បេក្ខជនជាប់ឆ្នោតថ្មីជាចៅសង្កាត់ប៉ោយប៉ែត ក្រុងប៉ោយប៉ែត មកពីគណបក្សសង្គ្រោះជាតិ ដែលកំពុងស្ថិតក្នុងពន្ធនាគារខេត្តបន្ទាយមានជ័យ ត្រូវបានសមត្ថកិច្ចពន្ធនាគារបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកមិត្តភាពកម្ពុជា-ជប៉ុន ស្រុកមង្គលបូរី កាលពីយប់ថ្ងៃទី១០ មិថុនា។ មកដល់រសៀលថ្ងៃទី១១ មិថុនា ស្ថានភាពជំងឺរបស់បេក្ខជនចៅសង្កាត់រូបនេះបានធូរស្រាលខ្លះឡើងវិញ តែមិនទាន់អាចចេញពីមន្ទីរពេទ្យបាននៅឡើយ។
សាច់ញាតិលោក ចៅ វាសនា ដែលជាបេក្ខជនចៅសង្កាត់ថ្មីនៃសង្កាត់ប៉ោយប៉ែត មកពីគណបក្សប្រឆាំងអះអាងថា បេក្ខជនចៅសង្កាត់រូបនេះត្រូវបានអនុរក្សពន្ធនាគារខេត្តបន្ទាយមានជ័យ បញ្ជូនទៅសង្គ្រោះបន្ទាន់ ដោយសារជំងឺពោះវៀនដុះខ្នែងមានសភាពធ្ងន់ធ្ងរមិនអាចព្យាបាលនៅក្នុងពន្ធនាគារបាន។
កូនស្រីបេក្ខជនជាប់ឆ្នោតជាចៅសង្កាត់ប៉ោយប៉ែត លោកស្រី ចៅ រតនៈ ឲ្យដឹងថា លោកស្រី និងក្រុមគ្រួសារ បានចូលទៅមើលឪពុកផ្ទាល់នៅក្នុងមន្ទីរពេទ្យបង្អែកមិត្តភាពកម្ពុជា-ជប៉ុន ទាំងយប់ បន្ទាប់ពីលោក ចៅ វាសនា បានទូរស័ព្ទទៅប្រាប់កាលពីយប់ថ្ងៃទី១០ មិថុនា ថា លោកឈឺពោះខ្លាំង។
លោកស្រីអះអាងថា ដំបូងឡើយ មន្ត្រីអនុរក្សពន្ធនាគារមិនអនុញ្ញាតឲ្យឪពុករបស់ខ្លួនទៅព្យាបាលជំងឺនៅខាងក្រៅគុកនោះទេ តែក្រោយមក ឪពុករបស់លោកស្រីឈឺពោះខ្លាំងមិនអាចទ្រាំបាន ទើបសមត្ថកិច្ចពន្ធនាគារសម្រេចបញ្ជូនទៅសង្គ្រោះបន្ទាន់នៅមន្ទីរពេទ្យវេលាម៉ោងប្រហែល ៨យប់៖ «នៅពេលស្នើសុំនោះ ឪពុកខ្ញុំគាត់ថាទ្រាំលែងបានទៀតហើយ ដាច់ខាតត្រូវទៅព្យាបាលនៅមន្ទីរពេទ្យទើបបាន ព្រោះក្នុងពន្ធនាគារគ្មានថ្នាំ និងគ្មានគ្រូពេទ្យព្យាបាលជំងឺនេះបានទេ។ ចំណែកមន្ត្រីពន្ធនាគារចេះតែថាមិនអីៗ មិនខ្វល់រឿងការយកទៅព្យាបាលឡើយ»។
លោកស្រីបន្ថែមថា គ្រូពេទ្យបញ្ជាក់ថាលោក ចៅ វាសនា កើតជំងឺពោះវៀនដុះខ្នែង ហើយគ្រូពេទ្យបានវះកាត់ទាន់ពេល ដោយពុំមានបញ្ហាអ្វីទេ។ លោកស្រីអះអាងថា ស្ថានភាពអ្នកជំងឺបានធូរស្រាលឡើងវិញ បន្ទាប់ពីគ្រូពេទ្យប្រើពេលវះកាត់ប្រមាណ ១ម៉ោង៖ «គាត់វះហើយភ្លាមបានធូរស្រាលគ្រាន់ជាងមុន តែគាត់មិនអាចហូបអីបានទេ។ និយាយរួមទៅ ក្រៅពីក្រុមគ្រួសារកូនចៅទាល់តែយើងមានឯកសារ បានគេឲ្យចូលជួប។ ឥឡូវនៅប្រចាំការមើលថែគាត់ មានតែម្ដាយខ្ញុំម្នាក់ទេ»។
អាស៊ីសេរី ពុំអាចរកប្រភពទាក់ទងប្រធានមន្ទីរពេទ្យបង្អែកមិត្តភាពកម្ពុជា-ជប៉ុន ស្រុកមង្គលបូរី ដើម្បីសុំការពន្យល់បន្ថែមអំពីសភាពជំងឺលោក ចៅ វាសនា បានទេនៅថ្ងៃទី១១ មិថុនា។
ប៉ុន្តែលោកស្រី ចៅ រតនៈ អះអាងថា ឪពុករបស់លោកស្រី គឺគ្រូពេទ្យតម្រូវឲ្យសម្រាកព្យាបាលប្រមាណ ១សប្ដាហ៍ទៀតទើបអនុញ្ញាតឲ្យចេញពីមន្ទីរពេទ្យបាន។
ចំណែកប្រធានក្រុមការងារគណបក្សសង្គ្រោះជាតិ ខេត្តបន្ទាយមានជ័យ លោក សោ ចាន់ដេត ដែលបានទៅមើលលោក ចៅ វាសនា ផ្ទាល់នៅមន្ទីរពេទ្យទាំងយប់ អះអាងថា បើទោះជាស្ថានភាពបេក្ខជនជាប់ឆ្នោតចៅសង្កាត់រូបនេះបានធូរស្រាលឡើងវិញក៏ដោយ ប៉ុន្តែមន្ត្រីពន្ធនាគារហាក់រឹតបន្តឹងទៅលើអ្នកជំងឺខ្លាំង ដូចជាបម្រុងវាយខ្នោះជនសង្ស័យ ហើយអ្នកដទៃក្រៅអំពីសាច់ញាតិក៏មិនអនុញ្ញាតឲ្យទៅសួរសុខទុក្ខបានដោយងាយស្រួលដែរ៖ «ក្រុមគ្រួសារគាត់ថាសុខចិត្តចូលគុកជំនួសប្ដីគាត់ បើសមត្ថកិច្ចខ្លាចប្ដីគាត់រត់ ហើយសមត្ថកិច្ចក៏សម្រេចមិនដាក់ខ្នោះគាត់ទៅ។ នេះជាការមួយសង្វេគមែនទែន មិនគួរណាខ្មែរយើងធ្លាក់ដល់កម្រិតនេះទេ ដោយសារបញ្ហានយោបាយបានធ្វើបាបគ្នាដល់ថ្នាក់នេះ វាអាក្រក់មើលមែនទែនបាទ!»។
អាស៊ីសេរី ពុំអាចទាក់ទងប្រធានពន្ធនាគារខេត្តបន្ទាយមានជ័យ លោក អ៊ុំ ស៊ីផាន ដើម្បីសុំអត្ថាធិប្បាយជុំវិញបញ្ហានេះបានទេ ដោយលោកពុំទទួលទូរស័ព្ទ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា លើកឡើងថា អ្នកជំងឺ គឺស្ថិតជាជនសង្ស័យ ពុំមែនជាអ្នកទោសនោះទេ ព្រោះតុលាការមិនទាន់ជម្រះក្ដីឲ្យបេក្ខជនចៅសង្កាត់រូបនេះថាមានទោស ឬយ៉ាងណានៅឡើយ។ លោកសង្កត់ធ្ងន់ថា អនុរក្សពន្ធនាគាររឹតបន្តឹងសាច់ញាតិចូលទៅមើលអ្នកជំងឺហួសហេតុ គឺជាទង្វើខុសច្បាប់ ហើយសមត្ថកិច្ចក៏មិនត្រូវវាយខ្នោះ ឬដាក់ច្រវាក់ជនសង្ស័យដែរ ពីព្រោះស្ថានភាពអ្នកជំងឺធ្ងន់ធ្ងរ មិនអាចរត់ទៅណារួចនោះទេ៖ «ព្រោះបើសិនជាដាក់ខ្នោះដាក់ច្រវាក់ជើង វាប៉ះពាល់យ៉ាងខ្លាំង។ ទី១ ធ្វើឲ្យប៉ះពាល់អារម្មណ៍គាត់។ អ៊ីចឹងគេអត់ឲ្យមានការដាក់ខ្នោះទេ ហើយមួយទៀត លោក ចៅ វាសនា បើសិនជាយើងមើលឃើញគាត់ឈឺពោះវៀនដុះខ្នែងវះកាត់ហើយ តើគាត់រត់ទៅណាបាន?»។
បេក្ខជនចៅសង្កាត់ប៉ោយប៉ែត ដើមកំណើតខ្មែរក្រោមរូបនេះ ត្រូវបានចៅក្រមស៊ើបសួរនៃសាលាដំបូងខេត្តបន្ទាយមានជ័យ សម្រេចបញ្ជូនទៅឃុំខ្លួននៅពន្ធនាគារខេត្តបន្ទាយមានជ័យ កាលពីថ្ងៃទី១៦ ខែកុម្ភៈ បន្ទាប់ពីសាកសួរអស់ជាង ៤ម៉ោង ដោយចោទប្រកាន់ពីបទញុះញង់ឲ្យប្រើអំពើហិង្សាមានស្ថានទម្ងន់ទោស ដែលប្រព្រឹត្តនៅមុខទីស្នាក់ការគយ និងរដ្ឋាករក្រុងប៉ោយប៉ែត កាលពីខែឧសភា ឆ្នាំ២០១៥។ កាលពីថ្ងៃទី២៥ ខែឧសភា ឆ្នាំ២០១៥ ក្រុមកម្មករអូសរទេះប្រមាណ ១៥០នាក់ ធ្វើបាតុកម្មទាមទារឲ្យមន្ត្រីគយប្រចាំច្រកទ្វារព្រំដែនអន្តរជាតិប៉ោយប៉ែត បញ្ឈប់យកពន្ធខ្ពស់ហួសហេតុលើការដឹកទំនិញចេញចូលតាមរទេះរុញបន្តទៀត។ ការតវ៉ានេះ បង្កឲ្យមានការប៉ះទង្គិចគ្នាដោយហិង្សារវាងក្រុមកម្មករអូសរទេះ និងកម្លាំងសមត្ថកិច្ច បណ្ដាលឲ្យខូចរថយន្តរបស់គយ និងរដ្ឋាករក្រុងប៉ោយប៉ែត ចំនួន ៧គ្រឿង ព្រមទាំងកញ្ចក់ របង ទ្វារ បង្អួចនៃទីស្នាក់ការគយខូចខាតមួយចំនួនទៀត។ ការតវ៉ាបង្កហិង្សាដាក់គ្នានេះ ដោយសារពួកគេឃើញសមត្ថកិច្ចចាប់តំណាងក្រុមអ្នកតវ៉ាម្នាក់វាយធ្វើទារុណកម្ម ហើយពួកគាត់ខឹង ក៏ផ្ទុះហិង្សាដាក់គ្នាតែម្ដង។
លោក សោ ចាន់ដេត អះអាងថា បើទោះជាលោក ចៅ វាសនា ស្ថិតនៅក្នុងពន្ធនាគារក៏ដោយ គឺខាងគណបក្សនៅតែរក្សាតំណែងចៅសង្កាត់ប៉ោយប៉ែត ទុកឲ្យលោកបំពេញការងារដដែល៕