គណបក្សនយោបាយតូចៗដែលចូលរួមប្រកួតប្រជែងក្នុងការបោះឆ្នោត ជ្រើសរើសក្រុមប្រឹក្សាឃុំ-សង្កាត់ ពេញចិត្តនឹងលទ្ធផលដែលខ្លួនទទួលបាន បើទោះជាពួកគេបានគ្រប់គ្រងឃុំ-សង្កាត់ណាមួយក្ដី។
ប្រធាន និងតំណាងគណបក្សនយោបាយចំនួន៧ ដែលចូលរួមប្រកួតប្រជែងក្នុងការបោះឆ្នោតក្នុងចំណោមគណបក្សទាំង ១២ អះអាងថា នឹងបន្តចូលរួមប្រកួតប្រជែងនៅឆ្នាំ២០១៨ នឹងអាណត្តិខាងមុខទៀត ទោះលទ្ធផលបឋមបង្ហាញថា គណបក្សទាំងនោះមិនទាន់គ្រប់គ្រងឃុំណាមួយក្តី។ ពួកគេសរសើរថា ការបោះឆ្នោតអាណត្តិនេះមានភាពល្អប្រសើរច្រើនជាងអាណត្តិមុន។
ប្រធានគណបក្សសញ្ជាតកម្ពុជា លោក លោក សេង សុខេង និយាយថា លទ្ធផលបោះឆ្នោតដែល គ.ជ.ប កំពុងផ្សាយគឺអាចលោកទទួលយកបាន។ លោកមិនទាន់ហ៊ានអះអាងពីលទ្ធផលរបស់គណបក្សរបស់ខ្លួនទទួលបានទេ ព្រោះថា គណបក្សគ្មានអ្នកសង្កេតការណ៍គ្រប់គ្រាន់នោះទេ។
រីឯប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ ឲ្យដឹងដែរថា លោកទុកលទ្ធភាពឲ្យ គ.ជ.ប ជាអ្នកប្រកាសលទ្ធផល។ លោកមិនធ្វើអត្ថាធិប្បាយពីសំឡេងបក្សរបស់ខ្លួន មុនស្ថាប័ននេះផ្សាយទេ។ ទោះជាការប្រកាសលទ្ធផលបឋមរបស់គណបក្សមិនទាន់បង្ហាញថា គណបក្សនេះអាចគ្រប់គ្រងឃុំណាមួយក្ដី ប៉ុន្តែលោក ម៉ម សូណង់ដូ ថា លោកនៅតែបន្តខំប្រឹងប្រមូលអ្នកប្រជាធិបតេយ្យបន្ថែម ដើម្បីប្រកួតប្រជែងជាមួយគណបក្សកាន់អំណាច ព្រោះលោកយល់ថា បក្សប្រឆាំងសព្វថ្ងៃមិនអាចផ្ដួលបក្សកាន់អំណាចបានទេ។
ដោយឡែកប្រធានគណបក្សយុវជនកម្ពុជា លោក ពេជ្រ ស្រស់ អះអាងថា គណបក្សរបស់លោកទទួលបានសំឡេងច្រើនក្នុងចំណោមគណបក្សគ្មានសំឡេងនៅរដ្ឋសភា ដែលជាអ្នកនយោបាយជើងចាស់។ លោកសង្កេតឃើញថា ការបោះឆ្នោតលើកនេះ ពលរដ្ឋម្ចាស់ឆ្នោត និងអ្នកនយោបាយមានភាពចាស់ទុំ ហើយ គ.ជ.ប ក៏បំពេញការងាររបស់ខ្លួនបានល្អដែរ។
អាស៊ីសេរី មិនអាចទាក់ទងប្រធាន ឬអ្នកនាំពាក្យគណបក្សហ៊្វុនស៊ិនប៉ិច គណបក្សខ្មែររួបរួមជាតិ និងគណបក្សសាធារណរដ្ឋប្រជាធិបតេយ្យ នៅថ្ងៃទី៥ ខែមិថុនា ដើម្បីសុំការបំភ្លឺពីករណីនេះបានទេ នៅថ្ងៃទី៥ ខែមិថុនា។
ប្រធានគណបក្សអំណាចខ្មែរ លោក សួន សេរីរដ្ឋា យល់ថា ការបោះឆ្នោតលើកនេះ ជាមេរៀនដ៏សំខាន់ ជាទុនដើម្បីឲ្យលោកបន្តដំណើរទៅមុខទៀត។ លោកថា ក្នុងថ្ងៃបោះឆ្នោតមានដំណើរការល្អ ប៉ុន្តែមុនថ្ងៃបោះឆ្នោតមួយថ្ងៃដែលជាថ្ងៃហាមឃោសនាបក្ស និងផឹកគ្រឿងស្រវឹង បែរជាមន្ត្រីគណបក្សប្រជាជនកម្ពុជា ផឹកគ្រឿងស្រវឹង និងចាក់ចម្រៀងឃោសនាបក្ស។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ នេះ មានគណបក្សចំនួន ១២ ចូលរួមប្រកួតប្រជែងដើម្បីដឹកនាំឃុំ-សង្កាត់ទាំង ១.៦៤៦ទូទាំងប្រទេស។ ក្នុងនោះឃើញ គណបក្សប្រជាជនកម្ពុជា និងគណបក្សសង្គ្រោះជាតិ បានសំឡេងប្រហាក់ប្រហែលគ្នា។ ក្រៅពីគណបក្សទាំងពីរនេះ ស្ទើរតែគ្មានគណបក្សណាសោះអាចគ្រប់គ្រងឃុំ សង្កាត់បាន។
អ្នកនាំពាក្យគណបក្សប្រជាធិបតេយ្យមូលដ្ឋាន លោក សាម អ៊ីន ឲ្យដឹងថា ទីភ្នាក់ងារគណបក្សរបស់លោកបានផ្ដល់តួលេខថា ក្នុងឃុំ-សង្កាត់ចំនួន២៧ ដែលគណបក្សនេះចូលរួមប្រកួតប្រជែង គណបក្សបានទទួលអាសនៈចំនួនបីឃុំ។ ទោះពុំបានគ្រប់គ្រងឃុំណាមួយបានដូចចិត្តថា នឹងយកឃុំនោះជាឃុំគំរូ។ លោក សាម អ៊ីន នៅតែពេញចិត្តចំពោះលទ្ធផលដែលខ្លួនទទួលបាន។
អគ្គលេខាធិការនៃគណបក្សសម្ព័ន្ធដើម្បីប្រជាធិបតេយ្យ លោក ចិន ថុន និយាយថា គណបក្សរបស់លោកមិនដែលខ្វល់ទៅនឹងលទ្ធផលបោះឆ្នោតទេ ព្រោះនេះជាតួនាទី និងការទទួលខុសត្រូវរបស់ពលរដ្ឋ។ លោកថា លទ្ធផលបឋមបង្ហាញថា គណបក្សសម្ព័ន្ធដើម្បីប្រជាធិបតេយ្យ មិនទាន់ឈ្នះឃុំណាមួយក្ដី ប៉ុន្តែលោកកត់សម្គាល់ថា ការគាំទ្រគណបក្សមានចំនួនកើតឡើង គ្រាន់តែមិនទាន់គ្រប់ចំនួនអាចទទួលបានអាសនៈនៅក្នុងឃុំ-សង្កាត់។
ប្រធានគណបក្សជនជាតិដើមប្រជាធិបតេយ្យ លោក ប្លាំង ស៊ីន និយាយថា ការដែលគណបក្សរបស់លោកទទួលបានសំឡេងតិចនៅក្នុងឃុំ ព្រោះពលរដ្ឋមួយចំនួនមិនបានទៅបោះឆ្នោត ដោយសារជាប់ផឹកគ្រឿងស្រវឹង និងចាញ់សម្លុតអ្នកនយោបាយ។
ការប្រកាសលទ្ធផលបោះឆ្នោតជ្រើសរើសក្រុមប្រឹក្សាឃុំ-សង្កាត់ គ.ជ.ប ធ្វើឡើងមានបីដំណាក់កាល គឺទី១ ការប្រកាសលទ្ធផលបឋម មានរយៈពេលពីរថ្ងៃ គឺនៅថ្ងៃទី៤ និងថ្ងៃទី៥ មិថុនា។ ទី២ លទ្ធផលបណ្ដោះអាសន្ននឹងប្រកាសរយៈពេលបីថ្ងៃ គឺចាប់ពីថ្ងៃទី៥ ដល់ថ្ងៃទី៧ មិថុនា និងទី៣ ការប្រកាសលទ្ធផលជាផ្លូវការ នៅថ្ងៃទី២៥ ខែមិថុនា គឺជាការប្រកាសនៅក្រោយពេល គ.ជ.ប បានដោះស្រាយបណ្ដឹងនានាចប់សព្វគ្រប់ និងបិទការតវ៉ា៕