មន្ត្រីអាជ្ញាធរអប្សរាទទួលបន្ទុកការពារ និងថែរក្សាប្រាសាទបុរាណ នៅខេត្តសៀមរាប បង្ហាញកង្វល់យ៉ាងខ្លាំងដោយសារតែក្នុងអំឡុងពេលយុទ្ធនាការឃោសនា និងការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ រយៈពេលតែ ២០ថ្ងៃ គឺប្រជាពលរដ្ឋបានសង់សំណង់ថ្មីៗជាច្រើននៅក្នុងតំបន់បេតិកភណ្ឌដែលច្បាប់បានហាមឃាត់។
ចាប់តាំងពីថ្ងៃទី១៩ រហូតមកដល់ថ្ងៃទី២០ ខែមិថុនា អាជ្ញាធរអប្សរាបានបញ្ជូនកម្លាំងសណ្ដាប់ធ្នាប់ជាច្រើនក្រុមដើម្បីចុះរុះរើសំណង់ថ្មីៗទាំងនោះចេញវិញ។
ពលរដ្ឋជាច្រើននៅភូមិរហាល សង្កាត់នគរធំ ក្រុងសៀមរាប បានប្រមូលផ្ដុំគ្នា ជំទាស់នឹងអាជ្ញាធរអប្សរា មិនព្រមឱ្យរុះរើសំណង់ថ្មីៗ ដែលទើបតែសាងសង់នៅជិតរបងប្រាសាទបន្ទាយក្ដីនោះទេ។
ក្រុមអ្នកភូមិបានលើកហេតុផលថា កម្លាំងសណ្ដាប់ធ្នាប់របស់អាជ្ញាធរអប្សរា ដែលប៉ុនប៉ងមករុះរើសំណង់ថ្មីៗនោះថា កាលពីកំពុងឃោសនារកសំឡេងឆ្នោត គឺពួកគេសាងសង់គ្មានអាជ្ញាធរណាចេញមុខទៅហាមឃាត់ឡើយ ប៉ុន្តែក្រោយពីការបោះឆ្នោតជ្រើសរើសក្រុមប្រឹក្សាឃុំ-សង្កាត់រួចហើយ បែរជាមករុះរើបណ្ដាលឱ្យពួកគេខាតបង់លុយកាក់ដែលខំទៅខ្ចីបុលធនាគារទៅវិញ។
ស្ត្រីអ្នកភូមិព្រះដាក់ ម្នាក់ ដែលមកចូលរួមតវ៉ាជាមួយអ្នកភូមិរហាល គឺអ្នកស្រី ស៊ុយ ទឹម។ អ្នកស្រីបង្ហាញកាយវិការជំទាស់នឹងមន្ត្រីអាជ្ញាធរអប្សរា ដែលចុះទៅរុះរើសំណង់ថ្មីរបស់ប្រជាពលរដ្ឋយ៉ាងខ្លាំង។ អ្នកស្រី ស៊ុយ ទឹម បន្ទោសទៅលើកម្លាំងសណ្ដាប់ធ្នាប់របស់អាជ្ញាធរអប្សរាថា ការចុះទៅរុះរើសំណង់ថ្មីដែលសង់រួចហើយនោះ គឺជាការជំរុញឱ្យពលរដ្ឋវ័ណ្ឌកនឹងបំណុល៖ «ខ្ញុំអត់សុខចិត្តទេ ខ្ញុំត្រូវតែតវ៉ាដូច្នេះហើយ។ កាលពីអ្នកភូមិធ្វើ ដឹកដីមកចាក់ យកឈើចូលមកយ៉ាងណា ក៏គ្មានអ្នកណាហាមឃាត់ដែរ»។
អ្នកភូមិជាច្រើនទៀតមានទស្សនៈដូចគ្នានឹងអ្នកស្រី ស៊ុយ ទឹម ដែរ ដោយពួកគេមិនសប្បាយចិត្តជាមួយអាជ្ញាធរអប្សរា។
កាលពីថ្ងៃទី៩ ខែមិថុនា អាជ្ញាធរអប្សរាបានចេញប្រកាសយកទៅចែកជូនពលរដ្ឋជាម្ចាស់សំណង់ថ្មីៗ ដោយឱ្យរុះរើចេញពីតំបន់ហាមឃាត់វិញក្នុងរយៈពេល ៧ថ្ងៃជាកំហិត។ អាជ្ញាធរអប្សរាចាត់ទុកសំណង់ដែលពលរដ្ឋសង់ក្នុងអំឡុងពេលបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤នេះថាគឺជាសំណង់ខុសច្បាប់។
មន្ត្រីនាយកដ្ឋានផ្សព្វផ្សាយរបស់អាជ្ញាធរអប្សរា លោក ឡុង កុសល មានប្រសាសន៍ថា ថ្វីបើការចុះរុះរើសំណង់ថ្មីក្នុងតំបន់ឧទ្យានអង្គរ មានប្រជាពលរដ្ឋខ្លះមិនយល់ព្រមក៏ដោយ ក៏ការងារនេះនៅតែបន្តដើម្បីការពារមត៌កដូនតាខ្មែរ ដែលក្លាយជាសម្បត្តិបេតិកភណ្ឌពិភពលោកទៅហើយ។ អាជ្ញាធរអប្សរាច្រានចោលការចោទប្រកាន់ដែលថា កាលពីសាងសង់ គឺគ្មានអាជ្ញាធរណាចុះទៅហាមឃាត់នោះ ជាការមិនពិតទេ ពីព្រោះកម្លាំងរបស់អាជ្ញាធរអប្សរា តែងទៅហាមឃាត់ ក៏ប៉ុន្តែប្រជាពលរដ្ឋមិនព្រមស្ដាប់។
លោក ឡុង កុសល បញ្ជាក់ថា ពលរដ្ឋកម្ពុជា ទាំងមូលគួរតែមានមោទនភាពដោយសារតែប្រទេសខ្មែរមានប្រាសាទបុរាណជាមត៌កពីដូនតាដ៏ល្បីល្បាញពេញពិភពលោក ហើយប្រទេសជាច្រើនតែងមករៀនសូត្រពីខ្មែរ។ លោក ឡុង កុសល អំពាវនាវឱ្យពលរដ្ឋបញ្ឈប់ការសង់សំណង់ថ្មីៗ នៅក្នុងតំបន់បេតិកភណ្ឌតទៅទៀត៖ «សូមចូលរួមថែរក្សា មត៌កដូនតារបស់យើងទាំងអស់គ្នា។ សំណូមពរទី២ថា អាជ្ញាធរអប្សរាមានការអនុញ្ញាតច្បាប់ឱ្យបងប្អូនដែលត្រូវការសង់ផ្ទះសម្បែងបានត្រឹមត្រូវ»។
មន្ត្រីអាជ្ញាធរអប្សរា ឱ្យដឹងថា ចាប់ពីថ្ងៃយុទ្ធនាការឃោសនាបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិទី៤ ថ្ងៃទី២០ ខែឧសភា រហូតដល់ថ្ងៃទី២ ខែមិថុនា គឺមានសំណង់ថ្មីៗនៅក្នុងតំបន់ឧទ្យានអង្គរប្រមាណ ៥២០ កន្លែង។
អ្នកស៊ើបអង្កេតសមាគមការពារសិទ្ធិមនុស្សអាដហុក (ADHOC) ខេត្តសៀមរាប លោក សួស ណារិន មើលឃើញថា ការអនុវត្តការពារតំបន់បេតិកភណ្ឌ គឺអាជ្ញាធរអប្សរាធ្វើទៅតាមព្រះរាជក្រឹត្យ ចំណែកប្រជាពលរដ្ឋវិញក៏ត្រូវការលំនៅឋានសមរម្យដែរ។ ដូច្នេះអាជ្ញាធរអប្សរា គួរតែកំណត់ស្តង់ដារមួយដែលអាចឱ្យពលរដ្ឋរស់នៅក្នុងតំបន់ការពារនោះ អាចសង់ផ្ទះបានតាមគំរូណាមួយ៕