Clik here to view.
អ្នកវិភាគ លោក គឹម សុខ បានបញ្ចប់កូដកម្មបង្អត់អាហារក្នុងពន្ធនាគារហើយ គិតត្រឹមថ្ងៃទី៤ ខែមិថុនា ចំថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់។ អ្នកឃ្លាំមើលពីបញ្ហាសង្គម និងនយោបាយដែលត្រូវតុលាការឃុំខ្លួននៅពន្ធនាគារព្រៃសរូបនេះ នៅតែប្រកាន់ជំហរដើម្បីបុព្វហេតុជាតិ ហើយអំពាវនាវឲ្យពលរដ្ឋប្រឹងប្រែងតាមឆន្ទៈរបស់ខ្លួនបន្តទៀត ដើម្បីត្រៀមខ្លួននៅថ្ងៃបោះឆ្នោតជ្រើសតាំងតំណាងរាស្ត្រនៅឆ្នាំ២០១៨ ខាងមុខ។
សាច់ញាតិរបស់លោក គឹម សុខ អះអាងថា ស្ថានភាពសុខភាពរបស់អ្នករិះគន់រដ្ឋាភិបាលមិនសំចៃមាត់រូបនេះ គឺមានសភាពទ្រុឌទ្រោមបន្តិច ក្រោយពីបញ្ចប់កូដកម្មបង្អត់អាហារនៅក្នុងពន្ធនាគារក្នុងអំឡុងពេលបោះឆ្នោតកាលពីថ្ងៃទី៤ ខែមិថុនា។
ថ្លែងប្រាប់អាស៊ីសេរីនៅថ្ងៃទី៦ ខែមិថុនា លោក គឹម សេង ដែលត្រូវជាប្អូនប្រុសបង្កើតរបស់លោក គឹម សុខ បញ្ជាក់ថា សុខភាពបងប្រុសរបស់លោករាងធ្លាក់ចុះបន្តិច នៅពេលបញ្ចប់ការបង្អត់អាហារ។ ប៉ុន្តែបើទោះជាសុខភាពរបស់លោក គឹម សុខ នៅពេលនេះមានសភាពទ្រុឌទ្រោមបន្តិចក៏ដោយចុះ ក៏លោក គឹម សេង ឲ្យដឹងថា អ្នកឃ្លាំមើលពីបញ្ហាសង្គម និងនយោបាយរូបនេះ នៅតែរក្សាជំហរ និងឆន្ទៈនយោបាយដូចមុនការចោទប្រកាន់ដោយមិនប្រែប្រួលឡើយ។ លោកបន្តថា «គាត់បានហូបអាហារវិញហើយ ប៉ុន្តែគាត់ប្រាប់ថាវាហូបអត់បានដូចដើម ដោយសារបញ្ហាក្រពះ ដោយសារគាត់អត់អាហារចំនួន ៧ថ្ងៃមកហើយ។ ចំពោះគោលជំហរការងារគាត់វិញ គាត់មិនប្ដូរទេ»។
កាលពីថ្ងៃទី២៨ ខែឧសភា លិខិតមួយច្បាប់ដែលសរសេរដោយដៃផ្ទាល់ចេញពីពន្ធនាគារ ហើយមានផ្ដិតមេដៃដោយលោក គឹម សុខ និងត្រូវបានគេផ្សព្វផ្សាយជាសាធារណៈ បានសរសេរថា ដើម្បីឲ្យមានយុត្តិធម៌សង្គម លោកសម្រេចចិត្តធ្វើកូដកម្មបង្អត់អាហារចំនួន ៧ថ្ងៃ។ កូដកម្មដែលអ្នកឃ្លាំមើលពីបញ្ហាសង្គម និងនយោបាយរូបនេះរៀបចំឡើង បំណងសំខាន់បំផុត គឺអំពាវនាវឲ្យពលរដ្ឋត្រូវប្រើប្រាស់សិទ្ធិរបស់ខ្លួនចូលរួមបោះឆ្នោតជ្រើសរើសមេឃុំ-ចៅសង្កាត់ និងក្រុមប្រឹក្សាឃុំ-សង្កាត់ ដើម្បីផ្លាស់ប្ដូរមេដឹកនាំនៅថ្នាក់មូលដ្ឋាន។
កូដកម្មបង្អត់អាហារដែលលោក គឹម សុខ ធ្វើឡើងនេះ គឺចាប់អនុវត្តពីថ្ងៃទី២៩ ខែឧសភា និងបញ្ចប់ទៅវិញនៅចំថ្ងៃបោះឆ្នោត គឺថ្ងៃទី៤ ខែមិថុនា។
បើទោះជាបែបណា លោក គឹម សេង ឲ្យដឹងថា រហូតមកដល់ពេលនេះ គេនៅមិនដឹងពីរបៀបនៃការធ្វើកូដកម្មបង្អត់អាហាររបស់លោក គឹម សុខ នេះតាមមធ្យោបាយណានៅឡើយដែរ ប៉ុន្តែគ្រាន់តែដឹងថា ក្រោយបញ្ចប់កូដកម្មនេះ ស្ថានភាពសុខភាពរបស់លោក គឹម សុខ គឺមានសភាពទ្រុឌទ្រោមជាងមុន។
ដោយឡែកលោក ជូង ជូងី ដែលជាមេធាវីការពារក្ដីឲ្យអ្នកឃ្លាំមើលពីបញ្ហាសង្គម និងនយោបាយរូបនេះ ក៏បានបដិសេធដែរថា លោកពុំបានដឹងពីវិធីនៃការធ្វើកូដកម្មបង្អត់អាហាររបស់លោក គឹម សុខ នេះដែរ។ លោកបន្តថា «ខ្ញុំអត់បានទៅជួបគាត់ទៀតទេតាំងពីគាត់ប្រកាសបង្អត់អាហារហ្នឹងមក។ ខ្ញុំគ្រាន់ដឹងថាគាត់ធ្វើ ៧ថ្ងៃ»។
លោក គឹម សុខ ត្រូវបានតំណាងអយ្យការនៃតុលាការក្រុងភ្នំពេញ លោក សៀង សុខ ចោទប្រកាន់តបតាមបណ្ដឹងមេធាវីតំណាងដោយអាណត្តិរបស់លោក ហ៊ុន សែន គឺលោក គី តិច រួចលោក រស់ ពិសិដ្ឋ ជាចៅក្រមស៊ើបសួរចេញដីកាឃុំខ្លួននៅពន្ធនាគារព្រៃស កាលពីថ្ងៃទី១៧ កុម្ភៈ។ មកដល់ពេលនេះ ចៅក្រមស៊ើបសួរនៃតុលាការក្រុងភ្នំពេញ បានបញ្ចប់ការស៊ើបអង្កេតលើសំណុំរឿងនេះហើយកាលពីអំឡុងខែមេសា ដើម្បីរង់ចាំថ្ងៃសវនាការលើអង្គសេចក្ដី។
តុលាការក្រុងភ្នំពេញ សម្រេចចេញដីកាចោទប្រកាន់ និងចាប់ខ្លួន ក្រោយពីទទួលការព្រមានពីលោក ហ៊ុន សែន។ ប្រធានគណបក្សប្រជាជនកម្ពុជា លោក ហ៊ុន សែន ចោទប្រកាន់ថា លោក គឹម សុខ និយាយខុសពីការពិតកាលពីថ្ងៃទី១៣ ខែកុម្ភៈ ដែលហ៊ានចោទប្រកាន់ថា រដ្ឋាភិបាលបានរៀបចំជាប្រព័ន្ធក្នុងការសម្លាប់មនុស្ស ក្នុងនោះមានលោកបណ្ឌិត កែម ឡី ផង។
ទាក់ទិនការធ្វើកូដកម្មបង្អត់អាហារនៅពន្ធនាគារព្រៃសនេះ អាស៊ីសេរី ពុំអាចសុំការបំភ្លឺបានពីអ្នកនាំពាក្យអគ្គនាយកដ្ឋានពន្ធនាគារ នៃក្រសួងមហាផ្ទៃ គឺលោក នុត សវនា បានទេនៅថ្ងៃទី៦ ខែមិថុនា។
កាលពីថ្ងៃទី១៦ ខែមីនា លោក គឹម សុខ ត្រូវបរាជ័យតាមរយៈការស្នើសុំនៅក្រៅឃុំម្ដងរួចមកហើយនៅក្នុងដំណាក់កាលនៃការជំនុំជម្រះនៅសភាស៊ើបសួរសាលាឧទ្ធរណ៍។ យ៉ាងណា នៅថ្ងៃទី៩ និងថ្ងៃទី២១ ព្រមទាំងថ្ងៃទី២៨ ខែមិថុនា ខាងមុខនេះ តុលាការកំពូល នឹងបើកសវនាការលើបណ្ដឹងសារទុក្ខរបស់មេធាវីលោក គឹម សុខ ដែលប្ដឹងប្រឆាំងទៅនឹងនីតិវិធីរបស់តុលាការក្រុងភ្នំពេញ៕