ប្រមុខដឹកនាំគណបក្សសង្គ្រោះជាតិ បានណែនាំអនាគតមេឃុំ-ចៅសង្កាត់ និងសមាជិកក្រុមប្រឹក្សារបស់ខ្លួន ឲ្យសហការជាមួយមន្ត្រីឃុំ-សង្កាត់ដែលមកពីគណបក្សប្រជាជនកម្ពុជា ដើម្បីធ្វើការរួមគ្នាអភិវឌ្ឍមូលដ្ឋាន។ មេដឹកនាំបក្សប្រឆាំងថ្លែងបែបនេះ នៅក្នុង “វេទិកាថ្លែងអំណរគុណម្ចាស់ឆ្នោត” នៅស្រុកស្រីសន្ធរ ខេត្តកំពង់ចាម ព្រឹកថ្ងៃទី១១ ខែមិថុនា ឆ្នាំ២០១៧។
ប្រធានគណបក្សសង្គ្រោះជាតិ លោក កឹម សុខា ថ្លែងទៅកាន់អ្នកគាំទ្រថា លទ្ធផលបោះឆ្នោតឃុំ-សង្កាត់អាណត្តិទី៤ នេះ បង្ហាញពីជោគជ័យថ្មីមួយទៀតរបស់គណបក្សប្រឆាំង ដែលបានកើនឡើងសំឡេងគាំទ្រពីប្រមាណ ៣០ភាគរយកាលពីឆ្នាំ២០១២ ទៅ ៤៥ភាគរយនៅឆ្នាំ២០១៧។
លោកបានផ្ដាំទៅមន្ត្រីឃុំ-សង្កាត់ជាប់ឆ្នោតរបស់គណបក្សសង្គ្រោះជាតិ ថាត្រូវបោះដៃទៅរកមន្ត្រីឃុំ-សង្កាត់នៃគណបក្សកាន់អំណាចមុន ដើម្បីសហការ និងធ្វើការរួមគ្នាឲ្យមានប្រសិទ្ធភាព សម្រាប់ជាប្រយោជន៍ដល់ពលរដ្ឋ ដោយមិនត្រូវប្រកាន់បក្ខពួកឡើយ។ លោក កឹម សុខា ក៏បានផ្ដាំទៅមន្ត្រីឃុំ-សង្កាត់ជាប់ឆ្នោតនៃគណបក្សសង្គ្រោះជាតិ ត្រូវខិតខំអនុវត្តកម្មវិធីនយោបាយដែលគណបក្សបានដាក់ចេញ៖ «»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកថា នេះជាគំនិតល្អ ហើយបើសិនជាអនុវត្តបានមែននោះ វានឹងមិនធ្វើឲ្យមានបញ្ហាអ្វីស្មុគស្មាញក្នុងសង្គមដូចការបោះឆ្នោតអាណត្តិមុនៗនោះទេ។ ទោះបីជាយ៉ាងណា លោកមិនទាន់ជឿជាក់ទាំងស្រុងលើការប្រកាសរបស់មេដឹកនាំបក្សប្រឆាំងនោះទេ ដោយរង់ចាំមើលការអនុវត្តជាមុនសិន៖ «»។
ទន្ទឹមនឹងនេះ លោក សុខ ឥសាន បន្តថា គណបក្សប្រជាជនកម្ពុជា កំពុងកែលំអចំណុចខ្វះខាតរបស់ខ្លួន ព្រមទាំងខិតខំបំពេញតាមតម្រូវការរបស់ពលរដ្ឋ ដើម្បីដណ្ដើមជ័យជម្នះនៅពេលបោះឆ្នោតជាតិខាងមុខ។
ការបោះឆ្នោតឃុំ-សង្កាត់អាណត្តិទី៤ នេះ គណបក្សប្រជាជនកម្ពុជា ប្រកាសថាខ្លួនទទួលបានសំឡេងគាំទ្រជាង ៥១ភាគរយ ហើយគណបក្សសង្គ្រោះជាតិ ប្រកាសថាខ្លួនទទួលបានសំឡេងគាំទ្រ ៤៦ភាគរយ។ ចំណែកឯបន្ទប់ស្ថានការណ៍សម្រាប់ការបោះឆ្នោតវិញ វាយតម្លៃជាបឋមថា គណបក្សប្រជាជនកម្ពុជា ទទួល ៤៨ភាគរយ និងគណបក្សសង្គ្រោះជាតិ ទទួលបាន ៤៥ភាគរយនៃសំឡេងឆ្នោតបានការសរុប។
នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា និកហ្វិច (NICFEC) លោក សំ គន្ធាមី កត់សម្គាល់ថា វប្បធម៌នៃការធ្វើការរួមគ្នា មិនទាន់បានចាក់ឫសជ្រៅនៅកម្ពុជា ឡើយ ពោលគឺមានតែការរើសអើងផ្នែកនយោបាយ។ លោកបន្តថា ពលរដ្ឋបោះឆ្នោតផ្តល់សេចក្តីទុកចិត្តឲ្យគណបក្សណាក៏ដោយ គឺសុទ្ធតែដើម្បីផលប្រយោជន៍រួម ដូច្នេះការធ្វើការរួមគ្នា នឹងអាចជួយឲ្យការអភិវឌ្ឍមូលដ្ឋានមានការរីកចម្រើនទៅមុខឆាប់រហ័ស។
ទន្ទឹមនឹងការផ្តាំផ្ញើឲ្យមន្ត្រីឃុំ-សង្កាត់ជាប់ឆ្នោតឲ្យធ្វើការរួមគ្នា ប្រធានគណបក្សសង្គ្រោះជាតិ លោក កឹម សុខា ក៏បានឆ្លើយតបចំពោះការលើកឡើងរបស់បក្សកាន់អំណាចដែរ ដែលប្រៀបប្រដូចការបោះឆ្នោតឃុំ-សង្កាត់នេះ ថាមានចរិតដូចការបោះឆ្នោតជាតិ ហើយគណបក្សសង្គ្រោះជាតិ មិនអាចផ្ដួលគណបក្សកាន់អំណាចបាននោះ គឺជាការលើកឡើងមួយដែលមិនត្រឹមត្រូវ។ លោកថា ការបោះឆ្នោតឃុំ-សង្កាត់នេះ គណបក្សសង្គ្រោះជាតិ ដាក់ចេញតែគោលនយោបាយថ្នាក់មូលដ្ឋានប៉ុណ្ណោះ មិនទាន់បានបញ្ចេញគោលនយោបាយថ្នាក់ជាតិនៅឡើយទេ។
លោក កឹម សុខា បញ្ជាក់ថា គោលនយោបាយថ្នាក់ជាតិសម្រាប់ការប្រកួតប្រជែងឆ្នាំ២០១៨ រួមមាន ការកំណត់អាណត្តិនាយករដ្ឋមន្ត្រី ការកែទម្រង់ប្រព័ន្ធតុលាការឲ្យយុត្តិធម៌ ការលុបបំបាត់អំពើពុករលួយ ការបង្កើតការងារជួយដល់យុវជន និងការស្វែងរកទីផ្សារកសិផល ជាដើម។ តាមរយៈការដាក់ចេញនូវគោលនយោបាយទាំងនេះ លោក កឹម សុខា រំពឹងថា គណបក្សរបស់លោកនឹងឈ្នះការបោះឆ្នោតជាតិនៅឆ្នាំ២០១៨ ខាងមុខ៕