វិបត្តិជំងឺរាតត្បាតសាកលកូវីដ-១៩ កំពុងរុញច្រានពលរដ្ឋនៅកម្ពុជា និងបណ្តាប្រទេសមួយចំនួនក្នុងតំបន់អាស៊ី ឲ្យធ្លាក់ចូលក្នុងអំពើទាសភាពសម័យទំនើបកាន់តែធ្ងន់ធ្ងរជាងពេលណាៗទាំងអស់។ នេះបើតាមការរកឃើញ និងការវាយតម្លៃរបស់ស្ថាប័នជំនាញអន្តរជាតិមួយ នៅក្នុងសន្ទស្សន៍សាកលអំពីទាសភាពសម័យទំនើបឆ្នាំ២០២០ ទើបនឹងចេញផ្សាយកាលពីថ្ងៃទី៣ កញ្ញា។ មន្ត្រីឃ្លាំមើលសិទ្ធិមនុស្ស ជំរុញឲ្យរដ្ឋាភិបាលផ្តល់ថវិកាជួយពលរដ្ឋក្រីក្រឲ្យបានកាន់តែច្រើនបន្ថែមទៀត ដើម្បីកុំឲ្យពលរដ្ឋកម្ពុជាងាយប្រឈមនឹងហានិភ័យនៃទាសករសម័យទំនើបកាន់តែធ្ងន់ធ្ងរថែមទៀតខណៈកំពុងជួបវិបត្តិកូវីដ-១៩។
ការរកឃើញនេះចេញផ្សាយនៅក្នុងសន្ទស្សន៍អំពីទាសភាពសម័យទំនើប ឆ្នាំ២០២០ របស់ក្រុមហ៊ុនវិភាគហានិភ័យ និងព្យាករណ៍យុទ្ធសាស្ត្រអន្តរជាតិមួយ ឈ្មោះ វើរីសគ៍ ម៉ាផលក្រូហ្វ (Verisk Maplecroft) ដែលមានមូលដ្ឋាននៅចក្រភពអង់គ្លេស។ ក្នុងសន្ទស្សន៍ប្រចាំឆ្នាំ២០២០ អំពីទាសភាពសម័យទំនើប ស្ថាប័នមួយនេះ វាយតម្លៃថា កម្ពុជា រួមនឹងបណ្តាប្រទេសមួយចំនួនក្នុងតំបន់អាស៊ី រួមមានដូចជា បង់ក្លាដេស (Bangladesh) ចិន (China) មីយ៉ាន់ម៉ា (Myanmar) ឬភូមា ឥណ្ឌា (India) និង វៀតណាម (Vietnam) ជាប្រទេសប្រឈមនឹងហានិភ័យខ្ពស់ដែលពលរដ្ឋងាយធ្លាក់ខ្លួនចូលក្នុងអំពើទាសភាពសម័យទំនើប ក្នុងពេលមានវិបត្តិជំងឺកូវីដ-១៩នេះ។ ក្នុងចំណោម ១៩៨ប្រទេសនៅទូទាំងពិភពលោក កម្ពុជាជាប់លេខរៀងទី៣២ ជាប្រទេសងាយរងគ្រោះខ្លាំងខាងអំពើទាសភាពសម័យទំនើប គឺអាក្រក់ជាងប្រទេសវៀតណាម និងប្រទេសឥណ្ឌូនេស៊ី (Indonesia) ទៅទៀត ខណៈប្រទេសមួយចំនួនទៀតដែលរងស្ថានភាពអាក្រក់ខ្លាំង មានដូចជាប្រទេសបង់ក្លាដេស ជាប់លេខទី១៨ បន្តដោយប្រទេសចិន និងភូមា ជាដើម។ បើតាមក្រុមហ៊ុនជំនាញវិភាគហានិភ័យនេះ សន្ទស្សន៍នេះវាស់វែងអំពីហានិភ័យដល់អាជីវកម្មដោយសារតែអាចជាប់ពាក់ព័ន្ធនឹងអំពើទាសភាព ការជួញដូរមនុស្ស និងពលកម្មដោយបង្ខំនៅក្នុងខ្សែចង្វាក់ផលិតកម្ម ប្រតិបត្តិការ ឬការផ្តល់សេវាកម្មរបស់ខ្លួន។
In this year’s #HumanRightsOutlook, we start by looking at how modern slavery risks have intensified in the epicentre of global manufacturing with @SNazalya. Learn more now: https://t.co/WtUSQGTokG#modernslavery #moderndayslavery #humanrights #asia #manufacturing pic.twitter.com/LPvt7baLvy
— Verisk Maplecroft (@MaplecroftRisk) September 4, 2020
ស្ថាប័ននេះ រកឃើញថា មូលដ្ឋានឧស្សាហកម្មផលិតនៅតំបន់អាស៊ី ជាពិសេសវិស័យរោងចក្រកាត់ដេរ កំពុងជួបប្រទះនូវការកើនឡើងគួរឲ្យកត់សម្គាល់នៃអំពើទាសភាពសម័យទំនើប ក្នុងរយៈពេល ៤ឆ្នាំ ចុងក្រោយនេះ ហើយដែលហានិភ័យនេះកាន់តែធ្ងន់ធ្ងរថែមទៀតស្របពេលដែលប្រទេសនានាកំពុងជួបប្រទះនឹងការធ្លាក់ចុះសេដ្ឋកិច្ចបង្កឡើងដោយវិបត្តិកូវីដ-១៩។ ស្ថាប័នវាយតម្លៃនេះ ថា កម្មករនិយោជិតរាប់លាននាក់ក្នុងតំបន់អាស៊ី បានបាត់បង់ការងារធ្វើដោយសារតែមានការបិទ ឬការបង្ខំចិត្តកាត់បន្ថយការងាររបស់កម្មករនៅតាមរោងចក្រនានា។ ស្ថាប័នដដែលនេះ ផ្តល់អំណះអំណាងថា ហេតុការណ៍នេះ បានរុញច្រានឲ្យកម្មករនិយោជិតជាច្រើនធ្លាក់ខ្លួនស្វែងរកការងារធ្វើក្នុងវិស័យសេដ្ឋកិច្ចក្រៅប្រព័ន្ធនៅតាមប្រទេសដែលមានកង្វះខាតប្រព័ន្ធគាំពារផ្នែកការងារស្រាប់ ដែលជាហេតុធ្វើឲ្យពួកគេងាយប្រឈមនឹងហានិភ័យនៃអំពើទាសភាពសម័យទំនើប ឬប្រឈមនឹងទម្រង់ផ្សេងៗនៃការកេងប្រវ័ញ្ចកម្លាំងពលកម្ម។
អាស៊ីសេរី មិនអាចទាក់ទងអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានទេ ដើម្បីសុំការបំភ្លឺជុំវិញរឿងនេះ ដោយសារតែលោកមិនលើកទូរស័ព្ទកាលពីល្ងាចថ្ងៃទី០៤ កញ្ញា។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ លោក អំ សំអាត យល់ស្របទៅនឹងការរកឃើញនេះ ដែលថាវិបត្តិកូវីដ-១៩ កំពុងរុញច្រានឲ្យពលរដ្ឋនៃប្រទេសមួយចំនួននៅតំបន់អាស៊ី ជាពិសេស កម្ពុជា ធ្លាក់ចូលក្នុងអំពើទាសភាពសម័យទំនើប ដោយសារតែពួកគេបាត់បង់ការងារធ្វើ ហើយវិធានការរបស់រដ្ឋជួយពលរដ្ឋក្រីក្រនៅមានកម្រិតនៅឡើយ៖ «យើងគិតថា គេអាចនឹងមើលឃើញ ទស្សន៍ទាយឃើញអ៊ីចឹងដែរ ពីព្រោះបញ្ហាកូវីដ-១៩ នេះ វាជាបញ្ហាសាកល បញ្ហាពិភពលោក។ អ៊ីចឹងហើយ វិបត្តិអត់ការងារធ្វើក៏ច្រើន ជាពិសេសប្រទេសក្នុងតំបន់អាស៊ី ប្រទេសដែលក្រីក្រហ្នុងអាចប្រឈមនឹងទាសភាពសម័យទំនើបលឿនដោយសារតែមានការចំណាកស្រុកច្រើន»។
លោក អំ សំអាត ស្នើជាដំណោះស្រាយថា រដ្ឋាភិបាលគួរបន្តបញ្ចេញបន្ថែមថវិកាឲ្យបានច្រើនជាងបច្ចុប្បន្ននេះ ដើម្បីជួយដោះស្រាយ និងសម្រួលបន្ទុកដល់ពលរដ្ឋក្រីក្រ និងងាយរងគ្រោះពីវិបត្តិជំងឺកូវីដ-១៩ ដែលអាចអូសបន្លាយយូរ៖ «ប្រទេសកម្ពុជា យើងឃើញរដ្ឋាភិបាលបានបញ្ចេញកញ្ចប់ថវិកាដែរ ក៏ប៉ុន្តែ គ្រាន់តែថា វាអាចនឹងអូសបន្លាយរយៈពេលយូរ។ អ៊ីចឹង ត្រូវតែមានការគាំទ្រទៅដល់ប្រជាពលរដ្ឋដែលក្រីក្រហ្នុង ធ្វើម៉េចឲ្យគាត់មានជីវភាពក្នុងការរស់នៅបាន។ អ៊ីចឹងហើយបានជាគេមើលឃើញថា ប្រទេសក្រីក្រគឺងាយប្រឈមជាងគេនៅក្នុងតំបន់អាស៊ីយើងនេះ»។
កាលពីខែឧសភា ស្របពេលដែលការរាតត្បាតជំងឺកូវីដ-១៩ កំពុងកើតមានឡើងយ៉ាងពេញបន្ទុក ធនាគារពិភពលោក បានព្យាករណ៍ថា ពលរដ្ឋខ្មែរជិត ២លាននាក់នឹងត្រូវធ្លាក់ខ្លួនក្រដោយសារតែបាត់បង់ការងារធ្វើបណ្តាលមកពីវិបត្តិជំងឺកូវីដ-១៩ បន្ថែមលើចំនួនអត្រាពលរដ្ឋក្រីក្រដែលមានស្រាប់ប្រមាណ ១៣,៥%។ កន្លងទៅ នៅមុនពេលមានវិបត្តិនេះ ធនាគារដដែលនេះ ធ្លាប់ព្រមានថា ពលរដ្ឋខ្មែរប្រមាណ ៤,៥លាននាក់ នៅតែងាយនឹងធ្លាក់ចូលក្នុងភាពក្រីក្រដដែល នៅពេលដែលសេដ្ឋកិច្ចរងផលប៉ះពាល់ ឬរងហានិភ័យពីក្រៅប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
