ស្ត្រីរកស៊ីផ្លូវភេទម្នាក់ ដែលចោទសន្តិសុខខណ្ឌដូនពេញថា បានវាយក្នុងបំណងសម្លាប់កាលពីយប់ថ្ងៃទី៩ ខែមេសា នឹងទៅតុលាការក្រុងភ្នំពេញ ជាលើកទី២ ដើម្បីជំរុញឲ្យមន្ត្រីតុលាការមានចំណាត់ការលើបណ្ដឹងដែលអ្នកស្រីបានប្ដឹង កាលពីថ្ងៃទី១២ ខែឧសភា។ សង្គមស៊ីវិលថា នឹងពិនិត្យមើលលទ្ធភាពក្នុងការផ្ដល់មេធាវីការពារក្ដី ប្រសិនបើស្ត្រីរងគ្រោះស្នើសុំសេវាផ្នែកច្បាប់។
ការអះអាងថា នឹងទៅជំរុញនៅតុលាការជាលើកទី២នេះ បន្ទាប់ពីសមាជិកបណ្ដាញស្ត្រីរួបរួមគ្នា អ្នកស្រី យេ សំអូន បានទៅជំរុញមន្ត្រីតុលាការម្ដងរួចហើយ កាលពីថ្ងៃទី២៣ ខែឧសភា។ ការទៅជំរុញលើកទី១ ដោយសារពាក្យបណ្ដឹងអ្នកស្រី បានដាក់ជាង ១ខែហើយ តុលាការនៅមិនទាន់ចាត់ការនៅឡើយ។ ស្ត្រីអតីតអ្នកប្រកបរបររកស៊ីផ្លូវភេទរូបនេះ ប្ដឹងមេសន្តិសុខសណ្ដាប់ធ្នាប់សាលាខណ្ឌដូនពេញ ឈ្មោះ គឹម រតនា ព្រមទាំងកូនចៅរបស់លោក គឹម រតនា មួយក្រុម ពីបទចាប់ខ្លួនអ្នកស្រីយកទៅសម្លាប់ ដោយមានការគ្រោងទុក។
អ្នកស្រី យេ សំអូន ប្រាប់ថា ក្រឡាបញ្ជីកាន់សំណុំរឿង ឈ្មោះ យន់ សាវិន បានប្រាប់ឲ្យអ្នកស្រីត្រឡប់ទៅផ្ទះវិញ ហើយនៅក្រោយបោះឆ្នោតក្រុមប្រឹក្សាឃុំ-សង្កាត់រួច តុលាការនឹងកោះហៅអ្នកស្រី។ សមាជិកបណ្ដាញស្ត្រីរួបរួមរូបនេះ មានគម្រោងទៅជំរុញតុលាការម្ដងទៀតនៅខែកក្កដា៖ «គាត់ (ក្រឡាបញ្ជី លោក យន់ សាវិន) ថា ចាំបោះឆ្នោតហើយ គាត់ហ្នឹងកោះហើយ។ គាត់ថា សុំទោសបង អត់បានកោះហៅណា ខ្ញុំប្រុងកោះហៅដែរ តែចាំឲ្យបោះឆ្នោតហើយ ចាំខ្ញុំនឹងកោះហៅ តែខ្ញុំអត់ឃើញគេហៅផង។ រាល់ដងខ្ញុំដើរ អត់ឃើញនរណាហៅទេ ខ្ញុំទៅបង្ខំគេតែម្ដង។ ឥឡូវខ្ញុំកំពុងរវល់ដែរណា ចាំដល់ខែ៧... ខ្ញុំអត់ជឿទេ ព្រោះរឿងដែរខ្ញុំដើរមកមួយៗ អត់ដែលមាននរណាកោះហៅទេ ទាល់តែខ្ញុំទៅតឿនគេ ហើយខ្ញុំដឹកសាក្សីឲ្យគេទៀត»។
អ្នកស្រី យេ សំអូន បានអះអាងថា កាលពីយប់ថ្ងៃទី៩ ខែមេសា ក្រុមសន្តិសុខខណ្ឌដូនពេញ បានដេញចាប់ក្រុមស្ត្រីរកស៊ីផ្លូវភេទនៅម្ដុំទន្លេសាប ជិតវត្តភ្នំ។ អ្នកស្រី និងស្ត្រីរកស៊ីផ្លូវភេទម្នាក់ទៀត ត្រូវកងសន្តិសុខខណ្ឌចាប់ឡើងឡានសណ្ដាប់ធ្នាប់ខណ្ឌ ហើយបានដឹកទៅដល់ទីងងឹតត្រង់បន្ទប់ទឹកនៅម្ដុំរូបសំណាកលោកយាយពេញនៅវត្តភ្នំ ហើយព្រួតវាយអ្នកស្រី និងស្រែកគំរាមសម្លាប់ដោយសារហ៊ានចេញមុខអន្តរាគមន៍ជួយស្ត្រីរកស៊ីផ្លូវភេទជាច្រើនលើកច្រើនសា។
មុនពេលប្ដឹងទៅតុលាការ អ្នកស្រី យេ សំអូន ប្រាប់ថា បានរកអន្តរាគមន៍ពីសមត្ថកិច្ចនៅប៉ុស្តិ៍វត្តភ្នំ ជាច្រើនដង ប៉ុន្តែប៉ូលិសបានជំរុញអ្នកស្រីឲ្យទៅជួបជជែកជាមួយសន្តិសុខខណ្ឌនៅសាលាខណ្ឌដូនពេញ ប៉ុន្តែអ្នកស្រីមិនហ៊ានទៅជួបសន្តិសុខខណ្ឌនោះទេ ហើយក៏មិនហ៊ានរស់នៅបន្ទប់ជួលនៅភ្នំពេញ ទៀតដែរ ក្រោយពេលដែលអ្នកស្រីបានចាកចេញពីមន្ទីរពេទ្យកាល់ម៉ែត កាលពីថ្ងៃទី១១ ខែមេសា។
ចាប់តាំងពីមានការប្ដឹងមេសន្តិសុខខណ្ឌដូនពេញ មក ស្ត្រីរងគ្រោះរូបនេះប្រាប់ថា មិនហ៊ានដើរឆ្ងាយពីកន្លែងលាក់ខ្លួននោះទេ ព្រោះនៅពេលដែលជិះតាមផ្លូវម្ដងៗ អ្នកស្រីកត់សម្គាល់ឃើញថា តែងមានរថយន្តតាមកៀរ និងដួលម៉ូតូជាញឹកញាប់។ បន្ទាប់ពីបានដាក់ពាក្យប្ដឹងនៅតុលាការក្រុងភ្នំពេញ អ្នកស្រី យេ សំអូន បានពឹងពាក់សេវាផ្នែកច្បាប់នៅអង្គការសិទ្ធិមនុស្សលីកាដូ (LICADHO)។
ប្រធានផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត ប្រាប់ថា ខាងអង្គការធ្លាប់បានជួយប្រឹក្សាផ្នែកច្បាប់បានខ្លះហើយ។ នៅពេលពាក្យបណ្ដឹងដំណើរការ លោក អំ សំអាត ថា អង្គការលីកាដូ នឹងពិនិត្យមើលបន្ថែម ដើម្បីជួយផ្ដល់សេវាផ្នែកច្បាប់បន្ថែមទៀត៖ «ពីមុនមក យើងបានជួយគាត់ខ្លះហើយ ប្រឹក្សាយោបល់ផ្នែកផ្លូវច្បាប់ ហើយនិងពាក្យបណ្ដឹងថា ត្រូវធ្វើយ៉ាងម៉េច អានេះយើងសិក្សាទៅតាមផ្លូវច្បាប់»។
ដើម្បីមានសុវត្ថិភាពឡើងវិញ អ្នកស្រី យេ សំអូន យល់ថា មានការតែការដាក់ទោសទណ្ឌតាមច្បាប់លើអ្នកដែលវាយអ្នកស្រីតែប៉ុណ្ណោះ។ អ្នកស្រី យេ សំអូន មិនរំពឹងថា តុលាការចាត់ការលើបណ្ដឹងរបស់អ្នកស្រីនោះទេ ប៉ុន្តែទោះយ៉ាងណា អ្នកស្រីប្ដេជ្ញាជំរុញឲ្យតុលាការមានចំណាត់ការលើបណ្ដឹងអ្នកស្រីឲ្យខាងតែបាន៕