Clik here to view.
មជ្ឈមណ្ឌលសិទ្ធិមនុស្សកម្ពុជា (CCHR) បានចេញព្រឹត្តិបត្រសង្កេតការណ៍ពីថ្ងៃទី១ ខែវិច្ឆិកា ឆ្នាំ២០១៦ ដល់ថ្ងៃទី៣០ ខែមេសា ឆ្នាំ២០១៧ បានសង្កេតសវនាការនៅសាលាឧទ្ធរណ៍បានចំនួន ២៤៨ករណី។ ករណីទាំងនេះ ទាក់ទងនឹងជនជាប់ចោទដែលសាលាដំបូងកាត់ទោសរួច ប៉ុន្តែសេចក្ដីសម្រេចនោះកំពុងស្ថិតនៅក្នុងនីតិវិធីបណ្ដឹងឧទ្ធរណ៍ និងមិនទាន់ចូលជាស្ថាពរ។
របាយការណ៍សង្កេតការណ៍ដដែលនេះបញ្ជាក់ថា សវនាការចំនួន ២៤ករណី គឺមានជនជាប់ចោទចំនួន ៣០នាក់ បានបង្ហាញខ្លួននៅមុខតុលាការក្នុងឯកសណ្ឋានទណ្ឌិតពណ៌ខៀវ។ ការបង្ហាញខ្លួននៅមុខតុលាការក្នុងឯកសណ្ឋានជាទណ្ឌិតនេះ គឺជាការអនុវត្តខុសពីរដ្ឋធម្មនុញ្ញ ប្រកាសរបស់ក្រសួងមហាផ្ទៃ ឆ្នាំ២០១៣ និងនីតិវិធីលេខ៥ នៃនីតិវិធីពន្ធនាគាររបស់ក្រសួងមហាផ្ទៃ។ ករណីបែបនេះ ក៏មិនស្របនឹងច្បាប់សិទ្ធិមនុស្សអន្តរជាតិ ដែលធានានូវសិទ្ធិទទួលបានការសន្មតជាមុនថាគ្មានទោស និងបទដ្ឋានអន្តរជាតិនានា ដូចជាវិធានការអង្គការសហប្រជាជាតិ ស្ដីពីបទដ្ឋានអប្បបរមាសម្រាប់ការប្រព្រឹត្តទៅលើជនជាប់ឃុំ ជាដើម។
មាត្រា៣៨ នៃរដ្ឋធម្មនុញ្ញ ចែងថា ជនជាប់ចោទណាក៏ដោយ ត្រូវចាត់ទុកជាមនុស្សឥតទោស ដរាបណាតុលាការមិនទាន់កាត់ទោសជាស្ថាពរ៕
