Clik here to view.
មន្ត្រីគណបក្សសង្គ្រោះជាតិ ឃុំជាំក្រវៀន ស្រុកមេមត់ ខេត្តត្បូងឃ្មុំ បញ្ជាក់ថា លទ្ធផលបោះឆ្នោតបឋមដែលគណបក្សកាន់អំណាចឈ្នះនៅឃុំមួយនេះ គឺមិនបានឆ្លុះបញ្ចាំងពីការពិតទាំងស្រុងនោះទេ។ ការលើកឡើងនេះ ដោយសារតែមានពលរដ្ឋយ៉ាងច្រើនមិនបានចូលរួមបោះឆ្នោត ហើយមានពលរដ្ឋជាច្រើនទៀតមិនបានចុះឈ្មោះបោះឆ្នោត ជាដើម។
មន្ត្រីគណបក្សសង្គ្រោះជាតិ នៅឃុំជាំក្រវៀន អះអាងថា មានកត្តាមួយចំនួនបណ្ដាលឲ្យពលរដ្ឋជាច្រើនមិនបានបោះឆ្នោត ដូចជាពួកគាត់មិនមានឯកសារគ្រប់គ្រាន់ ហើយការផ្សព្វផ្សាយពីនីតិវិធីផ្សេងៗរបស់គណៈកម្មាធិការជាតិរៀបចំការបោះឆ្នោត (គ.ជ.ប) មិនបានទូលំទូលាយ និងកៀកថ្ងៃបោះឆ្នោតពេក។
បន្ថែមពីនេះ ពលរដ្ឋចំណាកស្រុកទៅក្រៅប្រទេស និងបន្លាស់ទីក្នុងប្រទេស ហើយថៅកែរោងចក្រ ឬសហគ្រាស មិនអនុញ្ញាតឲ្យកម្មករកម្មការិនីមានពេលឈប់សម្រាកគ្រប់គ្រាន់ ជាដើម។
បេក្ខជនលេខរៀងទី១ គណបក្សសង្គ្រោះជាតិ ឃុំជាំក្រវៀន លោក អ៊ិន សុខុន មានប្រសាសន៍ថា ឃុំរបស់លោកមានពលរដ្ឋជិត ៥០០នាក់ដែលមិនបានចូលរួមបោះឆ្នោត ដោយសារបញ្ហាប្រឈមទាំងនេះ។ លោកបញ្ជាក់ថា ក្នុងដំណើរការចុះឈ្មោះបោះឆ្នោតកាលពីចុងឆ្នាំ២០១៦ គឺពលរដ្ឋគ្រប់អាយុចុះឈ្មោះប្រមាណ ២ពាន់នាក់ មិនបានចុះឈ្មោះទេ ហើយសំឡេងបោះឆ្នោតកាលពីថ្ងៃទី៤ មិថុនា លោកយល់ថាមិនបានឆ្លុះបញ្ចាំងពីឆន្ទៈពលរដ្ឋភាគច្រើននោះឡើយ៖ «អ៊ីចឹងបានខ្ញុំមានការសំណូមពរទៅ គ.ជ.ប ដើម្បីរៀបចំការបោះឆ្នោតបន្តបន្ទាប់ ធ្វើយ៉ាងណាជួយសម្រួលនីតិវិធីហ្នឹងឲ្យបានស្រួលដល់ពលរដ្ឋ»។
ពលរដ្ឋនៅឃុំជាំក្រវៀន ដែលមានឈ្មោះក្នុងបញ្ជីបោះឆ្នោតមានចំនួនជាង ៦ពាន់នាក់ ហើយពលរដ្ឋបានទៅបោះឆ្នោតកាលពីថ្ងៃទី៤ មិថុនា មានចំនួនជាង ៥ពាន់នាក់។ ឃុំជាំក្រវៀន មានគណបក្សនយោបាយចំនួន៤ ប្រកួតប្រជែងការបោះឆ្នោតក្រុមប្រឹក្សាឃុំ-សង្កាត់អាណត្តិទី៤ ហើយគណបក្សប្រជាជនកម្ពុជា ទទួលបានសំឡេងឆ្នោតបឋមច្រើនជាងគេ បន្ទាប់មកគឺគណបក្សសង្គ្រោះជាតិ។
ទាក់ទងបញ្ហានេះ បេក្ខជនលេខរៀងទី១ គណបក្សប្រជាជនកម្ពុជា និងជាអនាគតមេឃុំជាំក្រវៀន អាណត្តិទី៤ លោក អ៊ួច យឿន មិនបានបកស្រាយបែបណាទេ ដោយលោកថាកំពុងនៅព្រំដែនកម្ពុជា-វៀតណាម។
ទោះជាយ៉ាងនេះក្តី លោក អ៊ិន សុខុន ចង់ឲ្យពេលចុះឈ្មោះ និងបោះឆ្នោតខាងមុខ គណៈកម្មាធិការជាតិរៀបចំការបោះឆ្នោត គប្បីកែទម្រង់នីតិវិធីមួយចំនួន ហើយដាក់កំហិតដល់ថៅកែរោងចក្រ ឬសហគ្រាស ឲ្យកម្មករមានពេលសម្រាកគ្រប់គ្រាន់មកចូលរួមការបោះឆ្នោត។ ជាងនេះទៀត ការជ្រើសរើសមន្ត្រីគណៈកម្មការរៀបចំការបោះឆ្នោត តាំងពីថ្នាក់ជាតិដល់ថ្នាក់ឃុំ ត្រូវមានភាគីគណបក្សប្រឆាំងចូលរួម ជៀសវាងជ្រើសរើសតែមន្ត្រី ឬសកម្មជនគណបក្សកាន់អំណាចដែលធ្វើដំណើរការបោះឆ្នោតមានភាពលម្អៀង។
ប្រធានគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (Comfrel) ប្រចាំខេត្តត្បូងឃ្មុំ លោក នាង សុវ៉ាត មើលឃើញថា មូលហេតុបណ្ដាលឲ្យពលរដ្ឋនៅតំបន់នេះមិនបានចូលរួមបោះឆ្នោតច្រើន ដោយសារកត្តាជីវភាពក្រីក្រ ហើយពួកគេត្រូវចំណាកស្រុកទៅតំបន់ឆ្ងាយៗ និងកត្តាចំណេះដឹងរបស់ពួកគេនៅមានកម្រិត ព្រមទាំងការភ័យខ្លាចដោយសារមានការគំរាមកំហែងមុនពេលបោះឆ្នោត ថាចាញ់ឆ្នោតនឹងមានសង្គ្រាម ជាដើម៖ «វាមិនមែនជាតំណាងពលរដ្ឋទាំងអស់ ព្រោះឃុំគាត់កើតឡើងដោយតំណាងពលរដ្ឋភាគច្រើន»។
ដ្បិតតែដំណើរការរៀបចំការបោះឆ្នោតនៅអាណត្តិនេះ ល្អជាងអាណត្តិមុនៗក៏ដោយ ប៉ុន្តែលោកថា មានចំណុចមួយចំនួនចង់ឲ្យគណៈកម្មាធិការជាតិរៀបចំការបោះឆ្នោត ត្រូវកែប្រែ ទាំងនីតិវិធី និងការផ្សព្វផ្សាយ គឺធ្វើឡើងឲ្យបានទូលំទូលាយ ហើយត្រូវបញ្ឈប់ការគំរាមកំហែងនានាបន្តទៀត៕
