Clik here to view.
លោក ចៅ វាសនា បេក្ខជនជាប់ឆ្នោតជាចៅសង្កាត់ប៉ោយប៉ែត មកពីគណបក្សសង្គ្រោះជាតិ ត្រូវបានអនុរក្សពន្ធនាគារខេត្តបន្ទាយមានជ័យ បញ្ជូនចេញពីមន្ទីរពេទ្យត្រឡប់ទៅពន្ធនាគារវិញហើយនៅព្រឹកថ្ងៃទី២០ មិថុនា។
ប្រពន្ធរបស់បេក្ខជនចៅសង្កាត់ប៉ោយប៉ែត លោកស្រី វង្ស គឹមហុង អះអាងថា សមត្ថកិច្ចបញ្ជូនប្ដីរបស់លោកស្រីត្រឡប់ទៅពន្ធនាគារយ៉ាងប្រញាប់នៅម៉ោងប្រមាណ ៩កន្លះព្រឹកថ្ងៃទី២០ មិថុនា។ លោកស្រីបន្ថែមថា ស្ថានភាពជំងឺរបស់លោក ចៅ វាសនា មិនទាន់ជាដាច់នៅឡើយ៖ «សុខភាពគាត់មិនទាន់ជាទេ គ្រាន់តែគាត់អាចដើរបានបន្តិចបន្តួចនៅក្នុងពេទ្យប៉ុណ្ណោះ ហើយគាត់ហូបបបរបានតែពីរបីស្លាបព្រាទេ។ ពេលសមត្ថកិច្ចនាំចេញ គេមិនបានប្រាប់ខ្ញុំមុនទេ ប៉ុន្តែខ្ញុំទៅដល់មន្ទីរពេទ្យមុនគេ នាំប្ដីខ្ញុំទៅពន្ធនាគារ»។
លោក ចៅ វាសនា ត្រូវបានសមត្ថកិច្ចបញ្ជូនទៅព្យាបាលជំងឺពោះវៀនដុះខ្នែងនៅមន្ទីរពេទ្យបង្អែកមិត្តភាពកម្ពុជា-ជប៉ុន មង្គលបូរី កាលពីយប់ថ្ងៃទី១០ មិថុនា។ ប្រធានមន្ទីរពេទ្យបង្អែកមិត្តភាពកម្ពុជា-ជប៉ុន មង្គលបូរី លោក ចន្ទ វិឌ្ឌីណាវុឌ្ឍ អះអាងថា បញ្ហាជំងឺពោះវៀនដុះខ្នែងរបស់លោក ចៅ វាសនា បានធូរស្រាល ទើបអនុញ្ញាតឲ្យចេញពីមន្ទីរពេទ្យ។
ចៅក្រមស៊ើបសួរនៃសាលាដំបូងខេត្តបន្ទាយមានជ័យ បានបញ្ជូនលោក ចៅ វាសនា នៅពន្ធនាគារខេត្តបន្ទាយមានជ័យ កាលពីថ្ងៃទី១៦ ខែកុម្ភៈ គឺនៅមុនបោះឆ្នោតឃុំ-សង្កាត់កាលពីថ្ងៃទី៤ ខែមិថុនា ឆ្នាំ២០១៧ ដោយចោទប្រកាន់ពីបទញុះញង់ឲ្យប្រើអំពើហិង្សាមានស្ថានទម្ងន់ទោស ដែលប្រព្រឹត្តទៅនៅមុខទីស្នាក់ការគយ និងរដ្ឋាករក្រុងប៉ោយប៉ែត កាលពីខែឧសភា ឆ្នាំ២០១៥៕
