Clik here to view.
មន្ត្រីស្ថាប័នជំនាញត្រួតពិនិត្យគុណភាពចំណីអាហារប្រចាំខេត្តព្រះសីហនុ ចុះត្រួតពិនិត្យផលិតផលគ្រឿងផ្សំរស ឬប្រេងខ្យងចំនួនពីរប្រភេទមានម៉ាក ហ្គូលឌិន អយស្ទ័រ ស៊ស (Golden Oyster Sauce) និង អយស្ទ័រ ស៊ស (Oyster Sauce) នាំចូលពីហុងកុង នៅតាមទីផ្សារនានាព្រោះមានផ្ទុកសារធាតុគីមីហាមឃាត់។
អនុប្រធានសាខាកាំកុងត្រូលខេត្តព្រះសីហនុ លោក ជា ប៉ិច បានដឹកនាំមន្ត្រីចុះត្រួតពិនិត្យតាមទីផ្សារជិត ១០ទីតាំងនាមូលដ្ឋាននេះ ពិសេសផ្សារទំនើបដែលមានជនជាតិចិន ជាម្ចាស់អាជីវកម្ម ដើម្បីស្រាវជ្រាវរកផលិតផលគ្រឿងផ្សំរស ដែលមានផ្ទុកសារធាតុគីមី នាំឲ្យប៉ះពាល់ធ្ងន់ធ្ងរដល់សុខភាពអ្នកទទួលទាន។
លោកថា ពេលចុះត្រួតពិនិត្យផលិតផលគ្រឿងផ្សំរស ឬប្រេងខ្យងទាំងពីរប្រភេទកាលពីព្រឹកថ្ងៃទី១៣ ខែមិថុនា មន្ត្រីជំនាញរកមិនឃើញប្រេងខ្យងទាំងពីរប្រភេទនេះមានដាក់តាំងលក់នៅលើទីផ្សារទេ។ ទន្ទឹមគ្នានេះ មន្ត្រីជំនាញក៏បានអប់រំដល់អាជីវករ ពិសេសម្ចាស់ផ្សារទំនើប មិនឲ្យនាំចូល ឬលក់ផលិតផលគ្រឿងផ្សំរស ឬប្រេងខ្យងប្រភេទ ហ្គូលឌិន អយស្ទ័រ ស៊ស និង អយស្ទ័រ ស៊ស នេះជាដាច់ខាត។
លោក ជា ប៉ិច ថាផលិតផលប្រេងខ្យងទាំងពីរប្រភេទនេះ ត្រូវស្ថាប័នជំនាញត្រួតពិនិត្យគុណភាពចំណីអាហារហុងកុង ពិសោធរកឃើញមានផ្ទុកសារធាតុគីមីហាមឃាត់មិនឲ្យប្រើទៅលើម្ហូបអាហារ ដែលនាំឲ្យប៉ះពាល់ដល់សុខភាពអ្នកទទួលទាន ឬអាចឈានដល់បាត់បង់ជីវិត៖ «ជាផលិតផលមកពីហុងកុង ចំនួនពីរប្រភេទ គឺមានម៉ាក ហ្គូលឌិន អយស្ទ័រ ស៊ស (Golden Oyster Sauce) និង អយស្ទ័រ ស៊ស (Oyster Sauce) មានប្រភពមកពីហុងកុង ដែលផលិតផលទាំងពីរមុខនេះតាមរយៈសមត្ថកិច្ចនៃសុវត្ថិភាពម្ហូបអាហារនៃទីក្រុងហុងកុង ក៏បានផ្សព្វផ្សាយ និងប្រមូលដោយមិនអនុញ្ញាតឲ្យធ្វើចរាចរនៅលើទីផ្សារ ដោយមូលហេតុថាមានប្រើប្រាស់សារធាតុគីមីហាមឃាត់ទៅលើចំណីអាហារដែលមានឈ្មោះថា ប្រូពីល ប៉ារ៉ា អ៊ីដ្រូស៊ីបេនហ្ស៊ូអាត (Propyl para-hydroxybenzoate)»។
អគ្គនាយកដ្ឋានត្រួតពិនិត្យទំនិញ និងបង្ក្រាបការក្លែងបន្លំនៃក្រសួងពាណិជ្ជកម្មកម្ពុជា ថ្មីៗនេះបានចេញសេចក្តីប្រកាសជូនមន្ត្រីក្រោមឱវាទនៅតាមរាជធានី-ខេត្តនីមួយៗ ឲ្យចុះទប់ស្កាត់ការនាំចូល និងដាក់តាំងលក់ទំនិញនៅលើទីផ្សារនានា ដោយតម្រូវឲ្យដកហូតផលិតផលម្ហូបអាហារគ្រឿងផ្សំរស ឬប្រេងខ្យងប្រភេទ ហ្គូលឌិន អយស្ទ័រ ស៊ស និង អយស្ទ័រ ស៊ស ដែលមានសារធាតុគីមី។
ប្រធានអគ្គនាយកដ្ឋានកាំកុងត្រូល លោក ម៉ក ពេជ្ជរិទ្ធ បានឲ្យដឹងក្នុងលិខិតជូនដំណឹងថា សារធាតុគីមីនោះមានឈ្មោះបច្ចេកទេសថា ប្រូពីល ប៉ារ៉ា អ៊ីដ្រូស៊ីបេនហ្ស៊ូអាត (Propyl para-hydroxybenzoate) គឺជាសារធាតុគីមីបន្ថែមសម្រាប់ដាក់ក្នុងផលិតផលម្ហូបអាហារដែលមានមុខងារជួយថែរក្សាផលិតផលម្ហូបអាហារនានា ឲ្យមានអាយុកាលវែង (Preservative) ដែលគេហាមប្រើនៅក្នុងផលិតផលម្ហូបអាហារ។
អគ្គនាយកដ្ឋានកាំកុងត្រូល បានណែនាំដល់មន្ត្រីក្រោមឱវាទទាំងអស់ ត្រូវចុះអនុវត្តវិធានការរាំងខ្ទប់ការដាក់តាំងលក់នៅតាមទីផ្សារ និងត្រូវហាមមិនឲ្យនាំចូលផលិតផលគ្រឿងផ្សំប្រេងខ្យងមានផ្ទុកសារធាតុហាមឃាត់នេះជាបន្ទាន់។ ជាងនេះ ក៏ត្រូវចុះត្រួតពិនិត្យនៅតាមទីផ្សារធំតូច ឬផ្សារទំនើបនានា ហើយត្រូវរឹបអូសពីទីផ្សារទាំងអស់ បើមានដាក់តាំងលក់។
អនុប្រធានសាខាកាំកុងត្រូលខេត្តព្រះសីហនុ លោក ជា ប៉ិច បានស្នើឲ្យប្រជាពលរដ្ឋ និងផ្នែកពាក់ព័ន្ធ ស្នើឲ្យផ្តល់ព័ត៌មានតាមរយៈទូរស័ព្ទលេខ០៩៨ ៥៥៥ ៦៦៦ លេខ០១៧ ៤៤៣ ៧៣៧ និងលេខ០១២ ៩៤៦ ០៤៦ បើឃើញផលិតផលគ្រឿងផ្សំរស ឬប្រេងខ្យងម៉ាក ហ្គូលឌិន អយស្ទ័រ ស៊ស និង អយស្ទ័រ ស៊ស មានដាក់តាំងលក់នៅលើទីផ្សារណាមួយ ដើម្បីបញ្ជូនមន្ត្រីជំនាញចុះទប់ស្កាត់ឲ្យបានទាន់ពេល៕
