គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី៨ មិថុនា បានបញ្ចប់ការបិទប្រកាសលទ្ធផលបណ្ដោះអាសន្ននៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤។ គ.ជ.ប បញ្ជាក់ថា មកដល់ពេលនេះមានបណ្ដឹងចំនួន ៧៨បណ្ដឹង។
លោក ហង្ស ពុទ្ធា អ្នកនាំពាក្យ គ.ជ.ប ឲ្យដឹងថា លទ្ធផលបណ្ដោះអាសន្នត្រូវបានបិទនៅតាមគណៈកម្មការឃុំ-សង្កាត់រៀបចំការបោះឆ្នោត (គធ.ខប) នៅតាមសាលាឃុំ-សង្កាត់ និងនៅតាមការិយាល័យបោះឆ្នោតទាំងជាង ២ម៉ឺន ២ពាន់ការិយាល័យ (២២.១៤៨ការិយាល័យ) ទូទាំងប្រទេសកម្ពុជា។ គ.ជ.ប បញ្ចប់ការងារនេះក្នុងរយៈពេលមួយថ្ងៃ៖ «តាមពិតឃុំ-សង្កាត់មានលទ្ធផលនេះ ហើយគាត់ជាអ្នកបូកលទ្ធផលនេះឯង។ ចឹង គ.ជ.ប ទទួលបាន (លទ្ធផល) ជាបឋម គឺរូបថត (ទម្រង់១១០២)។ គាត់មានលទ្ធផលរួចស្រេចនៅក្នុងដៃ តែគាត់ត្រូវទៅឲ្យគណៈកម្មការខេត្ត (រៀបចំការបោះឆ្នោត) និងគណៈកម្មាធិការជាតិ ដើម្បីផ្ទៀងផ្ទាត់។ ពួកគាត់មានលទ្ធផលមានក្នុងដៃរួចអស់ហើយ»។
បើតាមប្រតិទិននៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ ឆ្នាំ២០១៧ គ.ជ.ប ត្រូវប្រកាសលទ្ធផលបឋមដែលការប្រកាសលទ្ធផលមួយឃុំ-សង្កាត់ម្តងៗនៅថ្ងៃទី៤ ដល់ថ្ងៃទី៥ មិថុនា ហើយត្រូវពិនិត្យ បូកសរុប និងបិទផ្សាយលទ្ធផលបណ្ដោះអាសន្នចាប់ពីថ្ងៃទី៥ ដល់ថ្ងៃទី៧ មិថុនា។
គ.ជ.ប បានបញ្ចប់ការប្រកាសលទ្ធផលបឋមនៅថ្ងៃទី៧ គឺចំនួន ២ថ្ងៃក្រោយការគ្រោងទុក។ លោក ហង្ស ពុទ្ធា ពន្យល់ថា ការពន្យារពេលនេះ ដោយសារការបញ្ជូនលទ្ធផលពីការិយាល័យបោះឆ្នោតមួយចំនួនមានភាពយឺតយ៉ាវ ដោយសារអាកាសធាតុមិនល្អ និងដោយសារអ៊ីនធឺណិតដើរយឺត៖ «ទោះបីជាមានភាពយឺតយ៉ាវ គ.ជ.ប បានធ្វើការម៉ត់ចត់លើរឿងនេះ»។
មកដល់ថ្ងៃទី៨ មិថុនា គ.ជ.ប បានទទួលពាក្យបណ្ដឹងទាក់ទងនឹងភាពមិនប្រក្រតីនៃការបោះឆ្នោតចំនួន ៧៩បណ្ដឹង គឺកើនឡើងចំនួន ៨បណ្ដឹង បើធៀបនឹងតួលេខកាលពីថ្ងៃទី៧ មិថុនា។
លោក ហង្ស ពុទ្ធា បញ្ជាក់ថា ពាក្យបណ្ដឹងថ្មីទាំងនេះ គឺប្ដឹងឲ្យរាប់សន្លឹកឆ្នោតឡើងវិញនៅការិយាល័យមួយចំនួន និងប្ដឹងឲ្យដាក់ទោសទណ្ឌមន្ត្រីបោះឆ្នោតដែលបំពានច្បាប់៖ «ប្រសិនបើមានពាក្យបណ្ដឹង (គ.ជ.ប) ត្រូវតែធ្វើលើកិច្ចការទាំងហ្នឹង»។
គ.ជ.ប ផ្តល់សិទ្ធិដល់អ្នកពាក់ព័ន្ធឲ្យប្ដឹងជំទាស់នឹងលទ្ធផលបណ្ដោះអាសន្នទៅគណៈកម្មការឃុំ-សង្កាត់រៀបចំការបោះឆ្នោត (គធ.ខប) ចំនួន ៣ថ្ងៃ ហើយថ្ងៃទី១០ មិថុនា ជាកាលកំណត់ចុងក្រោយ ហើយ គ.ជ.ប មានរយៈពេល ៥ថ្ងៃ ត្រឹមថ្ងៃទី១៥ មិថុនា ដើម្បីសម្រេចលើការប្ដឹងជំទាស់ដោយ គធ.ខប។
លទ្ធផលបោះឆ្នោតផ្លូវការ នឹងត្រូវ គ.ជ.ប ប្រកាសនៅថ្ងៃទី២៥ មិថុនា បន្ទាប់ពីដោះស្រាយពាក្យបណ្ដឹងចប់សព្វគ្រប់។
សន្លឹកឆ្នោតមានចំនួនប្រមាណ ១លានសន្លឹក នៅសល់មិនទាន់បានបោះ បន្ទាប់ពីការបោះឆ្នោតកាលពីថ្ងៃអាទិត្យ ទី៤ មិថុនា។
លោក ហង្ស ពុទ្ធា ថ្លែងថា សន្លឹកឆ្នោតនៅសល់ទាំងនោះត្រូវបានមន្ត្រីរៀបចំការបោះឆ្នោតកាត់ចោលមុនពេលចាប់ផ្ដើមរាប់សន្លឹកឆ្នោត ដើម្បីធានាថា គេមិនអាចយកពួកវាទៅបោះឆ្នោតឡើងវិញបាន៖ «កិច្ចការងារនេះ ត្រូវធ្វើឡើងនៅចំពោះមុខអ្នកសង្កេតការណ៍ និងតំណាងគណបក្សនយោបាយដែលមាននៅគ្រប់ការិយាល័យបោះឆ្នោតតែម្តង មិនមែនជារឿងអាថ៌កំបាំងទេ»។
លោកបន្ថែមថា គ.ជ.ប នឹងរក្សាសន្លឹកឆ្នោតដែលខូចទាំងនោះរយៈពេល ១០ឆ្នាំ នៅការិយាល័យ គ.ជ.ប ដើម្បីរក្សាទុកជាភស្តុតាងផ្ទៀងផ្ទាត់ករណីមានបណ្ដឹងពីរឿងសន្លឹកឆ្នោតនេះកើតឡើង៕