និស្សិតមួយក្រុមប្រមូលផ្តុំជជែកពិភាក្សាគ្នាអំពីបញ្ហាបម្រែបម្រួលអាកាសធាតុ ដោយលើកឡើងពីបញ្ហាការកាប់បំផ្លាញព្រៃឈើ និងការចូលរួមរបស់យុវជន ដើម្បីដោះស្រាយបញ្ហា។
បន្ទាប់ពីទៅមើលតំបន់ព្រៃឈើកាលពីឆ្នាំ២០១៥ យុវតី ឡាយ វារី ចាប់ផ្តើមស្វែងយល់ និងសកម្មក្នុងការជជែកពីរឿងកាប់បំផ្លាញព្រៃឈើ ដែលនាងថាជាមូលហេតុមួយធ្វើឲ្យអាកាសធាតុផ្លាស់ប្ដូរកាន់តែអាក្រក់ទៅ និងផ្លាស់ប្ដូរការរស់នៅរបស់ប្រជាជនមូលដ្ឋានកាន់តែយ៉ាប់យ៉ឺន។
នាងឲ្យដឹងនៅថ្ងៃទី២៥ មិថុនា ក្នុងវេទិកាយុវជនមួយថា កាលដែលនាង និងមិត្តភ័ក្ដិទៅល្បាតព្រៃនៅព្រៃឡង់ និងព្រៃព្រះរកា ពួកនាងបានប្រទះឃើញការដឹកជញ្ជូនឈើដែលកាប់ចេញពីព្រៃជាច្រើនគោយន្ត៖ «»។
ឆ្នាំ២០១៦ ជាពេលដែលប្រទេសកម្ពុជា បានរងគ្រោះរាំងស្ងួតអាក្រក់បំផុតក្នុងរយៈពេល ៥០ឆ្នាំចុងក្រោយ។ វាបានប៉ះពាល់ដល់ប្រជាជនដែលរស់នៅតាមតំបន់រាំងស្ងួត គ្មានទឹកស្អាតបរិភោគ ពិសេសកសិករដែលគ្មានប្រាក់បូមទឹកដាក់ស្រែចម្ការ គ្មានទឹកគ្រប់គ្រាន់សម្រាប់ស្រោចស្រពដំណាំ នាំឲ្យទិន្នន័យកសិកម្មថយចុះ និងខាតបង់ប្រាក់។
ក្រៅពីបាតុភូតធម្មជាតិ អែលនីណូ (El Nino) ដែលបង្កើតគ្រោះរាំងស្ងួតធ្ងន់ធ្ងរនេះ អ្នកជំនាញក៏បន្ទោសទៅលើការកាប់បំផ្លាញព្រៃឈើផងដែរ។
មន្ត្រីរដ្ឋាភិបាល ជារឿយៗបានចោទប្រជាជនមូលដ្ឋានថាជាអ្នកកាប់ព្រៃឈើ។ ក៏ប៉ុន្តែកញ្ញា ឡាយ វារី យល់ឃើញផ្សេងពីនេះថា ប្រជាជនមូលដ្ឋានដែលភាគច្រើនជាយុវជនសម្រេចទៅកាប់ព្រៃឈើ ដោយសារគ្មានការងារធ្វើ ហើយអ្នកខ្លះដែលជាកសិករទៅកាប់ព្រៃ ដោយសារគ្មានដីដាំដំណាំ ឬធ្វើដំណាំបានផលហើយ តែគ្មានទីផ្សារសម្រាប់លក់ផលិតផលដំណាំ។
ពេលថ្មីៗនេះ នៅតែមានការកាប់ព្រៃឈើក្នុងតំបន់ព្រៃការពារ និងនាំចេញទៅប្រទេសវៀតណាម បើទោះជារដ្ឋាភិបាលបានហាមប្រាមក៏ដោយ។
និស្សិតរូបនេះបញ្ជាក់ថា នៅពេលយុវជនទៅឃើញតំបន់ព្រៃឈើផ្ទាល់ ពិសេសតំបន់មានការកាប់បំផ្លាញព្រៃឈើ នោះពួកគេនឹងចង់ចាប់ផ្ដើមធ្វើអ្វីម្យ៉ាងដើម្បីចូលរួមដោះស្រាយបញ្ហា។
ទាក់ទងនឹងតួនាទីរបស់យុវជនក្នុងការជួយទប់ស្កាត់ការប្រែប្រួលអាកាសធាតុ កញ្ញា សួន សុភាព ប្រធានកម្មវិធីស្ម័គ្រចិត្តសម្រាប់ការអប់រំផ្នែកអាកាសធាតុ មើលឃើញថា យុវជនអាចប្រើប្រាស់សក្ដានុពលដែលខ្លួនមាន ដើម្បីចូលរួមជាចំណែកនៃដំណោះស្រាយបញ្ហានេះ៖ «»។
ពលរដ្ឋអាយុក្រោម ៣៥ឆ្នាំតំណាងឲ្យជាងពាក់កណ្ដាលនៃប្រជាជនកម្ពុជា សរុបប្រមាណ ១៥លាននាក់។
អ្នកស្រី សីឡា កាសទីឡូ តាំងកូ (Shiela R. Castillo-Tiangco) អ្នកជំនាញផ្នែកបម្រែបម្រួលអាកាសធាតុនៃគម្រោង The Climate Reality Project ធ្វើបទបង្ហាញនៅក្នុងវេទិកាយុវជននេះថា យុវជនមានពេលវេលា ថាមពល ភាពក្លៀវក្លា និងមានសំឡេងច្រើនជាងមនុស្សវ័យណាៗទាំងអស់ ហើយអ្នកស្រីយល់ឃើញថា យុវជនគួរក្លាហានរួមគ្នាក្នុងសំឡេងតែមួយ ដើម្បីជជែកពីបញ្ហាប្រែប្រួលអាកាសធាតុនេះ៖ «»។
អ្នកស្រីជំរុញឲ្យយុវជនចែករំលែកចំណេះដឹង និងព័ត៌មាននានាស្ដីពីបញ្ហាប្រែប្រួលអាកាសធាតុ ទៅអ្នកដែលគេស្គាល់ឲ្យបានកាន់តែច្រើន ពិសេសចែករំលែកតាមបណ្ដាញសង្គម។ អ្នកស្រីលើកឡើងថា យុវជនត្រូវខំរៀនឲ្យមែនទែន ពីព្រោះថាពួកគេមិនអាចទៅដឹកនាំដោយគ្មានចំណេះដឹងទេ៕