មន្ត្រីក្រសួងការងារបានចេញលិខិតកោះហៅភាគីរោងចក្រសៅឡែនដ៍ (Southland Cambodia Co., Ltd.) ដើម្បីទៅពិភាក្សាដោះស្រាយគ្នាជុំវិញការតវ៉ារបស់កម្មករក្នុងរោងចក្រនេះ នៅថ្ងៃច័ន្ទ ទី១២ ខែមិថុនា ខាងមុខ។ ការសម្រេចចេញលិខិតកោះហៅភាគីថៅកែរោងចក្រនេះ បន្ទាប់ពីតំណាងក្រសួងការងារដែលចុះទៅពិភាក្សាជាមួយថៅកែរោងចក្រ មិនអាចស្វែងរកដំណោះស្រាយបាន។
ក្រោយពីចូលទៅក្នុងរោងចក្រដើម្បីជួបពិភាក្សាដោយផ្ទាល់ជាមួយថៅកែរោងចក្រសៅឡែនដ៍ អស់រយៈពេលមួយសន្ទុះនៅព្រឹកថ្ងៃទី៩ ខែមិថុនា ពុំអាចស្វែងរកដំណោះស្រាយណាមួយជូនកម្មកររាប់រយនាក់ ដែលឈរជើងតវ៉ានៅខាងក្រៅរោងចក្រ អនុការិយាល័យអន្តរាគមន៍ទី៣ នៃក្រសួងការងារ និងបណ្ដុះបណ្ដាលវិជ្ជាជីវៈ លោក ផន ម៉ៃ បានសម្រេចត្រឡប់ទៅក្រសួងវិញភ្លាមៗ ដើម្បីសរសេរលិខិតអញ្ជើញថៅកែរោងចក្រ ទៅពិភាក្សាគ្នាម្ដងទៀតនៅថ្ងៃច័ន្ទ ទី១២ មិថុនា នៅឯទីស្ដីការក្រសួងការងារវិញម្ដង។
មន្ត្រីក្រសួងការងារ រូបនេះបញ្ជាក់ថា មូលហេតុដែលការពិភាក្សារបស់លោកជាមួយថៅកែរោងចក្រមិនត្រូវរ៉ូវគ្នា ដោយសារភាគីរោងចក្រប្រកាន់ជំហរថា មិនបានប្រព្រឹត្តកំហុសអ្វីឡើយ៖ «បើខ្ញុំនៅតែព្យាយាម វានាំតែខាតពេលរបស់បងប្អូនកម្មករ អ៊ីចឹងខ្ញុំមានតែដកឃ្លា ដើម្បីដាក់លិខិតអញ្ជើញឱ្យគាត់ជួបជាមួយឯកឧត្ដមអគ្គ»។
កម្មករសៅឡែនដ៍ រាប់រយនាក់ កាលពីថ្ងៃទី៨ ខែមិថុនា បាននាំគ្នាដាក់ញត្តិស្នើសុំកិច្ចអន្តរាគមន៍ទៅក្រសួងការងារ ដើម្បីធ្វើយ៉ាងណាឱ្យសហជីពចលនាកម្មករចំនួន ១០នាក់ និងកម្មករម្នាក់បានចូលធ្វើការងារវិញ ក្រោយពីភាគីរោងចក្រចោទប្រកាន់ពួកគេថា ញុះញង់កម្មករ និងសម្រេចព្យួរការងារពួកគេ។
រឿងរ៉ាវតវ៉ាចំពោះរោងចក្រសៅឡែនដ៍នេះ បានផ្ទុះឡើងតាំងពីថ្ងៃទី២ ខែមិថុនា គឺមុនថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់ បន្ទាប់ពីភាគីរោងចក្រសម្រេចឱ្យកម្មករឈប់សម្រាកបានមួយថ្ងៃប៉ុណ្ណោះ គឺចំថ្ងៃអាទិត្យ ទី៤ ខែមិថុនា ដើម្បីឱ្យកម្មករនាំគ្នាទៅបោះឆ្នោតនៅឯស្រុកកំណើត។
មកដល់ថ្ងៃទី៦ ខែមិថុនា បន្ទាប់ពីវិលត្រឡប់ពីបោះឆ្នោតនៅឯស្រុកកំណើតវិញ កម្មករក៏នាំគ្នាតវ៉ាម្ដងទៀតនៅខាងមុខរោងចក្រ ដើម្បីស្នើសុំឱ្យភាគីរោងចក្រកាត់ថ្ងៃដែលពួកគេឈប់សម្រាកចំនួនពីរបន្ថែម គឺថ្ងៃទី៣ និងថ្ងៃទី៥ ខែមិថុនា ចូលទៅក្នុងថ្ងៃឈប់សម្រាកប្រចាំឆ្នាំមួយថ្ងៃ និងសល់មួយថ្ងៃទៀត កាត់ប្រាក់ឈ្នួលពួកគេតែ ៥០ភាគរយបានហើយ។
ពាក់ព័ន្ធនឹងការទៅបោះឆ្នោតរបស់កម្មករដែលនាំឱ្យថៅកែរោងចក្រសម្រេចកាត់ប្រាក់ឈ្នួលនេះ ត្រូវបានអនុការិយាល័យអន្តរាគមន៍ទី៣ នៃក្រសួងការងារ លោក ផន ម៉ៃ បានបកស្រាយថា ក្រសួងការងារ បានចេញសេចក្ដីប្រកាសរួចហើយដើម្បីឱ្យរោងចក្រនានា ធ្វើយ៉ាងណាជួយសម្រួលដល់កម្មកររបស់ខ្លួនបានធ្វើដំណើរទៅស្រុកកំណើត ដើម្បីចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់។
ដោយឡែកចំពោះការពន្យារពេលជួបគ្នារវាងភាគីក្រសួងការងារ ជាមួយរោងចក្រនៅពេលនេះ ត្រូវបានលោក ឡាញ់ ភិរម្យ ប្រធានសហជីពចលនាកម្មករប្រចាំរោងចក្រសៅឡែនដ៍ និងដែលជាអ្នកត្រូវរោងចក្រព្យួរការងារផងនោះ បានចាត់ទុកថា ជាលេសរបស់រោងចក្រប៉ុណ្ណោះ ដែលចង់ឱ្យកម្មករនាំគ្នាចូលធ្វើការងារវិញ ហើយបន្ទាប់មករោងចក្រមិនចង់ដោះស្រាយចំពោះការទាមទាររបស់កម្មករនៅពេលនេះ៖ «បើនិយាយទៅ មិនមែនត្រឹមថ្ងៃនេះទេ ដែលក្រុមហ៊ុនយកលេស គឺគាត់យកលេសតាំងពីថ្ងៃសុក្រមកម្ល៉េះ ដើម្បីដោះស្រាយបង្ហាញការពិត»។
ចំណែកក្រុមកម្មករដែលចេញតវ៉ា បាននាំគ្នាលើកឡើងថា ក្នុងចំណោមកម្មករជិត ២ពាន់នាក់ ដែលបម្រើការងារឱ្យរោងចក្រសៅឡែនដ៍ សព្វថ្ងៃ គឺមានកម្មករតែ ៣០ភាគរយប៉ុណ្ណោះ ដែលបានចូលធ្វើការងារធម្មតាវិញក្នុងរោងចក្រ ហើយមិនចេញតវ៉ាដូចកម្មករដទៃទៀត ប៉ុន្តែអ្នកដែលព្រមចូលធ្វើការងារទាំងនោះ ភាគច្រើនត្រូវបានភាគីរោងចក្របង្ខិតបង្ខំប៉ុណ្ណោះ។
ចំណែកកម្មការិនីឈ្មោះ នៅ ដារី ដែលបម្រើការងារឱ្យរោងចក្រសៅឡែនដ៍ អស់រយៈ ៩ឆ្នាំ ហាក់មិនសូវសង្ឃឹមថា រឿងរ៉ាវចម្រូងចម្រាសជាមួយរោងចក្រពេលនេះ អាចដោះស្រាយចេញឡើយ ដោយសារកញ្ញាចោទថា ទាំងភាគីរោងចក្រ និងសហជីពរដ្ឋាភិបាលនៅក្នុងរោងចក្រ គឺជាបក្សពួកតែមួយ ហើយកន្លងមក ពួកគេមិនសូវខ្វល់ខ្វាយចំពោះភាពលំបាករបស់កម្មករឡើយ៖ «រោងចក្រយើងពិបាកដោះស្រាយណាស់ និយាយទៅ រោងចក្រខាងក្នុងថៅកែរោងចក្រ និងសហជីព គឺជាបក្សពួកតែមួយ»។
ទាំងសហជីពចលនាកម្មករ និងកម្មករ ក៏ចង់ឱ្យក្រសួងការងារ នៅពេលជួបពិភាក្សាជាមួយថៅកែរោងចក្រម្ដងទៀត ត្រូវលើកយករឿងមួយចំនួនទៀតដូចការបង្ខិតបង្ខំ និងការជេរប្រមាថកម្មករ នៅពេលដែលក្រុមកម្មករមិនអាចបំពេញការងារគ្រប់ចំនួនតាមការចង់បានរបស់រោងចក្រ ព្រមទាំងលើកយកបញ្ហាអនាម័យនៅក្នុងរោងចក្រផងដែរ៕