Clik here to view.
មន្ត្រីបោះឆ្នោតឃុំក្រែក ស្រុកពញាក្រែក ខេត្តត្បូងឃ្មុំ ម្នាក់ថ្លែងសុំលាក់អត្តសញ្ញាណ ថា លោកពិតជាត្រូវបានគេកាត់ប្រាក់ឧបត្ថម្ភរបស់ខ្លួនមែន ទោះបីជាគណៈកម្មាធិការជាតិរៀបចំការបោះឆ្នោត (គ.ជ.ប) បដិសេធព័ត៌មាននេះក្ដី។
មន្ត្រីរូបនេះឲ្យអាស៊ីសេរីដឹងនៅថ្ងៃទី១៣ មិថុនា ថា គណៈកម្មការឃុំ-សង្កាត់រៀបចំការបោះឆ្នោត (គឃ.សប) បានហៅទូរស័ព្ទមកប្រធានការិយាល័យដែលលោកបំពេញការងារ ឲ្យទៅយកប្រាក់ដែលគេកាត់នោះមកវិញ កាលពីថ្ងៃទី១២ មិថុនា ក្រោយពីអាស៊ីសេរីផ្សាយព័ត៌មានពីការកាត់ប្រាក់ឧបត្ថម្ភនេះ កាលពីថ្ងៃទី១១ មិថុនា។
មន្ត្រីដដែលអះអាងថា ទោះបីជាខាងគ.ឃ.ស.ប ហៅលោកទៅយកប្រាក់នោះវិញក្ដី តែរូបគេថានឹងមិនទៅយកឡើយ ដោយបារម្ភថា គេចំណាំមុខជាដើម។
កាលពីថ្ងៃទី១២ មិថុនា គ.ជ.ប ចេញសេចក្ដីបំភ្លឺថា គ.ជ.ប បានស្រាវជ្រាវបន្ទាន់ករណីចោទប្រកាន់នេះ និងរកមិនឃើញដូចការចោទប្រកាន់ឡើយ ហើយប្រធានគណៈកម្មការរៀបចំការបោះឆ្នោតខេត្តត្បូងឃ្មុំ (គធ.ខប) លោក សុខ ឈិន អះអាងថា បើមានការកាត់ប្រាក់ឧបត្ថម្ភមែន លោកនឹងដាក់វិន័យតាមបទបញ្ជាផ្ទៃក្នុងរបស់គ.ជ.ប។
ទោះជាយ៉ាងណាក៏ដោយ ប្រធានគឃ.សប ឃុំក្រែក ខេត្តត្បូងឃ្មុំ លោក ឈឹម ធី ឲ្យអាស៊ីសេរីដឹងកាលពីថ្ងៃទី១១ មិថុនា ថា ក្រុមការងារលោកមិនមែនជាអ្នកកាត់ប្រាក់បេសកកម្មរបស់មន្ត្រីបោះឆ្នោតទេ ហើយលោកថា ប្រធានគណៈកម្មការរាជធានី-ខេត្តរៀបចំការបោះឆ្នោត ជាអ្នកកាត់ប្រាក់ឧបត្ថម្ភនេះ។
ប្រភពប្រាប់អាស៊ីសេរីកាលពីថ្ងៃទី១១ មិថុនា ថា មន្ត្រីការិយាល័យបោះឆ្នោត និងរាប់សន្លឹកឆ្នោត ឃុំក្រែក ស្រុកពញាក្រែក ខេត្តត្បូងឃ្មុំ ត្រូវបានគេកាត់ប្រាក់បេសកកម្ម ក្នុងនោះប្រធានការិយាល័យម្នាក់ចំនួន ១៥.០០០រៀល និងសមាជិកមន្ត្រីផ្សេងទៀតចាប់ពីអនុប្រធាន ដល់សមាជិកទី៣ ក្នុងម្នាក់ៗចំនួន ១២.០០០រៀលដោយមិនបញ្ជាក់ពីមូលហេតុឡើយ៕
