ប្រជាពលរដ្ឋនៅភូមិចំនួន២ នៃឃុំធិបតី ស្រុកគាស់ក្រឡ ខេត្តបាត់ដំបង ប្រមាណជាង ៣០នាក់ ត្រូវបានបញ្ជូនទៅពិនិត្យព្យាបាលនៅមន្ទីរពេទ្យបង្អែកស្រុកមោងឬស្សី បន្ទាប់ពីពួកគេបានពុលអាហារជាបន្តបន្ទាប់។ ករណីពុលអាហារនេះ បន្ទាប់ពីពលរដ្ឋទាំងនោះ បានហូបបាយប្រអប់ដែលខ្ចប់ទុកអំឡុងពេលចេញឃោសនារកសំឡេងឆ្នោតឱ្យគណបក្សនយោបាយ។
ពលរដ្ឋសង្ស័យថា មូលហេតុនាំឱ្យមានការពុលអាហារ រហូតបណ្ដាលឱ្យក្អួតចង្អោរ ស្លេកស្លាំង និងទន់ដៃទន់ជើង កាលពីថ្ងៃទី២ ខែមិថុនា ឆ្នាំ២០១៧ ប្រហែលបណ្ដាលមកពីប្រអប់ដែលពួកគាត់ប្រើប្រាស់សម្រាប់ខ្ចប់បាយ និងម្ហូបយកទៅបរិភោគ នៅពេលចេញឃោសនាបោះឆ្នោត។
សាក្សីម្នាក់នៅភូមិឆាយបល្ល័ង ឈ្មោះ យ៉ាន់ គួន ថ្លែងថា ពលរដ្ឋដែលពុលអាហារទាំងអស់មានទាំងក្មេង និងចាស់សរុបចំនួនប្រហែល ៣៨នាក់ ហើយសុទ្ធតែជាអ្នកគាំទ្រគណបក្សប្រជាជនកម្ពុជា រស់នៅក្នុងភូមិឆាយបល្ល័ង និងភូមិជើងទេញ ឃុំធិបតី ស្រុកគាស់ក្រឡ ខេត្តបាត់ដំបង បន្ទាប់ពីពួកគេនាំគ្នាហូបបាយជាមួយសាច់ជ្រូកចៀន និងពងទាចៀន ដែលប្រពន្ធរបស់លោកមេភូមិជើងទេញ ឈ្មោះ ជាល វៃ ចម្អិន និងវេចខ្ចប់ទុកក្នុងប្រអប់សម្រាប់បរិភោគនៅពេលចេញឃោសនាបោះឆ្នោតឃុំ-សង្កាត់។
លោកបន្តថា ករណីពុលនេះ ពលរដ្ឋក្នុងភូមិនាំគ្នាសង្ស័យថា អាចមិនមែនបង្កឡើងដោយសារម្ហូប បាយ និងទឹក ដែលពួកគេនាំគ្នាបរិភោគឡើយ៖ «អ្នកហូបនៅផ្ទះអត់អីទេ ប៉ុន្តែអ្នកខ្ចប់បាយយកទៅហូបនៅពេលដង្ហែក្បួន នៅពេលថ្ងៃត្រង់បែរជាពុលអ៊ីចឹងទៅ មិនដឹងថាមូលហេតុមកពីអាហារ ឬក៏ប្រអប់បាយ ហើយពុលដោយសារទឹកសុទ្ធ ក៏មានមិនតិចជាង ២០០នាក់ដែរ។ សូម្បីប្រធានភូមិក៏ពុលដែរ»។
ពលរដ្ឋរងគ្រោះពីការពុលអាហារម្នាក់ឈ្មោះ កាន កុសល រៀបរាប់ថា លោកមិនបានក្អួតចង្អោរ ឬក៏រាករូសដូចគេឯងឡើយ ប៉ុន្តែឪពុករបស់លោក និងពលរដ្ឋជាច្រើននាក់ផ្សេងទៀតមានអាការៈបែបនេះ។ លោកបន្តថា បន្ទាប់ពីឈប់សម្រាកដង្ហែក្បួនឃោសនានៅវេលាម៉ោង ១១ព្រឹក ពួកលោកបាននាំគ្នាហូបបាយប្រអប់សម្រាប់ជាអាហារថ្ងៃត្រង់ លុះដល់ម៉ោង ១រសៀល ទើបមានអាការៈពុលអាហារតែម្ដង។
លោក កាន កុសល ថ្លែងទៀតថា នៅម៉ោង ៤រសៀល ទើបមានក្រុមគ្រូពេទ្យចុះទៅពិនិត្យព្យាបាល និងព្យួរសេរ៉ូមជូនពលរដ្ឋដែលពុលអាហារទាំងនោះ មុននឹងសម្រេចបញ្ជូនទៅកាន់មន្ទីរពេទ្យបង្អែកស្រុកមោងឬស្សី៖ «មានតែរាក និងក្អួត ស្មារតីអត់អីទេ មានតែអស់កម្លាំង និងទន់ដៃទន់ជើង»។
ចំណែកអនុប្រធានមន្ទីរសុខាភិបាលខេត្តបាត់ដំបង លោក អ៊ុក វិជ្ជា ថ្លែងថា នៅរសៀលថ្ងៃទី៣ ខែមិថុនា អ្នកពុលអាហារភាគច្រើនបានធូរស្រាល និងបានបញ្ជូនទៅកាន់ភូមិកំណើតរបស់ពួកគេវិញ ហើយនៅសេសសល់ប្រហែល ៧នាក់ទៀតប៉ុណ្ណោះ ដែលសុទ្ធតែជាកុមារមានសុខភាពទន់ខ្សោយជាងមនុស្សចាស់ កំពុងសម្រាកព្យាបាលបន្តនៅមន្ទីរបង្អែក។ លោកបញ្ជាក់ថា ក្នុងចំណោមអ្នកពុលទាំងអស់ គឺមានកុមារសរុបចំនួន ១០នាក់ ហើយអ្នកពុលទាំងអស់នេះ ក៏ទទួលបានទឹកផ្លែឈើកំប៉ុងដែរ។
លោក អ៊ុក វិជ្ជា បន្ថែមទៀតថា ក្រុមគ្រូពេទ្យមិនអាចរកអាហារសេសសល់ដែលពលរដ្ឋនាំគ្នាបរិភោគពុល យកមកពិនិត្យស្វែងរកការពិតឡើយ ប៉ុន្តែតាមការសន្និដ្ឋាន អាហារក្ដៅដែលវេចខ្ចប់យូរក្នុងប្រអប់ទុកតាំងពីព្រឹករហូតដល់ថ្ងៃត្រង់ គឺអាចធ្វើឱ្យអាហារទាំងនោះផ្អូម ហើយធ្វើឱ្យអ្នកបរិភោគ ក្អួត និងរាករូសបាន៖ «កាលណាអាហារហ្នឹងម្ហូបតិចតូចទៅ ដល់ពេលហូបវាធ្វើឱ្យរាករូសបាន»។
លោក អ៊ុក វិជ្ជា មិនបានសង្ស័យលើប្រអប់ដែលពលរដ្ឋខ្ចប់បាយទៅបរិភោគរហូតបណ្ដាលឱ្យពុលឡើយ ព្រោះលោកសំអាងថា នៅកម្ពុជា ពុំមានភស្តុតាងណាមួយហាមប្រាមមិនឱ្យប្រើប្រាស់ប្រអប់ខ្ចប់បាយ ស្របពេលពលរដ្ឋទូទាំងនាំគ្នាប្រើប្រាស់ការវេចខ្ចប់បែបនេះតាំងពីដើមមក ហើយមិនឃើញករណីពុលអាហារនោះទេ។ ប៉ុន្តែលោកបញ្ជាក់ថា ដើម្បីបញ្ចៀសកុំឱ្យមានករណីពុលអាហារតទៅទៀត គឺពលរដ្ឋត្រូវមានអនាម័យ និងមិនត្រូវបរិភោគអាហារណាដែលវេចខ្ចប់ទុកយូររហូតផ្អូមឡើយ។
ទោះជាយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបាត់ដំបង លោក យិន ម៉េងលី យល់ឃើញថា ករណីពុលអាហារនៅឃុំធិបតី ស្រុកគាស់ក្រឡ មិនមែនដោយសារអាហារផ្អូមឡើយ ប៉ុន្តែលោកសង្ស័យខ្លាំងទៅលើសារធាតុគីមីក្នុងប្រអប់ ដែលពលរដ្ឋយកវេចខ្ចប់អាហារនោះ៖ «ព្រោះយើងដឹងហើយថា កាលណាចំណីផ្អូម យើងមិនហូបទេ ព្រោះហូបមិនកើតដោយសារក្លិន»។
មន្ត្រីសង្គមស៊ីវិលរូបនេះ ព្រួយបារម្ភថា សព្វថ្ងៃអាហារ ផ្លែឈើ និងគ្រឿងភេសជ្ជៈផ្សេងៗ ដែលចូលពីប្រទេសជិតខាង ដូចជាប្រទេសថៃ ជាដើម មកលក់នៅកម្ពុជា បែរជាមានតម្លៃថោកជាងតម្លៃដែលពួកគេលក់នៅក្នុងស្រុកទៅទៀត ស្របពេលតម្លៃក្នុងស្រុកដែលមិនត្រូវការបង់ពន្ធ និងដឹកជញ្ជូនផង បែរជាលក់ថ្លៃជាង។
លោក យិន ម៉េងលី បញ្ជាក់ថា ទំនិញដែលចូលមកលក់នៅកម្ពុជា មានតម្លៃថោកបែបនេះ អាចដោយសារមានការប្រើប្រាស់សារធាតុគីមីច្រើន ហើយមិនមានគុណភាព ដូច្នោះមន្ត្រីតាមកាំកុងត្រូលនៅតាមព្រំដែន ត្រូវត្រួតពិនិត្យអំពីទំនិញនាំចូលពីក្រៅប្រទេសទាំងនោះឱ្យដិតដល់បំផុត ដើម្បីការពារផលប៉ះពាល់សុខភាពប្រជាពលរដ្ឋធ្ងន់ធ្ងរ៕