គណៈកម្មការរៀបចំការបោះឆ្នោតខេត្តរតនគិរី ឲ្យដឹងថា មុនមួយថ្ងៃនៃការបោះឆ្នោតក្រុមប្រឹក្សាឃុំ-សង្កាត់អាណត្តិទី៤ ថា មន្ត្រីរៀបចំបោះឆ្នោតបានត្រៀមសម្ភារៈបរិក្ខារ និងធនធានមនុស្សគ្រប់គ្រាន់សម្រាប់បម្រើការបោះឆ្នោតនៅថ្ងៃទី៤ ខែមិថុនា។ ចំណែកក្រុមអ្នកសង្កេតការណ៍អង្គការក្រៅរដ្ឋាភិបាលឲ្យដឹងដែរថា នឹងឃ្លាំមើលដំណើរការបោះឆ្នោតនៅខេត្តភាគឦសានមួយនេះឲ្យបានសុក្រឹត។
ការិយាល័យបោះឆ្នោតចំនួន ២៧៣ការិយាល័យនៅតាមឃុំ-សង្កាត់នានាក្នុងខេត្តរតនគិរី បានរៀបចំរួចរាល់ទាំងទីតាំង សម្ភារៈ និងធនធានមនុស្ស ដើម្បីឲ្យប្រជាពលរដ្ឋម្ចាស់ឆ្នោតមកបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤។
ប្រធានគណៈកម្មការខេត្តរៀបចំការបោះឆ្នោតខេត្តរតនគិរី លោក ប៉ែន ឈុនឌី បញ្ជាក់នៅថ្ងៃទី៣ ខែមិថុនា ដែលជាថ្ងៃស បន្ទាប់ពីយុទ្ធនាការឃោសនាបោះឆ្នោតបានបញ្ចប់ថា ប្រសិនអាកាសធាតុអំណោយផលមិនមានភ្លៀងធ្លាក់ច្រើន ប្រជាពលរដ្ឋដែលមានឈ្មោះក្នុងបញ្ជីឈ្មោះបោះឆ្នោតនឹងនាំគ្នាមកបោះឆ្នោតដោយគ្មានការរំខាន។
លោកកត់សំគាល់ថា សកម្មភាពឃោសនាបោះឆ្នោតរបស់គណបក្សនយោបាយទាំងអស់ទើបតែកន្លងទៅនៅខេត្តរតនគិរី ឋិតក្នុងបរិយាកាសល្អ គ្មានអំពើហិង្សា និងគ្មានពាក្យបណ្ដឹងណាមួយដែលគណៈកម្មការបោះឆ្នោតឃុំ-សង្កាត់ ដោះស្រាយមិនបាននោះទេ៖ «ការរៀបចំយើងបានរួចរាល់ហើយ ប៉ុន្តែយើងបារម្ភខ្លាចភ្លៀងខ្លាំងអ្នកបោះឆ្នោតអាចប៉ះពាល់»។
នៅខេត្តរតនគិរី គណបក្សនយោបាយចំនួន៦ បានចុះបញ្ជីឈ្មោះបេក្ខជនចូលរួមប្រកួតប្រជែងបោះឆ្នោតក្រុមប្រឹក្សាឃុំ-សង្កាត់។ ដោយឡែករបាយការណ៍របស់គណៈកម្មការខេត្តរៀបចំការបោះឆ្នោតខេត្តរតនគិរី ឲ្យដឹងថា មានអង្គការក្រៅរដ្ឋាភិបាលជាតិចំនួន៧ បានដាក់ភ្នាក់ងារសង្កេតការណ៍សម្រាប់ការបោះឆ្នោតនេះចំនួន ៣៩៣នាក់ និងក្រុមសង្កេតការណ៍បោះឆ្នោតអន្តរជាតិមួយអង្គការមានភ្នាក់ងារម្នាក់។ ក្រៅពីនោះ ភ្នាក់ងារសង្កេតការណ៍របស់គណបក្សនយោបាយដែលចុះបញ្ជីឈ្មោះបេក្ខជនឈរឈ្មោះក៏បានរៀបចំរួចរាល់ហើយដែរ។
លេខាអង្គការខុមហ្វ្រែល (COMFREL) លោក ជូន ភិនដារ៉ា កត់សំគាល់ថា នៅថ្ងៃសហាមឃាត់ការឃោសនានៅទូទាំងខេត្តរតនគិរី មានសភាពស្ងប់ស្ងាត់ សកម្មភាពឃោសនាបោះឆ្នោតនៅតាមទីសាធារណៈ និងនៅតាមមូលដ្ឋានបានបញ្ចប់ លើកលែងតែនៅតាមការិយាល័យបោះឆ្នោតគឺមន្ត្រីរៀបចំការបោះឆ្នោត និងក្រុមប៉ូលិសការពារសុវត្ថិភាពការិយាល័យបោះឆ្នោតកំពុងរៀបចំទីតាំងបោះឆ្នោតឲ្យបានរួចរាល់។
លោកបន្តថា អ្នកសង្កេតការណ៍ខុមហ្វ្រែល ជាង ២០០នាក់ បានដាក់ឲ្យសង្កេតការណ៍នៅគ្រប់ឃុំ-សង្កាត់ ដើម្បីឃ្លាំមើលភាពមិនប្រក្រតីនៅថ្ងៃបោះឆ្នោត៖ «ការិយាល័យបោះឆ្នោតមានតែ ២៧៣ការិយាល័យទេ ប៉ុន្តែអ្នកសង្កេតការណ៍លើស ២៧៣នាក់ទៀតគ្រប់ឃុំយើងដាក់ទៅតាមស្ថានីយ»។
ទាក់ទិនកិច្ចការពារសន្តិសុខ សុវត្ថិភាព និងសណ្ដាប់ធ្នាប់នៅតាមការិយាល័យបោះឆ្នោត ស្នងការរងប៉ូលិសខេត្តរតនគិរី លោក អឹម ផាន់នី បញ្ជាក់ថា មន្ត្រីប៉ូលិសជិត ៧០០នាក់ បានបញ្ជូនទៅការពារនៅតាមការិយាល័យបោះឆ្នោតនានា។ លោកថា កងប៉ូលិសអន្តរាគមន៍នៅតាមអធិការដ្ឋានប៉ូលិសក្រុង និងស្រុក ក៏បានត្រៀមប្រចាំការ ប្រសិនមានបាតុភាពត្រូវអន្តរាគមន៍បន្ទាន់៖ «តាមផ្លូវសាធារណៈយើងប្រើតែកម្លាំងល្បាតការពារសន្តិសុខធម្មតាទេ ចៀសវាងការចោទប្រកាន់ប្រើប្រាស់កម្លាំងនាំឲ្យមានការវាយប្រហារទៅលើការគំរាមកំហែង»។
ទោះបីជាយ៉ាងណាក៏ដោយ ប្រមុខរាជរដ្ឋាភិបាលកម្ពុជា លោក ហ៊ុន សែន និងតំណាងគណបក្សនយោបាយនានា អំពាវនាវដូចគ្នាឲ្យប្រជាពលរដ្ឋទៅបោះឆ្នោតនៅថ្ងៃទី៤ ខែមិថុនា ឲ្យបានគ្រប់ៗគ្នា និងប្រកាន់យកបរិយាកាសបោះឆ្នោតល្អប្រសើរ ដោយគ្មានអំពើហិង្សា គ្មានការគំរាមកំហែង៕