Clik here to view.
ប្រជាពលរដ្ឋដែលមិនទាន់មានអត្តសញ្ញាណប័ណ្ណសញ្ជាតិខ្មែរសម្រាប់យកទៅបង្ហាញដើម្បីបោះឆ្នោតជ្រើសរើសក្រុមប្រឹក្សាឃុំ-សង្កាត់នៅថ្ងៃទី៤ មិថុនា អាចយកឯកសារបញ្ជាក់អត្តសញ្ញាណបម្រើឲ្យការចុះឈ្មោះបោះឆ្នោត ទៅបោះឆ្នោតបាន ក្រោយពីទទួលបានការផ្តល់សុពលភាព។
សេចក្តីណែនាំរួមចេញដោយក្រសួងមហាផ្ទៃ និងគណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី១ មិថុនា បញ្ជាក់ថា ពលរដ្ឋដែលបានចុះឈ្មោះបោះឆ្នោតឆ្នាំ២០១៦ ដោយប្រើប្រាស់ឯកសារបញ្ជាក់អត្តសញ្ញាណបម្រើឲ្យការចុះឈ្មោះបោះឆ្នោត និងមានឈ្មោះបោះឆ្នោតក្នុងបញ្ជីបោះឆ្នោតផ្លូវការឆ្នាំ២០១៦ ហើយមិនទាន់មានអត្តសញ្ញាណប័ណ្ណសញ្ជាតិខ្មែរ ពួកគេអាចយកឯកសារបញ្ជាក់អត្តសញ្ញាណបម្រើឲ្យការចុះឈ្មោះបោះឆ្នោត ទៅជួបគណៈកម្មការឃុំ-សង្កាត់រៀបចំការបោះឆ្នោតផ្ទាល់ខ្លួន ដោយស្នើសុំឲ្យគណៈកម្មការឃុំ-សង្កាត់រៀបចំការបោះឆ្នោត បញ្ជាក់អំពីការមានឈ្មោះក្នុងបញ្ជីបោះឆ្នោត ចុះហត្ថលេខា បោះត្រា និងចុះកាលបរិច្ឆេទផ្តល់សុពលភាពទៅលើឯកសារបញ្ជាក់អត្តសញ្ញាណបម្រើឲ្យការចុះឈ្មោះបោះឆ្នោត ដើម្បីប្រើក្នុងការបោះឆ្នោត។
សេចក្តីណែនាំរួមសង្កត់ធ្ងន់ថា ការស្នើសុំ និងការបញ្ជាក់លើឯកសារបញ្ជាក់អត្តសញ្ញាណនេះ ត្រូវបញ្ចប់ត្រឹមថ្ងៃទី៣ ខែមិថុនា វេលាម៉ោង ៥:៣០នាទីល្ងាច៕
