Clik here to view.
មន្ត្រីជាន់ខ្ពស់ក្រសួងមហាផ្ទៃ បញ្ជាក់ថា ការមិនឲ្យពលរដ្ឋបាននៅក្បែរការិយាល័យរាប់សន្លឹកឆ្នោតនោះ គឺដោយសារមានសំណូមពរពីប្រធានគណៈកម្មការរៀបចំការបោះឆ្នោត ដែលបារម្ភអំពីរឿងសណ្ដាប់ធ្នាប់។ ទោះជាយ៉ាងណា ពលរដ្ឋមួយចំនួនអះអាងថា ពួកគាត់មិនបានទៅបង្កការរំខាន ឬធ្វើឲ្យប៉ះពាល់ដល់ដំណើរការរាប់សន្លឹកឆ្នោតនោះទេ ពោលគឺគ្រាន់តែចង់សង្កេតមើលដំណើរការរាប់សន្លឹកឆ្នោតតែប៉ុណ្ណោះ។
មន្ត្រីនាំពាក្យអគ្គស្នងការដ្ឋាននគរបាលជាតិ លោក គៀត ច័ន្ទថារិទ្ធ បញ្ជាក់ប្រាប់អាស៊ីសេរី នៅល្ងាចថ្ងៃទី៤ មិថុនា ថា ការមិនឲ្យពលរដ្ឋនៅក្បែរការិយាល័យរាប់សន្លឹកឆ្នោតនៅតាមការិយាល័យមួយចំនួននោះ គឺដើម្បីថែរក្សាសណ្ដាប់ធ្នាប់នៃដំណើរការរាប់សន្លឹកឆ្នោត។
លោកថា ការចោមរោមរបស់ប្រជាពលរដ្ឋនៅជិតការិយាល័យរាប់សន្លឹកឆ្នោត ធ្វើឲ្យបាត់សណ្ដាប់ធ្នាប់ដែលជាការប៉ះពាល់ និងរំខានដល់សកម្មភាពគណៈកម្មការរៀបចំការបោះឆ្នោតកំពុងរាប់សន្លឹកឆ្នោត ហើយសមត្ថកិច្ចដែលជាភ្នាក់ងារសន្តិសុខបោះឆ្នោត៖ «»។
ផ្ទុយពីការលើកឡើងនេះ ពលរដ្ឋមួយចំនួនបញ្ជាក់ថា ពួកគាត់មិនមានការប្រមូលផ្តុំ ឬធ្វើសកម្មភាពណាមួយដែលប៉ះពាល់ដល់ដំណើរការរាប់សន្លឹកឆ្នោតនោះទេ ពោលគឺពួកគាត់គ្រាន់តែចង់តាមដានដំណើរការរាប់សន្លឹកឆ្នោតនេះតែប៉ុណ្ណោះ។ ពួកគាត់សម្ដែងការខកចិត្តចំពោះចំណាត់ការបែបនេះរបស់សមត្ថកិច្ច។
យុវជនម្នាក់ឈ្មោះ សួង នាគព័ន្ធ អះអាងថា រូបគេត្រូវសមត្ថកិច្ចប្រើអំពើហិង្សា ខណៈកំពុងនៅក្នុងបរិវេណការិយាល័យបោះឆ្នោតជាមួយពលរដ្ឋប្រមាណ ២០នាក់ទៀត ដើម្បីតាមដានអំពីដំណើរការរាប់សន្លឹកឆ្នោតក្នុងការិយាល័យបោះឆ្នោតនៅវិទ្យាល័យជម្ពូវ័ន្ត រាជធានីភ្នំពេញ៖ «»។
ជុំវិញរឿងនេះ នាយកប្រតិបត្តិអង្គការនិកហ្វិច (Nicfec) លោក សំ គន្ធាមី បញ្ជាក់ថា តាមនីតិវិធីរបស់ គ.ជ.ប បើសិនជាការប្រមូលផ្តុំណាមួយរបស់ពលរដ្ឋអាចធ្វើឲ្យប៉ះពាល់ដល់ដំណើរការរាប់សន្លឹកឆ្នោត នោះប្រធានគណៈកម្មការការិយាល័យរាប់សន្លឹកឆ្នោត អាចស្នើឲ្យភ្នាក់ងារសន្តិសុខបោះឆ្នោត អញ្ជើញពលរដ្ឋឲ្យចេញពីបរិវេណការិយាល័យបាន ក៏ប៉ុន្តែត្រូវធ្វើដោយសន្តិវិធី មិនមែនដោយអំពើហិង្សានោះទេ។
បន្ទាប់ពីមានព័ត៌មានថានៅតាមទីតាំងការិយាល័យមួយចំនួន សមត្ថកិច្ចបានបណ្ដេញពលរដ្ឋមិនឲ្យឈរមើលការរាប់សន្លឹកឆ្នោត លោក ហង្ស ពុទ្ធា ដែលជាអ្នកនាំពាក្យ គ.ជ.ប បញ្ជាក់ថា ពលរដ្ឋអាចឈរមើល និងថតរូបពីតាមបង្អួច ឬទ្វារបាន លើកលែងតែចូលក្នុងការិយាល័យរាប់សន្លឹកឆ្នោត។ លោកបន្ថែមថា បើសិនជាសមត្ថកិច្ចរារាំង ឬឃាត់ពលរដ្ឋមិនឲ្យមើលការរាប់សន្លឹកឆ្នោតមែន ជារឿងខុសច្បាប់។ លោកបញ្ជាក់ថា តំណាងគណបក្សនយោបាយអាចដាក់ពាក្យប្ដឹងមក គ.ជ.ប បាន។
មន្ត្រីនាំពាក្យអគ្គស្នងការដ្ឋាននគរបាលជាតិ លោក គៀត ច័ន្ទថារិទ្ធ មិនបកស្រាយជុំវិញការលើកឡើងរបស់លោក ហង្ស ពុទ្ធា នេះឡើយ ដោយលោកថា ការអនុវត្តរបស់ភ្នាក់ងារសន្តិសុខបោះឆ្នោតនេះ គឺធ្វើឡើងតាមសំណូមពររបស់ប្រធានគណៈកម្មការការិយាល័យបោះឆ្នោតតែប៉ុណ្ណោះ៕
