ក្រសួងការងារ និងបណ្ដុះបណ្ដាលវិជ្ជាជីវៈ នឹងចាត់មន្ត្រីជំនាញរបស់ខ្លួន ចុះទៅដោះស្រាយការតវ៉ារបស់ក្រុមកម្មកររោងចក្រកាត់ដេរ សៅ ឡែនដ៍ (Southland Cambodia Co., LTD) នៅថ្ងៃទី៩ ខែមិថុនា។ ការចាត់តាំងមន្ត្រីជំនាញចុះដោះស្រាយនេះ បន្ទាប់ពីក្រុមកម្មកររាប់រយនាក់ លើកគ្នាទៅតវ៉ានៅខាងមុខក្រសួងការងារ នៅថ្ងៃទី៨ ខែមិថុនា។
ការលើកគ្នាទៅតវ៉ារបស់កម្មកររាប់រយនាក់មកពីរោងចក្រ សៅ ឡែនដ៍ ស្ថិតនៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ នៅព្រឹកថ្ងៃទី៨ ខែមិថុនា នេះ គឺដើម្បីដាក់ញត្តិស្នើឱ្យរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង ចេញអន្តរាគមន៍ជួយពួកគេ ក្រោយពីថៅកែរោងចក្រកាត់ដេរ ព្យួរការងារសហជីពចលនាកម្មករចំនួន ១០នាក់ និងកម្មករម្នាក់។
កម្មការិនីឈ្មោះ កែវ ផល្លា បានថ្លែងនៅខាងមុខក្រសួងការងារថា ក្រៅពីចង់ឱ្យរដ្ឋមន្ត្រីក្រសួងការងារ ចេញអន្តរាគមន៍ឱ្យសហជីពចលនាកម្មករទាំង ១០នាក់ និងកម្មករម្នាក់ ចូលបម្រើការងារក្នុងរោងចក្រធម្មតាវិញ ក្រុមកម្មករក៏ចង់ឱ្យថៅកែរោងចក្រ មិនត្រូវកាត់ប្រាក់ឈ្នួលប្រចាំថ្ងៃរបស់ពួកគេចំនួន ២ថ្ងៃ ដែលក្រុមកម្មករនាំគ្នាឈប់សម្រាកទៅបោះឆ្នោត នៅថ្ងៃទី៣ និងថ្ងៃទី៥ ខែមិថុនា ដែរ។ កម្មការិនីដដែលនេះបន្តថា ក្នុងរយៈពេលដែលកម្មករនាំគ្នាទៅស្រុកកំណើតដើម្បីបោះឆ្នោត គឺស្នើឱ្យភាគីរោងចក្រ កាត់ចូលថ្ងៃឈប់សម្រាកប្រចាំឆ្នាំមួយថ្ងៃ និងមួយថ្ងៃទៀតសុំឱ្យភាគីរោងចក្រកាត់ប្រាក់ឈ្នួលប្រចាំថ្ងៃតែ ៥០ភាគរយបានហើយ៖ «ដូចថាក្នុងមួយថ្ងៃយើងធ្វើការបាន ៥ដុល្លារ អ៊ីចឹងយើងចង់ឲ្យភាគីរោងចក្រកាត់តែ ៥០ភាគរយបានហើយ»។
កម្មការិនី កែវ ផល្លា បន្ថែមទៀតថា កញ្ញាមានជំនឿតែលើក្រសួងការងារប៉ុណ្ណោះ ដែលអាចជួយកម្មករដែលជាខ្មែរគ្នាឯងបាន។
ការលើកគ្នាទៅតវ៉ាខាងមុខក្រសួងការងារនេះ ក្រោយពីកម្មករពុំអាចស្វែងរកដំណោះស្រាយពីភាគីរោងចក្រ បន្ទាប់ពីពួកគេនាំគ្នាតវ៉ាខាងមុខរោងចក្រ ស្ថិតនៅម្ដុំផ្លូវវ៉េងស្រេង កាលពីថ្ងៃទី៧ ខែមិថុនា។ នៅក្នុងញត្តិដែលដាក់ទៅក្រសួងការងារ សម្ព័ន្ធសហជីពចលនាកម្មករ បានចាត់ទុកការព្យួរការងាររបស់សហជីពកម្មករ និងកម្មករ សរុបមានគ្នាទាំង ១១នាក់ គឺជាការរើសអើង និងមានបំណងរំលាយសហជីពឯករាជ្យ ហើយទង្វើរបស់រោងចក្របែបនេះ គឺធ្វើរំលោភបំពានច្បាប់ស្ដីពីការងារ និងអនុសញ្ញារបស់អង្គការអន្តរជាតិខាងការងារទាំងស្រុង។
ដើមហេតុនាំឱ្យការផ្ទុះតវ៉ារបស់កម្មកររោងចក្រសៅ ឡែនដ៍ នេះ បានកើតឡើងតាំងពីថ្ងៃទី២ ខែមិថុនា បន្ទាប់ពីភាគីរោងចក្រមិនព្រមអនុញ្ញាតឱ្យពួកគេដែលជាកម្មករ បានឈប់សម្រាកមុនមួយថ្ងៃ និងក្រោយមួយថ្ងៃនៃថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃទី៤ មិថុនា និងថែមទាំងគំរាមកាត់ប្រាក់ខែរបស់កម្មករ ប្រសិនបើពួកគេមិនអាចវិលត្រឡប់ពីបោះឆ្នោតនៅឯស្រុកកំណើត និងចូលបំពេញការងារវិញទាន់ពេលវេលា។
ទោះជាយ៉ាងណា បន្ទាប់ពីក្រុមកម្មករបានវិលត្រឡប់មកពីបោះឆ្នោតនៅស្រុក ក៏បាននាំគ្នាតវ៉ាបន្តទៀតនៅថ្ងៃទី៦ មិថុនា ដើម្បីទាមទារឱ្យភាគីរោងចក្រ មិនត្រូវកាត់ប្រាក់ឈ្នួលរបស់ពួកគេនៅថ្ងៃឈប់សម្រាកដើម្បីទៅបោះឆ្នោត។ ក្រោយមកភាគីរោងចក្រ និងសហជីពខ្មែរក៏បានសម្រេចកិច្ចព្រមព្រៀងមួយដើម្បីឱ្យកម្មករចូលធ្វើការងារវិញធម្មតានៅថ្ងៃទី៨ ៧ ខែមិថុនា ប៉ុន្តែមកដល់ថ្ងៃទី៧ ខែមិថុនា ស្រាប់តែភាគីរោងចក្រ បានព្យួរការងាររបស់សហជីពចំនួន ១០នាក់ និងកម្មករម្នាក់ដោយចោទប្រកាន់ពួកគេថា ញុះញង់កម្មករ។
ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា ដែលតំណាងឱ្យកម្មករយកញត្តិទៅដាក់នៅក្រសួងការងារ ក៏បានបញ្ជាក់ថា សហជីពដែលត្រូវរោងចក្រព្យួរការងារ គឺពួកគេមិនបានប្រព្រឹត្តកំហុសអ្វីឡើយ ផ្ទុយទៅវិញ លោកចាត់ទុកទង្វើរបស់រោងចក្របែបនេះថា គ្រាន់តែជាចេតនាអាក្រក់ដើម្បីព្យាយាមមិនឱ្យមានសហជីពឯករាជ្យពិតប្រាកដតំណាងឱ្យកម្មករក្នុងរោងចក្រប៉ុណ្ណោះ។
លោក ប៉ាវ ស៊ីណា បន្ថែមថា ប្រសិនបើក្រសួងការងារ មិនអាចចុះដោះស្រាយបញ្ហាជូនកម្មករទាន់ពេលទេ ការតវ៉ារបស់កម្មករនៅពេលនេះ អាចមានកម្ដៅកាន់តែខ្លាំង និងរីកកាន់តែធំជាងមុខ ព្រោះលោកថា កាលពីថ្ងៃទី៥ មិថុនា ខាងភាគីរោងចក្រ បានដាក់ពាក្យបណ្ដឹងទៅតុលាការពីបទញុះញង់ បន្ទាប់មក តុលាការបានចេញសេចក្ដីសម្រេចយ៉ាងឆាប់រហ័សបំផុត នៅថ្ងៃទី៧ មិថុនា ដោយបង្គាប់ឱ្យកម្មករទាំងអស់ ត្រូវចូលបំពេញការងារតាមតួនាទីរៀងៗខ្លួនវិញ នៅក្នុងរយៈពេល ៤៨ម៉ោង បើមិនដូច្នោះទេ មានន័យថា កម្មករនឹងត្រូវថៅកែរោងចក្រប្ដឹងមួយករណីទៀត ពីបទបោះបង់ការងាររបស់ខ្លួនចោល៖ «ដូច្នោះយើងចាំបាច់ឲ្យមន្ត្រីជំនាញចុះដោះស្រាយឲ្យបានឆាប់តែដែលអាចធ្វើបាន»។
ក្រោយការតវ៉ាមួយសន្ទុះធំ មន្ត្រីគណៈកម្មការដោះស្រាយកូដកម្ម និងបាតុកម្មគ្រប់មុខសញ្ញានៃក្រសួងការងារ លោក អ៊ូ រតនា បានចេញមកទទួលញត្តិពីកម្មករ និងបានបញ្ជាក់ថា ក្រសួងនឹងចាត់មន្ត្រីជំនាញរបស់ខ្លួនចុះទៅដោះស្រាយដោយផ្ទាល់ដាល់រោងចក្រ នៅថ្ងៃទី៩ មិថុនា វេលាម៉ោង ៩ព្រឹក។
ទោះជាយ៉ាងណា ទាំងសហជីព និងកម្មករព្រមានថា ប្រសិនបើក្រសួងការងារ មិនអាចដោះស្រាយបញ្ហានេះទេ ពួកគេនឹងអាចតវ៉ាសុំកិច្ចអន្តរាគមន៍ពីក្រុមហ៊ុនមួយចំនួនដែលស្ថិតនៅប្រទេសបារាំង និងសហរដ្ឋអាមេរិក ដែលជាក្រុមហ៊ុនបញ្ជាទិញរបស់រោងចក្រសៅ ឡែនដ៍ ហើយអាចតវ៉ាទៅដល់លោកនាយករដ្ឋមន្ត្រី ហ៊ុន សែន៕