មន្ត្រីការិយាល័យបោះឆ្នោត និងរាប់សន្លឹកឆ្នោត ឬ គ.ក.ប និង គ.ក.រ នៅឃុំក្រែក ស្រុកពញាក្រែក ខេត្តត្បូងឃ្មុំ អះអាងថា ពួកគាត់ត្រូវគណៈកម្មការឃុំ-សង្កាត់រៀបចំការបោះឆ្នោត ឬ គឃ.សប កាត់ប្រាក់បេសកកម្ម។ ក៏ប៉ុន្តែប្រធាន គឃ.សប បានបដិសេធថា មិនបានកាត់លុយឧបត្ថម្ភនេះទេ ហើយថ្នាក់លើបញ្ជាក់ថាមិនទាន់ដឹងពីករណីនេះដែរ។
ប្រាក់ឧបត្ថម្ភដែលមន្ត្រីទាំងនេះត្រូវទទួលបានបន្ទាប់ពីបញ្ចប់ការបំពេញការងារ គឺប្រធានទទួលបានចំនួន ២២០.០០០រៀល អនុប្រធានចំនួន ២០០.០០០រៀល លេខាធិការចំនួន ១៨០.០០០រៀល និងសមាជិកទី១ ទី២ និងទី៣ ចំនួន ១៦០.០០០រៀល។
មន្ត្រីមួយរូបដែលសុំមិនបញ្ចេញឈ្មោះ ឲ្យអាស៊ីសេរីដឹងថា ក្រុមការងាររបស់លោក ឈឹម ធី ដែលជាប្រធាន គឃ.សប សុំកាត់ប្រាក់បេសកកម្មពីមន្ត្រីបោះឆ្នោត ពីប្រធាន គ.ក.ប និងគ.ក.រ ម្នាក់ចំនួន ១៥.០០០រៀល និងសមាជិកមន្ត្រីផ្សេងទៀតចាប់ពីអនុប្រធាន ដល់សមាជិកទី៣ ម្នាក់ៗចំនួន ១២.០០០រៀលដោយមិនបញ្ជាក់ពីមូលហេតុ។
ក៏ប៉ុន្តែលោក ឈឹម ធី បដិសេធថា ក្រុមការងារលោកមិនមែនជាអ្នកកាត់ប្រាក់បេសកកម្មរបស់មន្ត្រីបោះឆ្នោតទេ ហើយលោកថាគណៈកម្មការរាជធានី-ខេត្តរៀបចំការបោះឆ្នោត ឬ គធ.ខប ជាអ្នកកាត់ប្រាក់ឧបត្ថម្ភនេះ។
ប្រធាន គធ.ខប ខេត្តត្បូងឃ្មុំ លោក សុខ ឈិន អះអាងថា លោកមិនបានដឹងពីការកាត់ប្រាក់ឧបត្ថម្ភឡើយ ហើយលោកចុះស៊ើបអង្កេតអំពីករណីនេះ៖ «អ្នកណាថា? ខ្ញុំចុះទៅឥឡូវហើយ។ ខ្ញុំអីណាអ្នកកាត់! អត់អីទេ។ អរគុណហើយដែលបានប្រាប់ព័ត៌មាន។ ខ្ញុំចុះទៅឥឡូវហើយ»។
លោកបន្តថា លោកបានចាត់ប្រធានលេខាធិការដ្ឋាន លោក ទូច សុខា ដើម្បីពិនិត្យតាមដានរឿងនេះ។
លោក ទូច សុខា មិនលើកទូរស័ព្ទពេលអាស៊ីសេរី ទាក់ទងជាច្រើនលើកច្រើនសា ដើម្បីសុំការពន្យល់អំពីរឿងនេះ។
ទាក់ទងនឹងរឿងនេះដែរ អ្នកទទួលខុសត្រូវខេត្តត្បូងឃ្មុំ នៃនាយកដ្ឋានប្រតិបត្តិការរបស់ គ.ជ.ប លោក ជាង ពង្ស ក៏មិនទាន់ដឹងពីករណីការកាត់ប្រាក់បេសកកម្មរបស់មន្ត្រីបោះឆ្នោតនេះដែរ៖ «ខ្ញុំនឹងចុះស៊ើបអង្កេតរឿងហ្នឹង»។
ប្រធាន គធ.ខប ខេត្តត្បូងឃ្មុំ លោក សុខ ឈិន បញ្ជាក់ថា ប្រសិនបើ គធ.ខប រកឃើញថា មានមន្ត្រីកាត់ប្រាក់ឧបត្ថម្ភរបស់មន្ត្រីបោះឆ្នោតមែននោះ គឺត្រូវបញ្ឈប់លែងឲ្យធ្វើការ និងត្រូវទទួលទោសទណ្ឌតាមការកំណត់របស់ គ.ជ.ប៕