មន្ត្រីគណបក្សសង្គ្រោះជាតិ ខេត្តបាត់ដំបង ប្ដឹងទៅគណៈកម្មការឃុំរៀបចំការបោះឆ្នោត ស្នើឲ្យរាប់សន្លឹកឆ្នោតឡើងវិញចំនួន ៣ឃុំនៅក្នុងខេត្តនេះ។ មន្ត្រីបក្សប្រឆាំងអះអាងថា មូលហេតុដែលប្ដឹង ដោយសាររកឃើញភាពមិនប្រក្រតីមួយចំនួននៅក្នុងការិយាល័យបោះឆ្នោត ដែលនាំឲ្យគណបក្សនេះបាត់បង់សំឡេងឆ្នោត។
មន្ត្រីគណបក្សសង្គ្រោះជាតិ ខេត្តបាត់ដំបង មានជំនឿថា ប្រសិនបើរាប់សន្លឹកឆ្នោតឲ្យបានត្រឹមត្រូវឡើងវិញ គណបក្សនេះមានឱកាសឈ្នះការបោះឆ្នោតជ្រើសរើសក្រុមប្រឹក្សាឃុំ-សង្កាត់បាន ៣បន្ថែមទៀត។
ប្រធានគណបក្សសង្គ្រោះជាតិ ខេត្តបាត់ដំបង លោក ជា ជីវ មានប្រសាសន៍នៅថ្ងៃទី៥ មិថុនា ថា អ្នកអង្កេតការណ៍របស់គណបក្សប្រឆាំងរកឃើញភាពមិនប្រក្រតីចំនួន ៣ឃុំ រួមមានឃុំបឹងព្រីង ស្រុកថ្មគោល ឃុំបឹងប្រាំ ស្រុកបវេល និងឃុំតាគ្រាម ស្រុកបាណន់។
លោកអះអាងថា ភាពមិនប្រក្រតីទាំងនោះមានដូចជា សន្លឹកឆ្នោតដែលមានគំនូសវែងទៅលើគណបក្សសង្គ្រោះជាតិ មានរាប់រយសន្លឹក ដែលគណៈកម្មការបោះឆ្នោតចាត់ជាសន្លឹកឆ្នោតមិនបានការ ហើយលទ្ធផលដែលគណបក្សនេះចាញ់ឆ្នោតមានជាង ២០សន្លឹក ឬមានចំនួនតិចជាងសន្លឹកឆ្នោតមិនបានការ ក្រៅអំពីនេះ ខ្លះមានការសរសេរអក្សរសម្គាល់នៅលើសន្លឹកឆ្នោត ជាដើម៖ «បាទ! ជាគោលការណ៍ យើងប្ដឹងទៅមូលដ្ឋាន ហើយក្រុមការងារគណបក្សសង្គ្រោះជាតិ ប្រចាំស្រុកទាំង៣ នឹងដាក់ពាក្យប្ដឹងនៅថ្ងៃនេះទៅប្រធានគណៈកម្មការបោះឆ្នោតនៅឃុំនីមួយៗតែម្ដង»។
ឆ្លើយតបនឹងបញ្ហានេះ ប្រធានគណៈកម្មការរៀបចំការបោះឆ្នោតខេត្តបាត់ដំបង លោក វន ពន មានប្រសាសន៍ថា លោកពុំទាន់ទទួលព័ត៌មានករណីគណបក្សសង្គ្រោះជាតិ ប្ដឹងឲ្យរាប់សន្លឹកឆ្នោតនៅឃុំទាំង៣ នេះនៅឡើយ៖ «បាទ! ជួនកាលគាត់មិនមែនជាការប្ដឹងនៅក្នុងថ្ងៃបោះ និងរាប់ ប៉ុន្តែករណីនេះវាជាករណីបណ្ដឹងផ្ដន្ទាទោស ព្រោះបណ្ដឹងផ្ដន្ទាទោសមានរយៈពេល ៣ថ្ងៃ។ រីឯបណ្ដឹងកែតម្រូវនេះ ត្រូវតែបញ្ជូនមកភ្លាមៗ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ប្រចាំខេត្តបាត់ដំបង លោក យិន ម៉េងលី លើកឡើងថា លទ្ធផលសំឡេងឆ្នោតដែលគណបក្សណាមួយចាញ់ ឬឈ្នះ មានចំនួនតិច ចំណែកឯសន្លឹកឆ្នោតមិនបានការ ឬហៅថាសន្លឹកឆ្នោតខូច មានចំនួនច្រើន គឺអាចមានភាពមិនប្រក្រតី ហើយការប្ដឹងឲ្យរាប់សន្លឹកឆ្នោតឡើងវិញ គណបក្សដែលចាញ់មានឱកាសឈ្នះឆ្នោតនៅក្នុងការិយាល័យនោះ៖ «ការប្ដឹងវាជាសិទ្ធិរបស់គណបក្សនយោបាយដែលច្បាប់បានកំណត់ ហើយលទ្ធផលបោះឆ្នោតផ្លូវការរហូតថ្ងៃទី២០ ខែមិថុនា។ ចំណែកអ្នកប្ដឹង ត្រូវមានភស្តុតាងរឹងមាំ បើមិនដូច្នោះទេ ការប្ដឹងក៏មិនមានលទ្ធផលដែរ»។
លោក វន ពន សង្កត់ធ្ងន់ថា ករណីបណ្ដឹងរបស់មន្ត្រីគណបក្សប្រឆាំងនេះ អាចជាការប្ដឹងផ្ដន្ទាទោស ហើយគណបក្សនយោបាយមានសិទ្ធិប្ដឹងតវ៉ាករណីនេះមានរយៈពេល ៣ថ្ងៃ ចាប់ពីថ្ងៃបោះឆ្នោតរួច។
របាយការណ៍គណៈកម្មការរៀបចំការបោះឆ្នោតខេត្តបាត់ដំបង ឲ្យដឹងថា ចាប់ពីថ្ងៃបោះឆ្នោតមកមានពាក្យបណ្ដឹងចំនួន ៦ករណី គឺពីគណបក្សសង្គ្រោះជាតិ ១ករណី និងគណបក្សប្រជាជនកម្ពុជា ៥ករណី។ ចំណែកលទ្ធផលបោះឆ្នោតបឋម លោក វន ពន អះអាងថា មិនទាន់បូកសរុបរួចរាល់នៅឡើយ។ ប៉ុន្តែមន្ត្រីគណបក្សសង្គ្រោះជាតិ ខេត្តបាត់ដំបង អះអាងថា លទ្ធផលបោះឆ្នោតក្រៅផ្លូវការ គណបក្សប្រជាជនកម្ពុជា ទទួលបាន ៥៤ឃុំ-សង្កាត់ និងគណបក្សសង្គ្រោះជាតិ បាន ៤៨ឃុំ-សង្កាត់ក្នុងចំណោម ១០២ឃុំ-សង្កាត់៕