ងង់ ឬពុំយល់ការខុសត្រូវ ភយាគតិ លម្អៀងព្រោះខ្លាច និងឆន្ទាគតិ លម្អៀងព្រោះស្រឡាញ់) នោះមនុស្សម្នាក់ៗនឹងមានសន្តិភាពកើតឡើង»។
កាលពីដើមឆ្នាំ២០១៥ លោក ឃួង ស្រេង កាលជាអភិបាលរងរាជធានីភ្នំពេញ បានដឹកនាំសមាជិកប្រមាណ១០០នាក់ ចុះពិនិត្យផ្នែករដ្ឋបាលក្នុងវត្តព្រះសង្ឃខ្មែរក្រោម សាមគ្គីរង្សី ក្នុងសង្កាត់ស្ទឹងមានជ័យ ក្រោយពីមានចោទប្រកាន់ថា វត្តនេះជាតំបន់អបគមន៍។ បន្ទាប់ពីការចុះត្រួតពិនិត្យលោក ឃួង ស្រេង បដិសេធថា វត្តសាមគ្គីរង្សីជាតំបន់អបគមន៍ និងគ្រាន់តែអះអាងថា វត្តនោះមិនទាន់មានភាពស្របច្បាប់ជាដើម។ ទោះជាយ៉ាងណាក៏ដោយ លោក ឃួង ស្រេង ថ្លែងនៅពេលនោះថា បើសិនជាលោកផ្ទាល់វាយតម្លៃថា វត្តសាមគ្គីរង្សីនេះ ជាតំបន់អបគមន៍មែន លោកនឹងកម្ចាត់ភ្លាម៕