ក្រុមកម្មករដែលកំពុងបម្រើការនៅតាមរោងចក្រ ត្អូញត្អែរថា ពួកគេអាចប្រឈមមុខទៅនឹងការបាត់បង់សិទ្ធិបោះឆ្នោតសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ខាងមុខនេះ។ ការឈប់សម្រាកសម្រាប់កម្មករដែលបម្រើការនៅក្នុងវិស័យកាត់ដេរ បានក្លាយទៅជារឿងដ៏ចម្រូងចម្រាសរវាងក្រុមអ្នកនយោបាយ។
ស្របពេលអតីតប្រធានគណបក្សប្រឆាំង បានចោទប្រកាន់បញ្ហានេះថាអ្នកទទួលខុសត្រូវ គឺអាជ្ញាធររបស់រដ្ឋ ក្រសួងការងារ វិញបានបដិសេធ និងថែមទាំងថ្កោលទោសអតីតប្រមុខបក្សប្រឆាំងចំពោះការរិះគន់នេះថែមទៀតផង។
សមាគមរោងចក្រកាត់ដេរនៅកម្ពុជា ឬហៅកាត់ថា ជីម៉ាក់ (GMAC) បញ្ជាក់ជំហរថា ពុំមានគោលការណ៍ណាមួយតម្រូវឲ្យកម្មករឈប់សម្រាកបន្ថែមនៅថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់នោះឡើយ។
អគ្គលេខាធិការនៃសមាគមរោងចក្រកាត់ដេរនៅកម្ពុជា លោក កាំង ម៉ូនីកា ឲ្យដឹងនៅថ្ងៃទី១ ខែមិថុនា ថា នៅតាមរោងចក្រពុំទាន់ទទួលបានការប្រកាសជាផ្លូវការពីរដ្ឋាភិបាល ដែលតម្រូវឲ្យកម្មករបានឈប់បន្ថែមក្រៅពីថ្ងៃឈប់សម្រាកនៅថ្ងៃអាទិត្យ នោះទេ។ លោកបន្តថា ក្នុងករណីដែលពុំមានភ្លើងខៀវសម្រាប់ថ្ងៃឈប់ពិសេសណាមួយបន្ថែមទៀតនេះ មានន័យថា កម្មករដែលកំពុងបម្រើការនៅតាមរោងចក្រ និងសហគ្រាសផ្សេងទៀត ពុំមានសិទ្ធិពិសេសឈប់សម្រាកបន្ថែមពីលើថ្ងៃបោះឆ្នោតទៀតនោះឡើយ។ លោកបន្តថា «គឺថាមិនមានការណែនាំណាឲ្យមានការឈប់សម្រាកបន្ថែម។ ដូច្នេះបើមិនមានការណែនាំឲ្យឈប់បន្ថែម បានន័យថាអត់ឈប់ សាមញ្ញអ៊ីចឹងបាទ!»។
កាលពីថ្ងៃទី៣១ ខែឧសភា ក្រសួងការងារ បានថ្កោលទោសអតីតមេបក្សប្រឆាំង ដោយចោទប្រកាន់ថា លោក សម រង្ស៊ី និយាយមួលបង្កាច់ខុសពីការពិត ហើយថាអាជ្ញាធររដ្ឋ គឺជាអ្នកពាក់ព័ន្ធខ្ពស់បំផុត ដែលនាំឲ្យកម្មករខកខានមិនបានទៅបោះឆ្នោត។ ប្រតិកម្មរបស់ក្រសួងការងារ និងបណ្ដុះបណ្ដាលវិជ្ជាជីវៈ នេះ ធ្វើឡើងមួយថ្ងៃបន្ទាប់ពីលោក សម រង្ស៊ី អំពាវនាវកាលពីថ្ងៃទី៣០ ខែឧសភា ឲ្យកម្មករប្រើសិទ្ធិរបស់ខ្លួនទៅបោះឆ្នោត បើទោះជាត្រូវអាជ្ញាធររបស់រដ្ឋបិទសិទ្ធិសេរីភាពក៏ដោយចុះ។
អាស៊ីសេរី ពុំអាចសុំការបំភ្លឺចំពោះការចោទប្រកាន់នេះពីលោក សម រង្ស៊ី អតីតប្រធានគណបក្សប្រឆាំងបានទេ។ ស្របពេលលោក ហង្ស ពុទ្ធា អ្នកនាំពាក្យ គ.ជ.ប និងលោក ហេង សួរ អ្នកនាំពាក្យក្រសួងការងារ ក៏អាស៊ីសេរី មិនអាចសុំការអត្ថាធិប្បាយបានដែរនៅថ្ងៃទី១ ខែមិថុនា។
ជុំវិញការខ្វែងគំនិតគ្នានេះ ទាំងគណៈកម្មាធិការជាតិរៀបចំការបោះឆ្នោត និងក្រសួងការងារ ហាក់ទម្លាក់ការទទួលខុសត្រូវឲ្យគ្នាទៅវិញទៅមក។ ស្ថាប័ន គ.ជ.ប បានផ្ដល់សិទ្ធិសម្រេចនេះឲ្យទៅក្រសួងសាមី ដែលធ្វើការជិតដិតជាមួយកម្មករ និងភាគីរោងចក្រ។ ប៉ុន្តែភារៈនេះ ត្រូវបានក្រសួងការងារ បកស្រាយថា បញ្ហានេះគឺជាកាតព្វកិច្ច និងការទទួលខុសត្រូវរបស់ស្ថាប័នរៀបចំការបោះឆ្នោតទៅវិញទេ។
បញ្ហានេះ ទាំង គ.ជ.ប និងក្រសួង បានត្រឹមចេញសេចក្ដីប្រកាសព័ត៌មានដែលមានខ្លឹមសារប្រហាក់ប្រហែលគ្នា ដោយអំពាវនាវឲ្យម្ចាស់សហគ្រាស សិប្បកម្ម និងរោងចក្រកាត់ដេរ ជួយសម្រួលឲ្យកម្មករបានបោះឆ្នោតនៅថ្ងៃអាទិត្យ ទី៤ ខាងមុខនេះ។ ប៉ុន្តែស្ថាប័នទទួលខុសត្រូវទាំងពីរនេះ រងការរិះគន់ពីកម្មករថា ពុំបានជំរុញឲ្យម្ចាស់សហគ្រាស ឬរោងចក្រចេញច្បាប់ឈប់បន្ថែមក្នុងថ្ងៃបោះឆ្នោតនេះ។
កម្មការិនីដែលបម្រើការនៅរោងចក្រមួយស្ថិតនៅម្ដុំផ្លូវវ៉េងស្រេង ដែលថ្លែងសុំមិនបញ្ចេញឈ្មោះ លើកឡើងថា ក្នុងរោងចក្រដែលនាងធ្វើការ គឺភាគីរោងចក្រមិនអនុញ្ញាតឲ្យកម្មករបានឈប់សម្រាកមុនមួយថ្ងៃ ឬក្រោយមួយថ្ងៃនៃថ្ងៃបោះឆ្នោតឡើយ។ លោកស្រីបន្តថា បើទោះជាមានច្បាប់ដ៏តឹងតែងបែបនេះក៏ដោយចុះ ក្រុមកម្មករបានសម្រេចចិត្តរួចហើយ គឺត្រូវចេញដំណើរទៅបោះឆ្នោតដូចពលរដ្ឋដទៃទៀតដែរ។ លោកបន្តថា «ពួកខ្ញុំថាបើទោះបីគេមិនឲ្យទៅ ក៏ខ្ញុំត្រូវតែទៅ ទោះគេកាត់លុយក៏ដោយ»។
ក្រោយការបោះឆ្នោតជាតិកាលពីឆ្នាំ២០១៣ កម្មករបានប្រមូលផ្ដុំគ្នានៅម្ដុំផ្លូវវ៉េងស្រេង ម្ដងរួចមកហើយ។ បាតុកម្មដែលធ្វើឡើងក្នុងទ្រង់ទ្រាយធំពេលនោះ កម្លាំងសមត្ថកិច្ចបើកការបាញ់បង្ក្រាបប្រឆាំងការតវ៉ា រហូតមានស្លាប់ របួស បាត់ខ្លួន និងជាប់ពន្ធនាគារ។
សហជីពដែលតែងឈរខាងកម្មករយល់ឃើញថា ប្រហែលឆ្លងកាត់បទពិសោធន៍នៃការតវ៉ាពីកម្មករដ៏តានតឹងនេះហើយ ទើបជំរុញឲ្យរដ្ឋាភិបាលមិនចេញគោលការណ៍ឲ្យកម្មករបានឈប់សម្រាកបន្ថែមនៅថ្ងៃបោះឆ្នោតនេះ៕