ពានរង្វាន់អាស៊ាន រ៉ាយ បូល ស្តាតអាប់ (ASEAN Rice Bowl Startup Awards) កំពុងស្វែងរកសហគ្រិន ឬអាជីវកម្មទើបបង្កើតថ្មីពីតំបន់អាស៊ាន រួមទាំងកម្ពុជា ផង ដែលមានគំនិតច្នៃប្រឌិតជួយដោះស្រាយបញ្ហារស់នៅប្រចាំថ្ងៃរបស់ប្រជាពលរដ្ឋ ចូលរួមប្រកួតប្រជែងយកពានរង្វាន់ថ្នាក់តំបន់នេះ។
នេះជាឆ្នាំទី៣ នៃការរៀបចំពានរង្វាន់សម្រាប់សហគ្រិននៅតំបន់អាស៊ាននេះ។ កាលពីឆ្នាំ២០១៦ មានបេក្ខជនចំនួន ១.៥០០នាក់ចុះឈ្មោះចូលរួមប្រកួតប្រជែង។
ប្រធានគម្រោងនៃមូលនិធិសហគ្រិនថ្មី (New Entrepreneurs Foundation) អ្នកនាង រ៉ូប៊ី ដាឡាន់ (Rubi Dahlan) បានប្រាប់អាស៊ីសេរីថា ពានរង្វាន់អាស៊ាន រ៉ាយ បូល ស្តាតអាប់ (ASEAN Rice Bowl Startup Awards) ផ្តល់ការទទួលស្គាល់ និងលើកទឹកចិត្តដល់សហគ្រិនដែលទើបចាប់ផ្តើមអាជីវកម្មដំបូង ឬស្តាតអាប់ (startup) ដែលមានអាយុកាលមិនលើសពី ៥ឆ្នាំ ដែលមានការច្នៃប្រឌិតដោយប្រើប្រាស់បច្ចេកវិទ្យា កែប្រែរបៀបរបបរកស៊ីបែបបុរាណតាមរយៈការផ្តល់សេវាកម្ម និងទំនិញដល់ប្រជាពលរដ្ឋតាមបែបថ្មី។
អ្នកនាងបញ្ជាក់បន្ថែមថា ពានរង្វាន់នេះកំពុងស្វែងរកអាជីវកម្មទើបកើតឡើងថ្មី ដែលមានសក្ដានុពលជួយដោះស្រាយបញ្ហារបស់អ្នកប្រើប្រាស់ មិនត្រឹមតែក្នុងប្រទេសប៉ុណ្ណោះទេ ថែមទាំងអាចពង្រីកទីផ្សារទៅកាន់តំបន់ផងដែរ។
វាមានពីរដំណាក់កាលក្នុងការវាយតម្លៃ ដើម្បីជ្រើសរើសម្ចាស់ពានរង្វាន់។ ជុំទីមួយ ជាការប្រកួតប្រជែងក្នុងស្រុកនៅតាមប្រទេសសមាជិកអាស៊ាននីមួយៗ ដូចជាកម្ពុជា វៀតណាម ថៃ ឡាវ មីយ៉ាន់ម៉ា ម៉ាឡេស៊ី សិង្ហបុរី ប្រ៊ុយណេ ហ្វីលីពីន និងឥណ្ឌូនេស៊ី។
ការដាក់ពាក្យ ត្រូវចូលទៅកាន់គេហទំព័រ http://www.ricebowlawards.com/ ដើម្បីចូលរួមប្រកួតកម្មវិធីនេះ ហើយផុតកំណត់ដាក់ពាក្យនៅថ្ងៃទី៣០ ខែកក្កដា ឆ្នាំ២០១៧។
ជុំទីពីរ ជាការប្រកួតថ្នាក់តំបន់ គឺជាការប្រកួតប្រជែងរវាងអ្នកឈ្នះប្រចាំប្រទេស និងប្រទេស។ ការប្រកាសលទ្ធផលម្ចាស់ពានរង្វាន់អាស៊ាន រ៉ាយ បូល ស្តាតអាប់ (ASEAN Rice Bowl Startup Awards) នឹងត្រូវធ្វើនៅទីក្រុងកូឡាឡាំពួរ (Kuala Lumpur) ប្រទេសម៉ាឡេស៊ី (Malaysia) នៅខែវិច្ឆិកា ឆ្នាំ២០១៧។
អ្នកនាង រ៉ូប៊ី ដាឡាន់ (Rubi Dahlan) ថ្លែងថា នេះជាឱកាសមួយសម្រាប់សហគ្រិនបង្ហាញអាជីវកម្មរបស់ខ្លួនទៅកាន់ថ្នាក់តំបន់ ទៅជួបវិនិយោគិន។ នាងបន្តថា ការរៀបចំនេះ នឹងជួយបង្ហាញតំបន់អាស៊ានជាជង្រុកមួយរបស់ពិភពលោកផ្នែកការបង្កើតថ្មី និងជួយអ្នកបង្កើតគោលនយោបាយ រៀបចំរបៀបវារៈសហគ្រិនភាពស្ដីពីការច្នៃប្រឌិតបច្ចេកវិទ្យាឌីជីថល (Digital)៖ «វាជាពេលគួរឲ្យរំភើបមួយសម្រាប់អាជីវកម្មបង្កើតថ្មីនៅតំបន់អាស៊ាន។ ខ្ញុំដឹង! មានតំបន់ជាច្រើនកំពុងក្រឡេកមើលពី eco-system នៅតំបន់អាស៊ាន។ ជាការពិត យើងមិនមែនព្យាយាមប្រកួតប្រជែងជាមួយតំបន់ស៊ីឡេខូន វ៉ាឡេ (Sillicon Valley)។ គេដើរមុនយើងឆ្ងាយណាស់ទៅហើយ។ សហគមន៍អាស៊ាន គឺខុសពីលោកខាងលិច។ យើងមានបញ្ហាផ្ទាល់ខ្លួនដែលមានតែយើងទេអាចរួមគ្នាដោះស្រាយបានប្រសើរ»។
ពានរង្វាន់នេះមានច្រើនផ្នែកដូចជា ពានរង្វាន់ផ្នែកដំណោះស្រាយឆ្លាតវៃសម្រាប់ទីក្រុង អាជីវកម្មអនឡាយ (e-commerce) បច្ចេកវិទ្យាសុខភាព ជីវិតកម្សាន្ត បច្ចេកវិទ្យាអាហារ បច្ចេកវិទ្យាជីវៈបៃតង បច្ចេកវិទ្យាហិរញ្ញវត្ថុ បញ្ញាសិប្បនិម្មិត (AI) ជាដើម។
កាលពីឆ្នាំ២០១៦ ហ្គ្រាប (Grab) ដែលជាក្រុមហ៊ុនលក់សេវាធ្វើដំណើរតាមតាក់ស៊ីដោយកុម្ម៉ង់តាមកម្មវិធីលើទូរស័ព្ទ (app) ឈ្នះពានរង្វាន់អាស៊ាន រ៉ាយ បូល ស្តាតអាប់ (ASEAN Rice Bowl Startup Awards) ផ្នែកអាជីវកម្មបង្កើតថ្មីប្រចាំឆ្នាំ៕