អ្នកឃ្លាំមើលការអភិវឌ្ឍសង្គមប្រចាំខេត្តព្រះសីហនុ ស្នើដល់រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ រដ្ឋមន្ត្រីក្រសួងកសិកម្ម រដ្ឋមន្ត្រីក្រសួងបរិស្ថាន ជាពិសេសលោកនាយករដ្ឋមន្ត្រី ជួយដកហូតបរិវេណដីគម្របព្រៃឈើឆ្នាំ២០០២ មានទីតាំងនៅភូមិគគីរ ឃុំបិតត្រាំង ដែលត្រូវគេឃុបឃិតកាប់ព្រៃយកដីធ្វើកម្មសិទ្ធិយកមកដាក់ជាសម្បត្តិរដ្ឋគ្រប់គ្រង និងដាំកូនឈើឡើងវិញ។
មន្ត្រីអង្គការក្រៅរដ្ឋាភិបាលចំនួន៣ នៅខេត្តព្រះសីហនុ ស្នើឲ្យរដ្ឋាភិបាលត្រូវមានវិធានការផ្លូវច្បាប់រឹបអូសបរិវេណដីគម្របព្រៃឈើឆ្នាំ២០០២ ដែលត្រូវជនអនាធិបតេយ្យកាប់រានធ្វើកម្មសិទ្ធិកន្លងទៅ យកមកដាក់ជាសម្បត្តិរដ្ឋគ្រប់វិញ។
ក្រៅពីនេះទៀត អង្គការទាំងបីរួមមាន អង្គការលីកាដូ (LICADHO) សមាគមអាដហុក (ADHOC) និងអង្គការស៊ីអ៊ិនរ៉ូ (CNRO) ជាដើម ក៏ស្នើឲ្យរដ្ឋាភិបាលពិនិត្យឈានដល់និរាករណ៍ ឬរំលាយប័ណ្ណកម្មសិទ្ធិដែលបុគ្គលមួយចំនួនបានទន្ទ្រានកាន់កាប់ដីរដ្ឋដោយខុសច្បាប់នៅតំបន់ពយម៉ាចូវ ហើយឃុបឃិតគ្នាធ្វើប្លង់កម្មសិទ្ធិយកដីនោះមកអភិរក្សដាំកូនឈើ សម្រាប់បម្រើដល់វិស័យទេសចរណ៍ឡើងវិញ។
ប្រធានអង្គការស្រាវជ្រាវជាតិកម្ពុជា ហៅកាត់ថាស៊ីអ៊ិនរ៉ូ (CNRO) លោក សុខ សុខុម ស្នើឲ្យលោក ជា សុផារ៉ា រដ្ឋមន្ត្រីក្រសួងដែនដី រដ្ឋមន្ត្រីក្រសួងកសិកម្ម ពិសេសលោកនាយករដ្ឋមន្ត្រី ហ៊ុន សែន ឲ្យជួយថែរក្សាការពារបរិវេណដីគម្របព្រៃឈើឆ្នាំ២០០២ ឲ្យនៅគង់វង្ស ព្រោះបច្ចុប្បន្ន បរិវេណដីគម្របព្រៃឈើបៃតងមានទីតាំងនៅតំបន់ពយម៉ាចូវចុងឆ្នេរអូរត្រេះ ស្ថិតក្នុងភូមិគគីរ ឃុំបិតត្រាំង ត្រូវជនអនាធិបតេយ្យចូលទន្ទ្រានកាន់កាប់រលាយហិនហោចគ្មានសល់៖ «ការកាប់បំផ្លាញព្រៃឈើនៅតំបន់នេះ ត្រូវបានស្រឡះល្វឹងល្វើយអស់ហើយ ហើយត្រូវបានសង់ផ្ទះតូចធំយ៉ាងគគ្រឹកគគ្រេងតូចធំនៅក្នុងនេះ បណ្ដាលឲ្យបាត់បង់បរិវេណដីគម្របព្រៃឈើឆ្នាំ២០០២ ដែលជាដីសាធារណៈរបស់រដ្ឋ។ ហើយបទល្មើសនេះកន្លងមក ក្នុងនាមខ្ញុំជាអង្គការសង្គមស៊ីវិល ធ្លាប់បានរាយការណ៍ទៅរដ្ឋបាលព្រៃឈើខេត្តព្រះសីហនុ ជាបន្តបន្ទាប់ផងដែរ ប៉ុន្តែគាត់បានចុះមកតែនៅពេលដែលយើងរាយការណ៍ជូនទេ។ ក្រោយពីរាយការណ៍រួច តំបន់គម្របព្រៃឈើនៅភូមិគគីរ ឃុំបិតត្រាំង ចុងឆ្នេរអូរត្រេះ ឬតំបន់ពយម៉ាចូវនេះ នៅតែមានសកម្មភាពកាប់ឆ្ការព្រៃអនាធិបតេយ្យទន្ទ្រានដីធ្វើកម្មសិទ្ធិលើដីសាធារណៈរបស់រដ្ឋ នៅតែកើតមានដដែល»។
ចំណែកអ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី សង្ស័យថា បទល្មើសព្រៃឈើដែលគ្មានការបង្ក្រាបបែបនេះ អាចធ្វើសកម្មភាពដោយគ្មានអាជ្ញាធរហាមឃាត់ ទំនងជាអាចមានជាប់ពាក់ព័ន្ធមន្ត្រីខ្លះកំពុងបម្រើការងារនៅតាមមន្ទីរ ឬស្ថាប័នជំនាញខ្លះក្រោមឱវាទរដ្ឋបាលខេត្តព្រះសីហនុ។
អ្នកស្រី សុធារី ស្នើដល់រដ្ឋបាលខេត្តព្រះសីហនុ ពិសេសរដ្ឋាភិបាល ត្រូវដកហូតបរិវេណដីគម្របព្រៃឈើឆ្នាំ២០០២ ដែលត្រូវជនខិលខូចទន្ទ្រានកាន់កាប់ ដើម្បីយកដីនោះមកដាំកូនឈើអភិរក្សបម្រើដល់វិស័យទេសចរណ៍នៅថ្ងៃខាងមុខវិញ៖ «ជាយោបល់របស់នាងខ្ញុំ អាជ្ញាធរមានសមត្ថកិច្ចគួរតែចេញមុខដាក់ពាក្យបណ្ដឹងប្ដឹងទៅកាន់តុលាការ ដើម្បីទាមទារលុបចោលនូវឯកសារដែលពាក់ព័ន្ធទៅនឹងការកាន់កាប់ដីរដ្ឋទាំងអស់ហ្នឹង ហើយយកដីទាំងនោះមកដាក់ជាទ្រព្យសម្បត្តិរបស់រដ្ឋ ហើយគួរតែមានឯកសារផ្លូវច្បាប់មួយជាឯកសាររឹងមាំ ដើម្បីបង្ហាញឲ្យឃើញថា ដីនេះគឺជាដីរបស់រដ្ឋ ដែលស្ថិតក្រោមការគ្រប់គ្រងរបស់អង្គភាព ឬមន្ទីរណាមួយជាក់លាក់។ ជាងនេះ ត្រូវធ្វើការប្រកាសផ្សាយឲ្យប្រជាពលរដ្ឋ និងអាជ្ញាធរនៅតំបន់នោះចូលរួមអភិរក្សថែរក្សាទាំងអស់គ្នា»។
មន្ត្រីសង្គមស៊ីវិលរូបនេះផ្ដល់ទស្សនៈថា បើរដ្ឋាភិបាលមិនរឹបអូសយកដីគម្របព្រៃឈើដែលត្រូវគេរានកាន់កាប់អនាធិបតេយ្យមកឲ្យរដ្ឋគ្រប់គ្រង និងដាំដើមឈើឡើងវិញទេ ទំនាស់កាន់កាប់ដីធ្លីក្នុងតំបន់នេះ នឹងកើតមានកាន់តែច្រើន និងធ្ងន់ធ្ងរថែមទៀត ហើយនឹងប៉ះពាល់ធ្ងន់ធ្ងរដល់វិស័យទេសចរណ៍នៅតាមតំបន់ឆ្នេរខេត្តព្រះសីហនុ នៅថ្ងៃអនាគត។
អភិបាលខេត្តព្រះសីហនុ លោក យន្ត មីន ថ្លែងក្នុងសន្និសីទកាសែតកាលពីថ្ងៃទី១៥ ខែមិថុនា ថា រដ្ឋបាលខេត្តនេះមានគម្រោងដឹកនាំកម្លាំងចុះរុះរើខ្ទម ឬផ្ទះតូចៗដែលសង់នៅលើបរិវេណដីគម្របព្រៃឈើឆ្នាំ២០០២ តំបន់ពយម៉ាចូវ ឬចុងឆ្នេរអូរត្រេះនេះនៅថ្ងៃខាងមុខ។ លោកព្រមានថា អ្នកជាប់ពាក់ព័ន្ធបទល្មើសកាប់រានបរិវេណដីគម្របព្រៃឈើឆ្នាំ២០០២ នឹងត្រូវផ្ដន្ទាទោស ព្រោះជាទង្វើខុសច្បាប់ ហើយស្នើឲ្យដកខ្លួនជាបន្ទាន់៖ «បញ្ហាដីធ្លីនៅតំបន់ពយម៉ាចូវ ឬចុងឆ្នេរអូរត្រេះ គឺមានលក្ខណៈស្មុគស្មាញជាងនៅតំបន់ក្បាលឆាយច្រើនណាស់ ពីព្រោះដីមួយដុំ ពេលខ្លះមានម្ចាស់ដល់ទៅ ៣នាក់។ ម្ចាស់ខ្លះអះអាងមានប្លង់រឹង ម្ចាស់ខ្លះអះអាងថាមានលិខិតទិញលក់ទទួលស្គាល់ដោយអាជ្ញាធរភូមិ ឃុំ សង្កាត់ និងស្រុក ហើយម្ចាស់ខ្លះទៀតអះអាងថាមានច្បាប់គម្របព្រៃឈើ ជាដើម មានន័យថា ដីមួយដុំមានម្ចាស់ដល់ទៅបីនាក់។ ដូច្នេះនិយាយជារួម នៅថ្ងៃខាងមុខ អាជ្ញាធរនឹងដោះស្រាយបញ្ចប់ជម្លោះដីធ្លីនៅតំបន់ពយម៉ាចូវហ្នឹងឲ្យចង់សព្វគ្រប់»។
មន្ត្រីអង្គការក្រៅរដ្ឋាភិបាលបានអះអាងថា បរិវេណដីគម្របព្រៃឈើឆ្នាំ២០០២ មានទីតាំងនៅចុងឆ្នេរអូរត្រេះស្ថិតក្នុងឃុំបិតត្រាំង ស្រុកព្រៃនប់ ដែលកន្លងទៅ លោកនាយករដ្ឋមន្ត្រី ហ៊ុន សែន បានដាក់ឲ្យថ្នាក់ដឹកនាំខេត្តព្រះសីហនុ ថែរក្សាការពារទុកសម្រាប់បម្រើដល់វិស័យទេសចរណ៍នានា។ បច្ចុប្បន្ន គម្របព្រៃឈើបៃតងទាំងនោះ ត្រូវជនខិលខូចឃុបឃិតគ្នាកាប់បំផ្លាញរានដីធ្វើកម្មសិទ្ធិទាំងស្រុង ហើយរដ្ឋបាលខេត្តព្រះសីហនុ គ្មានវិធានការទប់ស្កាត់ទេកន្លងទៅ៕