ប្រទេសចិន និងឥណ្ឌា មានគម្រោងនឹងចុះហត្ថលេខាលើអនុស្សរណៈយោគយល់គ្នាជាមួយនឹងអាជ្ញាធរអប្សរា ស្ដីពីការកំណត់ទិសដៅនៃការជួសជុល និងការអភិរក្ស ព្រមទាំងអភិវឌ្ឍន៍ប្រាសាទបុរាណឱ្យមាននិរន្តរភាពតទៅមុខទៀត។
ពិធីចុះហត្ថលេខានឹងធ្វើឡើងនៅក្រោយពេលបញ្ចប់កិច្ចប្រជុំផ្នែកបច្ចេកទេសជួសជុល និងអភិវឌ្ឍន៍អង្គរ លើកទី២៨ របស់គណៈកម្មាធិការសម្របសម្រួលអន្តរជាតិ សម្រាប់អភិវឌ្ឍន៍ និងការពារបេតិកភណ្ឌ ដែលហៅកាត់ថា (ICC)។
អ្នកជំនាញជាន់ខ្ពស់ផ្នែកជួសជុល និងអ្នកជំនាញផ្នែកអភិវឌ្ឍន៍ប្រាសាទបុរាណ របស់គណៈកម្មាធិការសម្របសម្រួលអន្តរជាតិ សម្រាប់អភិវឌ្ឍន៍ និងការពារបេតិកភណ្ឌ បានជួបប្រជុំបច្ចេកទេសរយៈពេល ២ថ្ងៃ នៅឯមជ្ឈមណ្ឌលអាជ្ញាធរអប្សរា នាខេត្តសៀមរាប ចាប់តាំងពីព្រឹកថ្ងៃពុធ ទី២១ ខែមិថុនា។
កិច្ចប្រជុំដែលមានជប៉ុន និងបារាំង ធ្វើជាសហប្រធាន បានពិនិត្យមើលឡើងវិញទៅលើរបាយការណ៍នានា ស្ដីពីការជួសជុលប្រាសាទបុរាណ ព្រមទាំងចុះទៅពិនិត្យមើលតាមការដ្ឋានជួសជុលផ្ទាល់ ដើម្បីផ្ដល់អនុសាសន៍ផ្នែកបច្ចេកទេសថ្មីៗទៀតផង។
មន្ត្រីនាយកដ្ឋានផ្សព្វផ្សាយរបស់អាជ្ញាធរអប្សរា គឺលោក ឡុង កុសល។ លោកថ្លែងក្រោយពីសម្រាកពីកិច្ចប្រជុំនៅព្រឹកថ្ងៃពុធ ទី២១ ខែមិថុនា ថា អ្នកជំនាញជាន់ខ្ពស់ផ្នែកអភិរក្ស និងជួសជុល និងអ្នកជំនាញខាងអភិវឌ្ឍន៍ប្រាសាទបុរាណប្រកបដោយចិរភាព មកជួបប្រជុំគ្នាពេលនេះនឹងផ្ដល់យោបល់ទាំងលក្ខណៈបច្ចេកទេស ទាំងសម្ភារៈ ទៅដល់ក្រុមការងារដែលកំពុងតែអនុវត្តន៍គម្រោងជួសជុលប្រាសាទបុរាណនានា។
លោក ឡុង កុសល បញ្ជាក់ថា បច្ចុប្បន្ននៅក្នុងតំបន់ឧទ្យានអង្គរ គឺមានគម្រោងជួសជុលប្រាសាទបុរាណជាច្រើនដែលកំពុងដំណើរការ ដូចជានៅស្ពានហាលបុរាណនៃប្រាសាទអង្គរវត្តគម្រោងកំណាយនៅប្រាសាទតាព្រហ្ម និងគម្រោងជួសជុលប្រាសាទតាកែវ ជាដើម៖ «ការងារទាំងអស់គឺផ្ដោតទៅលើបច្ចេកទេសជាក់ស្ដែងតាមគម្រោងនីមួយៗ ដូច្នេះមុននឹងចូលកិច្ចប្រជុំ គឺអ្នកជំនាញជាន់ខ្ពស់ផ្នែកជួសជុល និងអ្នកជំនាញផ្នែកអភិវឌ្ឍន៍ប្រាសាទបុរាណ បានទៅពិនិត្យមើលជាក់ស្ដែងនៅតាមការដ្ឋានទាំងនោះសម្រាប់ផ្ដល់អនុសាសន៍»។
រដ្ឋមន្ត្រីក្រសួងបរិស្ថាន ដែលបានអញ្ជើញចូលរួមកិច្ចប្រជុំរបស់គណៈកម្មាធិការសម្របសម្រួលអន្តរជាតិ សម្រាប់អភិវឌ្ឍន៍ និងការពារបេតិកភណ្ឌអង្គរដែរនោះ បានផ្ដោតការយកចិត្តទុកដាក់ទៅលើការបំផ្លាញធម្មជាតិនៅលើភ្នំគូលែន គឺមិនត្រឹមតែប៉ះពាល់ដល់បរិស្ថាននៃឧទ្យានជាតិប៉ុណ្ណោះទេ វាថែមទាំងគំរាមកំហែងដល់រមណីយដ្ឋាន និងប្រាសាទបុរាណជាង ៥០កន្លែងទៀតផង។
អគ្គនាយករងនៃអគ្គនាយកដ្ឋានសហគមន៍មូលដ្ឋានរបស់ក្រសួងបរិស្ថាន លោក សេង សោត មានប្រសាសន៍ថា ក្រសួងបរិស្ថាន កំពុងប្រឹងប្រែងទប់ស្កាត់ការកាប់បំផ្លាញព្រៃឈើ ការរុករានយកដី និងការចូលទៅតាំងទីលំនៅលើខ្នងភ្នំគូលែន។ មន្ត្រីដដែលបញ្ជាក់ថា ក្រសួងបរិស្ថាន ព្រួយបារម្ភចំពោះការកាប់ឈើ និងការចូលទៅតាំងទីលំនៅលើខ្នងភ្នំគូលែន មិនត្រឹមតែធ្វើឱ្យប៉ះពាល់បរិស្ថានរបស់ឧទ្យានជាតិប៉ុណ្ណោះទេ វាក៏ធ្វើឱ្យប៉ះពាល់ដល់ប្រាសាទបុរាណ ព្រមទាំងរមណីយដ្ឋានប្រវត្តិសាស្ត្រជាង ៥០កន្លែងដែរ៖ «កាលណាគាត់ធ្វើផ្ទះកាន់តែច្រើនទៅៗ វាបង្កការប៉ះពាល់ដល់រមណីយដ្ឋានវាកើតសំរាម កើតទឹកកខ្វក់។ ភ្នំគូលែនជាតំបន់សក្ដិសិទ្ធិ»។
ក្រសួងបរិស្ថាន ឱ្យដឹងថា ដើម្បីការពារបរិស្ថាន និងជួយដល់រមណីយដ្ឋានបុរាណនៅលើភ្នំគូលែននោះ គឺក្រសួងបានសុំរដ្ឋាភិបាលឱ្យបញ្ចប់ការធ្វើសម្បទានដីកសិទេសចរណ៍ពីក្រុមហ៊ុនឯកជន ហើយមានគម្រោងធ្វើផ្លូវឡើងទៅលើភ្នំគូលែន ឱ្យបានល្អស្អាត សម្រាប់ទេសចរណ៍ងាយស្រួលឡើងទៅកម្សាន្ត ក៏ដូចក្រុមអភិរក្សងាយស្រួលល្បាតការពារព្រៃឈើ។ ម្យ៉ាងទៀតក្រសួងបរិស្ថានបានសហការជាមួយអាជ្ញាធរខេត្តសៀមរាប ក៏មានគម្រោងផ្លាស់ប្ដូរទីលំនៅរបស់ប្រជាពលរដ្ឋជាច្រើនរយគ្រួសារ ដែលកំពុងតែរស់នៅតំបន់ព្រះអង្គធំលើខ្នងភ្នំគូលែនដែរ។ ការធ្វើដូចនេះ ក្នុងបំណងការពារបរិស្ថាននៃឧទ្យានជាតិភ្នំគូលែនផង និងការពារអតីតរាជធានីបុរាណនៃអំឡុងសតវត្សទី៨ ទី៩ នៃគ្រិស្តសករាជផង៕