លោក ហ៊ុន សែន បានបញ្ជាឲ្យតាមចាប់ខ្លួនយុវជនម្នាក់ ដែលបង្ហោះព័ត៌មានមិនពិតថា លោកបានស្លាប់ក្នុងគ្រោះថ្នាក់ផ្ទុះយន្តហោះ កាលពីចុងសប្ដាហ៍នេះ។ លោក ហ៊ុន សែន បានប្រាប់ឲ្យយុវជនរូបនោះ ប្រញាប់រត់គេចខ្លួនអោយលឿនបំផុត ខណៈសមត្ថកិច្ចកំពុងតាមចាប់ខ្លួនដល់លំនៅឋាន។
កាលពីថ្ងៃទី២៥ ខែមិថុនា គណនី ហ្វេសប៊ុក (Facebook) មួយមានឈ្មោះថា "កម្មវិធីឡប់ៗតែសប្បាយ" បានបង្ហោះរូបភាពផ្ទុះឆេះយន្តហោះ ហើយសរសេរថា លោក ហ៊ុន សែន បានស្លាប់ហើយក្នុងពេលធ្វើដំណើរទៅប្រទេសវៀតណាម ដោយសារផ្ទុះយន្តហោះ។
លោក ហ៊ុន សែន ហៅការសរសេរនេះថា មិនមែនជាការបញ្ចេញមតិនោះឡើយ តែជាការប្រមាថលើអាយុជីវិតរបស់លោក ហើយក៏នាំទៅប៉ះពាល់ដល់ស្ថិរភាព និងសន្តិសុខរបស់ប្រទេសជាតិផងដែរ។ លោកបន្តថា បើនាយករដ្ឋមន្ត្រីម្នាក់បាត់បង់ជីវិតនោះប្រទេសជាតិ ប្រាកដជាជួបភាពវឹកវរមិនអាចមានសុខសន្តិភាព និងមានស្ថិរភាពនោះឡើយ។
កាលពីខែមករា ឆ្នាំ២០១៦ ប៉ូលិសក្រសួងមហាផ្ទៃ បានចាប់ស្ត្រីម្នាក់ដែលបានបង្ហោះហ្វេសប៊ុកថា លោក ហ៊ុន សែន បានស្លាប់ដោយសារបណ្តាសារ៕