សហព័ន្ធសហជីពកម្មករសំណង់ និងព្រៃឈើកម្ពុជា ស្នើឲ្យរដ្ឋាភិបាលយកចិត្តទុកដាក់លើបញ្ហាសុខភាព សុវត្ថិភាព និងផ្តល់កិច្ចគាំពារសង្គមសម្រាប់កម្មករសំណង់។ ការស្នើសុំនេះ បន្ទាប់ពីពួកគេមើលឃើញថា កម្មករសំណង់នៅតែរងហានិភ័យខ្ពស់ ខណៈវិស័យសំណង់បានដើរតួកាន់តែសំខាន់ជួយដល់សេដ្ឋកិច្ចជាតិ។
ថ្វីត្បិតតែវិស័យឧស្សាហកម្មសំណង់កំពុងតែរីកលូតលាស់លឿននៅកម្ពុជា ក្តី ប៉ុន្តែគេមើលឃើញថា លក្ខខណ្ឌការងារដ៏អាក្រក់ និងសុវត្ថិភាពដ៏ផុយស្រួយរបស់កម្មករនៅការដ្ឋានសំណង់ នៅតែចោទជាបញ្ហាធំ ដែលទាមទារឲ្យរដ្ឋាភិបាលត្រូវយកចិត្តទុកដាក់ដោះស្រាយ។
ដើម្បីលើកកម្ពស់សុខមាលភាព និងសុវត្ថិភាពកម្មករសំណង់ អគ្គលេខាធិការសហព័ន្ធសហជីពកម្មករសំណង់ និងព្រៃឈើ លោក យ៉ាន់ ធី ជំរុញឲ្យរដ្ឋាភិបាលកម្ពុជា ជួយគិតគូរអំពីបញ្ហាសុខភាព និងសុវត្ថិភាពរបស់កម្មករសំណង់ ការពង្រីកវិសាលភាពនៃបេឡាជាតិរបបសន្តិសុខសង្គមទៅលើក្រុមកម្មករសំណង់ ការត្រួតពិនិត្យទៅលើក្រុមហ៊ុនសាងសង់ និងកំណត់ប្រាក់ឈ្នួលគោលសម្រាប់ពួកគេ ជាដើម៖ «»។
ការលើកឡើងនេះ បន្ទាប់ពីសហព័ន្ធសហជីពកម្មករសំណង់ និងព្រៃឈើ បានធ្វើវេទិកាជួបជុំសមាជិកស្ដីពីសុខភាព សុវត្ថិភាព និងដំណើរឆ្ពោះទៅរកការទទួលបានកិច្ចគាំពារសង្គមសម្រាប់កម្មករសំណង់ ដែលរៀបចំឡើងនៅព្រឹកថ្ងៃទី១១ ខែមិថុនា នៅភូមិព្រែកថោង ឃុំព្រែកលួង ស្រុកខ្សាច់កណ្ដាល ខេត្តកណ្ដាល។
កម្មករសំណង់ម្នាក់ឈ្មោះ ទួន វុទ្ធី រៀបរាប់ថា លោកបានចាកចោលភូមិស្រុកដើរធ្វើជាកម្មករសំណង់ជាង ១០ឆ្នាំមកហើយ ប៉ុន្តែលោកថាការងារនេះពុំទទួលបានប្រាក់ខែខ្ពស់ ដែលនាំឲ្យមានជីវភាពធូរធារឡើយ ពោលគឺគ្រាន់តែបានចិញ្ចឹមជីវិតពីមួយថ្ងៃទៅមួយថ្ងៃប៉ុណ្ណោះ។ លោកឲ្យដឹងដែរថា កម្មករសំណង់ងាយប្រឈមនឹងគ្រោះថ្នាក់ខ្លាំង ដោយសារក្រុមហ៊ុនសំណង់ភាគច្រើនកង្វះខាតសម្ភារការពារខ្លួន។ គ្រោះថ្នាក់សម្រាប់កម្មករជាញឹកញយ គឺជួនកាលកម្មករធ្លាក់ពីលើអគារ ជួនកាលទៀតធ្វើការមុតដៃមុតជើង កម្មករខ្លះទៀតក៏ត្រូវខ្សែភ្លើងឆក់រហូតមានករណីស្លាប់ និងរងរបួស ប៉ុន្តែក្រុមហ៊ុនសំណង់ភាគច្រើនបានព្យាយាមលាក់បាំងព័ត៌មាន ហើយករណីជាច្រើនមិនត្រូវបានគេរាយការណ៍។
កម្មករសំណង់រូបនេះបន្តថា បើទោះជាការងាររបស់ពួកគេធ្ងន់ធ្ងរ និងប្រឈមយ៉ាងណាក្តី ប៉ុន្តែពួកគេបែរជាបាត់បង់សិទ្ធិទទួលបានអត្ថប្រយោជន៍ និងការធានារ៉ាប់រងផ្សេងៗទៅវិញ៖ «»។
ក្រៅពីមិនបានទទួលអត្ថប្រយោជន៍ផ្សេងៗនោះ កម្មករសំណង់ប្រាប់ថា ប្រាក់ឈ្នួលរបស់ពួកគេមិនត្រូវបានគេផ្ដល់ជូនឲ្យទៀងទាត់ឡើយ។
ទាក់ទងបញ្ហានេះ អាស៊ីសេរី មិនអាចសុំការឆ្លើយតបពីប្រធានការិយាល័យគោលនយោបាយនៃបេឡាជាតិរបបសន្តិសុខសង្គម (ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ លោក ជាវ ប៊ុនរិទ្ធ បានទេនៅថ្ងៃទី១១ ខែមិថុនា ដោយលោកលើក ហើយចុចបិទទូរស័ព្ទទៅវិញ។
របាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បង្ហាញថា ការវិនិយោគវិស័យសំណង់ក្នុងឆ្នាំ២០១៦ មានចំនួនប្រមាណជាង ៨.៥០០លានដុល្លារអាមេរិក (៨.៥៣៤.០៥៨.៣៨៩ដុល្លារ) បើធៀបនឹងឆ្នាំ២០១៥ ដែលមានចំនួនប្រមាណជាង ៣.៣០០លានដុល្លារអាមេរិក (៣.៣៣៨.១០៧.២១៨ដុល្លារ) គឺកើនឡើងចំនួន ១៥៥,៦៨%។ វិស័យសំណង់នេះ បានបង្កើតការងារជាច្រើនប្រភេទជូនប្រជាពលរដ្ឋគិតជាមធ្យមប្រមាណ ១៩ម៉ឺននាក់ទៅ ២០ម៉ឺននាក់ក្នុងមួយថ្ងៃ។
របាយការណ៍ដដែលបង្ហាញថា តម្លៃពលកម្មសម្រាប់កម្មករគ្មានជំនាញក្នុងមួយខែទទួលបាន ១២០ដុល្លារទៅ ២០០ដុល្លារ។ រីឯកម្មករមានជំនាញ និងមេជាង ក្នុងមួយខែទទួលបាន ៣០០ដុល្លារទៅ ៤៥០ដុល្លារ។ ចំពោះវិស្វករ ស្ថាបត្យករ និងអ្នកជំនាញផ្សេងៗទៀត អាចទទួលបានកម្រៃចាប់ពី ៣៥០ដុល្លារដល់ទៅ ២.៥០០ដុល្លារអាមេរិកក្នុងមួយខែ។
អគ្គលេខាធិការសហព័ន្ធសហជីពកម្មករសំណង់ និងព្រៃឈើ លោក យ៉ាន់ ធី លើកឡើងដែរថា វេទិកាជួបជាមួយសមាជិកជាកម្មករសំណង់នៅព្រឹកថ្ងៃទី១១ ខែមិថុនា នេះ គឺក្នុងបំណងបង្កើនការយល់ដឹងដល់កម្មករ និងចង់ផ្ញើសារឲ្យរដ្ឋាភិបាល យកចិត្តទុកដាក់បន្ថែមទៀតអំពីបញ្ហាសុខមាលភាព និងសុវត្ថិភាពការងាររបស់កម្មករសំណង់៕