Quantcast
Channel: ព័ត៌មាន​ថ្មីៗ
Viewing all 11174 articles
Browse latest View live

អ្នកវិភាគ​មើល​ឃើញ​ថា មេ​ដឹក​នាំ​អាស៊ាន​បរាជ័យ​លើ​ការ​រួម​គ្នា​ស្ដារ​សេដ្ឋកិច្ច​នៅ​ក្នុង​តំបន់​ឡើង​វិញ

$
0
0

រយៈ​ពេល​ជិត​ពីរ​ខែ​មក​នេះ មេ​ដឹក​នាំ​អាស៊ាន​មិន​បាន​អនុវត្ត​សេចក្ដីថ្លែងការណ៍​រួម ដែល ប្ដេជ្ញា​រួម​គ្នា​ស្ដារ​សេដ្ឋកិច្ច ពាណិជ្ជកម្ម  ដើម្បី​ប្រយុទ្ធ​នឹង​ផល​ប៉ះ​ពាល់​សេដ្ឋកិច្ច ដោយសារ​តែ​ជំងឺ​កូវីដ១៩ នោះ​ទេ។ ក្រុម​អ្នក​វិភាគ​មើល​ឃើញ​ថា មេ​ដឹក​នាំ​អាស៊ាន​នៅ​ក្នុង​ពេល​នេះ​មិន​សហការ​គ្នា​ដូច​សហគមន៍​អឺរ៉ុប ដើម្បី​ដោះ​ស្រាយ​ផល​ប៉ះពាល់​សេដ្ឋកិច្ច​រួម​គ្នា​ឡើយ។ ប្រទេស​អាស៊ាន​គិត​តែ​ពី​ផល​ប្រយោជន៍​រៀងៗ ខ្លួន មិន​មែន​ជា​សហគមន៍​តែ​មួយ​វាសនា​តែ​មួយ​ដូច​ការ​អះអាង​របស់​ខ្លួន​នោះ​ឡើយ។

ក្រុម​អ្នក​វិភាគ​មើល​ឃើញ​ថា សមាគម​អាស៊ី​អាគ្នេយ៍ ឬ​អាស៊ាន​ហាក់​បរាជ័យ​លើ​ការ​ប្ដេជ្ញា​រួម​គ្នា​ថា នឹង​ស្ដារ​សេដ្ឋកិច្ច​រួម​គ្នា​ឡើង​វិញ ដើម្បី​ប្រយុទ្ធ​នឹង​ផល​ប៉ះពាល់​ពី​ជំងឺ​​កូវីដ១៩ រាតត្បាត ដែល​បញ្ហា​នេះ នឹង​នាំ​ឲ្យ​ប្រទេស​មួយ​ចំនួន​អាច​ប្រឈម​នឹង​បញ្ហា​សន្តិសុខ​ស្បៀង ដោយសារ​ប៉ះ​ពាល់​សេដ្ឋកិច្ច​ធ្ងន់ធ្ងរ។

អ្នកឃ្លាំមើល​ផ្នែក​អភិវឌ្ឍន៍​សង្គម លោក បណ្ឌិត សេង សារី មានប្រសាសន៍ថា អាស៊ាន​ហាក់​ដូច​ជា​សហគមន៍​មួយ​បង្ហាញ​ពិភព​លោក​ឲ្យ​មើល​ឃើញ​ថា ជា​តំបន់​មួយ​រួបរួម​គ្នា ក៏​ប៉ុន្តែ​បញ្ហា​ជាក់​ស្ដែង​អាស៊ាន​មិនបាន​រួបរួម​គ្នា​ឡើយ។ លោក​បញ្ជាក់​ថា នៅ​ក្នុង​កំឡុង​ពេល​ប៉ះ​ពាល់​ដោយ​សារ​ជំងឺ​កូវីដ១៩ បើ​ទោះ​ជា​មេ​ដឹក​នាំ​អាស៊ាន​បាន បើក​កិច្ច​ប្រជុំ​កំពូល​អាស៊ាន​លើក​ទី៣៦ តាម​វីឌីអូ​ខុនហ្វឺរិន (Video Conference) ដើម្បី​រក​វិធី​ទប់ទល់​នឹង​ផល​ប៉ះ​ពាល់​រួម​គ្នា​ក្ដី តែ​ជាក់​ស្ដែង​មក​ទល់​ពេល​នេះ អាស៊ាន​មិន​អាច​សម្រេច​គោលដៅ​ដែល​បាន​ដាក់​ចេញ​របស់​ខ្លួន​នោះ​នៅ​ឡើយ។ លោក​បន្ថែម​ថា អាស៊ាន​មិន​ត្រឹម​តែ​មិន​រក​វិធី​ជួយ​គ្នា ឬ​រួម​គ្នា​ស្ដារ​សេដ្ឋកិច្ច​ប៉ុណ្ណោះ​ទេ ប៉ុន្តែ​អាស៊ាន​ថែម​ទាំង ប្រកួត​ប្រជែង​គ្នា ឬ​គិត​តែ​ពី​ប្រយោជន៍​រៀងៗ ខ្លួន​ទៀត​ផង៖ «»

លទ្ធផល​នៃ​កិច្ចប្រជុំ​កំពូល​អាស៊ាន​លើក​ទី៣៦ កាល​ពី​ថ្ងៃ​ទី១៤ ខែមេសា ដែល​ដឹក​នាំ​ដោយ​នាយក​រដ្ឋមន្ត្រី​វៀតណាម ក្នុង​នាម​ជា​ប្រធាន​អាស៊ាន​ប្តូរ​វេន​នោះ សមាជិក​អាស៊ាន​ទាំង​អស់ បាន​ចេញ​សេចក្ដីថ្លែងការណ៍​អនុម័ត​កិច្ច​ព្រមព្រៀង​រួម​គ្នា​មួយ មាន ៨ចំណុច ដើម្បី​ទប់ទល់​នឹង​ការ​រីក​រាលដាល​ជំងឺ​កូវីដ១៩ នៅ​ថ្នាក់​តំបន់។ ក្នុង​ចំណោម​កិច្ច​ព្រមព្រៀង​ទំាង ៨ចំណុច ដែល​និយាយ​ពី​ការ​ដាក់​វិធានការ​រួម​ទប់ទល់​នឹង​ការ​ឆ្លង​រីក​រាលដាល​ជំងឺ​កូវីដ​នោះ មាន ៣ចំណុច ដែល​សមាជិក​អាស៊ាន​ទាំង១០ បាន​ឯកភាព​គ្នា គឺ​ផ្ដោត​លើ​សហប្រតិបត្តិការ​ពាណិជ្ជកម្ម​នៅ​ក្នុង​តំបន់ និង​ក្រៅ​តំបន់ ដើម្បី​រក្សា​ស្ថិរភាព​សេដ្ឋកិច្ច និង​សន្តិសុខ​ស្បៀង។

នៅ​ក្នុង​កិច្ចប្រជុំ​កំពូល​អាស៊ាន​លើក​ទី៣៦ នោះ នាយករដ្ឋមន្ត្រី​មន្ត្រី​សិង្ហ​បុរី​លោក លី សៀនឡុង (Lee Hsien Loon) ដែល​ជា​ប្រទេស​លេចធ្លោ​ផ្នែក​សេដ្ឋកិច្ច​ជាង​គេ​នៅ​ក្នុង​តំបន់​នោះ​លើក​ឡើងថា ដើម្បី​កសាង​ភាព​ធន់​សម្រាប់​វិបត្តិ​សេដ្ឋកិច្ច​នា​ពេល​អនាគត បណ្តា​ប្រទេស​ក្នុង​តំបន់​គួរ​តែ​មាន​លក្ខណៈ​វិនិច្ឆ័យ​រួម ស្តីពី​ការ​រឹត​បន្តឹង​ការ​ធ្វើ​ដំណើរ និង​ពាណិជ្ជកម្ម។ លោក​បាន​រំលឹក​ថា មេ​ដឹក​នាំ​អាស៊ាន​ទាំង​អស់ ត្រូវ​បង្កើន​ទំនុក​ចិត្ត​គ្នា​ទៅ​វិញ​ទៅ​មក ហើយ​អាស៊ាន និង​អឺរ៉ុប គឺ​ជា​ដៃ​គូ​ពាណិជ្ជកម្ម​ដ៏​សំខាន់​មួយ ដែល​បណ្ដា​ប្រទេស​អាស៊ាន ត្រូវ​តែ​រក្សា​ពាណិជ្ជកម្ម​ទាំង​នៅ​ក្នុង​តំបន់ ទាំង​ដៃគូ​ពាណិជ្ជកម្ម​នៅ​ក្រៅ​តំបន់ ពិសេស​សហភាព​អឺរ៉ុប ដែល​ជា​ប្រភព​ទីផ្សារ​ដ៏​ធំ​របស់​អាស៊ាន។

រីឯ​លោក​នាយក​រដ្ឋមន្ត្រី​ ហ៊ុន សែន បាន​ស្នើ​ឲ្យ​សមាជិក​អាស៊ាន​ទាំង១០ និង​អាស៊ាន​បូក​បី មាន​ជប៉ុន កូរ៉េ​ខាង​ត្បូង និង​ចិន ត្រូវ​រួម​គ្នា​រក​យន្តការ​ដោះ​ស្រាយ​វិបត្តិ​សេដ្ឋកិច្ច និង​បើក​លំហ​សេដ្ឋកិច្ច​នៃ​ការ​ដឹក​ជញ្ជូន​ទំនិញ​ឆ្លង​ដែន​ទាំង​ផ្លូវ អាកាស និង​ផ្លូវ​គោក៖ «»

ទោះ​បី​ជា​មេ​ដឹក​នាំ​អាស៊ាន​បាន​ព្រមព្រៀង​និង​ប្ដេជ្ញា​ពី​ការ​ស្ដារ​សេដ្ឋកិច្ច​រួម​គ្នា​ឡើង​វិញ​បែប​នេះក្ដី ក៏​បណ្ឌិត សេង សារី មើល​ឃើញ​ថា មក​ទល់​ពេល​នេះ អ្វី​ដែល​អាស៊ាន​អាច​ធ្វើ​បាន​នោះ គឺ​ការ​ជញ្ជូន​ព័ត៌មាន​ឲ្យ​គ្នា​ទៅ​វិញ​ទៅ​មក​អំពី ការ​រាតត្បាត​ជំងឺ​កូវីដ១៩ នៅ​ក្នុង​តំបន់ និង​ការ​ដឹក​ជញ្ជូន​ទំនិញ​ឆ្លង​ពី​ប្រទេស​មួយ​ទៅ​ប្រទេស​ទៅ​ប្រទេស​មួយ​ទៀត ដូចជា ការ​ដឹក​នាំ​ពី​ថៃ​ចូល​កម្ពុជា ការ​ដឹក​ទំនិញ​ពី​វៀតណាម​ចូល​មក​កម្ពុជា និង​ការ​ដឹក​នាំ​ទំនិញ​ពី​កម្ពុជា​ចូល​ទៅ​ប្រទេស​ទាំង​នេះ​វិញ​ជា​ដើម។

សមាគម​ប្រជាជាតិ​អាស៊ី​អាគ្នេយ៍ ដែល​មាន​ប្រជាពលរដ្ឋ​ជាង ៦០០លាន​នាក់ បាន​ឯកភាព​គ្នា​កាល​ពី​ឆ្នាំ២០០៧ មក ដោយ​ផ្ដោត​លើ​សសរស្ដម្ភ​ចំនួន​បី រួម​មាន សហគមន៍​សន្តិសុខ-​នយោបាយ សហគមន៍​សេដ្ឋកិច្ច និង​សហគមន៍​វប្បធម៌-​សង្គម ដែល​សហគមន៍​ទាំង​បី​នេះ មាន​ទំនាក់ទំនង​គ្នា​ទៅ​វិញ​ទៅ​មក។ យ៉ាងណាក៏ដោយ  មាន​តែ​សហគមន៍​សេដ្ឋកិច្ច​អាស៊ាន​ទេ ដែល​កន្លង​មក ​ត្រូវ​បាន​អ្នក​ជំនាញ​ខាង​កិច្ចការ​អន្តរជាតិ​មើល​ឃើញ​ថា អាស៊ាន​សហការ​គ្នា​បាន​ល្អ​នៅ​ក្នុង​ការ​ធ្វើ​ពាណិជ្ជកម្ម​នៅ​ក្នុង​តំបន់​នោះ។ សហគមន៍​សេដ្ឋកិច្ច​អាស៊ាន​នេះ អនុញ្ញាត​ឲ្យ​មាន​លំហូរ​ទំនិញ​ឲ្យ​គ្នា​ទៅ​វិញ​ទៅ​មក​ដោយ​សេរី​ រួម​ទាំង សេវាកម្ម ការ​វិនិយោគ និង​លំហូរ​កម្លាំង​ពលកម្ម​ជា​ដើម។

ប៉ុន្តែ​នៅ​ក្នុង​គ្រា​ដែល​ជំងឺ​កូវីដ១៩ ធូរ​ស្រាល​នៅ​ឡើយ​នេះ ប្រទេស​នៅ​ក្នុង​តំបន់​មិន​ទាន់​បាន​បើក​ច្រក​ព្រំដែន​វិញ​នៅ​ឡើយ ដូចជា កម្ពុជា ថៃ និង​កម្ពុជា វៀតណាម​ជាដើម។ ការ​បិទ​ច្រក​ព្រំដែន​នេះ ធ្វើ​ឲ្យ​ប្រទេស​ដែល​មាន​សេដ្ឋកិច្ច​ទន់​ខ្សោយ​ដូច​កម្ពុជា ឡាវ និង​ភូមា រង​ផល​ប៉ះ​ពាល់​ជាង​គេ។ ប្រទេស​ទាំង​បី ក៏​មាន​ពលករ​ចំណាកស្រុក​របស់​ខ្លួន​ជា​ច្រើន​លាន​នាក់​នៅ​ក្នុង​ប្រទេស​ថៃ ដែល​រង​ផល​ប៉ះពាល់​ខ្លាំង​ក្នុង​អំឡុង​ពេល​វិបត្តិ​ជំងឺ​កូវីដ១៩ នេះ។

កាល​ពី​ថ្ងៃ​ទី២៥ ឧសភា ប្រធាន​សមាគម​ពង្រឹង​សេដ្ឋកិច្ច​ក្រៅ​ប្រព័ន្ធ​កម្ពុជា​ និង​ជា​​តំណាង​ប្រជាពលរដ្ឋ​នៅ​ក្រុង​ប៉ោយប៉ែត​ លោក ឌិន ពុទ្ធី ថ្លែង​នៅ​ព្រឹក​ថ្ងៃ​ទី​២៥​ឧសភា​ថា ពួក​គាត់​នឹង​ជាង ១.៥០០នាក់ ព្រមាន​ធ្វើ​បាតុកម្ម​បើ​សិន​ជា​អាជ្ញាធរ​កម្ពុជា​និង​ថៃ​នៅតែ​បិទ​ច្រក​ទ្វារ​ព្រំដែន​អន្តរជាតិ​ប៉ោយប៉ែត​ ពីព្រោះ​ការ​បិទ​ច្រក​ជាង ២ខែ​មក​នេះ​ធ្វើ​ឲ្យ​ប៉ះពាល់​សេដ្ឋកិច្ច​ពួក​គាត់​ធ្ងន់ធ្ងរ។ លោក​ថា ខណៈ ច្រក​ព្រំដែន​បិទ​មិន​ឱ្យ​អាជីវករ និង​ពលករ​ខ្មែរ​ឆ្លង​ចូល​ទៅ​ថៃ​រកស៊ី តែ​បែរ​ជា​មាន​ការ​អនុញ្ញាត​ឱ្យ​ឡាន​ទំនិញ​របស់​ថៃ​ចូល​មក​កម្ពុជា​បាន​ដោយសេរី ហើយ​ឡាន​ដឹក​ទំនិញ​របស់​កម្ពុជា​ចូល​ទៅ​ថៃ​វិញ អាជ្ញា​ថៃ​រឹតត្បិត៖ «»

អ្នកឃ្លាំមើលផ្នែកអភិវឌ្ឍន៍សង្គម លោក បណ្ឌិត មាស នី មានប្រសាសន៍ថា ការ​ទាមទារ​ឲ្យ​បើក​ច្រក​ព្រំដែន​វិញ ជា​រឿង​លំបាក ហើយបើ​ខាង​កម្ពុជា​បើក​ច្រក​វិញ ភាគី​ខាង​ថៃ​មិន​បើក​ក៏​នៅ​តែ​ជា​បញ្ហា ព្រោះ​ភាគី​ទាំង​អស់​គិត​ពី​ការពារ​កុំ​ឲ្យ​ឆ្លង​ជំងឺ​កូវីដ១៩។ លោក បណ្ឌិត មាស នី បន្ថែម​ថា ប្រទេស​នៅ​ក្នុង​តំបន់​ដែល​ប៉ះពាល់​សេដ្ឋកិច្ច​ខ្លាំង​ជាង​គេ​នោះ គឺ​កម្ពុជា៖ «»

ទីភ្នាក់ងារ​វាយតម្លៃ​ចំណាត់ថ្នាក់​ឥណទាន​ពិភពលោក Moody’s Investors Services របស់​សហរដ្ឋ​អាមេរិក​បាន វាយ​តម្លៃ​ផល​ប៉ះពាល់​សេដ្ឋកិច្ច​កម្ពុជា​នឹង​ធ្លាក់​ចុះ​មក​នៅ​ត្រឹម ០,% នៅ​ឆ្នំា២០២០ ដោយសារ​តែ​ផល​ប៉ះពាល់​ពី​ជំងឺ​កូវីដ១៩ និង ដោយសារ​ការ​ធ្លាក់​ចុះ​សេដ្ឋកិច្ច​របស់​ចិន សហភាព​អឺរ៉ុប និង​អាមេរិក។ ការ​ធ្លាក់​ចុះ​សេដ្ឋកិច្ច​របស់​សហភាព​អឺរ៉ុប និង​អាមេរិក​ក៏​ប៉ះពាល់​ខ្លាំង​ដែរ​ដល់​តម្រូវ​ការ​ទំនិញ ឬ​ការ​បញ្ជា​ទិញ​ទំនិញ​របស់​កម្ពុជា ទៅ​កាន់​ទីផ្សារ​អឺរ៉ុប និង​អាមេរិក ដែល​បញ្ហា​នេះ​បង្ក​ហានិភ័យ​ខ្ពស់​ដល់​សេដ្ឋកិច្ច​កម្ពុជា៕


តុលាការ​កំពូល​ប្រគល់​អត្តសញ្ញាណប័ណ្ណ តែ​បន្ត​រក្សា​ទុក​លិខិត​ឆ្លងដែន​អតីត​អ្នក​យក​ព័ត៌មាន​អាស៊ី​សេរី

$
0
0

តុលាការ​កំពូល​នៅ​ថ្ងៃ​ទី២៦ ឧសភា​នេះ បាន​បើក​ការ​ជំនុំ​ជម្រះ​លើ​សំណើសុំ​អត្តសញ្ញាណប័ណ្ណ និង​លិខិត​ឆ្លង​ដែន​របស់​អតីត​អ្នក​យក​ព័ត៌មាន​អាស៊ី​សេរី​លោក អ៊ួន ឈិន និង​លោក យាង សុធារិន្ទ។ តុលាការ​ជាន់ខ្ពស់​មួយ​នេះ​បានសម្រេច​ផ្ដល់​អត្តសញ្ញាណប័ណ្ណ​ឱ្យ​លោក អ៊ួន ឈិន វិញ ក៏​ប៉ុន្តែ​នៅ​តែ​រក្សា​ទុក​លិខិត​ឆ្លង​ដែន​របស់​អ្នក​ទាំង​ពីរ​ដដែល។

តុលាការ​កំពូល​មិន​ព្រម​ប្រគល់​លិខិត​ឆ្លងដែន​ឱ្យ​លោក អ៊ួន ឈិន និង​លោក យាង សុធារិន្ទ វិញ ក្រោម​ហេតុ​ផល​ថា លិខិត​ឆ្លងដែន​នៅ​មាន​ភាព​ចាំបាច់​ក្នុង​​កិច្ច​ស៊ើបសួរ​បន្ត​ទៀត។ តុលាការ​ជាន់ខ្ពស់​មួយ​នេះ​បាន​​ទុក​រឿង​ស្នើសុំ​លិខិត​ឆ្លងដែន​នេះ ឱ្យ​ក្រុម​ប្រឹក្សា​ជំនុំ​ជម្រះ​តុលាការ​ក្រុង​ភ្នំពេញ​ជា​អ្នក​សម្រេច​វិញ។

មេធាវី​ការពារ​ក្តី​ឱ្យ​អតីត​អ្នក​យក​ព័ត៌មាន​អាស៊ី​សេរី​ទាំង​ពីរ​រូប គឺ​លោក សំ ចំរើន យល់ថា សេចក្តី​សម្រេច​បែបនេះ​មានន័យ​ស្មើនឹង​ការ​ដាក់​កូន​ក្តី​របស់​លោក​ក្រោម​ការ​ត្រួតពិនិត្យ​ដោយ​ប្រយោល ព្រោះ​សេរីភាព​ដើរហើរ​របស់​ពួក​គេ​នៅ​តែ​ស្ថិត​ក្រោម​ការ​រឹតត្បិត។ លោក​អះអាង​ថា លិខិត​ឆ្លង​ដែន​មិន​មែន​ជា​វត្ថុ​តាង​នាំទៅ​រក​ការ​ពិត​នៃ​សំណុំ​រឿង​នោះ​ទេ ដូច្នេះ​គ្មាន​ការ​ចាំបាច់​ណាមួយ​ដែល​តុលាការ​ត្រូវ​រក្សា​ទុក​នោះ​ទេ៖ «»

មេធាវី សំ ចំរើន ឱ្យ​ដឹង​ទៀត​ថា លោក​កំពុង​រង់​ចាំ​សាលដីកា​ជា​លាយ​លក្ខណ៍​អក្សរ​ពី​តុលាការ​កំពូល ដើម្បី​យក​ទៅ​បង្ហាញ​ចៅក្រម​ស៊ើបសួរ​តុលាការ​ក្រុង​ភ្នំពេញ សុំ​យក​អត្តសញ្ញាណប័ណ្ណ​ឱ្យ​លោក អ៊ូន ឈិន វិញ។ ដោយ​ឡែក សម្រាប់​​លោក យាង សុធារិន្ទ វិញ លោក​ថា តុលាការ​មិន​បាន​ដក​ហូត​អត្តសញ្ញាណប័ណ្ណ​របស់​គាត់​នោះ​ទេ។

អតីត​អ្នក​យក​ព័ត៌មាន​អាស៊ី​សេរី លោក អ៊ូន ឈិន ថ្លែង​ថា លោក​នឹង​យក​អត្តសញ្ញាណប័ណ្ណ​ ដើម្បី​ធ្វើ​​ឯកសារ​ផ្លូវ​ការ​នានា ទាក់ទង​ជីវភាព​ប្រចាំ​ថ្ងៃ ក៏​ប៉ុន្តែ​ទន្ទឹម​នឹង​នេះ លោក​ក៏​ត្រូវ​ការ​លិខិត​ឆ្លងដែន​ដែរ ដើម្បី​ចេញ​​ទៅ​ពិនិត្យ​សុខភាព និង​វគ្គ​បណ្ដុះបណ្ដាល​នានា នៅ​ក្រៅ​ប្រទេស៖ «»

ចំណែក​លោក យាង សុធារិន្ទ ហៅ យាង សុជាមេត្តា ឱ្យ​ដឹង​ថា លោក​សាទរ​ដែល​តុលាការ​កំពូល​​ផ្ដល់​អត្តសញ្ញាណប័ណ្ណ​លោក អ៊ួន ឈិន ដែល​ប្រៀប​បាន​នឹង​ការ​ផ្ដល់​សញ្ជាតិ​ឱ្យ​គាត់​វិញ​យ៉ាង​ដូច្នេះ​ដែរ។ ទោះ​ជា​យ៉ាង​ណា លោក​ខក​ចិត្ត​ដែល​តុលាការ​កំពូល​មិន​ព្រម​ប្រគល់​លិខិត​ឆ្លងដែន​ឱ្យ​​ពួក​លោក​វិញ ព្រោះ​ពួក​លោក​ត្រូវ​ការ​ឯកសារ​នេះ​ជា​ចាំបាច់​ដើម្បី​ធ្វើ​ដំណើរ​ទៅក្រៅ​ប្រទេស​ ជាពិសេស​រូបលោក​ផ្ទាល់​ត្រូវ​ការ​លិខិត​ឆ្លងដែន​ដើម្បី​ទៅ​ជួប​សួរ​សុខ​ទុក្ខ​ឪពុក​ម្តាយ​វ័យ​ចាស់​ជរា នៅ​ដែន​ដី​កម្ពុជា​ក្រោម៖ «»

នាយក​រង​ទទួល​បន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត សោក​ស្ដាយ​ដែល​សិទ្ធិ​​​សេរីភាព​របស់​អតីត​អ្នក​យក​ព័ត៌មាន​អាស៊ី​សេរី​ទាំងពីរ​រូប​នៅ​តែ​ស្ថិត​ក្រោម​ការ​រឹតត្បិត តាម​រយៈ​សេចក្ដី​សម្រេច​របស់​តុលាការ​កំពូល។ លោក​ថា តុលាការ​មិន​គួរ​រក្សា​ទុក​វត្ថុ​តាង​ដែល​មិន​ពាក់ព័ន្ធ​នឹង​រឿង​ក្តី​បែប​នេះ​ទេ ព្រោះ​ការ​សម្រេច​បែបនេះ​ហាក់​ដូច​ជា​ដាក់​អ្នក​ទាំងពីរ​ឱ្យ​ស្ថិត​ក្រោម​ការ​ត្រួតពិនិត្យ​ដដែល៖ «»

តុលាការ​ក្រុង​ភ្នំពេញ​បាន​ចោទ​ប្រកាន់​អតីត​អ្នក​យក​ព័ត៌មាន​អាស៊ី​សេរី​លោក អ៊ួន ឈិន និង​លោក យាង សុធារិន្ទ ពី​បទ «ផ្ដល់​ឱ្យ​រដ្ឋ​បរទេស​នូវ​ព័ត៌មាន​​ជាអាទិ៍​​ដែល​នាំ​ឱ្យ​អន្តរាយ​ការ​ការពារ​ជាតិ» និង​បទ «ផលិត​វីដេអូ​អាសអាភាស»។ ក្រោយ​បើក​សវនាការ​ពីរ​ដង និង​ពន្យារ​ពេល​ប្រកាស​សាលក្រម​ម្តង តុលាការ​ក្រុង​ភ្នំពេញ បាន​សម្រេច​ឱ្យ​បើក​ការ​ស៊ើបអង្កេត​រឿង​នេះ​បន្ថែម​ទៀត។

សហគមន៍​ជាតិ និង​អន្តរជាតិ​នៅ​តែ​ទាម​ទារ​ឱ្យ​តុលាការ​ទម្លាក់​ចោល​បទ​ចោទ​​ប្រឆាំង​នឹង​អតីត​អ្នក​យក​ព័ត៌មាន​អាស៊ី​សេរី​ទាំង​ពីរ​រូប ​ក្រោយ​ពិនិត្យ​ឃើញ​ថា តុលាការ​​គ្មាន​មូលដ្ឋាន​ និង​ភស្តុតាង​គ្រប់គ្រាន់ ដើម្បី​បន្ត​ចោទប្រកាន់​ពួកគេ​នោះ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

លោក ហ៊ុន សែន អនុញ្ញាត​ឲ្យ​ពលរដ្ឋ​ខ្មែរ​ត្រឡប់​ចូល​កម្ពុជា​ដោយ​មិន​ចាំបាច់​មាន​លិខិត​បញ្ជាក់​សុខភាព

$
0
0

ប្រមុខ​រដ្ឋាភិបាល​កម្ពុជា លោក ហ៊ុន សែន ផ្លាស់​ប្ដូរ​ចិត្ត​អនុញ្ញាត​ឲ្យ​ពលរដ្ឋ​ខ្មែរ​នៅ​ក្រៅ​ប្រទេស អាច​វិល​ចូល​កម្ពុជា​បាន ដោយ​មិន​ចាំបាច់​មាន​លិខិត​បញ្ជាក់​សុខភាព​នោះ​ទេ។ ពលរដ្ឋ​ខ្មែរ​ដែល​ជាប់​គាំង នៅ​ម៉ាឡេស៊ី រំពឹង​ថា រដ្ឋាភិបាល នឹង​ជួយ​បញ្ជូន​ពួក​គាត់​ត្រឡប់​ទៅ​កម្ពុជា​ឲ្យ​បាន​ឆាប់ៗ ក្រោយ​មាន​ដំណោះ​ស្រាយ​ថ្មី​នេះ។

លោកនាយករដ្ឋមន្ត្រី ហ៊ុន សែន ប្រកាស​លើ​ហ្វេសប៊ុក​ថា ចាប់​ពី​ថ្ងៃ​ទី២៧ ខែ​ឧសភា តទៅ ពលរដ្ឋ​ខ្មែរ​ដែល​កាន់ លិខិត​ឆ្លង​ដែន​កម្ពុជា ហើយ​មាន​បំណង​វិល​ត្រឡប់​ចូល​កម្ពុជា​វិញ គឺ​មិន​តម្រូវ​ឲ្យ​មាន​វិញ្ញាបនប័ត្រ​បញ្ជាក់​សុខភាព​ថា គ្មាន​ជំងឺ​ឆ្លង​កូវីដ-១៩ ដូច​មុន​ឡើយ។ លោក ថា ការ​ផ្លាស់​ប្តូរ​ចិត្ត​របស់​លោក​នេះ គឺ​ដើម្បី​ជួយ​សម្រួល​ដល់​ពលរដ្ឋ​នៅ​ក្រៅ​ប្រទេស ឲ្យ​ឆាប់​បាន​វិល​ត្រឡប់​មក​ជួបជុំ​ក្រុម​គ្រួសារ​នៅ​ក្នុង​ប្រទេស​របស់​ខ្លួន​វិញ។

ទោះ​ជា​យ៉ាង​ណា លោក​បញ្ជាក់​ថា ពេល​ត្រឡប់​មក​ដល់​ប្រទេស​កម្ពុជា​វិញ ពលរដ្ឋ​ទាំង​នោះ​ត្រូវ​ចូល​ពិនិត្យ សុខភាព ហើយ​ដាក់​ឲ្យ​ស្នាក់​នៅ​ដាច់​ដោយ​ឡែក​ចំនួន ១៤ថ្ងៃ ទើប​អនុញ្ញាត​ឲ្យ​ទៅ​លំនៅឋាន​រៀងៗ ខ្លួន​វិញ។

ការ​ផ្លាស់​ប្តូរ​ចិត្ត​របស់​លោក​នាយក​រដ្ឋមន្ត្រី ហ៊ុន សែន នៅ​ពេល​នេះ គឺ​បន្ទាប់​ពី​ពលរដ្ឋ​ខ្មែរ​ដែល ជាប់​គាំង​នៅ​ក្រៅ​ប្រទេស ជាពិសេស​នៅ​ប្រទេស​ម៉ាឡេស៊ី រិះគន់​ផង និង​ទទូច​ស្នើសុំ​ម្ដង​ហើយ ម្ដង​ទៀត​ផង ឲ្យ​រដ្ឋាភិបាល​របស់​លោក​ជួយ​សម្រប​សម្រួល​បញ្ជូន​ពួក​គេ​ត្រឡប់​មក​កម្ពុជា​វិញ​ឲ្យ​បាន​ឆាប់ ព្រោះ​ពួក​គេ​ជួប​ការ​លំបាក​ផ្នែក​ជីវភាព និង​ពុំ​មាន​ថវិកា​សម្រាប់​ចំណាយ​ថ្លៃ ធ្វើ​តេស្ត​សុខភាព។

ពលករ​ធ្វើ​ការ​សំណង់​នៅ​ប្រទេស​ម៉ាឡេស៊ី​មួយ​រូប គឺ​លោក ហាំ សាលី ត្រេកអរ​ចំពោះ​ការ​ប្រកាស របស់​ប្រមុខ​រដ្ឋាភិបាល ហើយ​លោក​រំពឹង​ថា រដ្ឋាភិបាល នឹង​ជួយ​រៀបចំ​ជើង​ហោះ​ដឹក​ពួក​លោក​ ទៅ​ស្រុក​ខ្មែរ​ឲ្យ​បាន​ឆាប់​បំផុត។ លោក ត្អូញត្អែរ​ថា ការ​ទ្រាំ​រស់​នៅ​ក្នុង​ប្រទេស​ម៉ាឡេស៊ី​ក្នុង​អំឡុង​ពេល​ជំងឺ​កូវីដ១៩ នេះ លោក និង​ពលករ​ដទៃ​ទៀត ជួប​ការ​លំបាក​ខ្លាំង​ដោយសារ​គ្មាន​ការងារ​ធ្វើ ហើយ​គ្មាន​ចំណូល​សម្រាប់​ជួល​បន្ទប់​ស្នាក់នៅ និង​ទិញ​អាហារ​ហូប​ចុក​ជា​ដើម៖ «កន្លង​មក​ដែល​គាត់ (លោក ហ៊ុន សែន) មិន​ឲ្យ​ទៅ​ស្រុក​ខ្មែរ​នោះ ខ្ញុំ​ពិបាក​ក្នុង​ចិត្ត​ខ្លាំង ហើយ​ឥឡូវ​នេះ​រឿង​ពិបាក​នៅ​តែ​ពិបាក​ដដែល ប៉ុន្តែ​ធ្វើ​ម៉េច យើង​មិន​អាច​ទៅ​បាន ដូច្នេះ​ចេះ​តែ​ខំ​រក​ការងារ​ធ្វើ ដើម្បី​បាន​លុយ​បន្តិចបន្តួច។ ឥឡូវ​ឮ​ថា សម្តេច​នាយក​រដ្ឋមន្ត្រី ថា អាច​ឲ្យ​ទៅ​បាន​អ៊ីចឹង ខ្ញុំ​ត្រូវ​ទៅ​ដែរ ព្រោះ​ខ្ញុំ​នៅ​តែ​ចង់​ទៅ​ជួប​ប្រពន្ធ និង​កូន​របស់ខ្ញុំ»

ស្រដៀង​គ្នា​នេះ ពលករ​ធ្វើ​ការ​ជា​អ្នក​រត់​តុ​ក្នុង​ភោជនីយដ្ឋាន​នៅ​ប្រទេស​ម៉ាឡេស៊ី លោកស្រី ស៊ាង សំអូន រៀបរាប់​ថា ការ​ប្រកាស​មិន​តម្រូវ​ឲ្យ​មាន​លិខិត​បញ្ជាក់​សុខភាព​នេះ គឺ​ធ្វើ​ឲ្យ​ពលករ​សប្បាយ ចិត្ត​មួយ​ផ្នែក ប៉ុន្តែ​លោក​ស្រី ចង់​ឃើញ​រដ្ឋាភិបាល ចាត់​វិធានការ​ច្បាស់លាស់​ក្នុង​ការ​បញ្ជូន​អ្នក​ជាប់ គាំង​នៅ​ម៉ាឡេស៊ី​ត្រឡប់​ទៅ​កម្ពុជា​ឲ្យ​បាន​ឆាប់។ លោកស្រី​បន្ត​ថា រហូត​មក​ដល់​ពេល​នេះ ស្ថានទូត ខ្មែរ​ប្រចាំ​នៅ​ប្រទេស​ម៉ាឡេស៊ី មិន​ទាន់​ជូន​ដំណឹង​ជាក់លាក់​ថា ពួក​គាត់​ត្រូវ​ឡើង​យន្តហោះ​ថ្ងៃ​ណា នោះ​ទេ៖ «ខ្ញុំ​សំណូមពរ​ថា បើ​គាត់​ចង់​ឲ្យ​ពួក​ខ្ញុំ​ទៅ​អ៊ីចឹង គឺ​ចង់​ឲ្យ​បាន​ទៅ​លឿនៗ ព្រោះ​មិន​ចង់​ថា គាត់​ឲ្យ​ទៅ​ហើយ ត្រូវ​ផ្អាក​ដំណើរ​វិញ វា​យូរ​ថ្ងៃ​ទៀត ខ្ញុំ​អត់​ចង់​អ៊ីចឹង​ទេ។ ខ្ញុំ នៅ​ទី​នេះ​ពិបាក​ណាស់ វា​អត់​មាន​អី​ធ្វើ​បាន​លុយ ហើយ​លុយ​ជួល​ផ្ទះ​ក៏​គ្មាន លុយ​ទិញ​អី​ហូប​ក៏​គ្មាន ហើយ​បាន​តែ​គេ​ឲ្យ​ហូប ហើយ​បើ​គេ​មិន​ឲ្យ​យើង​អត់»

ប្រជាពលរដ្ឋ​ខ្មែរ ១៥០នាក់ បាន​ជាប់​គាំង​នៅ​ប្រទេស​ម៉ាឡេស៊ី ជិត​ពីរ​ខែ​ហើយ​ដោយសារ​តែ​ការ ផ្លាស់ប្តូរ​ចិត្ត​មិន​ប្រាកដប្រជា​របស់​លោក ហ៊ុន សែន។ កាល​ពី​ថ្ងៃ​ទី៧ ខែមេសា លោក​បាន​សម្រេច​ចិត្ត​ភ្លាមៗ ហាម​មិន​ឲ្យ​យន្តហោះ​ដឹក​ពលរដ្ឋ​ទាំង ១៥០នាក់​ចូល​កម្ពុជា ក្រោម ហេតុផល​ទប់​ស្កាត់​ជំងឺ​កូវីដ។ បន្ទាប់​មក​នៅ​ថ្ងៃ​ទី២៧ ខែមេសា លោក​បាន​ប្តូរ​ចិត្ត​បើក​ផ្លូវ ឲ្យ​ពលរដ្ឋ​ទាំង ១៥០នាក់ ចូល​កម្ពុជា​វិញ តែ​តម្រូវ​ឲ្យ​មាន​លិខិត​បញ្ជាក់​សុខភាព​ថា គ្មាន​ជំងឺ​កូវីដ-១៩។ លើស​ពី​នេះ រដ្ឋាភិបាល​លោក ហ៊ុន សែន ប្រកាស​ថា ការ​ពិនិត្យ​សុខភាព​នោះ​មិន​អស់​លុយ​ទេ ប៉ុន្តែ​ក្រោយ​មក​តម្រូវ​ពលរដ្ឋ​ចំណាយ​លុយ​ខ្លួន​ឯង​វិញ។

មន្ត្រី​កម្មវិធី​ផ្នែក​ទេសន្តរប្រវេសក៍​នៃ​មជ្ឈមណ្ឌល​សម្ព័ន្ធភាព​ការងារ និង​សិទ្ធិ​មនុស្ស ​ហៅ​កាត់​ថា សង់​ត្រាល់ (CENTRAL) លោក ឌី ថេហូយ៉ា ថ្លែង​ថា ដំណោះ​ស្រាយ​ថ្មី​របស់​រដ្ឋាភិបាល​នេះ ជា​រឿង​ល្អ ប៉ុន្តែ​មិន​ទាន់​គ្រប់គ្រាន់​នៅ​ឡើយ​ទេ។ លោក​ស្នើសុំ​ឲ្យ​រដ្ឋាភិបាល ដោះ​ស្រាយ​ចំណុច​សំខាន់ៗ ជា​ច្រើន​ទៀត ដូច​ជា ជួយ​ចំណាយ​ថ្លៃ​ធ្វើ​ដំណើរ និង​អាហារ​ហូប​ចុក​សម្រាប់​អ្នក​ដែល​រង​ផល​ប៉ះ​ពាល់​ធ្ងន់ធ្ងរ​ទាំង​ក្នុង​អំឡុង​ពេល​ពួក​គេ​នៅ​ក្រៅ​ប្រទេស និង​ទៅ​ដល់​ក្នុង​ប្រទេស​វិញ៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ក្រុម​និស្សិត និង​ព្រះសង្ឃ​ចោទ​ប្រធាន​ដែន​ជម្រក​សត្វ​ព្រៃ​ព្រះ​រកា​ថា បើក​រថយន្ត​បម្រុង​បុក​ពួក​គាត់

$
0
0

ព្រះសង្ឃ និង​ក្រុម​យុវជន​ ចោទ​នាយក​ដែន​ជម្រក​សត្វ​ព្រៃ​ព្រះ​រកា ​លោក យ៉ាន់ ប៊ុនសឿន ថា បើក​រថយន្ត​បម្រុង​បុក​ពួក​គាត់​នៅ​ពេល​ពួក​គាត់​ព្យាយាម ចូល​ក្នុ​ងដែន​ជម្រក​សត្វ​ព្រៃ​មួយ​នេះ។​ ក្រុម​និស្សិត ​និង​ព្រះសង្ឃ ​ចាត់​ទុក​ទង្វើ​នេះ ​ជា​ការ​គំរាម​កំហែង និង​រាំង​ខ្ទប់​ការ​រួម​ចំណែក​ធន​ធាន​ធម្មជាតិ​របស់​ពលរដ្ឋ​។

និស្សិត ៤នាក់ និង​ព្រះសង្ឃ ​១​អង្គ ​មក​ពី​សកល​វិទ្យាល័យ​នានា​ ក្នុង​រាជធានី​ភ្នំពេញ ​សម្ដែង​ការ​ខកចិត្ត ​ចំពោះ​ការ​រឹតត្បិត​ ការ​ឃ្លាំមើល ​និង​ការ​គំរាម​កំហែង​ពួកគេ​ មិន​ឱ្យ​ចូល​ព្រៃ​ព្រះ​រកា ​ពី​សំណាក់​មន្ត្រី​ឧទ្យានុរក្ស​របស់​ក្រសួង​បរិស្ថាន​នៅ ​ខេត្ត​ព្រះវិហារ។

ព្រះតេជព្រះគុណ នុត វាសនា មាន​ថេរ​ដីកា​ថា នាយក​ដែន​ជម្រក​សត្វ​ព្រៃ​ព្រះ​រកា ​លោក យ៉ាន់ ប៊ុនសឿន និង​សហការី ២នាក់​ទៀត ​មាន​ចេតនា​បើក​រថយន្ត​យ៉ាង​លឿន ​បម្រុង​បុក​ក្រុម​យុវជន​ និង​ព្រះសង្ឃ ​ដែល​កំពុង​ធ្វើ​ដំណើរ​ថ្មើរ​ជើង​តាម​ផ្លូវ​លំ​ក្នុង​ភូមិ ប៉ុន្តែ​មិន​បណ្ដាល​ឱ្យ​មាន​គ្រោះថ្នាក់​នោះ​ទេ ​គ្រាន់​តែ ​ប្រឡាក់​ភក់ ​និង​ទឹក ​ដោយសារ​រថយន្ត​សាច​ដាក់។

ព្រះអង្គ​មាន​ថេរ​ដីកា​បន្ថែម​ថា ឆ្មាំ​អភិរក្ស​របស់​ក្រសួង​បរិស្ថាន​ និង ​នគរបាល​ឃុំ​ប្រមេរ​ បាន​ឃ្លាំមើល ​និង​ថត​រូបភាព​របស់​ក្រុម​យុវជន​ និង​ព្រះសង្ឃ ​គ្រប់​សកម្មភាព ​និង​និយាយ​ចោទ​ប្រកាន់​ថា ការ​ប៉ុនប៉ង​ចូល​ព្រៃ​ព្រះ​រកា​នេះ ​ជា​ទង្វើ​ល្មើស​ច្បាប់៖ «គាត់​និយាយ​ថា ​មិន​មាន​មន្ត្រី​ជូន​យើង​ចូលព្រៃ ​ប៉ុន្តែ​គាត់​មាន​ពេល​វេលា​តាមដាន ​យើង​រហូត​ចាប់​តាំង​ពី​ថ្ងៃ​ទី២២ រហូត​ដល់​ថ្ងៃ​ទី២៥ ហ្នឹង។ ឡាន​ដែល​គាត់​បើក ​គឺ​ប្រភេទ​ឡាន​អត់​ស្លាក​លេខ​ហើយ យ៉ាន់ ប៊ុនសឿន​ហ្នឹង​គាត់​បើក​ឡាន ​បម្រុង​បុក​យុវជន ​ប៉ុន្តែ​អាត្មា​គិត​ថា ​គាត់​ធ្វើ​ឱ្យ​ពួក​យើង​ភ័យ​​ទេ​។ នៅ​ពេល​ដែល​ព្រះសង្ឃ​លោក ​ឈាន​ ពីរ​ជំហាន​ថយ​ទៅ ​បាន​ត្រឹមតែ​សាច​ទឹក​ដាក់​ព្រះសង្ឃ ​តែ​បើ​មិន​ថយ​ អាច​កិន​ជើង វា​កៀក​មែន​ទែន»

កាល​ពី​ថ្ងៃ​ទី២២ ដល់​ថ្ងៃ​ទី២៦ ខែ​ឧសភា ​ក្រុម​និស្សិត​ទាំង​នោះ ​បាន​ធ្វើ​ដំណើរ​ពី​ភ្នំពេញ ​ឆ្ពោះ​ទៅ​ដែន​ជម្រក​សត្វ​ព្រៃ​ព្រះ​រកា ​ឋិត​ក្នុង​ឃុំ​ប្រមេរ ស្រុក​ត្បែង​មាន​ជ័យ ​បំណង​សិក្សា​ពី​ព្រៃឈើ​ និង​ការ​ស្វែង​រក​អនុផល​ព្រៃឈើ​របស់​ពលរដ្ឋ​ ក៏​ប៉ុន្តែ​មន្ត្រី​ឧទ្យានុរក្ស​របស់​ក្រសួង​បរិស្ថាន​ មិន​អនុញ្ញាត​ឱ្យ​ពួក​គេ​ចូល​ព្រៃ​ព្រះ​រកា​នោះ​ទេ ​ដោយ​តម្រូវ​ឱ្យ​សុំ​ច្បាប់​អនុញ្ញាត​ពី​ មន្ទីរ​បរិស្ថាន​ខេត្ត​សិន​។ ក្រុម​យុវជន​ទាំង​នោះ ​បាន​ទៅ​សុំ​ច្បាប់​ពី​ប្រធាន​មន្ទីរ​បរិស្ថាន​ខេត្ត​ព្រះវិហារ លោក សុង ច័ន្ទជាតិ ក៏​ប៉ុន្តែ​មន្ត្រី​បរិស្ថាន​រូប​នេះ ​មិន​អនុញ្ញាត​ឱ្យ​ពួកគេ​ចូល​ព្រៃ​ព្រះ​រកា​នោះ​ទេ ដោយ​ប្រាប់​ឱ្យ​ពួកគេ​ ទៅ​សុំ​ច្បាប់​ពី​ក្រសួង​បរិស្ថាន​ជា​មុន​សិន។

និស្សិត​ម្នាក់​ទៀត កញ្ញា យ៉ន ពុទ្ធា ត្អូញ​ត្អែរ​ថា  មន្ត្រី​បរិស្ថាន ​បង្កើត​ភាព​ស្មុគស្មាញ​សាំញ៉ាំ និង​បង្ក​ជា​ឧបសគ្គ​រាំង​ខ្ទប់ មិន​ឱ្យ​ក្រុម​យុវជន ​ចូល​ព្រៃ​អភិរក្ស ​ដោយ​លើក​ហេតុ​ផល​ថា ​ត្រូវ​សុំ​ច្បាប់​ពី​ក្រសួង​បរិស្ថាន​សិន។ កញ្ញា​បន្ថែម​ថា ​ក្រុម​យុវជន​បាន​ស្នើ​សុំ​កិច្ច​សហការ​ ពី​មន្ត្រី​ឧទ្យានុរក្ស​ នៅ​តំបន់​នោះ​ដែរ​ ប៉ុន្តែ​មន្ត្រី​ទាំង​នោះ​មិន​ស្វាគមន៍​នោះ​ទេ៖ «ដំបូង​ពេល​ដែល​ឃើញ​ឡាន ​គាត់​តាម​ហ្នឹង​មាន​អារម្មណ៍​ថា ​ភ័យ​ខ្លាច​ដែរ​ ប៉ុន្តែ​គិត​យូរៗ ទៅ ​ធ្វើ​ឱ្យ​ពួក​ខ្ញុំ​គិត​ថា ​ធ្វើ​ឱ្យ​ពួក​ខ្ញុំ​គិត​ថា ​ពួក​គាត់​ខ្លាច​ពួក​ខ្ញុំ​វិញ។ ខ្ញុំ​គិត​ថា ​ពួក​គាត់​ខ្លាច​ពួក​ខ្ញុំ​ចូល​ព្រៃ​ខ្លាំង ខ្លាច​ពួក​ខ្ញុំ​ទៅ ​អាច​នឹង​ជួប​ការ​កាប់​បំផ្លាញ​ព្រៃឈើ​នៅ​ក្នុង​ហ្នឹង ​ព្រោះ​មាន​ការ​កាប់​បំផ្លាញ​ព្រៃឈើ​ជា​ច្រើន»

អាស៊ី​សេរី​បាន​ព្យាយាម​ទាក់ទង ​នាយក​ដែន​ជម្រក​សត្វ​ព្រៃ​ព្រះ​រកា ​លោក យ៉ាន់ ប៊ុនសឿន​ ដើម្បី​សុំ​ការ​បំភ្លឺ​ជុំវិញ​ការ​ចោទ​ប្រកាន់​នេះ តែ​ប៉ុន្តែ​ទូរស័ព្ទ​ហៅ​ចូល​ច្រើន​ដង​គ្មាន​អ្នក​ទទួល នៅ​ថ្ងៃ​ទី២៧ ឧសភា។

ចំណែក​ប្រធាន​ស្ដីទី ​នៃ​មន្ទីរ​បរិស្ថាន ខេត្ត​ព្រះវិហារ សុង ច័ន្ទជាតិ បដិសេធ​មិន​អធិប្បាយ​រឿង​នេះ​ទេ៖ «សុំ​ទោស ​ខ្ញុំ​មិន​អាច​ផ្ដល់​ជូន​បង​បាន​ទេ អរគុណ»

រីឯ​អ្នក​នាំ​ពាក្យ​ក្រសួង​បរិស្ថាន លោក នេត្រ ភត្ត្រា  មិន​បក​ស្រាយ​ចំពោះ​ការ​ចោទ​ប្រកាន់​របស់​ក្រុម​យុវជន​លើ​លោក យ៉ាន់ ប៊ុនសឿន ទេ ដោយ​លោក​គ្រាន់​តែ ​បញ្ជាក់​យ៉ាង​ខ្លី​ថា​ មន្ត្រី​ឧទ្យានុរក្ស​នៃ​ក្រសួង​បរិស្ថាន​បំពេញ​តួនាទី​របស់​ខ្លួន​ស្រប​តាម​ច្បាប់​ជា​ធរមាន ​ជា​ពិសេស​គឺ​ ច្បាប់​ស្ដីពី​តំបន់​ការពារ​ធម្មជាតិ។

មន្ត្រី​សម្រប​សម្រួល​សមាគម​អាដហុក ខេត្ត​ព្រះវិហារ ​លោក ​ឡោ ចាន់ ​ចាត់​ទុក​ ការ​ហាម​ក្រុម​យុវជន​មិន​ឱ្យ​ចូល​ព្រៃ​ព្រះ​រកា ពី​សំណាក់​មន្ត្រី​បរិស្ថាន ​ជា​ទង្វើ​រំលោភ​លើ​សិទ្ធិ​សេរីភាព​ពលរដ្ឋ​ ផ្ទុយ​ពី​រដ្ឋ​ធម្មនុញ្ញ។ លោក​ពន្យល់​ថា ប្រសិន​បើ​មន្ត្រី​បរិស្ថាន​ទាំង​នោះ ​មាន​ចេតនា​បើក​រថយន្ត​ បម្រុង​នឹង​បុក​ក្រុម​យុវជន ​គឺ​ជា​បទ​ល្មើស​ព្រហ្មទណ្ឌ​ ៖ «ការ​ការពារ ​ការ​តាម​ដាន​ និង​ឃ្លាំមើល ​ទោះ​បី​ជា​ពលរដ្ឋ​យើង​ធម្មតា ​ក៏​គាត់​មាន​សិទ្ធិ​ចូល​ព្រៃ​ដើម្បី​តាម​ដាន ​ឃ្លាំ​មើល​ដែរ។ អា​ហ្នឹង​បទ​ល្មើស​នរណា​ក៏​មាន​សិទ្ធិ​ដើម្បី​ឃាត់​។ ​បើ​យើង​ចូល​ព្រៃ​ជា​សិទ្ធិ​សេរីភាព​ របស់​យើង​ហ្នឹង​។ ​ពុំ​មាន​ច្បាប់​ចែង​ថា ​ជន​ទាំង​ឡាយ​ណា ​ចូល​ព្រៃ​ព្រះ​រកា ឬ​ព្រៃ​ឡង់ ត្រូវ​សុំ​ច្បាប់​អនុញ្ញាត​ពី​មន្ទីរ​បរិស្ថាន ឬ​មន្ទីរ​នេះ ​នោះ ​វា​អត់​មាន​ច្បាប់​ចែង»

ក្រុម​ជនជាតិ​ដើម​ភាគ​តិច​កួយ  រាប់ពាន់​គ្រួសារ​រស់​នៅ​ជុំវិញ​តំបន់​ព្រៃ​ព្រះ​រកា និង​បណ្ដាញ​សហគមន៍​ការពារ​ព្រៃ​ព្រះ ​ខេត្ត​ព្រះវិហារ​ ត្អូញត្អែរ​ថា  ពួក​គេ​ខក​ខាន​ចុះ​ល្បាត​ព្រៃ​ព្រះ​រកា​ ប្រមាណ ២ខែ​មក​ហើយ ​ដោយ​សារ​មន្ត្រី​ឧទ្យានុរក្ស​ របស់​ក្រសួង​បរិស្ថាន​រារាំង ​និង​តម្រូវ​ឱ្យ​សុំ​ច្បាប់ ​អនុញ្ញាត​ពី​មន្ទីរ​បរិស្ថាន ​និង​ក្រសួង​បរិស្ថាន​ជា​មុន​សិន។​ ពួកគេ​ចាត់​ទុក​បញ្ហា​នេះ ​ជា​ការ​រួម​ចំណែក​បំផ្លាញ​ព្រៃ​ព្រះ​រកា​ដែល​នៅ​សល់​ចុង​ក្រោយ​ ព្រោះ​បទ​ល្មើស​ព្រៃឈើ ​នៅតែ​កើត​មាន​ច្រើន ​គ្មាន​ការ​អនុវត្ត​ច្បាប់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បក្ស​បង្កើត​ថ្មី​ដើរ​អូស​ទាញ​សកម្មជន​បក្ស​ប្រឆាំង​នៅ​ខេត្ត​បាត់ដំបង​ចូល​រួម​ធ្វើ​នយោបាយ​ជា​មួយ​បក្ស​ខ្លួន

$
0
0

សកម្មជន​គណបក្ស​សង្គ្រោះ​ជាតិ​នៅ​ខេត្ត​បាត់ដំបង​អះអាង​ថា ​មន្ត្រី​គណបក្ស​ខ្មែរ​ស្រលាញ់​ជាតិ​ដែល​ទើប​បង្កើត​ថ្មី ចាប់​ផ្ដើម​ដើរ​អូស​ទាញ​សកម្មជន​បក្ស​ប្រឆាំង​នៅ​តាម​មូលដ្ឋាន​ឱ្យ​ចូល​រួម​​ធ្វើ​នយោបាយ​ជា​មួយ​គណបក្ស​នេះ​ជា​បន្តបន្ទាប់។ មន្ត្រី​អង្គការ​សង្គម​ស៊ីវិល​ផ្នែក​ការងារ​បោះ​ឆ្នោត យល់​ថា បរិបទ​នយោបាយ​សព្វ​ថ្ងៃ​នេះ ក្រៅ​អំពី​គណបក្ស​សង្គ្រោះ​ជាតិ​មិន​ទាន់​មាន​គណបក្ស​ណា​មាន​លទ្ធភាព​អាច​ប្រកួត​ប្រជែង​​យក​ឈ្នះ​គណបក្ស​កាន់​អំណាច​នោះ​ទេ។

មន្ត្រី​គណបក្ស​សង្គ្រោះ​ជាតិ ឲ្យ​ដឹង​ថា សកម្មជន​គណបក្ស​ប្រឆាំង​នៅ​តាម​មូលដ្ឋាន ​នៅ​ក្នុង​ស្រុក​របស់​លោក​នៅ​តែ​ស្មោះ​ស្ម័គ្រ​​​ជា​មួយ​​គណបក្ស​លោក​ដដែល។ ជំទប់​ទី១ ឃុំ​ព្រែក​នរិន្ទ ជាប់​ឆ្នោត​គណបក្ស​សង្គ្រោះ​ជាតិ​​ស្រុក​ឯកភ្នំ​ខេត្ត​បាត់ដំបង​ លោក សុខ សុភ័ក្រ ថ្លែង​នៅ​ថ្ងៃ​ទី២៧ ឧសភា​ថា មន្ត្រី​គណបក្ស​ខ្មែរ​ស្រលាញ់​ជាតិ​ឈ្មោះ ហ៊ុយ ហ៊ាង បាន​​មក​ចែចូវ​លោក​ និង​សកម្មជន​ដទៃ ​ក្នុង​ឃុំ​ជា​មួយ​គាត់​ ឱ្យ​បោះ​បង់​គណបក្ស​សង្គ្រោះ​ជាតិ​ចោល​ ហើយ​ងាក​មក​រួម​រស់​​ជា​មួយ​គណបក្ស​​បង្កើត​ថ្មី​របស់​គេ​វិញ៖ «ហើយ​បើ​ម្នាក់​ទៅ​បង្កើត​គណបក្ស​ក្នុង​ស្ថានភាព​​សេដ្ឋកិច្ច​អត់​សឹង​តែ​រក​បាយ​​ស៊ី​គ្មាន​អីចឹង​ទៅ​បង្កើត​គណបក្ស​​មាន​ន័យ​យ៉ាង​ម៉េច?។ ខ្ញុំ​អត់​យល់​ទៅ​បង្កើត​គណបក្ស​ហ្នឹង​មិន​ថា​យក​អី​ បើ​ប្រជាពលរដ្ឋ​គាត់​ចេះ​ដឹង​គាត់​ស្គាល់​​នីតិវិធី​ក្នុង​ការ​បោះ​ឆ្នោត​ ហើយ​គាត់​ផ្ដួចផ្ដើម​ចង់​បោះ​ឆ្នោត​ហ្នឹង​​រួច​បាត់​ទៅ​ហើយ​ ទៅ​បង្កើត​ធ្វើ​យ៉ាង​ម៉េច​បាន​សន្លឹក​ឆ្នោត»

ចំណែក​​ប្រធាន​គណបក្ស​សង្គ្រោះ​ជាតិ​ស្រុក​មោង​ឫស្សី លោក អ៊ុត ជឿន​ វិញ​ មាន​ប្រសាសន៍​ថា ​​មន្ត្រី​របស់​គណបក្ស​ដែល​ទើប​បង្កើត​ថ្មី​នេះ ក៏​លួងលោម​លោក​ឱ្យ​ទៅ​រួម​រស់​ជា​មួយ​គេ​ដែរ​ ក៏​ប៉ុន្តែ​​លោក​​មិន​​បាន​ចូល​រួម​តាម​ការ​អំពាវនាវ​នោះ​​ទេ​។​លោក​បញ្ជាក់​ថា ​មូលហេតុ​ដែល​​លោក​មិន​​ធ្វើ​នយោបាយ​ជា​មួយ​គណបក្ស​នេះ ពីព្រោះ​​​ជា​ក្រុម​មនុស្ស​ឱកាស​និយម​​ ធ្វើ​នយោបាយ​​ដើម្បី​បម្រើ​ប្រយោជន៍​ផ្ទាល់​ខ្លួន​ប៉ុណ្ណោះ៖ «ចំពោះ​ប្រជាពលរដ្ឋ​និយាយ​ឱ្យ​ចំ​សកម្មជន​​គេ​សំដៅ​ទៅ​លើ​អតីត​សកម្មជន​គណបក្ស​សង្គ្រោះ​ជាតិ​ តែ​ពួក​ខាង​សកម្មជន​ហ្នឹង​គាត់​ដូច​ជា​មាន​បទពិសោធន៍​ គាត់​ធុញទ្រាន់​ហ្នឹង​នយោបាយ​ ថា​មិន​ទៅ​គណបក្ស​ណា​ទាំង​អស់​ គាត់​នៅ​ធ្វើ​​ជា​ពលរដ្ឋ​ធម្មតា​ស្រួល​ជាង​ គាត់​លែង​ខ្វល់ខ្វាយ​ហើយ»

ឆ្លើយតប​នឹង​បញ្ហា​នេះ មន្ត្រី​គណបក្ស​ខ្មែរ​ស្រលាញ់​ជាតិ លោក ហ៊ុយ ហ៊ាង ប្រាប់​អាស៊ី​សេរី​ថា គណបក្ស​របស់​លោក គឺ​ជា​ជម្រើស​ថ្មី ដើម្បី​ជួយ​ស្រោចស្រង់​ដល់​សកម្មជន​គណបក្ស​សង្គ្រោះ​ជាតិ​ ឱ្យ​បាន​ចូល​ធ្វើ​នយោបាយ​​ឡើង​វិញ​។​លោក​បន្ត​ថា ​គណបក្ស​សង្គ្រោះ​ជាតិ ​មិន​អាច​រស់​ឡើង​វិញ​បាន​ទេ ដូច្នេះ​ហើយ​បាន​ជា​ពួក​លោក​រួម​កម្លាំង​អ្នក​ស្នេហាជាតិ​បង្កើត​គណបក្ស​ថ្មី​នេះ​ឡើង ដើម្បី​ចូល​រួម​ប្រកួតប្រជែង​នយោបាយ​ជា​មួយ​គណបក្ស​កាន់​អំណាច​នៅ​ពេល​ខាង​មុខ៖ «យើង​បើក​ចំហ​ក្នុង​នាម​យើង​ដែល​ជា​អ្នក​ប្រជាធិបតេយ្យ​ យើង​ត្រូវ​តែ​ប្រមូល​មតិ​គ្នា ដើម្បី​តស៊ូ មតិ​ធ្វើ​ការងារ​បន្ត​ យើង​មិន​អាច​រង់​ចាំ​បាន​ទេ។ ខ្ញុំ​ឧទាហរណ៍​តែ​មួយ​ទេ​​បើ​មេ​បញ្ជាការ​ហ្នឹង​លោក​រង​របួស ឬ​ក៏​យ៉ាង​ម៉េច​ត្រូវ​មាន​មេ​បញ្ជាការ​រង​ហ្នឹង​ងើប​តស៊ូ​ ហើយ​ខ្ញុំ​ទាញ​ឧទាហរណ៍​តែ​មួយ​ទេ​នៅ​ពេល​ដែល​យើង​ធ្វើ​សង្គ្រាម​ តើ​សុខ​ចិត្ត​ចាញ់​សមរភូមិ​ឬ​ក៏​សុខ​ចិត្ត​ចាញ់​សង្គ្រាម»

លោក​បន្ត​ថា ក្រសួង​មហា​ផ្ទៃ​បាន​ទទួល​ស្គាល់​គណបក្ស​ខ្មែរ​ស្រលាញ់​ជាតិ​ជា​គណបក្ស​នយោបាយ នៅ​ថ្ងៃ​ទី២ ខែ ​កុម្ភៈ ឆ្នាំ២០២០ ហើយ​លោក ជីវ កត្តា ជា​ប្រធាន​បណ្ដោះ​អាសន្ន​របស់​គណបក្ស​មួយ​នេះ។លោក​ថា គណបក្ស​នេះ​មាន​សមាជិក ៨០នាក់​ដំបូង បាន​ឈរ​ឈ្មោះ​ជា​ស្ថាបនិក​របស់​គណបក្ស។

ទោះ​ជា​យ៉ាង​ណា​មន្ត្រី​ជាន់​ខ្ពស់​ផ្នែក​អង្កេត​នៃ​អង្គការ ខុមហ្រែល (Comfrel) លោក កង សាវាង្ស មាន​ប្រសាសន៍​ថា ការ​បង្កើត​គណបក្ស​នយោបាយ​ជា​សិទ្ធ​សេរីភាព​របស់​ប្រជាពលរដ្ឋ ក៏​ប៉ុន្តែ​ការ​សម្រេច​បោះ​ឆ្នោត​ជូន​គណបក្ស​ណា​មួយ​នោះ ​ជា​សិទ្ធិ​របស់​ម្ចាស់​ឆ្នោត​។​លោក​កត់សំគាល់​ទៀត​​ថា ​​ចាប់​តាំង​ពី​តុលាការ​កំពូល​រំលាយ​គណបក្ស​សង្គ្រោះ​ជាតិ​មក មិន​ទាន់​មាន​គណបក្ស​ណា​មួយ​​​មាន​ប្រជាពលរដ្ឋ​គាំទ្រ​ច្រើន ដែល​អាច​​មាន​កម្លាំង​ប្រកួតប្រជែង​ជា​មួយ​គណបក្ស​កាន់​អំណាច​បាន​នៅ​ឡើយ​ទេ៖ «ប្រជាពលរដ្ឋ​គួរ​ជ្រើស​អ្នក​នយោបាយ​ឬ​គណបក្ស​នយោបាយ​ ឬ​ក៏​សម្រេច​ចិត្ត​បែប​ណា​ ដើម្បី​ឱ្យ​អ្នក ដែល​យើង​បាន​ជ្រើស​យើង​ហ្នឹង​បម្រើ​យើង​ពិតប្រាកដ​ មាន​ន័យ​ឆន្ទៈ​ក្នុង​ការ​​ជួយ​គិត​គួរ​បញ្ហា​របស់ ដូច​ការ​សួរ​សុខទុក្ខ​យើង​ពិត​ប្រាកដ។ អីចឹង​បាន​តែ​ប្រជាពលរដ្ឋ​​ខ្លួន​ឯង​ទេ​ ធ្វើ​តាម​ដាន​ហើយ​វិនិច្ឆ័យ ហើយ​កុំ​ឱ្យ​ការ​វិនិច្ឆ័យ​របស់​ខ្លួន​ឯង​​ទៅ​តាម​អ្នក​ដទៃ»

មក​ទល់​ពេល​នេះ​គណបក្ស​ខ្មែរ​ស្រឡាញ់​ជាតិ បាន​លើក​ស្លាក​ចំនួន ៧ខេត្ត​រួច​មក​ហើយ រួម​មាន​ ខេត្ត​បាត់ដំបង កំពង់ធំ ពោធិ៍សាត់ សៀមរាប ​និង​ខេត្ត​កំពង់ចាម បន្ទាយមានជ័យ​ និង​ត្បូងឃ្មុំ។

ទោះ​ជា​យ៉ាង​ណា លោក កង សាវាង្ស កត់​សំគាល់​ថា សព្វ​ថ្ងៃ​នេះ ​គណបក្ស​នយោបាយ មិន​ងាយ​បោក​បញ្ឆោត​ទាញ​ការ​គាំទ្រ​ពី​ពលរដ្ឋ​បាន​ដូច​ពេល​មុន​នោះ​ទេ ពីព្រោះ​ពួកគាត់​បាន​ឆ្លងកាត់​បទ​ពិសោធ​ការ​បោះ​ឆ្នោត​យ៉ាង​ជោកជាំ​រួច​មក​ហើយ៕

អាជ្ញាធរ​ក្រុង​ប៉ោយប៉ែត​ពង្រាយ​កម្លាំង​​មុខ​ផ្ទះ​លោក ឌិន ពុទ្ធី ដើម្បី​គំរាម​កុំ​ឱ្យ​នាំ​ពលរដ្ឋ​ធ្វើ​បាតុកម្ម​នៅ​ច្រក​ទ្វារ​ព្រំដែន

$
0
0

អាជ្ញាធរ​ខេត្ត​បន្ទាយមានជ័យ​ដាក់​ពង្រាយ​កម្លាំង​​ប៉ូលិស​និង​ប្រជា​ការពារ​ភូមិ​ជា​ច្រើន​នាក់​​នៅ​ផ្លូវ​ច្រក​ចូល​ព្រំដែន​អន្តរជាតិ​ប៉ោយប៉ែត​ និង​នៅ​​មុខ​​ផ្ទះ​​​របស់​ប្រធាន​សមាគម​ពង្រឹង​សេដ្ឋកិច្ច​ក្រៅ​ប្រពន្ធ័​កម្ពុជា​ លោក ឌិន ពុទ្ធី​។ មន្ត្រី​សង្គម​ស៊ីវិល​ ចាត់​ទុក​​​សកម្មភាព​របស់​អាជ្ញាធរ​នេះ​ថា ជា​ការ​​បំភិតបំភ័យ​ដល់​ប្រជាពលរដ្ឋ​ ដើម្បី​កុំ​ឱ្យ​ពួកគាត់​ចូល​រួម​ធ្វើ​បាតុកម្ម​​​ទាមទារ​ឱ្យ​​ថៃ​បើក​ច្រក​ទ្វារ​ព្រំដែន​នៅ​ពេល​ខាង​មុខ។

ប្រធាន​សមាគម​ពង្រឹង​សេដ្ឋកិច្ច​ក្រៅ​ប្រព័ន្ធ​កម្ពុជា​ លោក ឌិន ពុទ្ធី ថ្លែង​នៅ​ព្រឹក​ថ្ងៃ​ទី២៧ ឧសភា​ថា អាជ្ញាធរ​ក្រុង​ប៉ោយប៉ែត​បាន​ពង្រាយកម្លាំង​​ប្រមាណ​២៥​នាក់​នៅ​ផ្លូវ​​មុខ​ផ្ទះ​របស់​លោក​ក្នុង​ភូមិ​មិត្តភាព សង្កាត់​ប៉ោយប៉ែត។ ចំណែក​នៅ​ផ្ទះ​ចាស់​របស់​លោក​ក្នុង​ភូមិ​​សាមគ្គីមានជ័យ លោក​ថា ក៏​មាន​ប្រជា​ការពារ​ភូមិ​ជា​ច្រើន​នាក់​បណ្ដាក់​គ្នា​ជិះ​ម៉ូតូ​ឃ្លាំមើល​​​តាំង​ពី​ម៉ោង​៦​​ព្រឹក​រហូត​មក«កន្លង​មក​​មិន​ដែល​មាន​ដាក់​កម្លាំង​មុខ​ផ្ទះ​ខ្ញុំ​បែប​នេះ​ទេ នេះ​ជា​ការ​គំរាមកំហែង​ពាក់​ព័ន្ធ​នឹង​សតិអារម្មណ៍​ស្មារតី​​ហើយ​មួយ​ទៀត​ធ្វើ​ហ្នឹង​​គឺ​ជា​រូបភាព​មួយ​បំបាក់​ស្មារតី​​កុំ​ឱ្យ​មាន​ការ​តស៊ូ​មតិ​ជា​ពិសេស​ខ្ញុំ​តែ​ម្ដង​គឺ​គេ​ចល័ត​កម្លាំង​ហ្នឹង​ក្នុង​គោលបំណង​​ដើរ​រក​ខ្ញុំ​ចេញ​ចូល​ទៅ​ណា​​វា​ហាក់​ដូច​ជា​រឹតត្បិត​សិទ្ធ​សេរីភាព​​ធ្ងន់ធ្ងរ​មែន​ទែន​សម្រាប់​ខ្ញុំ។ សូម្បី​តែ​សមាជិក​កម្មករ​​ដែល​រក​មក​ជួប​ខ្ញុំ​នៅ​ផ្ទះ​ក៏​គាត់​មិន​ហ៊ាន​​ចូល​ផ្ទះ​ខ្ញុំ​ដែរ»

​​កាល​ពី​ថ្ងៃ​ទី​២៥​ឧសភា​ លោក ឌិន ពុទ្ធី ​​បាន​ឈរ​ជា​តំណាង​ពលរដ្ឋ​នៅ​ក្រុង​ប៉ោយប៉ែត​​​ដាក់​លិខិត​ទៅ​សាលា​ខេត្ត​បន្ទាយមានជ័យ​ ស្នើ​សុំ​ធ្វើ​បាតុកម្ម​ទាមទារ​ឱ្យ​អាជ្ញាធរ​កម្ពុជា​និង​ថៃ​បើក​ច្រក​ទ្វារ​ព្រំដែន​ប្រទេស​ទាំង​ពីរ​ឡើង​វិញ នៅ​ចុង​ខែ​ឧសភា។ នៅ​ក្នុង​លិខិត​ស្នើ​សុំ​នោះ មាន​ប្រជាពលរដ្ឋ ១.៥០០​នាក់ គ្រោង​ចូល​រួម​ធ្វើ​បាតុកម្ម​ដោយ​សន្តិវិធី​ចាប់​ពី​ម៉ោង ៦ព្រឹក​ដល់​ម៉ោង ៦ល្ងាច ចាប់​ពី​ថ្ងៃ​ទី១ ដល់​ថ្ងៃ​ទី២០ មិថុនា ក៏​ប៉ុន្តែ​ត្រូវ​បាន​អាជ្ញាធរ​ខេត្ត​បន្ទាយ​មាន​ជ័យ​បដិសេធ។

ទាក់​នឹង​បញ្ហា​នេះ ស្នងការ​រង​នគរបាល​ខេត្ត​បន្ទាយមានជ័យ​ទទួល​បន្ទុក​ផ្នែក​សន្តិសុខ​លោក វង្ស ប្រាថ្នា ប្រាប់​អាស៊ី​សេរី​យ៉ាង​ខ្លី​ថា លោក​ពុំ​បាន​​ដឹង​​ជុំវិញ​​​ការ​ដាក់​ពង្រាយ​កម្លាំង​ប៉ូលិស​និង​ប្រជា​ការពារ​ភូមិ​នោះ​ទេ៖ «បាទ​ខ្ញុំ​នៅ​ខេត្ត​ទេ​មិន​ដឹង​ខាង​ក្រុង​ការងារ​ជំនាញ​របស់​គេ​មិន​ដឹង​គេ​​ធ្វើ​អី​ទេ​សូម​បង​​សួរ​ទៅ​ខាង​ក្រុង​ប៉ោយប៉ែត​​បាន​ដឹង​។ខ្ញុំ​ក្ដាប់​អត់​បាន​ទេ​សូម​អធ្យាស្រ័យ​ព្រោះ​ការងារ​ជំនាញ​ខុស​ៗ​គ្នា​»

អាស៊ី​សេរី​ក៏​បាន​ព្យាយាម​ទាក់​ទង​​​អភិបាល​​រង​ខេត្ត​បន្ទាយមានជ័យ​ លោក ង៉ោ ម៉េងជ្រួន​ និង​អភិបាល​ក្រុង​ប៉ោយប៉ែត លោក គាត ហ៊ុល ព្រម​ទាំង​អធិការ​នគរបាល​ក្រុង​ប៉ោយប៉ែត លោក ធិន ស៊ិនដេត ដើម្បី​សុំ​​អត្ថាធិប្បាយ​ជុំ​វិញ​បញ្ហា​នេះ​​​ដែរ តែ​​ទូរស័ព្ទ​ចូល​ជា​ច្រើន​ដង​ពុំ​មាន​អ្នក​ទទួល។

ទោះ​ជា​យ៉ាង​ណា ​មន្ត្រី​សម្របសម្រួល​សមាគម​ការពារ​សិទ្ធិមនុស្ស​អាដហុក (Adhoc) ខេត្ត​បន្ទាយមានជ័យ​លោក ស៊ុំ ច័ន្ទគា ​មាន​ប្រសាសន៍​ថា ​ការ​ដាក់​ពង្រាយ​កម្លាំង​នេះ ​ជា​ការ​​គំរាមកំហែង​ដល់​ប្រជាពលរដ្ឋ​​​ ដើម្បី​រាំង​ខ្ទប់​កុំ​ឱ្យ​ពួកគាត់​ចូល​រួម​ធ្វើ​បាតុកម្ម​នៅ​ច្រក​ទ្វារ​ព្រំដែន​កម្ពុជា​និង​ថៃ​​នៅ​ពេល​ខាង​មុខ។​លោក​ចាត់​ទុក​ទង្វើ​របស់​អាជ្ញាធរ​នេះ​ ថា ជា​ការ​​បិទ​សិទ្ធិ​សេរី​ភាព​ក្នុង​ការ​សម្ដែង​មតិ​របស់​ប្រជាពលរដ្ឋ«បាទ​ជា​ការ​ភិតភ័យ​បែរ​ទៅ​ជា​​ព្រួយ​ខ្លាច​លោក​ឌិន ពុទ្ធី​ធ្វើ​បាតុកម្ម​​នាំ​ឱ្យ​បាក់មុខ​បាក់​មាត់​នៅ​កន្លែង​ហ្នឹង​​គេ​ស្រែក​គេ​ថា​អីចឹង​​ទៅ​​ធ្វើ​ឱ្យ​ខ្លួន​ឯង​ហ្នឹង​បាក់​មុខ​បាក់​មាត់​​ក្នុង​រដូវ​ជំងឺ​កូវិដ​១៩។ ប៉ុន្តែ​​តើ​ការ​ដោះស្រាយ​ជូន​ប្រជាពលរដ្ឋ​បាន​ប៉ុណ្ណា? កន្លង​មក​យើង​ឃើញ​​ក្រុម​សប្បុរសជន​ជួយ​ដោះស្រាយ​ចុះ​អ្នក​ផ្សេង​​មាន​តួនាទី​របស់​រដ្ឋ​​ដែល​ត្រូវ​បំពេញ​បន្ថែម​​ធ្វើ​ឱ្យ​ប្រសើរ​ឡើង​បាន​ធ្វើ​ហើយ​រួច​នៅ​ឬ​ក៏​បំបិទ​មិន​ឱ្យ​គាត់​ចេញ​ទេ​​​នៅ​ហ្នឹង​ទៅ​​ដេក​ផ្ទះ​មិន​ឆ្លង​រោគ​​ចុះ​បាន​អី​ស៊ី​ឥឡូវ​ហ្នឹង»

អាជ្ញាធរ​កម្ពុជា​និង​ថៃ​បាន​បិទ​ច្រក​ទ្វារ​ព្រំដែន​ប្រទេស​ទាំង​២ ​តាំង​ពី​ថ្ងៃ​ទី​២៣ ​មីនា​មក​ ដើម្បី​បង្ការ​កុំ​ឱ្យ​រាលដាល​ជំងឺ​កូវិដ​១៩​ ហើយ​រហូត​ទល់​ពេល​នេះ​ព្រំដែន​ប្រទេស​ទាំង​២​ មិន​ទាន់​បើក​​​​ដំណើរការ​វិញ​​នៅ​ឡើយ​ទេ។ លោក​ឌិន ពុទ្ធី ឱ្យ​ដឹង​ថា ការ​​បិទ​ច្រក​ទ្វារ​ព្រំដែន​នេះ​ធ្វើ​ឱ្យ​ពលរដ្ឋ​នៅ​តំបន់​ព្រំដែន​ ដូច​ជា​អ្នក​រត់​ម៉ូតូឌុប កម្មករ​អូស​រទេះ ​និង​អ្នក​ស៊ីឈ្នួល​លីសែង​​នៅ​ក្នុង​ទឹក​ដី​ថៃ បាត់​បង់​ប្រាក់​ចំណូល​ទាំង​ស្រុង ហើយ​មាន​ពលរដ្ឋ​ខ្លះ​​ដាច់​ស្បៀង​​រហូត​ដល់​ថ្នាក់​​នាំ​គ្នា​ដើរ​បេះ​ត្រកួន និង​ដើរ​រើស​អេតចាយ​លក់​យក​ប្រាក់​ទិញ​អង្ក​ច្រក​ឆ្នាំង​ទៀត​ផង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ជន​រង​គ្រោះ​ម្នាក់​ស្ថិត​ក្នុង​ស្ថានភាព​មិន​ប្រក្រតី​ក្រោយ​អាជ្ញាធរ​បាន​ប្រើ​កម្លាំង​ឈូស​ឆាយ​យក​ដី​របស់​ខ្លួន

$
0
0

ប្រជាពលរដ្ឋ​រង​គ្រោះ​ម្នាក់​កំពុង​ស្ថិត​ក្នុង​បញ្ហា​ស្មារតី ក្រោយពី​អាជ្ញាធរ​របប​ក្រុង​ភ្នំពេញ​បាន​ដឹក​នាំ​កម្លាំង​ប្រមា​ណ​ជិត ១រយ​នាក់​មក​បណ្ដេញ​ចេញ​ពី​ដី​របស់​ខ្លួន​ដោយ​បង្ខំ ដើម្បី​​យក​ដី​ទៅ​ឲ្យ​ក្រុម​ហ៊ុន អូស៊ីអាយស៊ី (OCIC) ​របស់​លោក​ ឧញ៉ា ពុង ឃាវសែ។ មន្ត្រី​សិទ្ធិមនុស្ស​បាន​ចាត់​ទុក​ទង្វើ​របស់​សមត្ថកិច្ច​ថា ជា​សកម្មភាព​រំលោភ​យ៉ាង​ធ្ងន់ធ្ងរ​ដល់​សិទ្ធិ​រស់​រាន​មាន​ជីវិត​របស់​ពលរដ្ឋ។

ពលរដ្ឋ​រង​គ្រោះ​ដោយ​សារ​ការ​បណ្ដេញ​ចេញ​ដោយ​បង្ខំ​ប្រាប់​លោក​ស្រី ហ៊ុល សាវឿន អាស៊ី​សេរី​ថា សុខភាព​របស់​លោក​ស្រី​នៅ​មាន​សភាព​ទន់​ខ្សោយ​និង​មិន​ប្រក្រតី​ក្រោយ​ពី​អ្នក​ស្រី​បាន​ដួល​សន្លប់​ដើម្បី​ព្យាយាម​កុំ​អោយ​អាជ្ញាធរ​មក​រុះរើ​កុងតឺន័រ​ដែល​លោក​ស្រី​នឹង​ក្រុម​គ្រួសារ​ស្នាក់​នៅ​ចាំ​ដី​របស់​ខ្លួន។

លោក​ស្រី​និយាយ​ថា អាជ្ញាធរ​ប្រមាណ​ជិត ១០០​នាក់​បាន​យក​គ្រឿង​ចក្រ​ និង​ រថយន្ត​បាញ់​ទឹក​មក​បណ្ដេញ​លោក​ស្រី​ចេញ​ដោយ​មិន​បាន​ជួន​ដំណឹង​អ្វី​ទាំង​អស់។ លោក​ស្រី​បញ្ជាក់​ថា អាជ្ញាធរ​រដ្ឋាភិបាល​ធ្វើ​នេះ​ហាក់​បី​ដូច​ជា​ហាក់​មនុស្ស​ធម៌​ហួសហេតុ​ដែល​លោក​ស្រី​មិន​អាច​ទទួល​យក​បាន៖ «ឈឺ​ចាប់​ឃើញ​គេ​មក​​ប្លន់​យក​ដី​យើង​ស្រស់​តែ​ម្ដង ហើយ​ឥឡូវ​ហ្នឹង​គេ​ដាក់​ការ​ពារ​មិន​អោយ​ចូល​ដី​របស់​ខ្លួន​​ទៀត។​យើង​ជា​ម្ចាស់​ដី​មិន​បាន ចូល​ទៅ​ដី​ខ្លួន​ឯង​ហើយ​គេ​ព័ទ្ធ​របង​តាម​ចិត្ត​គេ​។​គេ​ធ្វើ​ភ្លាមៗ​ហ៊ុំ​យក​ដី​យើង​តែ​ម្ដង»

អាជ្ញាធរ​ខណ្ឌ​ជ្រោយ​ចង្វា និង​សាលា​រាជ​ធានី​ភ្នំពេញ កាល​ព្រឹក​ថ្ងៃ​ទី២៧ ខែ​ឧសភា ​បាន​រថយន្ត​បាញ់​ទឹក និង​រថយន្ត​ស្ទូច​យក​ទូរ​កុងតឺន័រ ៣គ្រឿង និង​ផ្ទះ​ឈើ​ចំនួន​ពី ២ខ្នង​របស់​លោកស្រី ហ៊ុល សាវឿន ចេញ​ពី​ដី​របស់​ខ្លួន​ដែល​លោក​ស្រី​បាន​រស់​នៅ​តាំង​ពី​ឆ្នាំ១៩៩៤ ទៅ​ឲ្យ​ក្រុម​ហ៊ុន អូស៊ី​អាយ​ស៊ី (OCIC)

ក្រុមហ៊ុន អូស៊ី​អាយ​ស៊ី (OCIC) របស់​លោក​ឧកញ៉ា ពុង ឃាវ សែ​ មាន​គម្រោង​អភិវឌ្ឍន៍​ទៅ​ជា​ក្រុង​រណប ដែល​មាន​ទំហំ​ទឹក​ប្រាក់​ជាង ១ពាន់ ៦រយ​លាន​ដុល្លារ​សហរដ្ឋ​អាមេរិក លើ​ទំហំ​ដី ៣៨៧​ហិកតារ។គម្រោង​អភិវឌ្ឍន៍​នេះ​ស្ថិត​នៅ​ភាគ​ខាង​កើត​ទីក្រុង​ភ្នំពេញ​ ជាប់​ច្រាំង​ទន្លេសាប​​ខាងកើត​ឆៀង​ខាង​ឆ្វេង​ស្ពាន​មិត្តភាព​កម្ពុជា-ជប៉ុន​ និង​ស្ពាន​មិត្ត​ភាព​កម្ពុជា​-ចិន។

ឆ្លើយ​តប​នឹង​បញ្ហា​នេះ អភិបាល​ក្រុង​ភ្នំពេញ​លោក ឃួង ស្រេង​ បាន​បញ្ជាក់​យ៉ាង​ខ្លី​ថា​ លោក​មិន​ទាន់​ទទួល​ព័ត៌មាន​នេះ​នោះ​ឡើយ​ ដោយ​សារ​តែ​អាជ្ញាធរ​មូលដ្ឋាន​មិន​ទាន់​រាយការណ៍​ជូន​លោក៖ «សួរ​ទៅ​ខណ្ឌ​ទៅ។ខ្ញុំ​មិន​ទាន់​បាន​ទទួល​ព័ត៌មាន​នៅ​ឡើយ»

បើ​ទោះ​បី​ជា​សកម្មភាព​បណ្ដេញ​ប្រជាពលរដ្ឋ​ដោយ​បង្ខំ​ត្រូវ​បាន​អាជ្ញាធរ​នៃ​របប​ក្រុង​ភ្នំពេញ​ព្យាយាម​គេច​ចេញ​ពី​ការ​មិន​ទទួល​ខុស​ត្រូវ​យ៉ាង​ណា​ក៏​ដោយ។ ក៏​ក្រុម​អ្នក​ឃ្លាំ​មើល​រំលោភ​សិទ្ធិមនុស្ស​នៅ​តែ​ចាត់​ទុក​ថា​សកម្មភាព​របស់​សមត្ថកិច្ច​ជា​ទង្វើ​រំលោភ​យ៉ាង​ធ្ងន់ធ្ងរ​ចំពោះ​សិទ្ធិ​រស់​រាន​មាន​ជីវិត។​

មន្ត្រី​នៃ​សិទ្ធិមនុស្ស​នៃ​មជ្ឈមណ្ឌល​សិទ្ធិមនុស្ស​កម្ពុជា (CCHR) លោក វណ្ណ សូផាត ដែល​ចុះ​ឃ្លាំ​មើល​​ការ​រុះរើ​ពី​សំណាក់​អាជ្ញាធរ​នេះ​ប្រាប់​អាស៊ី​សេរី​ថា ក្រុម​អាជ្ញាធរ​ធ្វើ​នេះ​គឺ​ជា​ទង្វើ​រំលោភ​សិទ្ធិ​រស់​នៅ​ជា​មូលដ្ឋាន​របស់​ប្រជា​ពលរដ្ឋ និង​រំលោភ​សិទ្ធិ​មនុស្ស​យ៉ាង​ធ្ងន់ធ្ងរ ខណៈ​ពលរដ្ឋ​នៅ​តំបន់​ជ្រោយ​ចង្វា​ខណៈ​នៅ​មាន​ពលរដ្ឋ​ខ្លះ​មិន​​ទាន់​ទទួល​បាន​​នៅ​ឡើយ ។

លោក​ស្រី ហ៊ុល សាវឿន ពលរដ្ឋ​​រង​គ្រោះ​ដោយ​សារ​ការ​បណ្ដេញ​ចេញ​ដោយ​បង្ខំ​បាន​បញ្ជាក់​ថា​ នៅ​មាន​ពលរដ្ឋ​ប្រមាណ​៦៥​គ្រួសារ​ទៀត​ក្រុម​ហ៊ុន​មិន​ទាន់​ផ្ដល់​សំណង​នៅ​ឡើយ។​លោក​ស្រី​និយាយ​ថា​ ក្រុម​ហ៊ុន​អូ​ស៊ី​អាយ​ស៊ី (OCIC) សន្យា​ថា ផ្ដល់​ប្រាក់​សំណង ១០​ភាគ​រយ​នៃ​ទំហំ​ដី​ដែល​នៅ​សេស​សល់​ចំនួន​ជាង ៥០ហិកតារ ដែល​ពួកគេ​មិន​អាច​ទទួល​យក​ដំណោះ​ស្រាយ​នេះ​ទេ។

ក្រុមហ៊ុន​វិនិយោគ​ទុន​ក្រៅ​ប្រទេស អូស៊ីអាយស៊ី (OCIC) ទទួល​សិទ្ធិ​វិនិយោគ​រយៈ​ពេល ៩៩ឆ្នាំ​ពី​រដ្ឋាភិបាល​ ដើម្បី​អភិវឌ្ឍន៍​ទៅ​ជា​ទីក្រុង​ពាណិជ្ជកម្ម​ដ៏​សម្បូរ​បែប ស្ថិត​នៅ​តាម​បណ្ដោយ​ទន្លេ​មេគង្គ។

គម្រោង​អភិវឌ្ឍន៍​ដ៏​ធំ​នេះ​លាត​សន្ធឹង​ចាប់​ពី​ចំណុច​ក្បាល​ទឹក​ត្រង់​ទន្លេ​បាសាក់ (ខាង​កើត​ទីក្រុង​រណប​កោះ​ពេជ្រ) ស្របតាម​មាត់​ច្រាំង​ទន្លេ​មេគង្គ​រហូត​ដល់​កោះ​ប្រាក់ ស្រុក​​កៀន​ស្វាយ​ ខេត្ត​កណ្ដាល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មជ្ឈមណ្ឌល STIMSON Center ដាក់​ឱ្យ​ប្រើប្រាស់​ប្រព័ន្ធ​តាម​ដាន​គម្រោង អភិវឌ្ឍន៍​ហេដ្ឋារចនាសម្ព័ន្ធ​នៅ​តំបន់​ទន្លេ​មេគង្គ

$
0
0

មជ្ឈមណ្ឌល​ស្រាវជ្រាវ​គោលនយោបាយ STIMSON Center ដែល​មាន​មូលដ្ឋាន​នៅ​រដ្ឋធានី​វ៉ាស៊ីនតោន សហរដ្ឋអាមេរិក បាន​ដាក់​ឱ្យ​ប្រើប្រាស់​ជា​ផ្លូវការ​នូវ​ប្រព័ន្ធ​អនឡាញ​តាមដាន​គម្រោង​អភិវឌ្ឍន៍​ហេដ្ឋារចនាសម្ព័ន្ធ​នៅ​តំបន់​ទន្លេមេគង្គ​។ ប្រព័ន្ធ​អនឡាញ​នេះ អនុញ្ញាត​ឱ្យ​ក្រុម​អ្នកសិក្សា​ស្រាវជ្រាវ អ្នកធ្វើ​គោល​នយោបាយ សង្គម​ស៊ីវិល រដ្ឋាភិបាល ដៃគូ​អភិវឌ្ឍន៍ និង​ភាគី​ពាក់ព័ន្ធ ទទួល​បាន​នូវ​ទិន្នន័យ ប្រកប​ដោយ​តម្លាភាព ជុំវិញ​គម្រោង​អភិវឌ្ឍន៍​ហេដ្ឋារចនាសម្ព័ន​នានា ពិសេស​ការ​សាងសង់​ទំនប់​វារីអគ្គិសនី នៅ​តំបន់​ទន្លេ​មេគង្គ

ជាមួយនឹង​ប្រព័ន្ធ​អន​ឡាញ​ថ្មី​នេះ ក្រុម​អ្នកសិក្សា​ស្រាវជ្រាវ ឬ​ភាគី​ពាក់ព័ន្ធ អាច​រកបាន​នូវ​និន្នន័យ​ដ៏​សម្បូ​ហ៍​បែប ពាក់ព័ន្ធ​នឹង​ព័ត៌មាន​លម្អិត អំពី​គម្រោង​អភិវឌ្ឍន៍​ហេដ្ឋារចនាសម្ព័ន្ធ នៅតាម​ប្រទេស​នានា​ក្នុង​តំបន់​ទន្លេមេគង្។ ជា​ឧទាហរណ៍ គេ​អាច​ដឹងថា គម្រោង​ទាំងនោះ​ចាប់ផ្តើម​សាងសង់​នៅពេលណា ដោយ​ក្រុមហ៊ុន​ណា វឌ្ឍនភាព​នៃ​ការ​សាងសង់ ទំហំ​ទឹកប្រាក់​គម្រោង ឬ​ឈ្មោះ​ប្រទេស ឬ​អ្នកផ្តល់​មូលនិធិ​សម្រាប់​គម្រោង​អភិវឌ្ឍន៍​ទាំងនោះ​ជាដើម។

ទិន្នន័យ មាននៅ​ក្នុង​ប្រព័ន្ធ​តាមដាន​នេះ ពាក់ព័ន្ធ​នឹង​គម្រោង​អភិវឌ្ឍន៍​វិស័យ​ថាមពល វិស័យ​ដឹកជញ្ជូន ការសាងសង់​ទំនប់​វារីអគ្គិសនី និង​ហេដ្ឋារចនាសម្ព័ន្ធ​រូបវ័ន្ត​ដទៃទៀត ក្នុង​តំបន់​ទន្លេមេគង្គ ដែល​ធ្វើ​ឱ្យ​មាន​ការ​ប្រែប្រួល​ដល់​សង្គម សេដ្ឋកិច្ច និង​ប្រព័ន្ធ​អេកូឡូស៊ី នៅក្នុង​តំបន់​នេះ។

មជ្ឈមណ្ឌល​ស្រាវជ្រាវ​គោលនយោបាយ​ដើម្បី​លើកកម្ពស់​សន្តិសុខ វិបុលភាព និង​យុត្តិធម៌​អន្តរជាតិ STIMSON Center ថា ការ​បង្កើត​ប្រព័ន្ធ​តាមដាន​អនឡាញ​នេះ​ឡើង គឺ​ក្នុង​គោលដៅ​ដើម្បី​ជួយ​បំពេញ​នូវ​កង្វះខាត​នៃ​ការ​ចងក្រង​ទិន្នន័យ​ជារួម​អំពី​ប្រភេទ និង​វិសាលភាព​នៃ​គម្រោង​អភិវឌ្ឍន៍​ហេ​ដ្ឋា​រចនា​នា​នៅក្នុង​តំបន់​ទន្លេមេគង្គ ស្រប​ពេលដែល​តំបន់​មួយ​នេះ កំពុង​ជួបប្រទះ​នូវ​ការ​ស្ទុះ​ឡើង​ខ្លាំង នៃ​គម្រោង​អភិវឌ្ឍន៍​ហេដ្ឋារចនាសម្ព័ន្ធ​នានា​។ ប្រព័ន្ធ​តាមដាន​អន​ឡាញ​ថ្មី​នេះ ទទួលបាន​ការគាំទ្រ​ថវិកា​ពី​ទីភ្នាក់ងារ USAID និង​មូលនិធិ Asia Foundation។

នាយក​មជ្ឈមណ្ឌល STIMSON Center លោក ប្រាយអ៊ិន ហ្វីនឡេយ៍ (Brian Finlay) ថា ឧបករណ៍​ថ្មី​នេះ នឹង​ផ្តល់​ឱ្យ​ក្រុម​អ្នកប្រើប្រាស់ ទទួលបាន​ទិន្នន័យ​ថ្មី​ចុងក្រោយ​បំផុត ដើម្បី​ធ្វើការ​សម្រេចចិត្ត​កាន់តែ​ប្រសើរ​ជាង​មុន ជុំវិញ​គម្រោង​អភិវឌ្ឍន៍​ហេដ្ឋារចនាសម្ព័ន្ធ​នានា ក្នុង​តំបន់​ទន្លេមេគង្គ​។ លោក​ថា ប្រព័ន្ធ​តាមដាន​នេះ នឹង​បន្ត​កែលម្អ ធ្វើ​បច្ចុប្បន្នភាព ជា​បន្តបន្ទាប់​នាពេល​អនាគត។

រីឯ តំណាង​ទីភ្នាក់ងារ USAID អ្នកស្រី ហ្លូរៀ ស្ទៀលេ (Gloria Steele) មាន​ប្រសាសន៍​ថា ប្រព័ន្ធ​តាមដាន​នេះ បង្កើតឡើង​ទាន់ពេលវេលា ស្រប​ពេលដែល​តំបន់​ទន្លេមេគង្គ កំពុង​ជួបប្រទះ​នូវ​កំណើន​គួរ​ឱ្យ​កត់សម្គាល់​ក្នុង​រយៈពេល​ប៉ុន្មាន​ទសវត្ស​ន៍​ចុង​ក្រោយនេះ​។ ក៏ប៉ុន្តែ អ្នកស្រី​ថា គម្រោង​អភិវឌ្ឍន៍​ទាំងនោះ ក៏បាន​ចូលរួមចំណែក បង្កើត​ឱ្យ​មាននូវ ផលប៉ះពាល់​ខ្លាំង​ដល់​បរិស្ថាន និង​សង្គម​ដែរ​។ អ្នកស្រី​ថា ហានិភ័យ​ផ្នែក​សេដ្ឋកិច្ច សង្គម និង​បរិស្ថាន​នៃ​តំបន់​ទន្លេមេគង្គ​សព្វថ្ងៃនេះ រឹតតែ​កើតមាន​កាន់តែ​ខ្ពស់​ឡើង ដោយសារតែ​គម្រោង​អភិវឌ្ឍន៍​ហេដ្ឋារចនាសម្ព័ន្ធ​ទាំងនេះ ហើយ​ថា ការធ្វើ​សេចក្តីសម្រេចចិត្ត​នៅថ្ងៃនេះ នឹង​ប៉ះពាល់​ដល់​ជីវភាព​រស់នៅ​របស់​ប្រជាជន ដែល​ពឹងផ្អែក​អាស្រ័យ​លើ​ទន្លេមេគង្គ ពីមួយ​ជំនាន់​មនុស្ស​ទៅមួយ​ជំនាន់​ទៀត។

អ្នកស្រី​បាន​លើកយក​ពី​ឧទាហរណ៍​មួយ​ដែល​ថា កាលពី​ខែ​មេសាកន្លង​ទៅ ការសិក្សា​ស្រាវជ្រាវ​ចុងក្រោយ​មួយ​របស់​ក្រុមហ៊ុន​អាមេរិកាំង បាន​រក​ឃើញ​ថា ចិន​បាន​ព្យាយាម​ចាត់ចែង​គ្រប់គ្រង​ធនធានទឹក ដោយបាន​រឹតត្បិត ឬ​រាំងខ្ទប់​ទឹក ពី​ខ្សែទឹក​ខាងលើ​នៃ​ទន្លេមេគង្គ តាមរយៈ​ទំនប់​វរីអគ្គិសនី​របស់ខ្លួន​។ ហេតុការណ៍​នេះ បាន​បង្ក​ឱ្យ​មាន​គ្រោះ​រាំងស្ងួត និង​រីងស្ងួត​នៅ​តាម​ប្រទេស​ខ្សែទឹក​ខាងក្រោម​ទន្លេមេគង្គ មិន​ធ្លាប់មាន​ពីមុន​មក ដែល​ធ្វើ​ឱ្យ​ប៉ះពាល់​ខ្លាំង​ដល់​ជីវភាព​មនុស្ស​រាប់លាន​នាក់ ដែល​កំពុង​រស់នៅ​តាម​ប្រទេស​ខ្សែទឹក​ខាង​ក្រោម

ជុំវិញ​ការដាក់​ឱ្យ​ប្រើប្រាស់​ប្រព័ន្ធ​តាមដាន​ថ្មី​នេះ នាយក​កម្មវិធី​អាស៊ីអាគ្នេយ៍​នៃ​មជ្ឈមណ្ឌល STIMSON Center លោក ប្រាយអ៊ិន អាយល័រ (Brian Eyler) ថា មជ្ឈមណ្ឌល​របស់​លោក បាន​ចំណាយ​ពេល​ជាង ១៨​ខែ ដើម្បី​អភិវឌ្ឍន៍​ប្រព័ន្ធ​តាមដាន​ថ្មី​នេះ​ឡើង ដែល​លោក​ថា នឹង​នាំមក​នូវ​តម្លាភាព​សម្រាប់​តំបន់​ទន្លេមេគង្គ​។ លោក​ថា ប្រព័ន្ធ​ថ្មី​នេះ ក៏​អនុញ្ញាត​ឱ្យ​អ្នកប្រើប្រាស់​ស្នើ​បញ្ចូល​នូវ​ទិន្នន័យ​បន្ថែម​ដែល​ពួកគេ​មាន ពាក់ព័ន្ធ​នឹង​គម្រោង​អភិវឌ្ឍន៍​ហេដ្ឋារចនាសម្ព័ន្ធ​ទាំងឡាយណា ដែល​នៅ​ពុំទាន់​មាន ទិន្នន័យ​គ្រប់គ្រាន់ ឬ​មាន​ទិន្នន័យ​មិន​ស៊ីសង្វាក់​គ្នា ក្នុង​គោលដៅ​ដើម្បី​កែលម្អ​ប្រព័ន្ធ​ឱ្យ កាន់តែ​សុក្រឹតភាព​ឡើង​។ លោក​ថា សំណើ​របស់​ពួកគេ​អាចធ្វើ​ឡើង​ដោយ​អនាមិក៖ «បច្ចុប្បន្ន​ប្រព័ន្ធ​តាមដាន​របស់​យើង មាន​ទិន្នន័យ​ចម្បងៗ​ចំនួន​ពីរ​ប្រភេទ​ពាក់ព័ន្ធ​នឹង​គម្រោង​អភិវឌ្ឍន៍​ហេដ្ឋារចនាសម្ព័ន្ធ។ យើង​មាន​ទិន្នន័យ​អំពី​គម្រោង​សាងសង់​ផលិត​ថាមពល និង​គម្រោង​ហេដ្ឋារចនាសម្ព័ន្ធ​ផ្លូវថ្នល់ ផ្លូវដែក និង​ផ្លូវទឹក​។ យើង​មាន​ទិន្នន័យ​គម្រោង​ផលិត​ថាមពល​អគ្គិសនី​សរុប​ចំនួន ១៧៧០ គម្រោង សម្រាប់​ឱ្យ​អ្នកប្រើប្រាស់​ឆែក​មើល ហើយនឹង​គម្រោង​គម​នា​គម​សរុប​ប្រវែង​ជាង ១៧៥​ពាន់ គីឡូម៉ែត្រ ដែល​រួមមាន​ផ្លូវ​រថភ្លើង​ល្បឿន​លឿន រថភ្លើង​ក្នុង​ក្រុង និង​គម្រោង​កែលម្អ​ដទៃទៀត ដែល​អ្នក​អាច​រកមើល​បាន»

លោក ប្រាយអ៊ិន អាយល័រ បន្ត​ថា នៅ​ដំណាច់​ខែមិថុនា​ខាង​មុខ​នេះ មជ្ឈមណ្ឌល​នឹង​ដាក់​បញ្ចូល​ទិន្នន័យ​បន្ថែម​ទាក់ទង​នឹង​គម្រោង​អភិវឌ្ឍន៍​ឧស្សាហកម្ម ដូចជា​តំបន់​សេដ្ឋកិច្ច​ពិសេស តំបន់​ឧស្សាហកម្ម និង​ហេដ្ឋារចនាសម្ព័ន្ធ​ពាក់ព័ន្ធ​នឹង​តំបន់​នេះ ដូចជា​កំពង់ផែ ស្ថានីយ​រថភ្លើង ព្រលាន​យន្តហោះ ជាដើម​។ នៅ​ចុង​ខែ​កញ្ញា មជ្ឈមណ្ឌល​ក៏​នឹងមាន​បន្ថែម​ទិន្នន័យ ទាក់ទង​ទៅនឹង​គម្រោង​សាងសង់​អាង​ស្តុក​ទឹក និង​បណ្តាញ​ចែកចាយ​ថាមពល​អគ្គិសនី​ជាដើម។ លោក​ថា ទិន្នន័យ​ទាំងនេះ ផ្តល់​ឱ្យ​អ្នកប្រើប្រាស់​ដោយ​ឥត​គិតថ្លៃ ហើយ​គេ​អាច​ទាញយក​ទៅ​ធ្វើ​សិក្សា​ស្រាវជ្រាវ និង​វិភាគ​បន្ថែម​បាន​យ៉ាង​ងាយ។

ក្រុម​អ្នកសិក្សា​ស្រាវជ្រាវ ឬ​ភាគី​ពាក់ព័ន្ធ អាច​ប្រើប្រាស់​ប្រព័ន្ធ​ថ្មី​នេះ​បាន ដោយ​ចូលទៅ​កាន់ គេហទំព័រ​មជ្ឈមណ្ឌល STIMSON Center www.stimson.org រួច​ចុច​លើ Mekong Infrastructure Tracker ដើម្បី​មើល​ព័ត៌មាន​លម្អិត​អំពី​គម្រោង​អភិវឌ្ឍន៍​ហេដ្ឋារចនាសម្ព័ន្ធ ជាក់លាក់​ណាមួយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។


ធនាគារ​មួយ​បង្កើត​កម្មវិធី​លើក​កម្ពស់​ជីវភាព​ស្ត្រី​អ្នក​តម្បាញ ខណៈ​វិបត្តិ​ជំងឺ​កូវីដ-១៩

$
0
0

គម្រោង​កម្មវិធី​លើក​កម្ពស់​ស្ត្រី​អ្នក​តម្បាញ របស់​ធនាគារ​ម៉េយប៊ែង (Maybank) ជា​ធនាគារ​របស់​ម៉ាឡេស៊ី ដោយ​សហការ​ណ៏​ជាមួយ​ដៃគូរ​ក្រុមហ៊ុន​ផលិត​សូត្រ​ខ្មែរ ដែល​មាន​ឈ្មោះថា​សូត្រ​ពណ៌ (ColorSilk) បាន​ផលិត​ម៉ាស ឬ​របាំងមុខ​ចំនួន​ជាង ១០​ម៉ឺន​ម៉ាស ធ្វើ​ដោយ​ដៃ ដើម្បី​លើក​កម្ពស់​ជីវភាព​ស្ត្រី​ក្នុង​វិបត្តិ​ជំងឺ​កូវីដ-១៩

នាយក​ប្រតិបត្តិ​នៃ​មូលនិធិ​របស់​ធនាគារ​ម៉េយប៊ែង លោក ហ្សារ៉ីល អាហ្សា ជីមីន (Shahril Azuar Jimin) មាន​ប្រសាសន៍​ថា កម្មវិធី​នេះ​ជួយ​ដល់​ស្ត្រី​អ្នក​តម្បាញ​ចំនួន ២៥០​នាក់ និង​ជួយ​ទប់ស្កាត់​ការរីក​រាលដាល​ជំងឺ​កូវីដ-១៩ បាន​ផង។ លោក​បញ្ជាក់ទៀត ថា ការ ខិតខំ​ប្រឹងប្រែង​នេះ​ដើម្បី​ជួយ​ប្រជាពលរដ្ឋ​ក្នុង​សហគមន៍​ពី​ផល​ប៉ះពាល់​វិនិយោគ​ដែល​បណ្ដាល​មកពី​វិបត្តិ​នៃ​ជំងឺ​កូវីដ-១៩

លោក ជីមីន (Shahril Azuar Jimin) ឱ្យ​ដឹង​ទៀតថា កម្មវិធី​លើ​កំពស់​ស្ត្រី​អ្នក​តម្បាញ​នេះ មិន​ត្រឹមតែ​ជួយ​ធានា​សុខមាលភាព​ប្រជាពលរដ្ឋ​ប៉ុណ្ណោះ​ទេ កម្មវិធី​នេះ​ក៏​ជួយ​រក្សា​និរន្ដ​ភាព​សេដ្ឋកិច្ច​គ្រួសារ​អ្នក​ដំបាញ អាច​រកប្រាក់​ចំណូល​បាន​ចន្លោះ​ពី​២០០​ទៅ​៣៥០​ដុល្លារ​ក្នុង​មួយខែ ខណៈពេលដែល​ប្រជាពលរដ្ឋ​ក្នុង​តំបន់​ជួប​បញ្ហា​សេដ្ឋកិច្ច​ជា​សកល។

កម្មវិធី​លើក​កំពស់​ស្ដ្រី​អ្នក​តម្បាញ (Women Eco Weavers Programme) បាន​ជួយ​ទៅដល់​ស្ត្រី​ខ្មែរ​ចំនួន ២៥០​នាក់​ក្រោម​កម្មវិធី​នេះ នឹង​ផលិត​ម៉ាស់​ដែល​ធ្វើ​ដោយ​ដៃ ដោយ​ផលិត​ចេញពី​កប្បាស​និង​សូត្រ​ខ្មែរ​សុទ្ធ ដើម្បី​បំពេញ​តំរូវការ​ផ្នែក​វិជ្ជសាស្ត្រ​ក្នុង​តំបន់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ស្ត្រី​អតីត​សកម្មជន​ដីធ្លី​បឹងកក់​ពី​អ្នក​ត្រូវ​គេ​រំលោភ​យក​ដីធ្លី ក្លាយ​ជា​អ្នក​ការពារ​សិទ្ធិ​ពលរដ្ឋ​មាន​បញ្ហា​ដីធ្លី

$
0
0

ស្ត្រី​អតីត​សកម្មជន​ដីធ្លី​បឹងកក់​ម្នាក់​ដែល​ធ្លាប់​ជាប់ពន្ធនាគារ និង​វាយ​បង្ក្រាប​ពី​ក្រុម​សន្តិសុខ​ក្រុងភ្នំពេញ​រាប់​ភ្លេច​ដោយសារតែ ការ​ទាមទារ​ដីធ្លី​របស់ខ្លួន​នោះ បាន​វិវឌ្ឍ​ខ្លួន​ពី​អ្នក​ត្រូវគេ​រំលោភ​យក​ដីធ្លី​ក្លាយ ជា​អ្នក​ការពារ​សិទ្ធិ​ពលរដ្ឋ​មាន​បញ្ហា​ដីធ្លី​វិញ​ម្ដង ក្រោយ​ទាមទារ​បាន​ដីធ្លី​របស់​ខ្លួន​ពី​ឈ្មួញ​មាន​អំណាច​បាន​ជោគជ័យ។ ពេលនេះ កញ្ញា សុង ស្រី​លាភ ពេញចិត្ត​ធ្វើការងារ​ជាមួយ​ពលរដ្ឋ​មាន​បញ្ហា​សហគមន៍​ដីធ្លី សិទ្ធិមនុស្ស និង​បរិស្ថាន ដោយ​អះអាងថា តាមរយៈ​បទពិសោធន៍​របស់ខ្លួន ជា​ពលរដ្ឋ​មាន​បញ្ហាដីធ្លី នឹង​ជួយ​ដល់​ពលរដ្ឋ​មាន​បញ្ហាដីធ្លី​នៅ​តំបន់​ផ្សេងៗ​ទៀត៖ «យើង​តែងតែ​ដាក់​ញត្តិ​សុំ​កិច្ច​អន្តរាគមន៍​ពី​គាត់ (លោក ស ខេង) បញ្ហា​រឿង​ដីធ្លី​ហើយ​ក្នុងនោះ គឺ​យើង​ទទួលបាន​ការឆ្លើយតប​ពី​គាត់ គឺ​គាត់​ចូលរួម​ក្នុង​ការ​អន្តរាគមន៍​ទៅកាន់​សាលាក្រុង​ឱ្យ​ធ្វើការ​ដោះស្រាយ​បញ្ហា​ចំពោះ​បញ្ហា​ដីធ្លី​តំបន់​បឹងកក់​អ៊ីចឹង​ត្រង់ ហ្នឹង​ហើយ​ដែល​យើង​ស​បញ្ជាក់ថា​ឧបនាយករដ្ឋមន្ត្រី ស ខេង គាត់​ដឹង​ពី​បញ្ហា​បឹងកក់​ច្បាស់»

សម្រែក​នៃ​ការទាមទារ​ជា​រឿង​អតីតកាល​ដ៏​ជូរចត់​របស់​សកម្មជន​ដីធ្លី តំបន់​បឹងកក់ កញ្ញា សុង ស្រីលាភ បាន​អូសបន្លាយ​រាប់​ឆ្នាំ ទម្រាំ​ពលរដ្ឋ​បឹងកក់​រូបនេះ​និង​អ្នកភូមិ​បឹងកក់​ផ្សេងទៀត​ទទួល​បាន​ដំណោះស្រាយ​។ ប៉ុន្តែ​អតីត​អ្នករងគ្រោះ​បញ្ហា​ដោយ​ដីធ្លី​រូបនេះ សព្វថ្ងៃ​បាន​ក្លាយ​ជា​អ្នកការពារ​សិទ្ធិ​ពលរដ្ឋ​ដែល​រង​ការ​រំលោភបំពាន​សិទ្ធិ ឬ​ការ​រំលោភបំពាន​ដីធ្លី។

សកម្មជន​ដីធ្លី​តវ៉ា​ទាមទារ​ឲ្យ​តុលាការ​ដោះលែង​អ្នកស្រី ទេព វន្នី និង​លោកស្រី បូវ សោភា នៅ​ខាង​មុខ​តុលាការ នៅ​ថ្ងៃ​ទី​១៧ សីហា ឆ្នាំ​២០១៦។
សកម្មជន​ដីធ្លី​តវ៉ា​ទាមទារ​ឲ្យ​តុលាការ​ដោះលែង​អ្នកស្រី ទេព វន្នី និង​លោកស្រី បូវ សោភា នៅ​ខាង​មុខ​តុលាការ នៅ​ថ្ងៃ​ទី​១៧ សីហា ឆ្នាំ​២០១៦។ RFA/Cheu Sideth

ក្នុងនាម​ជា​សកម្មជន​ដីធ្លី កញ្ញា សុង ស្រីលាភ ត្រូវ​ជាប់ពន្ធនាគារ​ចំនួន ២​ដង លើក​ទី​១ កាល​ពី​ឆ្នាំ​២០១២​ជាប់ឃុំ​រយៈពេល​មួយ​ខែ បី​ថ្ងៃ​ពី​បទ​ប្រព្រឹត្តិ​ហិង្សា​លើ​មន្ត្រី​សាធារណៈ​និង​ទន្ទ្រាន​ដី​សាធារណៈ និង​លើក​ទី​២​កាលពី​ឆ្នាំ​២០១៤​ត្រូវ​ជាប់ឃុំ​ម្ដងទៀត​រយៈពេល​ប្រាំ​ខែ​មួយថ្ងៃ​ពីបទ​រារាំង​ចរាចរណ៍​សាធារណៈ។ ជា​ស្រី​ក្រមុំ​ត្រូវគេ​ចាប់​ដាក់ពន្ធនាគារ កញ្ញា សុង ស្រីលាភ ពេល​ឈាន​ជើង​ដល់​ពន្ធនាគារ​ថ្ងៃ​ដំបូង​កញ្ញា​មាន​អារម្មណ៍​ភ័យខ្លាច៖ «តក់ស្លុត​ជាងគេ​នៅពេល​យើង​ឈាន​ជើង​ដល់​ពន្ធនាគារ​នៅពេលនោះ គឺ​រូបភាព​មួយ​ធ្វើ​ឱ្យ​យើង​ដក់ចិត្ត​ខ្លាំង គឺ​ពេលដែល​ជើង​ឈានដល់​ខាងក្នុង​មាន​អ្នកទោស​ជាច្រើន​គាត់​អើត​តាម​បង្អួច​គាត់​លូកដៃ​ហើយ​មក​មើល​យើង​អីចឹង​ណា អ៊ីចឹង​ខ្ញុំ​ឃើញ​រូបភាព​ហ្នឹង មាន​អារម្មណ៍​រៀង​ភ័យ​តក់ស្លុត​ដោយសារ​ធ្លាប់​លឺ​គេ​និយាយ​ថា នៅ​ក្នុង​ពន្ធនាគារ​គេ​វាយ​ធ្វើ​បាប​អី​អ៊ីចឹង​ណា»។

ជា​កូន​ទី៣ ក្នុង​គ្រួសារ​រង​ការ​រំលោភបំពាន​ដីធ្លី​រម្លឹក​ថា កាលពី​អំឡុង​ឆ្នាំ​២០១២ កញ្ញា​សម្រេច​ឈប់​ពី​ការងារ​នៅ​ក្រុមហ៊ុន​ឯកជន​មួយ មក​ចូលរួម​ទាមទារ​ជាមួយ​អ្នកភូមិ​បឹងកក់​ដោយ​ការរំលោភបំពាន​យក​ដីធ្លី​ពី​ឈ្មួញ​មាន​លុយ​ស្និទ្ធ​នឹង​រដ្ឋាភិបាល។ កញ្ញា​បន្ត​ថា ក្នុង​ពេល​ទាមទារ​ដីធ្លី​របស់​ខ្លួន​នោះ គឺ​បាន​ឆ្លងកាត់​បទពិសោធន៍​ឈឺចាប់​គ្រប់យ៉ាង ដោយ​ការ​វាយ​បង្ក្រាប​ពី​ក្រុម​សមត្ថកិច្ច និង​សន្តិសុខ​សាលាក្រុង​ភ្នំពេញ ការ​ឃុំខ្លួន ការ​ចោទប្រកាន់ និង​រហូត​ជាប់​ពន្ធនាគារ​។ នៅ​ពេល​ចេញពី​ពន្ធនាគារ​ក្នុង​គ្រានោះ​កញ្ញា ស្រីលាភ ថ្លែង​ប្រាប់​អ្នកសារព័ត៌មាន​ថា កញ្ញា​មិន​បញ្ឈប់​ការ​ទាមទារនោះ​ទេ បើ​មិន​បាន​ដីធ្លី​មក​វិញ៖ «ពួក​ខ្ញុំ​នៅតែ​បន្ត​ការ​តវ៉ា​រាល់​រឿង​ដែល​រំលោភ​សិទ្ធិ​ពួក​ខ្ញុំ ហើយ​ពួក​ខ្ញុំ​នៅតែ​បន្ត​ឆន្ទៈ​ទៀត​លុះត្រាតែ​សហគមន៍​បឹងកក់​ខ្ញុំ​ទទួល​បាន​ជោគជ័យ​ទាំងអស់​គ្នា​នៅ​ក្នុង​ដី ១២,៤៤ហិកតារ»។

ការ​ជាប់​ពន្ធនាគារ​ព្រោះ​ការ​ទាមទារ​ដីធ្លី​ខ្លួនឯង​នេះ​ហើយ បាន​ជំរុញ​ឱ្យ​កញ្ញា ស្រីលាភ ហក់​ចូល​ស៊ប់​នឹង​ការ​ទាមទារ​នេះ​។ រយៈពេល​នៃ​ការទាមទារ​រាប់​ឆ្នាំ​ក៏មាន​តំណាង​សហគមន៍​បឹងកក​ផ្សេងទៀត​ដែរ​ត្រូវ​ជាប់​ពន្ធនាគារ និង​រង​ការ​វាយ​ធ្វើ​ពី​ក្រុម​សមត្ថកិច្ច​រួម​មាន​៖ អ្នកស្រី ទេព វន្នី អ្នកស្រី ប៊ូវ សោភា លោកស្រី ង៉ែត ឃុន លោក ចាន់ ពុទ្ធិស័ក្ក និង​អ្នកភូមិ​បឹងកក​ផ្សេងទៀត ហើយ​ពួកគេ​ខ្លះ​ត្រូវ​រង​ការ​វាយ​ធ្វើបាប វាយដំ ជេរ​ប្រមាថ និង​ខ្លះទៀត​ត្រូវ​បាន​អាជ្ញាធរ​ចាប់​ដាក់គុក ដោយសារ​ការ​ចេញ​តវ៉ា​ការពារ​ដីធ្លី​របស់​ពួកគេ​ជាច្រើនលើក​ច្រើន​សារ​កាល​ពេល​កន្លង​ទៅ

សកម្មជន​បឹងកក់ កញ្ញា សុង ស្រីលាភ ត្រូវ​​សន្តិសុខ​ខណ្ឌ​៧មករា វាយ ទាត់​នៅ​ខាង​មុខ​តុលាការ​រាជធានី​ភ្នំពេញ នៅ​ថ្ងៃ​ទី​២៣ ខែ​កុម្ភៈ ឆ្នាំ​២០១៧។ RFA/Rann Samnang
សកម្មជន​បឹងកក់ កញ្ញា សុង ស្រីលាភ ត្រូវ​​សន្តិសុខ​ខណ្ឌ​៧មករា វាយ ទាត់​នៅ​ខាង​មុខ​តុលាការ​រាជធានី​ភ្នំពេញ នៅ​ថ្ងៃ​ទី​២៣ ខែ​កុម្ភៈ ឆ្នាំ​២០១៧។ RFA/Rann Samnang RFA/Rann Samnang

ក្រោយ​ការ​ទាមទារ​ដីធ្លី​អស់​រយៈពេល​ជិត ១០​ឆ្នាំ កញ្ញា សុង ស្រីលាភ បាន​ប្រែខ្លួន​ពី​ប្រជា​សហគមន៍​មាន​បញ្ហាដីធ្លី​មកជា​អ្នកឃ្លាំមើល​ការរំលោភបំពាន​សិទ្ធិមនុស្ស​វិញ​ម្ដង​។ នៅ​ឆ្នាំ​២០១៨​ខណៈ​វិបត្តិ​ដីធ្លី​នៅ​តំបន់​បឹង​បាន​ដោះស្រាយ​ស្ទើរ​ចប់​ស្វ​ព​គ្រប់ កញ្ញា សុង ស្រី​លាភ បាន​ចូល​បម្រើ​ជា​មន្ត្រី​នៃ​អង្គការ​ថ្មី​ដែល​ទើប​ចុះបញ្ជី​នៅ​ក្រសួងមហាផ្ទៃ ដែលមាន​ឈ្មោះ​គាំទ្រ​បច្ចេកៈវិទ្យា​នៅ​ជនបទ​ក្នុងប្រទេស​កម្ពុជា​ផ្នែក​សម្របសម្រួល​សហគម​ន៍ ដែល​ស្ថាប័ន​សង្គម​ធ្វើ​ការងារ​គាំទ្រ​ការតស៊ូ​មតិ​តាម​បណ្ដាញ​អ៊ីនធឺណិត​ផង និង​ចុះ​ជួប​ពលរដ្ឋ​ដែល​រងគ្រោះ​ដោយ​បញ្ហាដីធ្លី និង​ការរំលោភ​សិទ្ធិ​នានា​នៅតាម​មូលដ្ឋាន​។ កញ្ញា សុង ស្រីលាភ ប្រាប់​អាស៊ីសេរី​ទាំង​ញញឹម​ថា កញ្ញា​ស្រលាញ់​ការងារ​នេះ ព្រោះ​នាង​យល់​ពី​អារម្មណ៍​របស់​ពលរដ្ឋ​ដែល​ត្រូវ​គេ​រំលោភ​យក​ដីធ្លី​មាន​ការ​ឈឺចាប់​យ៉ាងណា? និង​ត្រូវការ​មាន​អ្នក​ប្រឹក្សា​យ៉ាងណា​?«ពេលដែល​ខ្ញុំ​​ងាក​ទៅ​ធ្វើ​ការងារ​សង្គម​ស៊ីវិល​ជា​ឱកាស​របស់ខ្ញុំ គឺ​ទោះបី​ខ្ញុំ​ឃ្លាតឆ្ងាយ​ពី​សហគមន៍​ខ្ញុំ ប៉ុន្តែ​ខ្ញុំ​អាចធ្វើ​ការ​ជាមួយ​សហគមន៍​ផ្សេងទៀត​ដែលមាន​បញ្ហា​ដូច​យើង​ដែរ ហើយ​មួយទៀត​ខ្ញុំ​អាច​ចែករំលែក​បទពិសោធន៍​របស់ខ្ញុំ​ទៅកាន់​ពួកគាត់ ហើយ​វា​ជា​ឱកាស​ខ្ញុំ​អាចធ្វើ​ជាមួយ​សហគមន៍​ជាច្រើន​នៅក្នុង​ប្រទេស​កម្ពុជា»។

ជម្លោះដីធ្លី​នៅ​តំបន់​បឹងកក់​កើតឡើង​ចាប់តាំងពី​ឆ្នាំ​២០០៧ ក្រោយ​រដ្ឋាភិបាល​អនុញ្ញាត​ឱ្យ​ក្រុមហ៊ុន ស៊ូកាគូ (Shukaku ) របស់​ឧកញ៉ា ឡៅ ម៉េងឃីន ធ្វើការ​អភិវឌ្ឍ​សម្រាប់​រយៈពេល​៩៩​ឆ្នាំ ក្នុង​ទឹកប្រាក់​ប្រមាណ​៧៩​លាន​ដុល្លារ​សហរដ្ឋអាមេរិក​លើ​ផ្ទៃដី​ជិត ១៣៣ហិកតារ។ ពលរដ្ឋ​សហគមន៍​បឹងកក់​ស្ទើរតែ​ទាំងអស់​បានទទួល​ដំណោះស្រាយ​ឬ​បាន​ដី​របស់ខ្លួន​មក​វិញ​។ ពេល​នេះ​ពលរដ្ឋ​បឹងកក់​ឱ្យ​ដឹងថា នៅ​សល់​តែ​ពលរដ្ឋ​ប្រមាណ ១០​គ្រួសារ​ទៀត​ប៉ុណ្ណោះ មិនទាន់​ចរចា​ត្រូវរ៉ូវ​គ្នា​ជាមួយ​សាលាក្រុង​ភ្នំពេញ។

ស្ត្រី​សហគមន៍​បឹងកក់ លោកស្រី ផាន់ ឈុន​រ៉េត ដែល​ចេញមុខ​តវ៉ា​រឿង​ដីធ្លី​របស់ខ្លួន​១០​ឆ្នាំ​មកហើយ​និង​ធ្លាប់​ជាប់ពន្ធនាគារ​ជាមួយ​កញ្ញា សុង ស្រី​លាភ និយាយថា លោកស្រី​សប្បាយចិត្ត​ពេល​ឃើញ​កញ្ញា សុង ស្រី​លាភ​អាចធ្វើ​ការងារ​ដោយ​មិន​គ្មាន​រើសអើង​ថា​ធ្លាប់​ជាប់ពន្ធនាគារ​ឬ​ជា​ពលរដ្ឋ​មាន​បញ្ហាដីធ្លី​។ លោកស្រី ផាន់ ឈុនរ៉េត ថា លោកស្រី​ក៏​ចង់ឃើញ​អង្គការ​សង្គម​ស៊ីវិល ឬ​ស្ថាប័ន​ផ្សេងទៀត​ផ្ដល់ឱកាស​ការងារ​ដល់​ពលរដ្ឋ​មាន​ជម្លោះដីធ្លី​ផ្សេងទៀត​ដែរ«ខ្ញុំ​សប្បាយចិត្ត​ដោយសារ​គាត់​តវ៉ា​ជាមួយ​ពួក​ខ្ញុំ ហើយ​គាត់​ក៏​ជាប់គុក​ជាប់​អី​ជាមួយ​ពួក​ខ្ញុំ​ដែរ ហើយ​ខ្ញុំ​ក៏​អរគុណ ហើយ​ខាង​អង្គការ​គេ​មិន​រើសអើង​ពួក​ខ្ញុំ យក​ពួកគាត់​ទៅ​ធ្វើ​ការ​ជាមួយ​ខ្ញុំ ក៏​សូម​សំណូមពរ​ឱ្យ​អ្នកផ្សេងៗ​ទៀត សូម​ឱ្យ​អង្គការ​ជួយ​យក​ចូល​ធ្វើការ​ដូច​ស្រី​លាភ​ផង»

អ្នកនាំពាក្យ​សមាគម​សិទ្ធិមនុស្ស​អាដ​ហុក (ADHOC) លោក ស៊ឹង សែន​ករុណា និយាយថា លោក​លើកទឹកចិត្ត​ដល់​សហគមន៍​ដីធ្លី​ដែល​ធ្លាប់​ជា​អ្នក​ត្រូវគេ​រំលោភ​យក​ដីធ្លី​មក​ធ្វើជា​អ្នកការពារ​សិទ្ធិ​ដីធ្លី​វិញ​។ លោក​បន្តថា អ្នក​ដែល​ហែល​ឆ្លង​ពី​បញ្ហាដីធ្លី​នេះ មាន​ឆន្ទៈ មានការ​ឈឺឆ្អាល និង​មាន​បទពិសោធន៍​ខ្ពស់​ក្នុង​ការ​ចែករំលែក​ទៅ​ពលរដ្ឋ​មាន​បញ្ហាដីធ្លី​ផ្សេងទៀត​ដែល​ឆ្ពោះទៅរក​ការទាមទារ​មួយ​ដើម្បី​ទទួលបាន​ដំណោះស្រាយ​«មាន​ការលើក​ចិត្ត​មែនទែន​ចំពោះ​រឿង​ទាំង​អស់ហ្នឹង​បាទ ដោយសារតែ​យើង​ឃើញថា​គាត់​មាន​ការ​តស៊ូ​ហើយ​ក្នុង​ហ្នឹង​សម្រាប់​សមាគម​អាដហុក ក៏​យើង​លើកទឹកចិត្ត​ដល់​សហគមន៍​ដីធ្លី​ផ្សេងៗ​ទៀត​ដែរ​បើសិន​គាត់​មាន​សមត្ថភាព​ក៏​អាច​វិវឌ្ឍ​ខ្លួន​ក្លាយជា​ទៅជា​បុគ្គលិក​សមាគម​អ៊ីចឹង​ដែរ​បាទ»។

កញ្ញា សុង ស្រីលាភ និយាយ​ថា ពេលនេះ​កញ្ញា​ទទួល​បាន​យុត្តិធម៌​ដោយ​បាន​ក្លាយជា​ម្ចាស់​ស្របច្បាប់​លើដី​របស់ខ្លួន​វិញ ក្រោយ​ការរំលោភបំពាន​ដែល​ដី​នេះ​មាន​តម្លៃ​ស្មើ​ជីវិត​។ កញ្ញា​រំពឹង​ថា ការងារ និង​បទពិសោធន៍​របស់​នាង​អាច​ក្លាយជា​ប្រយោជន៍​ដល់​ពលរដ្ឋ​មាន​បញ្ហាដីធ្លី​ដែល​មិនទាន់​ទទួល​ដំណោះស្រាយ​នៅ​ឡើយ។ អ្នកឃ្លាំមើល​សិទ្ធិមនុស្ស​រូបនេះ ចង់ឃើញ​ពលរដ្ឋ​មាន​បញ្ហាដីធ្លី​ផ្សេងទៀត​ប្រើប្រាស់​សិទ្ធិ​របស់ខ្លួន​ដែលមាន​ស្រាប់ ធ្វើ​ការ​តស៊ូ​មតិ​ដោយ​អហិង្សា​ដើម្បី​អាច​រស់នៅ​លើ​​ដី​របស់​ខ្លួន​សុខសាន្ត និង​ថ្លៃថ្នូរ៖ «អ្វីដែល​សប្បាយចិត្ត​ជាង​គេ​បំផុត​នោះ ពេលដែល​គាត់ (ពលរដ្ឋ​មាន​បញ្ហាដីធ្លី​)​ហៅ​យើង​ថា អ្នកគ្រូ អ៊ីចឹង​ណា​ខ្ញុំ​ប្រាប់​គាត់​ថា កុំ​ហៅ​ខ្ញុំ​អ្នកគ្រូ​អី​ហៅ​ខ្ញុំ​ថា ស្រី​លាភ​ធម្មតា​ដដែល​ទៅ ប៉ុន្តែ​គាត់​ថា សុំ​ហៅ​អ៊ីចឹង​ហើយ ដើម្បី​ងាយស្រួល អ៊ីចឹង​ខ្ញុំ​មើល​ទឹកចិត្ត​ពួកគាត់ គាត់​ចូលចិត្ត​ស្រលាញ់​យើង​ឱ្យ​តម្លៃ​យើង​ដែល​កន្លងមក​​យើង​ធ្វើ​ការងារ​ជាច្រើន​លះបង់​ជាច្រើន​ដើម្បី​សហគមន៍​ហើយ​នៅ​ពេល​យើង​បន្ត​ទៅ​មុខ​ទៀត​យើង​យក​អ្វី​ដែល​យើង​ធ្លាប់​ឆ្លងកាត់​ហ្នឹង​យក​ទៅ​ពិភាក្សា​ចែករំលែក​ជាមួយគ្នា​ទៅវិញ​ទៅ​មួយ»៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មន្ត្រី​សង្គម​ស៊ីវិល​ធ្វើ​ដែល​ការងារ​ផ្នែក​សិទ្ធិ​កម្មករ អំពាវនាវ​ឲ្យ​ប្រជាពលរដ្ឋ​កម្ពុជា ឈប់​ឆ្លងដែន​ទៅ​រក​ការងារ​ធ្វើ​នៅ​ប្រទេស​ថៃ​ក្នុង​អំឡុង​វិបត្តិ​ជំងឺ​កូវីដ-១៩

$
0
0

មន្ត្រី​សង្គម​ស៊ីវិល​ដែល​ធ្វើ​ការងារ​ផ្នែក​សិទ្ធិ​កម្មករ អំពាវនាវ​ឲ្យ​ប្រជាពលរដ្ឋ មេត្តា​ប្រុងប្រយ័ត្ន​កុំ​ចាញ់បោក​គេ ចេញ​ទៅ​ស្វែងរក​ការងារ​ធ្វើ​នៅ​ប្រទេស​ថៃ ក្នុង​អំឡុង​វិបត្តិ​នៃ​ការ​ឆ្លង​រាលដាល​ជំងឺ​កូវីដ-១៩។ ការ​លើក​ឡើង​នេះ បន្ទាប់​ពី​ពលរដ្ឋ​ ៦​នាក់ ជា​អ្នក​ខេត្ត​កំពង់ធំ បាន​លួច​ចូល​ឆ្លង​ដែន​ខុសច្បាប់​ទៅ​ប្រទេស​ថៃ តែ​ត្រូវ​សមត្ថកិច្ច​ឃាត់​ខ្លួន​នៅ​ចំណុច​ខេត្ត​បន្ទាយ​មាន​ជ័យ នៅ​ព្រឹក​ថ្ងៃ​ទី២៧ ខែ​ឧសភា។

សង្គម​ស៊ីវិល​ផ្នែក​សិទ្ធិ​ការងារ​ព្រួយបារម្ភ​ពី​ពលរដ្ឋ​កំពុង​ជួប​វិបត្តិ​សេដ្ឋកិច្ច​គ្រួសារ និង​ដោះ​បំណុល​ធនាគារ ដែល​ប្រថុយ​លួច​ឆ្លង​ដែន​ខុស​ច្បាប់​តាម​មេខ្យល់ ដើម្បី​ទៅ​ស្វែងរក​ការងារ​ធ្វើ​នៅ​ប្រទេស​ថៃ ហើយ​ត្រូវ​អាជ្ញាធរ​និង​កម្លាំង​សមត្ថកិច្ច​ចាប់​ខ្លួន។

ប្រធានមជ្ឈមណ្ឌល​សម្ពន្ធភាព​ការងារ​និង​សិទ្ធិមនុស្ស ហៅ​កាត់​ថា សង់ត្រាល់ (CENTRAL) លោក មឿន តុលា មាន​ប្រសាសន៍​ថា ពលរដ្ឋ​គួរ​តែ​ប្រុងប្រយ័ត្ន​ចំពោះ​ការ​អន្ទង​ពី​មេខ្យល់​ឲ្យ​ឆ្លង​ដែន​ខុស​ច្បាប់​ទៅ​ស្វែងរក​ការងារ​ធ្វើ​នៅ​ប្រទេស​ថៃ ក្នុង​អំឡុង​វិបត្តិ​ជា​សាកល​ជំងឺ​កូវីដ-១៩ ដែល​ថៃ​បន្ត​ដាក់​ប្រទេស​ក្នុង​ភាព​អាសន្ន និង​រឹតបណ្ដឹង​ខ្លាំង​នោះ។ លោក​ថា ក្រៅ​ពី​ការ​ចាប់​បញ្ជូន​មក​វិញ ភាគី​ថៃ​អាច​នឹង​អនុវត្ត​ច្បាប់​អន្តោប្រវេសន៍​ចាប់​ដាក់​ពន្ធនាគារ​ទៀត​ផង ខណៈ​ព្រំដែន​ប្រទេស​ទាំង​ពីរ​បន្ត​បិទ​គ្មាន​កាល​កំណត់​ជាក់លាក់​នៅ​ឡើយ។ មួយ​វិញ​ទៀត លោក​ថា ប្រទេស​កម្ពុជា​និង​ប្រទេស​ថៃ​តាមរយៈ​កិច្ចព្រមព្រៀង ឬ MOU ក៏​បាន​បន្ត​ផ្អាក​ការ​ទទួល​និង​បញ្ជូន​ពលករ​ពី​កម្ពុជា​ដែរ៖ «សម្រាប់​ពេល​នេះ​ពលរដ្ឋ​យើង​មិន​គួរ​ទាន់​ប្រថុយប្រថាន​ក្នុង​ការ​ឆ្លង​ដែន​ទៅ​ប្រទេស​ថៃ​ទៅ​ធ្វើការ​នៅ​ហ្នឹង​ទេ។ ការ​អន្ទង​ណាមួយ​ប្រជាពលរដ្ឋ​យើង​អាច​ចាញ់បោក​មេ​ខ្យល់​ណាមួយ ឬ​ចាញ់​បោក​គេ»

ក្ដី​បារម្ភ​នេះ បន្ទាប់​ពី​សមត្ថកិច្ច​ខេត្ត​បន្ទាយមានជ័យ កាល​ពី​ថ្ងៃ​ទី២៧ ឧសភា ចាប់​បាន​ពលរដ្ឋ ៦នាក់ ដែល​មក​ពី​ខេត្ត​កំពង់ធំ ដែល​ក្នុង​នោះ​មាន​កុមារ​ម្នាក់​អាយុ ៤ឆ្នាំ ឲ្យ​ធ្វើ​កិច្ចសន្យា ព្រោះ​ពួកគាត់​មាន​បំណង​លួច​ឆ្លង​ចូល​តាម​ច្រក​របៀង​ព្រំដែន ចូល​ទៅ​ដី​ថៃ​ដើម្បី​ទៅ​ធ្វើការ​នៅ​ខេត្ត​ឈុនបុរី ប្រទេស​ថៃ ដោយ​ថា​មាន​ថៅកែ​មក​រង់ចាំ​នៅ​ផ្សារ​រ៉ុងគ្លឿ (ប្រទេស​ថៃ) តាមរយៈ​ម៉ូតូឌុប ដោយ​យក​លុយ​ម្នាក់ ២.៥០០បាត ឬ​ប្រមាណ​ជិត ៩០ដុល្លារ។

រដ្ឋមន្ត្រី​ក្រសួង​មហាផ្ទៃ និង​ជា​ប្រធាន​គណៈកម្មាធិការ​ជាតិ​ប្រយុទ្ធ​ប្រឆាំង​អំពើ​ជួញដូរ​មនុស្ស លោក ស ខេង កាល​ពី​ថ្ងៃ​ទី២៧ ឧសភា ក៏​បាន​ស្នើ​សមត្ថកិច្ច​នៅ​តាម​បន្ទាត់​ព្រំដែន ជាពិសេស​រដ្ឋបាល​ដែនដី កម្លាំង​កងយោធពលខេមរភូមិន្ទ កងកម្លាំង​នគរបាល​ជាតិ និង​មន្ត្រី​សមត្ថកិច្ច​ពាក់ព័ន្ធ សហការ​គ្នា​ទប់ស្កាត់​កុំ​ឲ្យ​មាន​ករណី​ពលរដ្ឋ​បន្ត​លួច​ឆ្លងដែន​ចូល​ប្រទេស​ថៃ ត​ទៅ​ទៀត និង​ជំរុញ​ឲ្យ​ចាប់​មេខ្យល់​យក​មក​ផ្តន្ទាទោស៖ «ការ​លួច​ឆ្លងកាត់​ព្រំដែន​ត្រឡប់​ទៅ​ថៃ​វិញ សូម​ឲ្យ​បណ្ដា​ខេត្ត​ជាប់​ព្រំដែន​ខិតខំ​ប្រមូល​កម្លាំង​ដើម្បី​ជួយ​ទប់ស្កាត់។ ការពិត​ហើយ​គឺ​យើង​បិទ​ច្រក​ផ្លូវការ​តែ​តាម​របៀង​គឺ​គាត់​ទៅ​បាន​រឿង​នេះ​គឺ​ច្បាស់លាស់​ហើយ​កាល​ណា​ចាប់​បាន​មេខ្លោង​ហ្នឹង​គឺ​ពិត​ជា​អ្នក​ជួញដូរ​សូម​ឲ្យ​យក​ចិត្ត​ទុកដាក់ ហើយ​ព្រោះ​ទៅ​ដល់​ហ្នុង​គឺ​ខុស​ច្បាប់ ថៃ​នៅ​ប្រកាស​ដាក់​ប្រទេស​ក្នុង​គ្រា​មាន​អាសន្ន​នៅ​ឡើយ​មិន​ទាន់​បើក​ទេ។ អ៊ីចឹង​វា​ច្បាស់​ណាស់​ថា​ការ​លួច​ឆ្លង​ដែន​ទៅ​នេះ​គឺ​ខុស​ច្បាប់​ហើយ។ មន្ត្រី​ពាក់ព័ន្ធ​រួមគ្នា​ទប់ស្កាត់​កុំ​ឲ្យ​លួច​ឆ្លងកាត់​ខុសច្បាប់​ទៅ​ប្រទេស​ថៃ​ជាពិសេស»

យ៉ាង​នេះ​ក្ដី​លោក មឿន តុលា ថា ក្រៅ​ពី​ចំណាត់​ការ​អប់រំ​ផ្សព្វផ្សាយ និង​រាំង​ខ្ទប់​ពលរដ្ឋ​ដោយ​ប្រើ​ចំណាត់​ការ​ច្បាប់​នោះ ផ្ទុយ​វិញ​រដ្ឋាភិបាល​គួរ​តែ​មាន​វិធានការ​ណាមួយ​ក្នុង​ការ​ជួយ​ដោះស្រាយ​បញ្ហា​ឫស​គល់​ដែល​ជំរុញ​ឲ្យ​ពលរដ្ឋ​ចេះ​តែ​បន្ត​លួច​ចេញ​ទៅ​រក​ការងារ​ធ្វើ​ក្នុង​អំឡុង​ពេល​នេះ៖«ជួយ​ពលរដ្ឋ​ខ្មែរ​យើង​ដែល​បាន​ធ្វើ​ដំណើរ​ត្រឡប់​មក​ពី​ប្រទេស​ថៃ​ឡើង​វិញ​ហ្នឹង ឬ​ក៏​កសិករ​ខ្មែរ​យើង​ហ្នឹង​ឲ្យ​គាត់​មាន​ចំណូល​ណាមួយ​ដែល​អាច​ឲ្យ​គាត់​រ៉ាប់រង​ក្នុង​ចំណាយ​ប្រចាំ​ថ្ងៃ​របស់​គាត់។ ធម្មតា​ទេ​តែ​គាត់​អត់​មាន​ចំណូល​គាត់​ត្រូវ​ចំណាយ​ប្រចាំ​ថ្ងៃ គាត់​មាន​ជំពាក់​បំណុល​គេ​ផង​អី​ផង អ៊ីចឹង​បញ្ហា​ក្រពះ​គឺ​ត្រូវ​ប្រថុយ​ហើយ ជា​រឿង​មួយ​កត្តា​ជំរុញ​ឲ្យ​គាត់​ប្រថុយប្រថាន​ក្នុង​ការ​ធ្វើ​ចំណាកស្រុក​ដោយ​មិន​ដឹង​ព័ត៌មាន​ច្បាស់លាស់»

អំឡុង​ពេល​នៃ​ការ​រីក​រាល​ដាល​ជា​សាកល​នៃ​ជំងឺ​កូវីដ-១៩ ពលករ​ខ្មែរ​ដែល​កំពុង​ធ្វើការ​នៅ​ប្រទេស​ថៃ មាន​ចំនួន​ជាង ១លាន​នាក់ បាន​អត់​ការងារ​ធ្វើ ព្រោះ​តែ​រោងចក្រ សហគ្រាស​បាន​ផ្អាក​សកម្មភាព រហូត​ដល់​បិទ​ច្រក​ព្រំដែន និង​ដាក់​ប្រទេស​ក្នុង​ភាព​អាសន្ន ដើម្បី​ទប់ស្កាត់​ការ​ឆ្លង​រាលដាល​នៃ​ជំងឺ​នេះ។ ពលករ​ខ្មែរ​ដែល​អត់​ការងារ​ធ្វើ និង​បារម្ភ​ខ្លាច​ឆ្លង​ជំងឺ​បាន​បង្ខំចិត្ត​វិលត្រឡប់​មក​ស្រុក​កំណើត​វិញ ដោយ​ខ្លះ​បាន​ឆ្លងដែន​តាម​ច្រក​របៀង​នានា​ដោយ​ប្រថុយប្រថាន។

មន្ត្រី​ជាន់ខ្ពស់​ក្រសួង​មហាផ្ទៃ​អះអាង​ថា តួលេខ​ចុងក្រោយ​កាល​ពី​ចុង​ខែមីនា ឆ្នាំ២០២០ ត្រឹម​រយៈ​ពេល ២ខែ មាន​ពលករ​សរុប​ជាង ៩ម៉ឺន​នាក់ បាន​វិល​ចូល​ស្រុក​វិញ។ ប៉ុន្តែ​ដោយសារ​ពួក​គាត់​ប្រឈម​ការ​ខ្វះខាត​ជីវភាព និង​បំណុល​ធនាគារ មាន​សេចក្ដី​រាយការណ៍​ថា ព្រោះ​តែ​អាជ្ញាធរ​ព្រំដែន​ប្រទេស​ទាំង​ពីរ​រឹត​បណ្ដឹង និង​បិទ​ច្រក​ព្រំដែន ពួក​គាត់​ទាំង​នោះ​បាន​លួច​ឆ្លង​ចូល​ត្រឡប់​ទៅ​ដី​ថៃ​ដោយ​ខុស​ច្បាប់​ម្ដង​ទៀត​ក្រែងលោ​មាន​ការងារ​ធ្វើ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ជនរងគ្រោះ​ម្នាក់​ស្ថិតក្នុង​ស្ថានភាព​មិន​ប្រក្រតី​ក្រោយ​អាជ្ញាធរ​ប្រើ​កម្លាំង​ឈូសឆាយ​យក​ដី​របស់​ខ្លួន

$
0
0

ប្រជាពលរដ្ឋ​រងគ្រោះ​ម្នាក់​កំពុងស្ថិត​ក្នុង​បញ្ហា​ស្មារតី​មិន​នឹងន ក្រោយ​ពី​អាជ្ញាធរ​របប​ក្រុងភ្នំពេញ​បាន​ដឹកនាំ​កម្លាំង​ប្រមាណ​ជិត ១​រយ​នាក់មក​បណ្តេញ​ចេញពី​ដី​របស់ខ្លួន​ដោយ​បង្ខំ ដើម្បី​យក​ដី​ទៅ​ឱ្យ​ក្រុមហ៊ុន អូស៊ីអាយស៊ី (OCIC) របស់​លោក​ឧកញ៉ា ពុង ខៀវសែ។ មន្ត្រី​សិទ្ធិមនុស្ស​បានចាត់ទុក​ទង្វើ​របស់​សមត្ថកិច្ច​ថា ជា​សកម្មភាព​រំលោភ​យ៉ាងធ្ងន់ធ្ងរ​ដល់​សិទ្ធិ​រស់រាន​មានជីវិត​របស់​ពលរដ្ឋ។

ពលរដ្ឋ​រងគ្រោះ​ដោយសារ​ការបណ្តេញចេញ​ដោយ​បង្ខំ​លោកស្រី ហ៊ុល សាវឿន ប្រាប់​អាស៊ីសេរី​ថា សុខភាព​របស់លោកស្រី នៅមាន​សភាព​ទន់ខ្សោយ និង​មិន​ប្រក្រតី​ក្រោយ​ពី​អ្នកស្រី​បាន​ដួលសន្លប់​ដើម្បី​ព្យាយាម​កុំឱ្យ​អាជ្ញាធរ​មក​រុះរើ​កុងតឺន័រ ដែល​លោកស្រី​និង​ក្រុមគ្រួសារ​ស្នាក់​នៅ​ចាំ​ដី​របស់​ខ្លួន

លោកស្រី​និយាយថា អាជ្ញាធរ​ប្រមាណ​ជិត ១០០​នាក់​បាន​យក​គ្រឿងចក្រ និង​រថយន្ត​បាញ់​ទឹក​មក​បណ្ដេញ​លោកស្រី​ចេញ​ដោយ​មិន​បាន​ជួន​ដំណឹង​អ្វី​ទាំងអស់​។ លោកស្រី​បញ្ជាក់​ថា អាជ្ញាធរ​រដ្ឋាភិបាល​ធ្វើ​នេះ​ហាក់បីដូចជា​ហាក់​មនុស្សធម៌​ហួស​ហេតុដែល​លោកស្រី​មិន​អាចទទួល​យក​បាន៖ «ឈឺចាប់​ឃើញ​គេ​មក​ប្លន់​យក​ដី​យើង​ស្រស់​តែម្តង ហើយ​ឥឡូវ​ហ្នឹង​គេ​ដាក់​ការពារ​មិនឱ្យ​ចូល​ដី​របស់ខ្លួន​ទៀត។ យើង​ជា​ម្ចាស់​ដី​មិន​បាន ចូល​ទៅ​ដី​ខ្លួនឯង​ហើយ​គេ​ព័ទ្ធរបង​តាមចិត្ត​គេ។ គេ​ធ្វើ​ភ្លាមៗ​ហ៊ុំ​យក​ដី​យើង​តែម្តង»។

អាជ្ញាធរ​ខណ្ឌ​ជ្រោយចង្វា និង​សាលា​រាជធានី​ភ្នំពេញ កាល​ព្រឹក​ថ្ងៃទី​២៧ ខែ​ឧសភា បាន​យក​រថយន្ត​បាញ់​ទឹក និង​រថយន្ត​ស្ទូច យក​ទូកុងតឺន័រ ៣​គ្រឿង និង​ផ្ទះ​ឈើ​ចំនួន​ពី ២​ខ្នង​របស់​លោកស្រី ហ៊ុល សាវឿន​ចេញពី​ដី​របស់ខ្លួន​ដែល​លោកស្រី​បាន​រស់នៅ​តាំងពី​ឆ្នាំ​១៩៩៤ ទៅ​ឱ្យ​ក្រុមហ៊ុន​អូស៊ីអាយស៊ី។

ក្រុមហ៊ុន​អូស៊ីអាយស៊ី របស់លោក​ឧកញ៉ា ពុង ខៀវ សែ មាន​គម្រោង​អភិវឌ្ឃន៍​ទៅ​ជា​ក្រុង​រណប ដែល​មាន​ទំហំ​ទឹកប្រាក់​ជាង ១​ពាន់ ៦​រយ​លាន​ដុល្លារ​សហរដ្ឋអាមេរិក លើ​ទំហំ​ដី ៣៨៧​ហិកតារ។ គម្រោង​អភិវឌ្ឍន៍​នេះ​ស្ថិតនៅ​ភាគ​ខាងកើត​ទីក្រុង​ភ្នំពេញ ជាប់​ច្រាំង​ទន្លេសាប​ខាងកើត​ឆៀង​ខាងឆ្វេង ស្ពាន​មិត្តភាព​កម្ពុជា​-​ជប៉ុន និង​ស្ពាន​មិត្តភាព​កម្ពុជា​-​ចន។

​ឆ្លើយតប​នឹង​បញ្ហា​នេះ អភិបាលក្រុង​ភ្នំពេញ​លោក ឃួង ស្រេង បានបញ្ជាក់​យ៉ាងខ្លី​ថា លោក​មិនទាន់​ទទួល​ព័ត៌មាន​នេះនោះ​ឡើយ ដោយសារតែ​អាជ្ញាធរ​មូលដ្ឋាន​មិន​ទាន់​រាយការណ៍​ជូន​លោក«សួរ​ទៅ​ខណ្ឌ​ទៅ​។​ខ្ញុំ​មិន​ទាន់បាន​ទទួល​ព័ត៌មាន​នៅ​ឡើយ»។

បើទោះបីជា​សកម្មភាព​បណ្ដេញ​ប្រជាពលរដ្ឋ​ដោយ​បង្ខំ​ត្រូវបាន​អាជ្ញាធរ​នៃ​របប​ក្រុងភ្នំពេញ​ព្យាយាម​គេច​ចេញ​ពី​ការ​មិន​ទទួលខុសត្រូវ​យ៉ាងណាក៏ដោយ។ ក៏​ក្រុម​អ្នកឃ្លាំមើល​រំលោភសិទ្ធិ​មនុស្ស​នៅតែ​ចាត់ទុកថា​សកម្មភាពរ​បស់​សមត្ថកិច្ច​ជា​ទង្វើ​រំលោភ​យ៉ាងធ្ងន់ធ្ងរ​ចំពោះ​សិទ្ធិ​រស់រានមានជីវិត។

មន្ត្រី​នៃ​សិទ្ធិមនុស្ស​នៃ​មជ្ឈមណ្ឌល​សិទ្ធិមនុស្ស​កម្ពុជា (CCHR) លោក វណ្ណ សូផាត ដែល​ចុះ​ឃ្លាំមើល​ការរុះរើ​ពី​សំណាក់​អាជ្ញាធរ​នេះ​ប្រាប់​អាស៊ីសេរី​ថា ក្រុម​អាជ្ញាធរ​ធ្វើ​នេះ​គឺជា​ទង្វើ​រំលោភសិទ្ធិ​រស់នៅ​ជា​មូលដ្ឋាន​របស់​ប្រជាពលរដ្ឋ និង​រំលោភ​សិទ្ធិមនុស្ស​យ៉ាងធ្ងន់ធ្ងរ ខណៈ​ពលរដ្ឋ​នៅ​តំបន់​ជ្រោយចង្វា​នៅ​មាន​ពលរដ្ឋ​ខ្លះ​មិន​ទាន់​ទទួល​បាន​សំណង​នៅ​ឡើយ

លោកស្រី ហ៊ុល សាវឿន ពលរដ្ឋ​រងគ្រោះ​ដោយសារ​ការបណ្តេញចេញ​ដោយ​បង្ខំ​បាន​បញ្ជាក់​ថា នៅ​មាន​ពលរដ្ឋ​ប្រមាណ ៦៥​គ្រួសារ​ទៀត ក្រុមហ៊ុន​មិនទាន់​ផ្តល់​សំណង​នៅឡើយ។ លោកស្រី​និយាយថា ក្រុមហ៊ុន​អូស៊ីអាយស៊ី សន្យា​ថា ផ្តល់ប្រាក់​សំណង ១០​ភាគរយ​នៃ​ទំហំ​ដី​ដែល​នៅ​សេសសល់​ចំនួន​ជាង ៥០​ហិកតា ដែល​ពួកគេ​មិន​អាចទទួល​យក​ដំណោះស្រាយ​នេះ​ទេ។

ក្រុមហ៊ុន​វិនិយោគទុន​ក្រៅប្រទេស​អូស៊ីអាយស៊ី ទទួល​សិទ្ធិ​វិនិយោគ​រយៈពេល ៩៩​ឆ្នាំ ពី​រដ្ឋាភិបាល ដើម្បី​អភិវឌ្ឍ​ទៅជា​ទីក្រុង​ពាណិជ្ជកម្ម​ដ៏​សម្បូរបែប ស្ថិត​នៅ​តាម​បណ្តោយ​ទន្លេមេគង្គ។

គម្រោង​អភិវឌ្ឍន៍​ដ៏​ធំ​នេះ​លាតសន្ធឹង​ចាប់ពី​ចំណុច​ក្បាល​ទឹក​ត្រង់​ទន្លេបាសាក់ (ខាងកើត​ទីក្រុង​រណប​កោះ​ពេជ្រ​) ស្រប​តាម​មាត់ច្រាំង​ទន្លេ​មេគង្គ រហូត​ដល់​កោះ​ប្រាក់ ស្រុក​កៀនស្វាយ ខេត្តកណ្តាល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

កសិករ​​​ដាំ​បន្លែ​​​មួយ​ចំនួន​នៅ​ខេត្ត​បាត់ដំបង​​​​​​​​​​​​​​​កំពុង​ត្រូវ​ប៉ាន់​នឹង​​របរ​​ដាំដុះ​​លក់​បាន​ប្រាក់​ច្រើន​អំឡុង​វិបត្តិ​ជំងឺ​កូវិត​១៩

$
0
0

​ប្រជាកសិករ​​ជា​ច្រើន​គ្រួសារ​​ដែល​ប្រកប​របរ​ដាំ​​បន្លែ​​លក់​នៅ​ស្រុក​ឯកភ្នំ ខេត្ត​បាត់ដំបង​ កំពុង​ត្រូវ​ប៉ាន់​នឹង​របរ​ដាំ​​ដុះ​​ ​អំឡុង​ពេល​មាន​វិបត្តិ​ជំងឺ​កូវិដ​១៩​។ ក្រុម​កសិករ​ទាំង​នោះ​​ ឱ្យ​ដឹង​​ថា​ សព្វ​ថ្ងៃ​​​​​តម្លៃ​​​កសិផល​​មាន​ហាងឆេង​​​ខ្ពស់​ជាង​ឆ្នាំ​មុន​ៗ ​ទ្វេ​ដង​ ​​​ធ្វើ​ឱ្យ​ពួកគាត់​មាន​ការងារ​ធ្វើ​នៅ​ក្នុង​ស្រុក​មិន​បាច់​ធ្វើ​ចំណាក​ស្រុក​​​​ឡើយ​។

តើ​ប្រជាកសិករ​ទាំង​នោះ​​និយម​ដាំ​ដុះ​បន្លែ​អ្វី​ខ្លះ​​​​លក់​លើ​ទីផ្សារ​​បាន​ជា​មាន​​តម្លៃ​​​ខ្ពស់​បែប​នេះ​?​

ប្រជាកសិករ​នៅ​ស្រុក​ឯកភ្នំ​ លើក​ឡើង​ស្រដៀង​គ្នា​ថា ​​​ចាប់​តាំង​ពី​​មាន​ការ​រាតត្បាត​ជំងឺ​កូវិដ១៩​​ មក ​តម្លៃ​​កសិផល​​របស់​ពួកគេ​​​​​មាន​​ហាងឆេង​​ប្រសើរ​ឡើង​ជា​បន្ត​បន្ទាប់​​ ហើយ​​សំបូរ​ឈ្មួញ​ចូល​ទិញ​​បន្លែ​ដល់​​ចម្ការ​ទៀត​ផង​។

អ្នក​ដាំ​បន្លែ​នៅ​ភូមិ​ដួង​មា ឃុំ​ ព្រែក​នរិន្ទ ស្រុក​ឯកភ្នំ លោក ធឹម វីរៈ ​ថ្លែង​ថា ​​ចាប់​តាំង​តែ​លោក​ដាំដំណាំ​មក​ទើប​តែ​ឆ្នាំ​នេះ​​​ទេ​ ដែល​​​លក់​បន្លែ​បាន​ថ្លៃ​បំផុត និង​ងាយ​ស្រួល​រក​ទីផ្សារ​លក់​​​​។ ​កសិករ​វ័យ​៤០ឆ្នាំ​​រូប​នេះ រៀបរាប់​ថា ​​​​ដំណាំ​​​​ដែល​លោក​ដាំដុះ​នោះ​ជា​ប្រភេទ​បន្លែ រួម​មាន​ ​ពោត ត្រសក់ ​ត្រប់ និង​ឪឡឹក​​យក​ផ្លែ​ធ្វើ​សម្ល​ នៅ​លើ​ផ្ទះ​ដី​​ប្រមាណ ​៣ហិកតារ ​ដោយ​​ចំណាយ​អស់​ដើម​ទុន​​​ជាង​ ៣ពាន់​(.០០០ដុល្លារ​អាមេរិក​។ លោក​បន្ថែម​​ថា ​បន្លែ​មួយ​ចំនួន​​​ប្រមូល​ផល​​រួច​​ហើយ​ កាល​ពី​​ចុង​ខែ​មេសា​ និង​មួយ​ចំនួន​ទៀត ​​កំពុង​ប្រមូល​ផល។​​ លោក​​បន្ត​​ថា ​បន្លែ​ឆ្នាំ​នេះ​មាន​ឈ្មួញ​​ចូល​ទៅ​ទិញ​ដល់​ចម្ការ​មិន​សូវ​សូញសាញតម្លៃ​ដូច​ឆ្នាំ​មុន​ៗ​​ ទេ ​គឺ​ឱ្យ​តែ​មាន​បន្លែ​​លក់​​ឈ្មួញ​​ប្រមូល​ទិញ​​យក​ទាំង​អស់។ លោក​​ថា ​បន្លែ​​គ្រប់​មុខ​លក់​បាន​ថ្លៃ​ចាប់​ពី​ខែ​មីនា​មក​​ ​ហើយ​តម្លៃ​​​ចេះ​តែ​​ហក់​ឡើង​​ជា​បន្ត​បន្ទាប់​ ដោយ​ចាប់​​ពី​តម្លៃ​​ ៥០០​រៀល​ក្នុង​មួយ​គីឡូក្រាម​​ឡើង​​​ដល់​​​ ១ពាន់​ ៨០០​រៀល​ (.៨០០ក្នុង​មួយ​គីឡូក្រាម៖ «បើ​សិន​ជា​តម្លៃ​ដូច​សព្វ​​ថ្ងៃ​នេះ​ខ្ញុំ​ជឿ​ថា​កសិករ​នៅ​ប្រទេស​យើង​ នៅ​​ស្រុក​ខ្ញុំ​​​គឺ​ពីរ​បី​ឆ្នាំ​ទៀត ប្រាកដ​ជា​មាន​ជីវភាព​ធូរធារ​ច្រើន​បាទ ព្រោះ​​អី​នៅ​ភូមិ​ខ្ញុំ​ឃុំ​ខ្ញុំ​នេះ​ភាគ​ច្រើន​ចូល​ចិត្ត​ដ​បន្លែ​ឆ្លង​កាត់​ហ្នឹង​​ធ្វើ​ចង់​គ្រប់​គ្នា​បណ្ដោយ​។ ព្រោះ​មាន​អី​ពឹង​មាន​តែ​ផ្នែក​កសិកម្ម​​ធ្វើ​បន្លែ​ហ្នឹង​ឯង​ បើ​មាន​ការ​ធ្លាក់​តម្លៃ​ទៀត​កសិកម្ម​យើង​ខ្ញុំ​ មិន​ធ្វើ​យ៉ាង​ម៉េច​ទេ​»

លោក​បន្ត​ថា ​​បន្លែ​លក់​បាន​ថ្លៃ​បំផុត​ក្រោយ​ពេល​ចូល​ឆ្មាំ​ហើយ​​​រហូត​ដល់​ដើម​ខែ​ឧសភា​ ដោយ​ត្រសក់​​តម្លៃ​​ជិត ​២ពាន់​រៀល​ (.០០០ក្នុង​មួយ​គីឡូក្រាម ដែល​​ខុស​ពី​មិន​ទាន់​មាន​ជំងឺ​កូវិដ​១៩​ តម្លៃ​​ចន្លោះ​ពី​ ២៥០​ទៅ​ ៦០០​រៀល​​ក្នុង​មួយ​គីឡូក្រាម​ ហើយ​ពេល​ខ្លះ​​ឈ្មួញ​មិន​ទិញ​ ក៏​មាន​ដែរ។​ លោក​ថា ​បន្លែ​​ទាំង​អស់​​​នេះ​ ​លោក​​ដឹក​យក​ទៅ​លក់​​​នៅ​ផ្សារ​បាត់ដំបង​ដោយ​ខ្លួន​ឯង​ ​​គឺ​មិន​បាន​លក់​ឱ្យ​ឈ្មួញ​នៅ​ក្នុង​ចំការ​នោះ​ទេ ដើម្បី​ឱ្យ​បាន​កម្រៃ​​ច្រើន​បន្ថែម​ទៀត។ លោក​បញ្ជាក់​ទៀត​​ថា ​គិត​ត្រឹម​ថ្ងៃ​ទី​២៧​ឧសភា​លោក​លក់​បន្លែ​​បាន​ប្រាក់​​ជាង​ ៧ពាន់​ដុល្លារ​ (.០០០)​ អាមេរិក​ហើយ ពោល​គឺ​ បាន​ប្រាក់​ច្រើន​ជាង​ឆ្នាំ​មុន​​​ជិត ៣​ដង ដែល​លក់​បាន​ប្រាក់​ប្រមាណ​ ៣ពាន់​ដុល្លារ (.០០០) ​ប៉ុណ្ណោះ៖ «អ្នក​ដែល​ដាំ​ហ្នឹង​ គឺ​ដាំ​វិល​ជុំ​បណ្ដោយ​។ អស់​ពី​ដំណាំ​មួយ​ចូល​ដំណាំ​មួយ​ ទៅ​តាម​រដូវ​កាល​មេឃ​អីចឹង​។ ឥឡូវ​ដូច​ជា​ ឪឡឹក​របស់​ខ្ញុំ​ហ្នឹង​អស់​ផល​ហើយ។ ឥឡូវ​ខ្ញុំ​ចាប់​ផ្ដើម​ដាំ​ដូច​​ជា​បន្លែ​ម្រះ​បន្ថែម​ទៀត​។ ពីដើម​មក ខ្ញុំ​លក់​ឱ្យ​ឈ្មួញ​កណ្ដាល​ តែ​ឥឡូវ​នេះ​ខ្ញុំ​លក់​​ផ្ទាល់​ខ្លួន​ឯង​ ប៉ុន្តែ​កសិករ​​ភាគ​ច្រើន​មិន​ទាន់​បាន​ទៅ​លក់​ខ្លួន​ឯង​ទេ ខ្វះ​ខាត​ឧបករណ៍​ដឹក​ជញ្ជូន»

​​កសិករ​​​នៅ​ភូមិ​ដួង​មា​ម្នាក់​ទៀត​ លោក គឹម កាន ឱ្យ​ដឹង​ថា អំឡុង​​មាន​វិបត្តិ​ជំងឺ​កូវិដ១៩​នេះ​ លោក​ដាំ​​ឪឡឹក​​សម្ល​​ ពោត​ និង​ត្រប់​ នៅ​លើ​ផ្ទៃ​ដី​ជាង​២ហិកតារ​​ ហើយ​ចំណាយ​អស់​ដើម​ទុន​​ជិត ​៣ពាន់​(.០០០ដុល្លារ​ ក្នុង​នោះ​​​ប្រាក់​​ជាង​ពាក់​កណ្ដាល​លោក​ខ្ចី​ពី​ស្ថាប័ន​មីក្រូហិរញ្ញវត្ថុ​​និង​មួយ​ចំនួន​ទៀត​ជា​ប្រាក់​​​ផ្ទាល់​ខ្លួន។ ​លោក​បន្ត​ថា ​​​ឆ្នាំ​នេះ​លោក​លក់​បន្លែ​បាន​ប្រាក់​ច្រើន​ជាង​ឆ្នាំ​មុន​ទ្វេ​ដង​ ​ដោយសារ​តែ​តម្លៃ​កសិផល​លក់​បាន​ថ្លៃ​។ លោក​ថា ​ចាប់​ពី​ខែ​មេសា​មក​យ៉ាង​ហោច​ណាស់​លោក​បេះ​បន្លែ​លក់​បាន​ប្រាក់​​ប្រមាណ​​ ១លាន​រៀល​ (.០០០.០០០)​​ ក្នុង​មួយ​ថ្ងៃ​ដែរ ​ហើយ​​ផាត់​ថ្លៃ​ឈ្នួល​កម្មករ​​ និង​​ថ្លៃ​ចាយ​វាយ​​នៅ​សល់​ប្រាក់​ប្រមាណ ​១៥០​ដុល្លារ​អាមេរិក​ក្នុង​មួយ​ថ្ងៃ៖ «ម្នាក់​រក​បាន​អីចឹង​មាន​​អី​ម្នាក់​អរ​ណាស់​ អ្នក​ខ្លះ​ថា​មិន​ដែល​ជួប​មាន​តម្លៃ​ខ្ពស់​បែប​នេះ​​ទេ​។ ​ចាប់​ពី​មាន​ជំងឺ​កូវិដ​មក​អ្នក​ទិញ​មក​ទិញ​ដល់​ចម្ការ​​បង​ អត់​ពិបាក​ទៅ​រក​ទីផ្សារ​ខ្លួន​ឯង​ទេ​ ដណ្ដើម​គ្នា​ទិញ​ ព្រោះ​វា​ដាច់​បន្លែ​។​ យើង​យក​ទៅ​លក់​ខ្លួន​ឯង​ក៏​បាន​ដែរ​ ពេល​យើង​គ្មាន​ពេល​ទំនេរ​អីចឹង​យើង​លក់​កន្លែង​ចំការ​បេះ​​ហើយ​ច្រក​ថង់​ឱ្យ​គេ​ ហើយ​គេ​យក​ឡាន​មក​​យក​ខ្លួន​ឯង​ទៅ​។ ឥឡូវ​ដាំ​តែ​បន្លែ​លក់​បាន​ថ្លៃ​​​ហ្នឹង​ធូរធារ​មែនទែន​តែ​ម្ដង​​​»

លោក​បន្ថែម​ថា នៅ​តំបន់​​ពួកគាត់​ដាំ​ដុះ​មាន​កសិករ​​ប្រមាណ​ ៦០​គ្រួសារ​ និង​មាន​ផ្ទៃ​ដី​ប្រមាណ​ ១២០​ហិកតារ។ ​​ក្រុម​កសិករ​ទាំង​នេះ​ដាំ​បន្លែ​​នៅ​លើ​ដី​ស្រែ​ជាប់​មាត់​អូរ​​​នៅ​ប៉ែក​ខាងក្រោម​ដង​​សង្កែ​​ស្ថិត​ក្នុង​ភូមិ​ដួង​មា ​ឃុំ​ព្រែក​នរិន្ទ ចម្ងាយ​ប្រហែល ​២០​គីឡូម៉ែត្រ​ពី​ទី​រួម​ខេត្ត​បាត់ដំបង។​​​​​ កសិករ​ទាំង​នេះ ​ត្អូញត្អែរ​​ថា ​​សព្វ​ថ្ងៃ​នេះ​ពួកគេ​លំបាក​រឿង​បញ្ហា​ទឹក​ស្រោចស្រព​ផល​ដំណាំ ដែល​ចំណាយ​អស់​ថវិកា​ច្រើន​ ដើម្បី​ទាញ​យក​ទឹក​ពី​ស្ទឹង​សង្កែ​បូម​​បញ្ចូល​​ទៅ​ក្នុង​អូរ​​​តំបន់​ដែល​ពួកគាត់​ដាំ​ដុះ​មាន​ចម្ងាយ​ជាង ​១គីឡូម៉ែត្រ​។ ​អ្នក​ភូមិ​អំពាវនាវ​​ឱ្យ​រដ្ឋាភិបាល​ជួយ​ធ្វើ​​ប្រឡាយ​ទឹក​​មួយ​ខ្សែ​ជូន​ដល់​ពួកគាត់​ ដើម្បី​ដាំដុះ​ទៅ​ថ្ងៃ​ក្រោយ​​អស់​ដើម​ទុន​តិច​។

ទាក់​ទង​នឹង​បញ្ហា​នេះ​ អភិបាល​ស្រុក​ឯកភ្នំ លោក ម៉ិល សុផល​ ប្រាប់​អាស៊ី​សេរី​ថា ​អាជ្ញាធរ​ខេត្ត​បាត់ដំបង​​គម្រោង​ធ្វើ​ប្រឡាយ​ទឹក​​ចម្ងាយ​ ៩​គីឡូម៉ែត្រ​​ចេញ​ពី​ភូមិ​បឹង​ឆ្ដោរ​ឆ្ពោះ​ទៅ​​ភូមិ​ដួង​មានៅ​តំបន់​ដែល​​ប្រជា​ពលរដ្ឋ​ដាំ​​បន្លែ​នោះ​រួច​ហើយ​។​ លោក​បញ្ជាក់​ថា ​គម្រោង​នេះ​ចំណាយ​អស់​ប្រមាណ​ ៤០០​លាន​រៀល​ ជា​ថវិកា​របស់​រដ្ឋាភិបាល​​ និង​​ចាប់​ផ្ដើម​​អនុវត្ត​បណ្ដើរៗ​ហើយ​៖ «ហើយ​ក្នុង​គំនិត​ហ្នឹង​សេចក្ដី​សង្ឃឹម​របស់​ខ្ញុំ​​ថា​ខ្ញុំ​នឹង​ធ្វើ​ឱ្យ​បាន​ នៅ​តំបន់​ហ្នឹង​ឱ្យ​មាន​ពណ៌បៃតង​​ទាំង​ប្រាំង​ទាំង​វស្សា​។នេះ​ជា​គោលការណ៍​ខ្ញុំ​នៅ​ពេល​ដែល​ទ្វារ​ទឹក​​សាលា​តា​អន​​ធ្វើ​ហើយ​។​យើង​យក​២​ឃុំ​​ខាង​លិច​ស្ទឹង​សិន​ បី​ឃុំ​ខាង​កើត​ស្ទឹង​យើង​​មាន​២​ឃុំ​​ជា​ដី​​កសិកម្ម​ច្រើន​ រីឯ​មួយ​​ឃុំ​ទៀត​ដូច​ឃុំ​សំរោង​ក្នុង​​មិន​សូវ​មាន​កសិកម្ម​ទេ​»

​​លោក​បន្ត​​ថា កសិករ​នៅ​​​ឃុំ​ព្រែក​ហ្លួង​ និង​ ឃុំ​ព្រែក​នរិន្ទ​នៅ​ជាប់​ដង​សង្កែ​ប៉ែក​ខាង​ក្រោម នៃស្រុក​ឯកភ្នំ​ ​ប្រមាណ ​១៦០​គ្រួសារ ​​និយម​ដាំដុះ​បន្លែ​លក់​​យក​ប្រាក់​ដោះស្រាយ​ជីវភាព។

​​ថ្មី​ៗ​នេះ​លោក​នាយករដ្ឋមន្ត្រី​ហ៊ុន សែន​ បាន​ប្រកាស​​​ថា វិបត្តិ​ជំងឺ​កូវិដ​១៩​ ជា​ឱកាស​ល្អ​ដល់​​កសិករ​ខ្មែរ​​ ​ដាំដុះ​លក់​បាន​ប្រាក់​ចំណូល​ច្រើន​ជាង​មុន​។​ លោក​​ក៏​ជំរុញ​ឱ្យ​​​ប្រជាពលរដ្ឋ​​ពង្រីក​ការ​ដាំ​ដុះ​​​ឱ្យ​បាន​ច្រើន ដើម្បី​​ផ្គត់ផ្គង់​ទីផ្សារ​ក្នុង​ស្រុក​​​។​​​

ទោះ​ជា​យ៉ាង​ណា ​ប្រធាន​សម្ព័ន្ធ​​សមាគម​កសិករ​កម្ពុជា​ លោក ថេង សាវឿន មាន​ប្រសាសន៍​ថា ​​បន្លែ​ឡើង​ថ្លៃ​នេះ​ ពុំ​មែន​​បណ្ដាល​មក​ពី​​​ជំងឺ​កូវិដ​១៩ ​​តែ​មួយ​មុខ​នោះ​ទេ​ គឺ​ដោយសារ​​​​​ប្រទេស​​ថៃ​ និង​វៀតណាម​បិទ​ច្រក​ទ្វារ​ព្រំដែន​ជាប់​កម្ពុជា​​​ ទើប​ធ្វើ​​​ឱ្យ​​ឈ្មួញ​នៅ​​ប្រទេស​​ទាំង​នោះ​​មិន​អាច​នាំ​​បន្លែ​​​​ចូល​មក​លក់​នៅ​​កម្ពុជា​បាន​ច្រើន​​​ដូច​ពេល​មុន។ ​មន្ត្រី​សង្គម​ស៊ីវិល​រូប​នេះ​ ក៏​អំពាវនាវ​​​ដល់​រដ្ឋាភិបាល​​ឱ្យ​ទប់​ស្កាត់​​ការ​នាំ​ចូល​បន្លែ​ពី​ក្រៅ​ប្រទេស​​បន្ត​ទៀត ដើម្បី​ជួយ​​ឱ្យ​កសិករ​ក្នុង​ស្រុក​​ដាំដុះ​លក់​កសិផល​បាន​ប្រាក់​ចំណូល​ច្រើន​ដូច​សព្វ​ថ្ងៃ​​​៕​​​​​​​​​​​​​​​​​​​​​​​​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ចៅក្រម​ស៊ើបសួរ​ទម្លាក់​ចោល​ករណី​ញុះញង់​ប្រឆាំង​មន្ត្រី​អាដហុក​លោក ប៉ែន ប៊ុណ្ណារ៍ និង​ប្រជា​សហគមន៍

$
0
0

ចៅក្រម​ស៊ើបសួរ​តុលាការ​ខេត្ត​រតនគិរី សម្រេច​ទម្លាក់​ចោល​សំណុំ​រឿង​ញុះញង់​ប្រឆាំង​នឹង​មន្ត្រី​ស៊ើបអង្កេត​ជាន់ខ្ពស់​សមាគម​អាដហុក លោក ប៉ែន បុណ្ណារ៍ និង​ប្រជា​សហគមន៍​ឃុំ​សេដា ៩នាក់​ផ្សេង​ទៀត។ មន្ត្រី​សិទ្ធិមនុស្ស​ជំរុញ​ឱ្យ​តុលាការ​គ្រប់​រាជធានី​ខេត្ត យក​​សេចក្តី​សម្រេច​នេះ​ជា​គំរូ ដោយ​លើក​លែង​បទ​ចោទ​លើ​អ្នក​ទោស​មនសិការ​ដទៃ​ទៀត។

មន្ត្រី​ពង្រឹង​សិទ្ធិ​អំណាច​សហគមន៍​មូលដ្ឋាន​នៃ​សមាគម​អាដហុក (ADHOC) លោក ប៉ែន​ ប៊ុណ្ណារ៍ មាន​ប្រសាសន៍​ថា ការ​ទម្លាក់​ចោល​បទ​ចោទ​ប្រកាន់​នេះ គឺ​ជា​ការ​ផ្ដល់​យុត្តិ​ធម៌​ដល់​រូបលោក និង​ប្រជា​សហគមន៍​ឃុំ​សេដា ដែល​តាំង​ពី​ដំបូង​មក​ មិន​បាន​ប្រព្រឹត្ត​កំហុស​អ្វី​ឡើយ។ លោក​ថា សេចក្ដី​សម្រេច​នេះ គឺ​ជា​គំរូ​ដល់​តុលាការ​ផ្សេង​ទៀត​ ឱ្យ​ទម្លាក់​ចោល​សំណុំ​រឿង​ព្រហ្មទណ្ឌ​ប្រឆាំង​នឹង​សកម្មជន​ និង​អ្នក​ការពារ​សិទ្ធិមនុស្ស។ ក្រៅ​ពី​នេះ លោក​​ស្នើ​ឱ្យ​តុលាការ​ចាត់​ការ​បណ្ដឹង​បរិហារ​ដែល​លោក និង​ប្រជា​សហគមន៍​ ប្តឹង​ករណី​កាប់​រាន​ដី​ព្រៃ និង​​រំលោភ​យក​ទ្រព្យ​សម្បត្តិ​សាធារណៈ​របស់​​រដ្ឋ​ពី​សំណាក់​ក្រុម​ជន​ល្មើស៖ «

ចៅក្រម​ស៊ើបសួរ​តុលាការ​ខេត្ត​រតនគិរី លោក សេង ស៊ឹម​សុរិយា បាន​សម្រេច​លើក​លែង​បទ​ចោទប្រកាន់​លើ​លោក ប៉ែន ប៊ុណ្ណារ៍ និង​ប្រជា​សហគមន៍​ឃុំ​សេដា ចំនួន ៩នាក់ តាម​រយៈ​លិខិត​ជូន​ដំណឹង​ចុះ​ថ្ងៃ​ទី២៦ ឧសភា។ ពួក​លោក​ទាំង១០ នាក់ ត្រូវ​បាន​ក្រុម​អាជ្ញាធរ​ និង​មន្ត្រី​ជំនាញ​នៅ​ខេត្ត​រតនគិរី ប្តឹង​បក​​ទៅ​តុលាការ កាល​ពី​ឆ្នាំ២០១៧ ក្រោយ​ពី​ពួក​លោក​បាន​ប្ដឹង​បរិហារ​ករណី​អាជ្ញាធរ​បណ្ដែត​បណ្ដោយ​ឱ្យ​មាន​បទល្មើស​កាប់​រាន​ដី​ព្រៃ​អភិរក្ស​អស់​ជាង ៨រយ​ហិកតារ (៨០០) ក្នុង​ដែន​ជម្រក​សត្វព្រៃ​លំផាត់ ខេត្ត​រតនគិរី។ តំណាង​អយ្យការ​បាន​ចោទ​ប្រកាន់​លោក ប៉ែន ប៊ុណ្ណារ៍ និង​ប្រជា​សហគមន៍​ឃុំ​សេដា ពី​បទ “ញុះញង់​ឱ្យ​​ប្រព្រឹត្ត​បទ​ឧក្រិដ្ឋ​ជាអាទិ៍” ។

នាយក​រង​ទទួល​បន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត សាទរ​ចំពោះ​សេចក្ដី​សម្រេច​របស់​ចៅក្រម​ស៊ើបសួរ​តុលាការ​ខេត្ត​រតនគិរី។ លោក​ថា ការ​ទម្លាក់​ចោទ​បទចោទប្រកាន់​នេះ ​ធ្វើ​ឱ្យ​លោក ប៉ែន ប៊ុណ្ណារ៍ និង​ប្រជា​សហគមន៍​មាន​សេរីភាព​ពេញលេញ​ឡើងវិញ ដើម្បី​ចូល​រួម​ថែរក្សា​បរិស្ថាន​ និង​ធនធាន​ធម្មជាតិ។ ទោះ​ជា​យ៉ាង​ណា លោក អំ សំអាត ក៏​សោក​ស្ដាយ​ផង​ដែរ ដែល​តុលាការ​បាន​ប្រើ​ពេល​ជាង ២ឆ្នាំ ទម្រាំ​នឹង​ទម្លាក់​ចោល​រឿង​នេះ ខណៈ​លោក ប៉ែន ប៊ុណ្ណារ៍ និង​ប្រជា​សហគមន៍​មិន​បាន​ប្រព្រឹត្ត​អ្វី​ខុស​ច្បាប់​ឡើយ៖ «

ចំណែក អ្នក​នាំ​ពាក្យ​សមាគម​អាដហុក (ADHOC) លោក ស៊ឹង សែនករុណា ថ្លែង​ថា ការ​ទម្លាក់​ចោទ​បទ​ចោទ​លើ​អ្ន​ក​ការពារ​សិទ្ធិមនុស្ស និង​បរិស្ថាន​នៅ​ត្រឹម​ដំណាក់​កាល​ចៅក្រម​ស៊ើបសួរ​នេះ គឺ​ជា​ករណី​កម្រ​បំផុត។ លោក​​គាំទ្រ​ចំពោះ​សេចក្ដី​សម្រេច​បែបនេះ ហើយ​ក៏​ចង់​ឃើញ​តុលាការ​គ្រប់​រាជធានី​ខេត្ត​ ទម្លាក់​ចោទ​សំណុំ​រឿង​ព្រហ្មទណ្ឌ​ប្រឆាំង​នឹង​អ្នក​ការពារ​សិទ្ធិមនុស្ស ក្រុម​សកម្មជន អ្នក​សារព័ត៌មាន និង​អ្នក​ទោស​មនសិការ​ដទៃ​ទៀត​ ដូច​គ្នា​នេះ​ដែរ៖ «

មន្ត្រី​សិទ្ធិ​មនុស្ស​ទាំង​ពីរ​រូប​ស្នើ​យ៉ាង​ទទូច​ដល់​មន្ត្រី​អនុវត្ត​ច្បាប់ ជាពិសេស តំណាង​អយ្យការ​ ឱ្យ​ពិចារណា​គ្រប់​ជ្រុង​ជ្រោយ​ មុន​នឹង​ចោទ​ប្រកាន់​លើ​អ្នក​ការពារ​សិទ្ធិមនុស្ស និង​អ្នក​ការពារ​បរិស្ថាន ពីព្រោះ​សកម្មភាព​របស់​ពួកគេ​គឺ ដើម្បី​ផល​ប្រយោជន៍​សាធារណៈ មិន​មែន​ដើម្បី​ផល​ប្រយោជន៍​ផ្ទាល់​ខ្លួន​​​នោះ​ទេ។ ជាពិសេស ការ​ចោទ​ប្រកាន់​ ត្រូវ​ធ្វើឡើង​ដោយ​មាន​ភស្តុតាង​រឹងមាំ និង​ឈរ​លើ​មូលដ្ឋាន​ច្បាប់​ជា​ធំ មិន​មែន​​ក្នុង​ន័យ​បំបាក់​ស្មារតី ឬ​បន្ទច់​បង្អាក់​សកម្មភាព​របស់​​អ្នក​ធ្វើ​ការងារ​សង្គម​នោះ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ស្ត្រី​ពលករ​ខ្មែរ​៧​នាក់​ដែល​ធ្វើ​ដំណើរ​ពី​ប្រទេស​ហ្សំប៊ី (Zambia) ហើយ​ត្រូវ​ជាប់​គាំង​នៅ​ចំណត​យន្តហោះ​កូរ៉េ បាន​មក​ដល់​ប្រទេស​កម្ពុជា​ហើយ

$
0
0

ស្ត្រី​ពលករ​ខ្មែរ ៧នាក់​ដែល​ធ្វើ​ដំណើរ​ពី​ប្រទេស​ហ្សំប៊ី (Zambia) ហើយ​ត្រូវ​ជាប់​គាំង​នៅ​ចំណត​យន្តហោះ​កូរ៉េ ព្រោះ​គ្មាន​លិខិត​តេស្ត​សុខភាព​រក​ជំងឺ​កូវីដ-១៩ បាន​មក​ដល់​ប្រទេស​កម្ពុជា​ហើយ នៅ​ថ្ងៃ​ទី២៨ ឧសភា ក្រោយ​អន្តរាគមន៍​ពី​រដ្ឋាភិបាល។ សង្គម​ស៊ីវិល​សិទ្ធិ​ការងារ​ចង់​ឃើញ​រដ្ឋាភិបាល​ចាត់វិធានការ​ដូចគ្នា​ចំពោះ​អ្នក​កំពុង​ជាប់​គាំង​នៅ​ប្រទេស​ដទៃ​ទៀត។

ស្ត្រី​ជា​ពលករ​ទាំង​នោះ កំពុង​រង់ចាំ​លទ្ធផល​តេស្ត​សុខភាព​នៅមណ្ឌល​សុខភាព​ចាក់អង្រែក្រោម រាជធានី​ភ្នំពេញ និង​សង្ឃឹម​ថា ពួកគេ​នឹង​ឆាប់​បាន​វិល​ត្រឡប់​ទៅ​ស្រុក​កំណើត​រៀងៗខ្លួន​វិញ។

ពលករ​មួយ​រូប​ក្នុង​ចំណោម​អ្នក​ទាំង ៧នាក់ មាន​ស្រុក​កំណើត​នៅ​ខេត្ត​ស្វាយរៀង កញ្ញា មាស ធីតា ថ្លែង​ថា នាង​អរ​សប្បាយ​គ្មាន​ពាក្យ​អ្វី​និយាយ ព្រោះ​បាន​ធ្វើ​ដំណើរ​បន្ត​មក​ដល់​ប្រទេស​កម្ពុជា។ កញ្ញា​ថា ពួកគាត់​ចាញ់​បោក​ថៅកែ​ចិន​ចូល​ធ្វើការ​នៅ​សណ្ឋាគារ​កាស៊ីណូ ផ្នែក​ហ្គេម ដោយ​លិខិត​ឆ្លងដែន​របស់​ពួកគាត់​បាន​ផុត​ទិដ្ឋាការ​រស់នៅ​​ប្រទេស​ហ្សំប៊ី (Zambia) ១ឆ្នាំ​ហើយ។ កញ្ញា​បន្ត​ថា ដោយសារ​ការ​ឆ្លង​រាលដាល​នៃ​ជំងឺ​កូវីដ-១៩ កាស៊ីណូ​នោះ​ត្រូវ​បាន​បិទ​រយៈពេល​២​ខែ​ហើយ ដែល​ធ្វើ​ឲ្យ​ពួកគេ​ខ្វះខាត​ជីវភាព ព្រោះ​បាន​ចំណាយ​ថ្លៃ​ផាក​ពិន័យ​ទៅ​ប្រទេស​នេះ​ម្នាក់​ ៥​រយ​ដុល្លារ​រួច​ទិញ​សំបុត្រ​យន្តហោះ​ទើប​បាន​ចេញ​មក៖ «ពួក​ខ្ញុំ​មក​ពី​នោះ​ហ្នឹង​វា​ពិបាក​ហើយ​បង ពួក​ខ្ញុំ​ចេញ​មក​នេះ​តាំង​ពី​ថ្ងៃ​ទី២២ ម៉ោង ១២ ខ្ញុំ​ធ្វើ​ដំណើរ​ឆ្ងាយ​ជិះ​ឡាន ទម្រាំ​ដល់​កន្លែង​ព្រលាន​ហ្នឹង​ជិះ​ឡាន​ឡើង ៦, ៧ម៉ោង ចូល​ស្នាក់​ផ្ទះ​គេ​ហ្នឹង ចាំ​ឡើង ៤ម៉ោង ៥ម៉ោង បាន​ទៅ​ឡើង​ព្រលាន​នៅ​នោះ។ ថៅកែ​ខ្ញុំ​គាត់​វាយ​វីសា​ខ្ញុំ​បាន​តែ​មួយ​ខែ​ហ្នឹង​តែ​ខែ​ក្រោយៗ មក​គាត់​អត់​វៃ​ឲ្យ​ពួក​ខ្ញុំ​ណា និយាយ​ទៅ​គាត់​អត់​ល្អ​ហ្មង​បង យើង​ទុក​ចិត្ត​គាត់​ថា​គាត់​រត់ការ​អី ដល់​ពួក​ខ្ញុំ​សុំ​មក​ផ្ទះ​នេះ​អត់​ចង់​ឲ្យ​ពួក​ខ្ញុំ​មក​អត់​ចង់​ឲ្យ​ពួក​ខ្ញុំ​មក​ទៀត​ពួក​ខ្ញុំ​រៀបរាប់​ប្រាប់​ហេតុផល​ឲ្យ​គាត់​អ៊ីចឹង​ទៅ​គាត់​ក៏​ព្រម ប៉ុន្តែ​ព្រម​ឲ្យ​មក​ហ្នឹង​គឺ​យើង​រត់ការ​ចេញ​លុយ​ខ្លួន​ឯង​ទាំង​អស់»

ពលករ​ខ្មែរ ៧នាក់​ជា​អ្នកបម្រើ​ការងារ​នៅ​សណ្ឋាគារ​កាស៊ីណូ​របស់​ចិន បាន​ចេញ​ដំណើរ​ពី​ប្រទេស​ហ្សំប៊ី (Zambia) តាំង​ពី​ថ្ងៃ​ទី២៣ ឧសភា ក្នុង​គោលដៅ​ត្រឡប់​មក​ស្រុកខ្មែរ​វិញ ហើយ​មក​ដល់​ប្រទេស​កូរ៉េ​នៅ​ថ្ងៃ​ទី២៤ ខែឧសភា តែ​ត្រូវ​បាន​អាជ្ញាធរ​កូរ៉េ​ឃាត់​ស្ទាក់​នៅ​ចំណត​យន្ត​ហោះ ដោយ​ព្រោះ​តែ​ពួកគេ​គ្មាន​លិខិត​បញ្ជាក់​ធ្វើ​តេស្ត​ជំងឺ​កូវីដ-១៩។ អ្នក​ទាំង​នោះ មិន​បាន​ដឹង​ថា កម្ពុជា​តម្រូវ​ឲ្យ​ធ្វើ​តេស្ដ​សុខភាព​មុន​ចេញ​ដំណើរ​ឡើយ ហើយ​ម្យ៉ាង​ក្រសួង​សុខាភិបាល​នៃ​ប្រទេស​ហ្សំប៊ី​ដែល​ពួកគេ​ស្នាក់នៅ​នឹង​មិន​ធ្វើ​តេស្ត​ឲ្យ​ឡើយ​ប្រសិន​ជា​គ្មាន​រោគសញ្ញា​ឬ​អាការៈ​សង្ស័យ។

យ៉ាង​ណា​អ្នក​ទាំង​នេះ បាន​មក​ដល់​ប្រទេស​កម្ពុជា​នៅ​ពាក់​កណ្ដាល​យប់​ថ្ងៃ​ទី២៧ ឧសភា ក្រោយ​ដេក​រង់ចាំ​នៅ​ចំណត​យន្តហោះ​កូរ៉េ ៣យប់ ៣ថ្ងៃ។

ឯក​អគ្គ​រាជទូត​ខ្មែរ​ប្រចាំ​ប្រទេស​កូរ៉េ លោក ឡុង ឌីម៉ង់ ឲ្យ​ដឹង​ថា មូលហេតុ​ដែល​ប្រទេស​កូរ៉េ​ឃាត់​សួរ​រក​លិខិត​បញ្ជាក់​បាន​តេស្ត​សុខភាព​រក​ជំងឺ​កូវីដ-១៩ ពី​ប្រទេស​ហ្សំប៊ី (Zambia) ដោយសារ​តែ​ជា​ច្បាប់​តម្រូវ​របស់​រដ្ឋាភិបាល​ខ្មែរ។ លោក​ថា នេះ​ជា​ករណី​ពិសេស​ដែល​ទាមទារ​ឲ្យ​មាន​ការ​អន្តរាគមន៍​បន្ទាន់៖ «គាត់​បាន​ស្នាក់នៅ​ប្រទេស​ហ្សំប៊ី​ហ្នឹង​ក៏​ហួស​ដែរ ខុស​ច្បាប់​ដែរ ហួស​ទិដ្ឋាការ​ច្បាប់​អន្តោប្រវេសន៍​របស់​គេ​គឺ​មិន​អនុញ្ញាត​ឲ្យ​ពួកគាត់​ចូល​ប្រទេស​ហ្សំប៊ី​វិញ​ទេ អ៊ីចឹង​ស្មើ​នឹង​គាត់​អត់​កន្លែង​ទៅ​ខ្មែរ​ទៅ​អត់​កើត​នៅ​កូរ៉េ​ក៏​អត់​កើត។ ខ្ញុំ​ក៏​រាយការណ៍​ទៅ​ឯកឧត្តម​ឧបនាយក លោក​ក៏​បាន​ស្នើ​សុំ​គោលការណ៍​បន្ត​ទៅ​សម្ដេចតេជោ នាយករដ្ឋមន្ត្រី​ដើម្បី​សុំ​ការ​អនុញ្ញាត​លក្ខណៈ​ពិសេស​នេះ រហូត​ដល់​ចេញ​វិធានការ​ថ្មី រាល់​ពលរដ្ឋ​ខ្មែរ​ទាំងអស់​មិន​ចាំបាច់​មាន​តេស្ត​កូវីដ​ទេ ពួកគាត់​ទៅ​ដល់​គេ​ធ្វើ​តេស្ត​គាត់​ស្រាប់​ហើយ និង​ធ្វើ​ចត្តាឡីស័ក ១៤ថ្ងៃ​ទៀត»

មន្ត្រី​កម្មវិធី​ផ្នែក​ទេសន្តរប្រវេសក៍​នៃ​មជ្ឈមណ្ឌល​សម្ព័ន្ធភាព​ការងារ និង​សិទ្ធិ​មនុស្ស ​ហៅ​កាត់​ថា សង់ត្រាល់ (CENTRAL) លោក ឌី ថេហូយ៉ា សាទរ​ចំណាត់​ការ​នេះ។ ប៉ុន្តែ​លោក​សំណូមពរ​ឲ្យ​រដ្ឋាភិបាល​សម្របសម្រួល​ដល់​ពលរដ្ឋ​ខ្មែរ​ដែល​កំពុង​ជាប់​គាំង​នៅ​ប្រទេស​ដទៃ​ទៀត ដូច​ជា​ពលករ និង​និស្សិត​នៅ​ប្រទេស​ម៉ាឡេស៊ី​ដែល​ពេល​នេះ​កំពុង​មាន​បញ្ហា​ប្រឈម​ជីវភាព​ខ្លាំង។

លោកនាយករដ្ឋមន្ត្រី ហ៊ុន សែន ប្រកាស​លើ​ហ្វេសប៊ុក​ថា ចាប់​ពី​ថ្ងៃ​ទី២៧ ខែ​ឧសភា តទៅ ពលរដ្ឋ​ខ្មែរ​ដែល​កាន់​លិខិត​ឆ្លង​ដែន​កម្ពុជា ហើយ​មាន​បំណង​វិល​ត្រឡប់​ចូល​កម្ពុជា​វិញ គឺ​មិន​តម្រូវ​ឲ្យ​មាន​វិញ្ញាបនប័ត្រ​បញ្ជាក់​សុខភាព​ថា គ្មាន​ជំងឺ​ឆ្លង​កូវីដ-១៩ ដូច​មុន​ឡើយ។ លោក​ថា ការ​ផ្លាស់​ប្ដូរ​ចិត្ត​របស់​លោក​នេះ គឺ​ដើម្បី​ជួយ​សម្រួល​ដល់​ពលរដ្ឋ​នៅ​ក្រៅ​ប្រទេស ឲ្យ​ឆាប់​បាន​វិល​ត្រឡប់​មក​ជួបជុំ​ក្រុម​គ្រួសារ​នៅ​ក្នុង​ប្រទេស​របស់​ខ្លួន​វិញ។

ការ​ផ្លាស់​ប្តូរ​ចិត្ត​របស់​លោក​នាយក​រដ្ឋមន្ត្រី ហ៊ុន សែន នៅ​ពេល​នេះ គឺ​បន្ទាប់​ពី​ពលរដ្ឋ​ខ្មែរ​ដែល ជាប់​គាំង​នៅ​ក្រៅ​ប្រទេស ជាពិសេស​នៅ​ប្រទេស​ម៉ាឡេស៊ី រិះគន់​ផង និង​ទទូច​ស្នើសុំ​ម្ដង​ហើយ ម្ដង​ទៀត​ផង ឲ្យ​រដ្ឋាភិបាល​របស់​លោក​ជួយ​សម្រប​សម្រួល​បញ្ជូន​ពួក​គេ​ត្រឡប់​មក​កម្ពុជា​វិញ​ឲ្យ​បាន​ឆាប់ ព្រោះ​ពួក​គេ​ជួប​ការ​លំបាក​ផ្នែក​ជីវភាព និង​ពុំ​មាន​ថវិកា​សម្រាប់​ចំណាយ​ថ្លៃ ធ្វើ​តេស្ត​សុខភាព។

ស្ត្រី​ទាំង ៧នាក់​ឲ្យ​ដឹង​ថា បន្ទាប់​ពី​ទទួល​បាន​លទ្ធផល​តេស្ត​នៅ​មណ្ឌល​សុខភាព​នោះ​ហើយ ពួកគេ​នឹង​មិន​ទាន់​ត្រឡប់​ទៅ​ស្រុក​កំណើត​វិញ​ភ្លាមៗ​ឡើយ ដោយ​បាន​ជួល​បន្ទប់​ស្នាក់នៅ​ដើម្បី​ដាក់​ខ្លួន​ឯង​ឲ្យ​នៅ​ដាច់​ដោយ​ឡែក​ចំនួន ១៤ថ្ងៃ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។


ខុមហ្វ្រែល​រក​ឃើញ​ថា តំណាង​រាស្ត្រ​រដ្ឋសភា​ឯក​បក្ស ១២៥រូប មិន​បាន​ជួយ​ពលរដ្ឋ​ទាមទារ​រក​យុត្តិធម៌

$
0
0

អង្គការ​ខុមហ្វ្រែល (COMFREL) បង្ហាញ​របាយការណ៍​ថ្មី​មួយ ដោយ​រក​ឃើញ​ថា តំណាង​រាស្ត្រ​បក្ស​គណបក្ស​ប្រជាជន​កម្ពុជា​ចុះ​ទៅ​មូលដ្ឋាន​ដើម្បី​ពង្រឹង​បក្ស​ តែ មិន​សូវ​ខ្នះខ្នែង​ដោះ​ស្រាយ​បញ្ហា​ប្រឈម​ជូន​ពលរដ្ឋ​ទេ។ អ្នក​នាំ​ពាក្យ​រដ្ឋសភា ចាត់​ទុក​របាយការណ៍​នេះ ផ្ទុយ​ពី​ការ​ពិត។

អង្គការ ខុមហ្វ្រែល រក​ឃើញ​ថា តំណាងរាស្ត្រ​ទាំង ១២៥រូប ក្នុង​ឆ្នាំ​ទី១ នៃ​នីតិកាល​ទី៦ នេះ នៅ​មិន​ទាន់​មាន​តំណាងរាស្ត្រ​ណា​ម្នាក់ ចេញ​មុខ​អន្តរាគមន៍​ជួយ​ពលរដ្ឋ​ដែល​ទាមទារ​រក​យុត្តិធម៌​នោះ​ឡើយ។ អង្គការ​នេះ​រក​ឃើញ​ទៀត​ថា ប្រសិទ្ធភាព​ការងារ​របស់​រដ្ឋសភា​ឯក​បក្ស បាន​ធ្លាក់​ចុះ បើ​ធៀប​រដ្ឋសភា​ពហុបក្ស​កាល​ពី​អាណត្តិ​មុនៗ ព្រោះ​មិន​ឃើញ​តំណាងរាស្ត្រ​ណា​ម្នាក់ និយាយ​ពី​ភាព​អសកម្ម​របស់​អាជ្ញាធរ ដោះ​ស្រាយ​បញ្ហា​ជូន​ពលរដ្ឋ សួរ​ដេញដោល​លើ​ការ​អនុវត្ត​ច្បាប់ និង​សេចក្ដី​ស្នើ​ច្បាប់​ក្នុង​សម័យ​ប្រជុំ​នោះ​ឡើយ

របាយការណ៍​របស់​អង្គការ​ខុមហ្វែ្រល​បន្ថែម​ថា ក្នុង​ចំណោម​តំណាង​រាស្ត្រ​ចំនួន ១២៥រូប មាន​តំណាងរាស្ត្រ​តែ ៥៥រូប​ទេ ដែល​ចុះ​មូលដ្ឋាន ហើយ​ការ​ចុះ​នោះ​ទៀតសោត គឺ​ដើម្បី​សួរ​សុខ​ទុក្ខ​ពលរដ្ឋ និង​សរសើរ​អាជ្ញាធរ​មូលដ្ឋាន​ប៉ុណ្ណោះ។ លើស​ពី​នេះ គណៈកម្មការ​ជំនាញ​រដ្ឋសភា​ទាំង ១០ គឺ​មាន​តែ​គណៈកម្មការ​ចំនួន ៨ ប៉ុណ្ណោះ ដែល​ចេញ​ធ្វើ​សកម្មភាព។

អង្គការ ខុមហ្វ្រែល ទទួល​ស្គាល់​ថា គណៈកម្មការ​ជំនាញ​រដ្ឋសភា ធ្លាប់​កោះហៅ​រដ្ឋមន្ត្រី​ក្រសួង​យុត្តិធម៌​មក​សួរ​នាំ​ដែរ ក៏​ប៉ុន្តែ​មិន​បាន​ផ្ដោត​លើ​បញ្ហា​អយុត្តិធម៌​របស់​ពលរដ្ឋ​ខ្មែរ​នោះ​ទេ ជា​ពិសេស​ពលរដ្ឋ​មាន​ជម្លោះ​ដី​ធ្លី ការ​កាប់​ព្រៃ​ឈើ និង​ការ​ប្រើ​កម្លាំង​ហួស​ហេតុ​ជា​ដើម។

អ្នក​សម្របសម្រួល​ផ្នែក​អង្កេត និង​តស៊ូ​មតិ នៃ​អង្គការ​ខុមហ្វ្រែល (COMFREL ) លោក កន សាវាង្ស សង្កេត​ឃើញ​ថា ស្ថាប័ន​រដ្ឋសភា​ឯក​បក្ស មិន​សូវ​ខ្វល់ខ្វាយ អន្តរាគមន៍​រាល់​ក្តី​កង្វល់​របស់​ពលរដ្ឋ​នោះ​ឡើយ ព្រោះ​ពុំ​មាន​កម្លាំង​ណា​មួយ រុញ​ច្រាន​ឱ្យ​មាន​ការ​ត្រួត​ពិនិត្យ​គ្នា​ទៅ​វិញ​ទៅ​មក​នោះ​ទេ។ លោក​ថា តំណាង​រាស្ត្រ​ទាំង​នោះ មិន​បាន​រិះគន់​កែ​តម្រូវ​ភាព​អសកម្ម​របស់​ស្ថាប័ន​នីតិប្រតិបត្តិ ដើម្បី​ឱ្យ​ប្រសើរ​ឡើង​រាល់​ការ​អនុវត្ត​ច្បាប់​នោះ​ឡើយ ផ្ទុយ​ពី​រដ្ឋសភា ដែល​មាន​តំណាង​រាស្ត្រ​គណបក្ស​ប្រឆាំង​ចូលរួម៖ តួនាទី​ត្រួត​ពិនិត្យ​គ្នា​ទៅ​វិញ​ទៅ​មក នូវ​អង្គ​នីតិប្រតិបត្តិ​ក៏​ដោយ និង​នីតិបញ្ញត្តិ​ក៏​ដោយ វា​នៅ​ក្នុង​ចន្លោះ​ប្រហោង​ហើយ វា​អត់​បាន​ពេញលេញ​ទេ។ អា​នេះ អ្វី​ដែល​ឯក​បក្ស គឺ​វា​អ៊ីចឹង អ្វី​ដែល​សំខាន់​សូម​ឱ្យ ទោះ​បី​ឯក​បក្ស​ក៏​ដោយ ដោយសារ​តែ​ខ្លួន​គ្រប់គ្រង​ទាំង​អស់ អង្គ​នីតិ​ប្រតិបត្តិ និង​អង្គ​នីតិបញ្ញត្តិ តំណាង​រាស្ត្រ​ត្រូវ​ពិនិត្យ​ឡើង​វិញ ទាក់ទង​ភាព​អសកម្ម​ផ្សេងៗ និង​អយុត្តិធម៌​ផ្សេងៗ ទាក់ទង​បញ្ហា​ដីធ្លី​ជា​ដើម​ហ្នឹង»

អ្នក​នាំ​ពាក្យ​រដ្ឋសភា លោក ឡេង ប៉េងឡុង ចាត់​ទុក​ការ​រក​ឃើញ​របស់​អង្គការ​ខុមហ្រ្វែល នេះ​ថា ខុស​ពី​ការ​ពិត។ លោក​ថា តំណាង​រាស្ត្រ​ទាំង​អស់ ចុះ​មូលដ្ឋាន​យ៉ាង​សកម្ម ដើម្បី សួរ​សុខ​ទុក្ខ​ពលរដ្ឋ និង​ដោះ​ស្រាយ​ក្តី​កង្វល់​របស់​ពលរដ្ឋ។ លោក​ថា មាន​តំណាង​រាស្ត្រ​ខ្លះ បាន​ជួយ​ផ្ដល់​សេវា​សុខភាព ជួយ​ដោះ​ស្រាយ​បញ្ហា​ប្រឈម​ជូន​ពលរដ្ឋ និង​មាន​តំណាង​រាស្ត្រ​ខ្លះ​ទៀត ជួយ​អន្តរាគមន៍​ទៅ​រដ្ឋមន្ត្រី​ថ្នាក់​ក្រសួង នៅ​ពេល​ពលរដ្ឋ​ពឹង​ពាក់៖ «ការ​អះអាង​របស់​អង្គការ​ខុមហ្វ្រែល​មិន​ត្រឹម​ត្រូវ​ទេ ការងារ​ចុះ​មូលដ្ឋាន​ច្រើន​ណាស់ ខ្លះ​ទៅ​ដោះ​ស្រាយ​បញ្ហា​ទូទៅ​ទាំង​អស់ គាត់​អាច​ដោះ​ស្រាយ​នៅ​មូលដ្ឋាន​មិន​បាន គាត់​អាច​ទៅ​ដោះ​ស្រាយ​ជាមួយ​រដ្ឋមន្ត្រី ក្រសួង​ថែម​ទៀត។ មិន​បាច់​ដោះ​ស្រាយ​ផ្លូវ​ការ​ទេ គាត់​ដោះ​ស្រាយ​ការ​ទាក់ទង​របស់​គាត់​ជា​ឯក ឬ​ក៏​ជា​មិត្តភ័ក្ដិ​ក៏​បាន​ដែរ»

ទោះ​ជា​យ៉ាង​ណា អ្នក​សិក្សា​ផ្នែក​ច្បាប់ លោក វ៉ន ចាន់ឡូត យល់​ថា របាយការណ៍​នេះ ឆ្លុះ​បញ្ចាំង​ពី​ការ​ពិត ព្រោះ​លោក​សង្កេត​ឃើញ​ថា តំណាង​រាស្ត្រ​ឯក​បក្ស​ទាំង ១២៥ រូប មិន​បាន​បំពេញ​តួនាទី​បម្រើ​ពលរដ្ឋ​ឱ្យ​គ្រប់​ជ្រុង​ជ្រោយ និង រិះគន់​ចំណុច​ខ្វះខាត​របស់​រដ្ឋាភិបាល ដើម្បី​កែ​លម្អ​នោះ​ឡើយ។ លោក​យល់​ថា ភាព​អសកម្ម​នេះ គឺ​ដោយ​សារ​តំណាង​រាស្ត្រ​ទាំង​នោះ ឋិត​ក្រោម​អំណាច​នីតិប្រតិបត្តិ៖ «យើង​មើល​ឃើញ​សកម្មភាព​គាត់ មិន​អាច​ស្វែង​រក​ការ​ពិត នៃ​បញ្ហា​របស់​ពលរដ្ឋ ដើម្បី​មក​ជជែក​ក្នុង​រដ្ឋសភា ដើម្បី​ឱ្យ​សភា​ចេញ​យន្តការ​ដោះ​ស្រាយ​វិបត្តិ​ដោះ​ស្រាយ​ភ្លាមៗ ទេ។ សកម្មភាព​របស់​គាត់ បម្រើ​ផល​ប្រយោជន៍​បក្ស»

មន្ត្រី​ជាន់ខ្ពស់​អង្គការ​ខុមហ្រ្វែល លោក កន សាវាង្ស អំពាវនាវ​ដល់​តំណាង​រាស្ត្រ​ឱ្យ​កែ​លម្អ​ភាព​អសកម្ម​ទាំង​ឡាយ​ ដោយ​ងាក​មួយ​​ជួយ​ដោះស្រាយ​បញ្ហា​ប្រឈម​របស់​ពលរដ្ឋ​ឱ្យ​បាន​ផុលផុស​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ជន​សង្ស័យ​ពី​បទ​ប្រល័យ​ពូជ​សាសន៍​នៅ​ក្នុង​ប្រទេស​រវ៉ានដា (Rwandan) បដិសេធ​ការ​ចោទ​ប្រកាន់​នៅ​តុលាការ​បារាំង

$
0
0

ជន​សង្ស័យ​សំខាន់​មួយ​រូប​ក្នុង​អំពើ​ប្រល័យ​ពូជ​សាសន៍​នៅ​ក្នុង​ប្រទេស​រវ៉ានដា (Rwandan) កាល​ពី ២៦ឆ្នាំ​មុន ប្រាប់​តុលាការ​បារាំង​នៅ​ថ្ងៃ​ទី២៨ ឧសភា​ថា លោក​មិន​បាន​ប្រព្រឹត្ត​ដូច​ការ​ចោទ​ប្រកាន់​នោះ​ទេ។

លោក ហ្វេលិសៀន កាបប៊ូហ្កា (Félicien Kabuga) ដែល​បាន​រត់​គេច​ពី​ការ​តាម​ចាប់​ខ្លួន​អស់​រយៈ​ពេល ២៦ឆ្នាំ ពី​បទ​ពាក់ព័ន្ធ​នឹង​អំពើ​ប្រល័យ​ពូជ​សាសន៍ នៅ​ក្នុង​ប្រទេស​រវ៉ានដា (Rwandan) កាល​ពី​ឆ្នាំ១៩៩៤ ត្រូវ​បាន​អាជ្ញាធរ​ទីក្រុង​ប៉ារីស សហការ​ជា​មួយ​អង្គការ​សហប្រជាជាតិ​ចាប់​ខ្លួន កាល​ពី​ពាក់​កណ្ដាល​ខែ​ឧសភា​នេះ ប្រាប់​តុលាការ​ប្រទេស​បារាំង​នៅ​ថ្ងៃ​ព្រហស្បតិ៍ ម្សិល​មិញ​ថា ការ​ចោទ​ប្រកាន់​ទាំង​ឡាយ​មក​លើក​រូប​លោក គឺ​ជា​រឿង​កុហក។ នៅ​ក្នុង​សវនាការ​បឋម​សុំ​នៅ​ក្រៅ​ឃុំ ជន​សង្ស័យ​អាយុ ៨៤ឆ្នាំ​រូប​នេះ បញ្ជាក់​ប្រាប់​តុលាការ​ថ៖ «ខ្ញុំ​មិន​បាន​សម្លាប់​ជន​ជាតិ​ទូតស៊ី (Tutsi) ណា​ម្នាក់​ឡើយ»

លោក ហ្វេលិសៀន កាបប៊ូហ្កា (Félicien Kabuga) ជា​ពាណិជ្ជករ​ដ៏​មាន​ទ្រព្យធន​ម្នាក់​ដែល​រង​ការ​ចោទ​ថា បាន​ជួយ​ឧបត្ថម្ភ​គាំទ្រ​ជា​ហិរញ្ញវត្ថុ​ដល់​យុទ្ធនាការ​សម្លាប់​ជន​ជាតិ​ទូតស៊ី​អស់​ប្រមាណ​ប្រាំបី​សែន​នាក់ (៨០០.០០០) ប្រព្រឹត្ត​ដោយ​ជនជាតិ​ហ៊ូទូ Hutu)។ លោក​ត្រូវ​បាន​ចាប់​ខ្លួន​នៅ​ជាយ​ទីក្រុង​ប៉ារីស បន្ទាប់​ពី​លាក់​ខ្លួន​អស់​រយៈ​ពេល ២៦ឆ្នាំ ដោយ​ប្ដូរ​ឈ្មោះ​ថ្មី​ចំនួន ២៨ឈ្មោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ក្រុមប្រឹក្សា​ឃ្លាំមើល​កម្ពុជា​ថា ការ​ហាម​​ពលរដ្ឋ​ទៅ​មើល​ព្រំដែន ដោយ​ខ្លាច​ដឹង​ពី​ការ​បោះ​បង្គោល​ព្រំដែន​ចូល​ទឹកដី​ខ្មែរ

$
0
0

សមាជិក​ក្រុមប្រឹក្សា​ឃ្លាំមើល​ព្រំដែន​កម្ពុជា និង​ក្រុម​យុវជន​បញ្ចេញ​ប្រតិកម្ម​ចំពោះ លោក បណ្ឌិត សុខ ទូច ប្រធាន​គណៈកម្មការ​ស្រាវ​ស្រាវជ្រាវ​ព្រំដែន​កម្ពុជា វៀតណាម ដែល​លើកឡើង​ថា បើសិនជា​អាជ្ញាធរ​ខ្មែរ​អនុញ្ញាត​ឱ្យ​ពួកគេ​ទៅ​មើល​ខ្សែ​បន្ទាត់​ព្រំដែន ខ្លាច​វៀតណាម​ចាប់​នោះ គឺជា​ការ​អះអាង​មិន​ត្រឹមត្រូវ​ឡើយ​។ ផ្ទុយទៅវិញ​ពួកគេ​អះអាង​ថា រដ្ឋាភិបាល​រឹតត្បិត ឬ​មិន​អនុញ្ញាត​ពលរដ្ឋ​របស់​ខ្លួន​ទៅ​មើល​ខ្សែ​បន្ទាត់​ព្រំដែន​កម្ពុជា​វៀតណាម​នេះ ព្រោះ​មានរឿង​អាថ៌កំបាំង​ទាក់ទង​នឹង​ការ​បោះ​បង្គោល​ព្រំ​ដែន​កម្ពុជា វៀតណាម​។​

សមាជិក​ក្រុមប្រឹក្សា​ឃ្លាំមើល​កម្ពុជា លោក រ៉ុង ឈុន អះអាង​ថា អាជ្ញាធរ​ខ្មែរ​ហាម​ឃាត់ ពលរដ្ឋ​មិន​ឱ្យ​ទៅ​មើល​តំបន់​ព្រំដែន កម្ពុជា វៀតណាម​កន្លង​មក​នោះ គ្រាន់តែ​ជា​លេស ដែល​រដ្ឋាភិបាល​មិន​ចង់​ឱ្យ​ប្រជាពលរដ្ឋ​បាន​ឃើញ​ទីតាំង​ព្រំដែន​ជាក់ស្ដែង​ចំពោះ​ការ​បោះ​បង្គោល​ព្រំដែន​ប្រទេស​ទាំងពីរ​តែប៉ុណ្ណោះ​។​

លោក រ៉ុង ឈុន មាន​ប្រសាសន៍​ថា អាជ្ញាធរ​វៀតណាម​បណ្ដុះ​ឆន្ទៈ​យុវជន​ឱ្យ​ឈឺឆ្អាល​រឿង​ប្រទេសជាតិ រឿង​ព្រំដែន ដូចជា​កាល​ពី​ពេល​ថ្មីៗ​នេះ អាជ្ញាធរ​វៀតណាម​នាំ​សិស្សានុសិស្ស​ទៅ​មើល​ព្រំដែន​តែ​អាជ្ញាធរ​កម្ពុជា​វិញ ពលរដ្ឋ​មាន​ឆន្ទៈ​ដោយ​ខ្លួនឯង​ចង់​ទៅ​មើល​ព្រំដែន​បែរ​ជា​អាជ្ញាធរ​ហាម​ឃាត់​ទៅវិញ​។ លោក​បញ្ជាក់​ថា ការ​ហាមឃាត់​នេះ ប្រហែល​ជា​មាន​ភាព​មិន​ប្រក្រតី​ចំពោះ​ការ​បោះ​បង្គោល​ព្រំដែន​កម្ពុជា​វៀតណាម​៖ «រារាំង​មិន​ឱ្យ​ពលរដ្ឋ​ទៅ​មើល​ព្រំដែន មានន័យថា ការ​បោះ​បង្គោល​ព្រំដែន​នេះ​មាន​ភាព​មិន​ប្រក្រតី​ច្រើន បាន​ជា​មិន​ឱ្យ​ពលរដ្ឋ​ទៅ​មើល​ម្ដង​ហើយ​ម្ដងទៀត»

ការ​លើកឡើង​របស់​លោក រ៉ុង ឈុន នេះ នៅ​បន្ទាប់​ពី​លោក បណ្ឌិត សុខ ទូច បាន​ថ្លែង​នៅ​ក្នុង​បទ​សម្ភាសន៍​ជាមួយ​​វិទ្យុ​អាស៊ីសេរី កាលពី​រាត្រី​ថ្ងៃ​ទី​២៧ ឧសភា ថា អាជ្ញាធរ​កម្ពុជា​បាន​ហាមឃាត់​ពលរដ្ឋ និង​ក្រុម​យុវជន​មិន​ឱ្យ​ទៅ​មើល​តំបន់​ព្រំដែន​កម្ពុជា​វៀតណាម ដោយសារតែ​គិត​ពី​សុវត្ថិភាព​ប្រជាពលរដ្ឋ​៖ «យុវជន​ពេលណា​ចង់​ទៅ​មើល​ព្រំដែន ពេល​ទៅ​មើល​គាត់​កាន់​ផែនទី ឬ​កាន់​អី​? ទៅ​មើល​នឹង​ថ្ងាស​ឬ​អី​? ព្រោះថា​ឥលូវ​យួន​បិទ​ព្រំដែន​គេ​បិទ​ដោយ​ឯកតោភាគី»

កាល​ពី​ពេល​ថ្មីៗ​នេះ សមាជិក​ក្រុមប្រឹក្សា​ឃ្លាំមើល​កម្ពុជា និង​ក្រុមការងារ​១០០​រាត្រី​ដែល​ចុះ​ស្រាវជ្រាវ​រឿង​ព្រំដែន​បន្ត​ពី​លោក​បណ្ឌិត កែម ឡី រួម​ទាំង​ប្រធាន​គណបក្ស​ឆន្ទៈ​ខ្មែរ និង​ជា​មន្ត្រី​ប្រឹក្សា​ពិគ្រោះ​យោបល់ ដែល​មាន​លិខិត​បេសកកម្ម​រដ្ឋបាល​ត្រឹមត្រូវ​ផង បាន​ចុះទៅ​មើល​តំបន់​ព្រំដែន​នៅ​តំបន់​ភូមិ​ព្រែក​ជ្រៃ ឃុំ​ព្រែក​ជ្រៃ ស្រុក​កោះធំ ជាទី​តាំង​ដែល​អាជ្ញាធរ​វៀតណាម​បាន​បោះតង់​ចូល​លើ​ទឹកដី​ខ្មែរ ប៉ុន្តែ​អាជ្ញាធរ​ហាមឃាត់​។​

លោក រ៉ុង ឈុន លើកឡើង​ថា បើសិនជា​អាជ្ញាធរ​ខ្លាច ពួក​លោក ឬ​ពលរដ្ឋ​ដើរ​ឆ្លង​ចូល​ទឹកដី​វៀតណាម​នោះ អាជ្ញាធរ​ព្រំដែន​គួរតែ​នាំ​ពលរដ្ឋ​ទៅ​មើល​តំបន់​ដែល​វៀតណាម​បោះបង់ ឬ​បង្គោល​ព្រំដែន ដូចដែល​វៀតណាម​ធ្លាប់​បាន​ធ្វើ​លើ​ពលរដ្ឋ​គេ​ដែរ ដើម្បី​បង្ហាញ​ពី​តម្លាភាព​៖ «យើង​នៅតែ​មាន​មន្ទិល​សង្ស័យ ហើយ​អាជ្ញាធរ​ត្រូវ​សហការ​ជាមួយ​ក្រុមប្រឹក្សា​កម្ពុជា ដើម្បី​ទៅ​មើល​ព្រំដែន និង​បង្ហាញ​ពី​តម្លាភាព ហើយ​រដ្ឋាភិបាល​គួរតែ​សប្បាយចិត្ត​នៅ​ពេល​ពលរដ្ឋ​ឈឺឆ្អាល​រឿង​ព្រំដែន»

អភិបាលខេត្ត​កណ្ដាល លោក គង់ សោភ័ណ្ឌ ឱ្យ​ដឹង​កាលពី​ថ្ងៃ​ទី២៥ ឧសភា​ថា យោធា​វៀតណាម​បាន​រុះរើ​តង់ ថយ​ពី​តំបន់​កៀក​ព្រំដែន នៅ​ស្រុក​កោះធំ និង​ស្រុក​លើកដែក អស់ហើយ​។ លោក​អះអាង​ថា កងទ័ព​វៀតណាម បាន​រុះរើ​នៅ​ចំណុច​កៀក​ព្រំដែន​កម្ពុជា តាម​ការ​ស្នើ​សុំ​របស់​អាជ្ញាធរ​ខេត្ត​កណ្ដាល​៖ «វរៈ ៦០១ ហ្នឹង គឺ​គាត់​ថត​តាំងពី​វៀតណាម គាត់​រើ គាត់​អ្វីៗ​ហ្នឹង តង់​គាត់​ហ្នឹង ថត​យក​មក​ឱ្យ​យើង​ឃើញ ជាក់ស្ដែង​។ អ៊ីចឹង មកដល់​ម៉ោង​នេះ ចំណុច​ដែល​កៀកៗ ហ្នឹង គឺ​គាត់​បាន​រើ​ហើយ ហើយ​វា​នៅ​ដែល​ឆ្ងាយ​ពី​កន្លែង​យើង​ទៅ នៅ​ក្នុង​តំបន់​របស់​គាត់​នោះ​ទេ»

ទោះជា​មានការ​អះអាង​របស់​អភិបាលខែត្រ​កណ្ដាល​បែបនេះ​ក្ដី ប៉ុន្តែ មន្ត្រី​ជាន់ខ្ពស់​ក្រសួងការបរទេស​ប្រាប់​ថា វៀតណាម​មិនទាន់​រើ​តង់​ចំនួន​២៨​កន្លែង ចេញពី​តំបន់​ព្រំដែន នៅ​ស្រុក​កោះធំ និង​ស្រុក​លើកដែក ក្នុង​ខេត្ត​កណ្ដាល តាម​កំណត់​ទូត​របស់​ភាគី​កម្ពុជា​នៅឡើយ​ទេ​។ មន្ត្រី​នាំ​ពាក្យ​ក្រសួងការបរទេស លោក កុយ គួង ប្រាប់​អាស៊ីសេរី កាលពី​ថ្ងៃ​ទី​២២ ឧសភា ថា កម្ពុជា មិន​ទាន់​មាន​វិធានការ​ផ្សេង​នៅឡើយ​ទេ ដោយ​នៅ​រង់ចាំ​ការ​ឆ្លើយតប កំណត់​ទូត​របស់​វៀតណាម​សិន​។ លោក​បញ្ជាក់​ថា ក្រសួង​បាន​ផ្ញើ​កំណត់​ទូត ទៅ​វៀតណាម កាលពី​ថ្ងៃ​ទី​១៣ ឧសភា គឺ​តំណាល​គ្នា​នឹង​ខេត្ត​អានយ៉ាង (An Giang) របស់​វៀតណាម បាន​ផ្ញើ​លិខិត​មក​អាជ្ញាធរ​ខេត្ត​កណ្ដាល ពន្យល់​ថា ការ​បោះ​តង់ ដើម្បី​ទប់ស្កាត់​កូវីដ១៩ (Covid-19) ខ្លាច​ពលរដ្ឋ​ទាំង​២​ប្រទេស​ឆ្លងកាត់​ច្រក​របៀង ខណៈ​ច្រក​អន្តរជាតិ​បិទ​ជា​ផ្លូវការ។

 

លោក រ៉ុង ឈុន មាន​ប្រសាសន៍​ថា ដោយ​សារតែ​ការ​អះអាង​របស់​អាជ្ញាធរ​ខែត្រ​កណ្ដាល និង ក្រសួង​ការបរទេស​បញ្ច្រាស​គ្នា​នេះ​ហើយ ទើប​ក្រុមប្រឹក្សា​ឃ្លាំមើល​កម្ពុជា និង​ក្រុម​យុវជន​ចង់​ទោ​មើល​តំបន់​ទាំងនោះ​ជាក់ស្ដែង។

ក្រៅពី​ករណី​វៀតណាម​បោះតង់​ចូល​ទឹកដី​ខ្មែរ​នេះ ពលរដ្ឋ​ខ្មែរ​ក៏​សំដែង​ការ​ព្រួយបារម្ភ​ខ្លាច​បាត់បង់​ទឹកដី ដោយសារតែ​រដ្ឋាភិបាល​បាន​ជួល​ដី​ឱ្យ​ក្រុមហ៊ុន​វៀតណាម​នៅ​តំបន់​ព្រំដែន​ក្នុង​រយៈពេល​៩០​ឆ្នាំ​ដែរ​។ លោក សុខ ទូច អះអាង​ថា សព្វថ្ងៃ​នេះ ឈប់​មាន​ករណី​ជួល​ដី​នៅ​តំបន់​ព្រំដែន​ទៀត​ហើយ។

ទាក់ទង​នឹង​បញ្ហា​នេះ ប្រធាន​សមាគម​និស្សិត​បញ្ញវន្ត​ខ្មែរ លោក មួង សូនី មាន​ប្រសាសន៍​ថា បច្ចុប្បន្ន​នេះ នៅតែ​មាន​ករណី​ជួល​ដី​នៅ​តំបន់​ព្រំដែន​ឱ្យ​វៀតណាម​ដដែល ក៏ប៉ុន្តែ​ការជួល​នេះ គេ​ផ្លាស់ប្ដូរ​ទម្រង់ ដោយ​ប្ដូរ​ឈ្មោះ​ពី​ការជួល មក​ការ​បង្វាស់​ដី​ឱ្យ​ជនជាតិ​វៀតណាម​វិញ​៖ «ខ្មែរ​យើង​អត់​សូវ​ធ្វើ​ចម្ការ​ទេ អត់​ចំណេញ ដោយសារ​គ្មាន​ទឹក​ហើយ​តាម​ព្រំដែន​មាន​ព្រែក​ហ្នឹង​គេ​អាច​ប្រើប្រាស់​បាន ជី​ថ្លៃ ទី​២ ស្រូវ​គេ​លក់​បាន​ថ្លៃ ហើយ​ជី​ថោក ខ្មែរ​យើង​ស្រូវ​លក់​ថោក ទឹក​ទិញ​ពី​វៀតណាម ជី​ទិញ​ពី​វៀតណាម​ក្នុង​តម្លៃ​ថ្លៃ»

របាយការណ៍​របស់​អង្គការ​លីកាដូ​ចេញផ្សាយ​កាលពី​ខែ​មីនា ឱ្យ​ដឹង​ថា រដ្ឋាភិបាល​បាន​ជួល​ដី​ឬ​ផ្ដល់​ដី​សម្បទាន​សេដ្ឋកិច្ច​ឱ្យ​ក្រុមហ៊ុន​វៀតណាម​សរុប​ផ្ទៃដី​ទាំងអស់​មាន​ចំនួន​ជាង ៣​សែន ៦​ម៉ឺន​ហិកតារ ដែល​មាន​នៅ​ក្នុង​ខែត្រ​មួយ​ចំនួន​ដូចជា ឧត្តរមានជ័យ ព្រះវិហារ កំពង់ធំ ស្ទឹងត្រែង ក្រចេះ មណ្ឌលគិរី និង​ខែត្រ​រតនគិរី​ជាដើម៕

អ្នកវិភាគ​ថា កម្ពុជា​ពិបាក​លុបបំបាត់​ប្រាក់​ដុល្លារ ដោយសារ​សេដ្ឋកិច្ច​កម្ពុជា​ពឹង​ទាំងស្រុង​លើ​បរទេស

$
0
0

អ្នកវិភាគ​នយោបាយ និង​សង្គម លោក គឹម សុខ ដែល​ហាន​និយាយ​រិះគន់​របប​ក្រុងភ្នំពេញ ឥត​សំចៃ​មាត់ ថា កម្ពុជា​ពិបាក​លុបបំបាត់​ប្រាក់​ដុល្លារ ដោយសារ​សេដ្ឋកិច្ច​កម្ពុជា​ពឹង​ទាំងស្រុង​លើ​បរទេស​។ លោក​បន្ត​ថា ប្រទេស​កម្ពុជា ដែល​ខ្វះ​ឯករាជ្យ​ភាព​ក្នុង​ការ​ដឹកនាំ​នយោបាយ​រូបិយវត្ថុ​យូរយារ​ណាស់​មក​ហើយ​នោះ ឥឡូវ​បន្ថែម​បន្ទុក​មួយ​ទៀត គឺ​វិបត្តិ​សេដ្ឋកិច្ច​ធ្ងន់ធ្ងរ​ដោយសារ​បញ្ហា​ជំងឺ​កូវីដ-១៩។

ប្រតិកម្ម​របស់​លោក គឹម សុខ ធ្វើឡើង​ស្រប​ពេល​ដែល​ធនាគារ​ជាតិ​នៃ​កម្ពុជា កាលពី​ថ្ងៃ​ទី២៨ ខែ​ឧសភា បាន​ប្រកាស​ប្រមូល​ក្រដាស​ប្រាក់​ដុល្លារ​ប្រភេទ ១​ដុល្លារ ២​ដុល្លារ និង​៥​ដុល្លារ ចូល​ឃ្លាំង​ឱ្យ​អស់ ត្រឹម​រយៈពេល ៣ ខែ គិត​ចាប់​ពី​ពេល​នេះ​តទៅ​។ ក្រោយ​ប្រមូល​អស់​ហើយ ធន​គារ​ជាតិ​នៃ​កម្ពុជា នឹង​ដឹកជញ្ជូន​ក្រដាសប្រាក់​ទាំងនេះ​ទៅ​ក្រៅ​ប្រទេស​។ ធនាគារ​ជាតិ អះអាង​ថា កម្ពុជា​កំពុង​ប្រឈម​នឹង​បញ្ហា​ចរាចរណ៍​ប្រាក់​ដុល្លារ​ទាំងនេះ​។ ក្រោយ​ប្រមូល​ក្រដាសប្រាក់​ដុល្លារ​ទាំងនេះ​អស់​រួច ធនាគារ​ជាតិ​នឹង​កំណត់​ពេលវេលា​ណាមួយ​សមស្រប ដើម្បី​ផ្អាក​ទទួល​ក្រដាសប្រាក់​ដុល្លារ​អាមេរិក​ប្រភេទ​ក្រោម ១០​ដុល្លារ​នេះ ទាំងស្រុង​ពី​គ្រឹះស្ថាន​ធនាគារ និង​ហិរញ្ញ​វត្ថ។

លោក គឹម សុខ ដែល​កំពុង​និទ្ទេស​ខ្លួន​នៅ​ប្រទេស​ហ្វាំងឡង់ ប្រាប់​អាស៊ីសេរី កាលពី​ថ្ងៃ​ទី​២៨ ខែ​ឧសភា ថា​អ្វី​ដែល​កម្ពុជា​ត្រូវ​ធ្វើជា​ចម្បង ដើម្បី​ឱ្យ​សេដ្ឋកិច្ច​កម្ពុជា​អាច​ឈរ​ដោយ​ខ្លួន​ឯង​បាន​រឹងមាំ គឺ​ការ​ដាក់​ចេញ​ផែនការ​ស្ថាបនា​មូលដ្ឋាន​សេដ្ឋកិច្ច​របស់​ខ្លួន ជាពិសេស​ការ​ពង្រឹង​ផលិតកម្ម​ក្នុងស្រុក​។ ប៉ុន្តែ​ក្រោម​ការដឹកនាំ​របស់​លោក ហ៊ុន សែន​ជាង ៣០ ឆ្នាំ​មក​ហើយ​នេះ សេដ្ឋកិច្ច​កម្ពុជា​នៅតែ​ខ្ចី​ដង្ហើម​គេ​ដក​ដដែល​។ ដូច្នេះ​លោក គឹម សុខ ថា កិច្ច​ខិតខំ​ប្រឹងប្រែង​លុបបំបាត់​លុយ​ដុល្លារ​នៅ​ពេល​នេះ គឺ​គ្មាន​បាន​ប្រយោជន៍​អ្វី​នោះ​ឡើយ៖ «នយោបាយ​បដិ​ដុល្លារ​រូបនីយកម្ម​នៅ​ពេល​ហ្នឹង​ទៅ​យ៉ាងម៉េច​នឹង​រួច​។ សេដ្ឋកិច្ច​ប្រទេស​កម្ពុជា​ពឹងផ្អែក​ទាំងស្រុង​ពី​ការ​អនុគ្រោះ​សេដ្ឋកិច្ច​នៃ​បណ្តា​ធំៗ ដូចជា​អាមេរិក និង​សហភាព​អឺរ៉ុប​។ ការ​ដាក់​គោល​នយោបាយ​នេះ វា​អត់​ខុស​ទេ ប៉ុន្តែ​វា​អត់​ទៅមុខ​រួច ដោយសារតែ​កម្ពុជា​យើង​គ្មាន​មូលដ្ឋាន​សេដ្ឋកិច្ច​រឹងមាំ​។ អត់​បាន​បង្ហាញ​ផែនការ​នយោបាយ​សេដ្ឋកិច្ច​ឱ្យ​ច្បាស់លាស់​។ អត់​បាន​បញ្ចេញ​លុយ​ក្នុង​ការ​ស្ដារ​សេដ្ឋកិច្ច​ឡើងវិញ​។ ហើយ​កន្លងមក អ្វី​ដែល​គាត់​ធ្វើ​និយាយ​ចោលៗ»

សេចក្តី​ប្រកាស​ព័ត៌មាន​របស់​ធនាគារ​ជាតិ ករណី​ប្រមូល​ក្រដាសប្រាក់​ដុល្លារ​ប្រភេទ ១​ដុល្លារ ២​ដុល្លារ និង​៥​ដុល្លារ បាន​ធ្វើ​ឱ្យ​មតិ​សាធារណជន​មួយ​ចំនួន ច្របូកច្របល់ ព្រោះ​បារម្ភ​អំពី​បញ្ហា​ឈប់​ចាយ​លុយ​ដុល្លារ​។ ប៉ុន្តែ ធនាគារ​ជាតិ​អះអាង​ថា វិធានការ​នេះ គឺ​ដើម្បី​ពង្រឹង​ឯករាជ្យ​ភាព​ក្នុង​ការដឹកនាំ​គោលនយោបាយ​រូបិយវត្ថុ និង​រួមចំណែក​ជំរុញ​កំណើន​សេដ្ឋកិច្ច​ឱ្យ​មាន​ប្រសិទ្ធភាព៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មន្ត្រី​សង្គម​ស៊ីវិល​ស្នើ​ឱ្យ​មាន​តម្លាភាព​ក្នុង​យុទ្ធនាការ​ដោះលែង​អ្នក​ទោស​ចេញ​ពី​ពន្ធនាគារ

$
0
0

មន្ត្រី​សង្គម​ស៊ីវិល​ស្វាគមន៍​ចំពោះ​យុទ្ធនាការ​ដោះលែង​អ្នក​ជាប់ឃុំ​ដ៏​ច្រើន ដើម្បី​ដោះស្រាយ​ភាព​ចង្អៀត​ណែន​ក្នុង​ពន្ធនាគារ និង​ដើម្បី​ទប់ស្កាត់​ការ​រាលដាល​សកល​នៃ​ជំងឺ​កូវីដ-១៩ (Covid-19)

ការ​សាទរ​នេះ ធ្វើឡើង​ក្រោយ​ដែល​រដ្ឋមន្ត្រី​ក្រសួង​មហាផ្ទៃ លោក ស ខេង បាន​ប្រកាស​កាលពី​ថ្ងៃ​ទី២៧ ខែ​ឧសភា ថា ក្នុង​យុទ្ធនាការ​នេះ នឹង​អាច​ដោះលែង​អ្នក​ជាប់ឃុំ​ប្រមាណ​ជាង ១​ម៉ឺន​នាក់ ដែល​ភាគច្រើន​ពួកគេ​ជាប់​បទល្មើស​កម្រិត​ស្រាល និង​អ្នក​បាន​អនុវត្ត​ទោស​ជិត​ចប់​ហើយ។

មន្ត្រី​ជាន់ខ្ពស់​នៃ​អង្គការ​សិទ្ធិមនុស្ស​លីកាដូ (Licadho) ស្នើ​សុំ​ឱ្យ​ការ​ដោះលែង​អ្នក​ជាប់ឃុំ​ដ៏​ច្រើន​ជា​លើកដំបូង​នេះ ធ្វើ​ឡើង ចំពោះ​ពលរដ្ឋ​ទូទៅ ដោយ​តម្លាភាព និង​ដោយ​គ្មាន​ការ​ប្រកាន់​ពី​និន្នាការ​នយោបាយ។

នាយករង​ទទួលបន្ទុក​សិទ្ធិមនុស្ស​អង្គការ​លីកាដូ លោក អំ សំអាត មាន​ប្រសាសន៍​ប្រាប់​អាស៊ីសេរី កាលពី​យប់​ថ្ងៃ​ទី២៨ ខែ​ឧសភា ថា លោក​សាទរ​ចំពោះ​យុទ្ធនាការ​ដោះស្រាយ​ភាព​ចង្អៀត​ណែន​របស់​អ្នក​ជាប់ឃុំ​នៅ​ក្នុង​ពន្ធនាគារ ពីព្រោះ​អង្គការ តែងតែ​ស្នើសុំ​ឱ្យ​ពិចារណា ដោះលែង​អ្នក​ជាប់ឃុំ​បទល្មើស​កម្រិត​ស្រាល និង​ដែល​អនុវត្ត​ទោស​បាន ២ ភាគ ៣ រួចហើយ ក្រោយពី​ពួកគេ​បាន​ធ្វើ​ការ​កែប្រែ​ខ្លួន នៅ​ក្នុង​ពន្ធនាគារ៖ «យើង​នៅតែ​មាន​សង្ឃឹម​ថា ប្រសិន​ការ​ដោះលែង​ធ្វើឡើង​តាម​បែប​បទ​នេះ​មែន គួរតែ​កុំ​រើសអើង​នយោបាយ ធ្វើ​ម៉េច​ការ​ដោះលែង​នេះ​គឺ​ធ្វើ​តម្លាភាព​ដូចគ្នា ព្រោះ​គាត់​ជា​ពលរដ្ឋ​ខ្មែរ​ដូចគ្នា។ ប្រសិនបើ​បទល្មើស​ត្រូវ​ការ​អាច​ដោះលែង​ឱ្យ​នៅ​ក្រៅ​ឃុំ​បាន ឬ​កាត់​តម្រឹម ឬ​អ្នក​ត្រូវ​ជិត​ផុត​ទោស​ហើយ គាត់​អាច​កែប្រែ​ខ្លួន​បាន ទៅ​តាម​បទដ្ឋាន​នៃ​ច្បាប់​ហើយ គឺ​ត្រូវ​ធ្វើ​ឡើង​ដោយ​តម្លាភាព​ផង​ដែរ»

កាល​ពី​ថ្ងៃ​ទី២៧ ខែ​ឧសភា លោក ស ខេង រដ្ឋមន្ត្រី​ក្រសួង​មហាផ្ទៃ បាន​ថ្លែង​ក្នុង​ពិធី​ផ្សព្វផ្សាយ​របាយការណ៍​ប្រយុទ្ធ​ប្រឆាំង​ការ​ជួញដូរ​មនុស្ស​ឆ្នាំ ២០១៩ និង​ទិសដៅ​សម្រាប់​ឆ្នាំ២០២០ ថា រដ្ឋាភិបាល កំពុង​ខិតខំ​ដោះស្រាយ​បញ្ហា​ចង្អៀត​ណែន​ក្នុង​ពន្ធនាគារ ដែល​ជា​បន្ទុក​ធ្ងន់ធ្ងរ​របស់​រដ្ឋ ក្នុង​ការ​ចំណាយ​ថវិកា​ដ៏​ច្រើន ដើម្បី​ផ្គត់ផ្គង់​ដល់​អ្នក​ជាប់ឃុំ​ក្នុង​ពន្ធនាគារ​ទាំងនោះ​។ លោក ស ខេង ក៏បាន​លើកឡើង​ពី​ក្តី​បារម្ភ ក្នុង​ការ​ទប់ស្កាត់ ប្រសិនបើ មានការ​រាលដាល​នៃ​ជំងឺ​កូវីដ-១៩ នៅ​ក្នុង​ពន្ធនាគារ​ផង​ដែរ។

លោក ស ខេង មាន​ប្រសាសន៍​បញ្ជាក់​ថា ការ​ដោះលែង​អ្នក​ជាប់ឃុំ​នេះ អាច​នឹង​​មាន​ចំនួន​ប្រមាណ ១​ម៉ឺន​នាក់ ដែល​ជា​បទល្មើស​ស្រាល ហើយ​ពួកគេ​អនុវត្ត​ទោស​បាន​ជិត​ចប់​ហើយ។ ប៉ុន្តែ​លោក​ថា ប្រសិនបើ​អ្នក​ដោះលែង​ទាំងនោះ នៅតែ​បន្ត​ប្រព្រឹត្ត​បទល្មើស​ទៀត នោះ​សមត្ថកិច្ច​នឹង​ចាប់​ពួកគេ យក​មក​ទុក​ក្នុង​ពន្ធនាគារ​វិញ៖ «ប្រហែលជា​តុលាការ​អាច​ដោះលែង បទល្មើស​ស្រាល មិនមែន​ឧក្រិដ្ឋ​ទេ។ ឧទាហរណ៍​យើង​សម្រាល និង​បន្ធូរបន្ថយ បាន​មួយ​ម៉ឺន​នាក់ វា​មិនមែន​ទៅ​តែមួយ​ខេត្ត ឬ​២​ខេត្ត​ទេ គឺ​វា​រាយ​នៅ​គ្រប់កន្លែង​តាម​ខេត្ត​ច្រើន​។ ដូច្នេះ​យើង​នឹង​ធ្វើ​បញ្ជី​ជាក់លាក់ ដើម្បី​ប្រគល់ ឱ្យ​សមត្ថកិច្ច​ថ្នាក់ក្រោម​ជាតិ ។ យើង​កំពុង​រក​មធ្យោបាយ​ថែមទៀត ដើម្បី​ជួយ​ដល់​ការគ្រប់គ្រង នៅ​ថ្នាក់​មូលដ្ឋាន គ្រប់គ្រង​បន្ត»

ក្រៅ​តែ​ពី​ការគ្រប់គ្រង​របស់​សមត្ថកិច្ច​ថ្នាក់ក្រោម​ជាតិ លោក ស ខេង ក៏បាន​ឱ្យ​ដឹង​ផង​ដែរ​ថា រដ្ឋាភិបាល​កំពុង​គិតគូរ​បង្កើត​មជ្ឈមណ្ឌល​នីតិសម្បទា និង​ស្ដារ​សមត្ថភាព​របស់​អ្នកទោស​ទាំងនោះ ដើម្បី​អាច​ឱ្យ​ពួកគេ​រៀន​យក​វិជ្ជា​ជំនាញ​ណាមួយ ដើម្បី​ក្លាយ​ជា​ធនធាន​ដ៏​ល្អ​ក្នុង​សង្គម។

ទោះជា​ក្នុង​ហេតុផល​យ៉ាងណាក៏ដោយ អ្នកនាំពាក្យ​ក្រសួង​យុត្តិធម៌ លោក ជិន ម៉ាលីន ក៏បាន​ប្រាប់​អាស៊ីសេរី កាលពី​យប់មិញ​ដែរ​ថា ចំពោះ​ការ​ដោះលែង​នេះ គឺ​ផ្អែក​ទាំងស្រុង​លើ​មូលដ្ឋាន​ច្បាប់ ទៅលើ​សំណុំរឿង​ព្រហ្មទណ្ឌ​ទូទៅ មិន​សំដៅ​លើ​បុគ្គល​ណា​ឡើយ៖ «មិនមែន​ជា​យុទ្ធនាការ​ដោះលែង​អ្នកទោស​ទេ គឺ​នីតិវិធី​ច្បាប់ គឺ​ពន្លឿន​សំណុំរឿង​ឱ្យ​លឿន​។ កាលណា​សំណុំរឿង​វា​លឿន​ចប់​ឆាប់ គឺជា​គោលការណ៍​ច្បាប់ គឺ​អាច​ដោះស្រាយ​ភាព​ចង្អៀត​ណែន​ក្នុង​ពន្ធនាគារ​បាន​មួយ​ចំនួន​ដែរ ហើយ​ការ​អនុវត្ត​គឺ​ផ្អែក​ទៅ​លើ​មូលដ្ឋាន​ច្បាប់ ជា​ចម្បង មិន​សំខាន់​សកម្មជន ឬ​មិន​សកម្មជន​នោះ​ទេ»

ក្រោយ​ពី​បាន​ឡើង​កាន់​តំណែង​ជា​រដ្ឋមន្ត្រី​ក្រសួង​យុត្តិធម៌ លោក កើត រិទ្ធ បាន​ប្រកាស​យុទ្ធនាការ​ដោះស្រាយ​បញ្ហា​កកស្ទះ​សំណុំរឿង​ក្នុង​តុលាការ ជា​ការងារ​អាទិភាព​មួយ ដែល​នឹង​ជួយ​កាត់បន្ថយ​ភាព​ចង្អៀត​ណែន​នៅ​ក្នុង​ពន្ធនាគារ ដោយ​ត្រូវ​អនុវត្ត​យ៉ាង​ម៉ឺងម៉ាត់ ឈរ​លើ​មូលដ្ឋាន​ច្បាប់ សុចរិត​ភាព ស្មោះត្រង់ និង​មិន​ពុករលួយ​។ លោក រដ្ឋមន្ត្រី​យុត្តិធម៌​រូប​នេះ សង្កត់ធ្ងន់​ថា ចៅក្រម ព្រះរាជអាជ្ញា ក្រឡាបញ្ជី ណាមួយ ដែល​ប្រព្រឹត្ត​អំពើ​ខុសច្បាប់ ឬ​ឆ្លៀតឱកាស​នៃ​យុទ្ធនាការ​នេះ ដើម្បី​ផលប្រយោជន៍​ផ្ទាល់ខ្លួន នឹង ទទួលខុសត្រូវ​ទាំង​ផ្នែក​វិជ្ជាជីវៈ ទាំង​ផ្នែក​ផ្លូវច្បាប់។

រដ្ឋមន្ត្រី​ក្រសួង​យុត្តិធម៌ ឱ្យ​ដឹង​ថា បច្ចុប្បន្ន សំណុំរឿង​ដែល​កំពុង​ស្ថិត​ក្នុង​ដំណាក់កាល​សាលាដំបូង​រាជធានី​ខេត្ត មាន​ចំនួន​ជិត ៤​ម៉ឺន​សំណុំរឿង ក្នុង​នោះ​ជនល្មើស​ដែល​ត្រូវ​បាន​ចាប់ខ្លួន​ពី​បទ​ល្មើស​គ្រឿងញៀន មាន​ប្រមាណ ២​ម៉ឺន​នាក់​។ ក្នុងចំណោម អ្នក​ជាប់ឃុំ​ប្រមាណ​ជិត ៤​ម៉ឺន​នាក់ (៣៨.០០០) ក្នុង​នោះ​ស្ត្រី​មាន​ជាង ២​ពាន់ ៥​រយ​នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

Viewing all 11174 articles
Browse latest View live