Clik here to view.
ស្របពេលដែលគណបក្សប្រជាជនកម្ពុជា និងគណបក្សសង្គ្រោះជាតិ ធ្វើយុទ្ធនាការឃោសនាទ្រង់ទ្រាយធំដែលមានអ្នកចូលរួមរាប់ម៉ឺននាក់ នៅរាជធានីភ្នំពេញ ឥឡូវយើងងាកមកចាប់អារម្មណ៍នឹងគណបក្ស ១០ផ្សេងទៀតវិញ ថាតើពួកគេមានសកម្មភាពអ្វីខ្លះដែរនៅថ្ងៃឃោសនាចុងក្រោយនេះ?
គណបក្សចំនួន ១០ផ្សេងទៀត ដែលចូលរួមប្រកួតប្រជែងក្នុងការបោះឆ្នោតក្រុមប្រឹក្សាឃុំ-សង្កាត់អាណត្តិទី៤ នេះ ធ្វើសកម្មភាពផ្សេងៗគ្នានៅថ្ងៃទី២ ខែមិថុនា ដែលជាថ្ងៃឃោសនាចុងក្រោយ។
គណបក្សសម្ព័ន្ធដើម្បីប្រជាធិបតេយ្យ មានការជួបជុំ និងធ្វើការឃោសនាទ្រង់ទ្រាយធំនៅខេត្តបាត់ដំបង។ អគ្គលេខាធិការគណបក្សនេះ គឺលោក ចិន ថុន បញ្ជាក់ថា អ្នកចូលរួមហែក្បួននេះមានប្រមាណ ១ម៉ឺននាក់ ដឹកនាំដោយលោក ខឹម វាសនា ប្រធានគណបក្ស។
ចំណែកគណបក្សរាជានិយមហ៊្វុនស៊ិនប៉ិចវិញ ប្រមុខដឹកនាំគណបក្សនេះ គឺសម្ដេចក្រុមព្រះ នរោត្តម រណឫទ្ធិ បានចុះជួបជាមួយបេក្ខជន និងហែក្បួននៅខេត្តកំពង់ចាម ប៉ុន្តែការហែក្បួននេះមិនមានទ្រង់ទ្រាយធំនោះទេ។ នេះបើតាមការឱ្យដឹងរបស់លោក ញ៉េប ប៊ុនជិន ដែលជាអនុប្រធានគណបក្ស។
ដោយឡែកគណបក្សខ្មែររួបរួមជាតិរបស់លោក ញឹក ប៊ុនឆៃ វិញ ក៏មិនមានហែក្បួនទ្រង់ទ្រាយធំណាមួយដែរ។ លោក ញឹក ប៊ុនឆៃ បញ្ជាក់ថា គណបក្សរបស់លោកបានហែក្បួនឃោសនាទ្រង់ទ្រាយធំកាលពីប៉ុន្មានថ្ងៃមុន នៅខេត្តបន្ទាយមានជ័យ និងព្រះវិហារ ដូច្នេះនៅថ្ងៃចុងក្រោយនេះ លោកគ្រាន់តែចុះជួបបេក្ខជន និងអ្នកគាំទ្រនៅតាមឃុំ-សង្កាត់ក្បែររាជធានីភ្នំពេញ ប៉ុណ្ណោះ។
ចំណែកឯលោក លោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យវិញ បានចុះជួបផ្ទាល់ជាមួយបេក្ខជន និងអ្នកគាំទ្រ ព្រមទាំងមានការដង្ហែក្បួនខ្លះ នៅខេត្តកំពង់ចាម។ លោក ម៉ម សូណង់ដូ បញ្ជាក់ថា ការហែក្បួននេះមានអ្នកចូលរួមប្រមាណ ៣០០នាក់។
ចំណែកឯថ្នាក់ដឹកនាំគណបក្សប្រជាធិបតេយ្យមូលដ្ឋានវិញ បានចុះឃោសនានៅតាមឃុំ-សង្កាត់ដែលខ្លួនបានដាក់បេក្ខជនឈរឈ្មោះដូចធម្មតា មិនមានការជួបប្រជុំ ឬហែក្បួនទ្រង់ទ្រាយធំណាមួយឡើយ។ លោក សាម អ៊ីន ដែលជាអគ្គលេខាធិការបក្ស បញ្ជាក់ថា ការមិនហែក្បួនទ្រង់ទ្រាយធំនេះ ដោយសារតែវាជាការបោះឆ្នោតឃុំ-សង្កាត់ មិនមែនជាការបោះឆ្នោតថ្នាក់ជាតិនោះទេ ដូច្នេះការចុះពង្រឹងនៅតាមឃុំ-សង្កាត់ជារឿងចាំបាច់ជាង។
ចំណែកឯប្រធានគណបក្សអំណាចខ្មែរ លោក សួន សេរីរដ្ឋា បានចុះជួបជាមួយបេក្ខជនរបស់ខ្លួននៅខេត្តបន្ទាយមានជ័យ ដោយមិនមានការហែក្បួនអ្វីនោះដែរ។ លោកយល់ឃើញថា ការហែក្បួនទ្រង់ទ្រាយធំ មិនសំខាន់អ្វីសម្រាប់ការបោះឆ្នោតឃុំ-សង្កាត់នេះឡើយ ហើយវាមានតែនាំឱ្យកើតមានអំពើហិង្សាទៅវិញទេ។
រីឯលោក ពេជ្រ ស្រស់ ប្រធានគណបក្សយុវជនកម្ពុជាវិញ បញ្ជាក់ថា គណបក្សរបស់លោកមានការជួបជុំ និងហែក្បួនឃោសនាធំ ដែលមានអ្នកចូលរួមប្រមាណ ៣ពាន់នាក់ នៅខេត្តត្បូងឃ្មុំ ជាមូលដ្ឋានធំ និងជាខេត្តតែមួយគត់ដែលគណបក្សនេះដាក់បេក្ខជនឈរឈ្មោះ។
ដោយឡែកគណបក្សជនជាតិដើមប្រជាធិបតេយ្យកម្ពុជាវិញ មិនមានការជួបជុំ ឬដង្ហែក្បួនអ្វីឡើយ។ ប្រធានគណបក្សនេះ គឺលោក ប្លាង ស៊ីន បញ្ជាក់ថា គណបក្សរបស់លោកមិនមានធនធានថវិកាដើម្បីហែក្បួននោះទេ ហើយនៅថ្ងៃចុងក្រោយនេះ គណបក្សគ្រាន់តែចាក់សារនយោបាយតាមឧបករណ៍បំពងសំឡេង តាមមូលដ្ឋានដែលមានបក្ខជនឈរឈ្មោះដូចសព្វដងតែប៉ុណ្ណោះ។
អាស៊ីសេរី បានព្យាយាមទាក់ទងប្រធានគណបក្សសញ្ជាតិកម្ពុជា លោក សេង សុខេង ដែរ ដើម្បីសាកសួរអំពីការឃោសនារបស់បក្សនៅថ្ងៃចុងក្រោយនេះ តែលោកមិនលើកទូរស័ព្ទ ចំណែកឯប្រធានស្ដីទីគណបក្សសាធារណរដ្ឋប្រជាធិបតេយ្យ លោក ចាន់ យ៉េត វិញ មិនអាចទាក់ទងបានទេ៕
