ប្រជាពលរដ្ឋភូមិ ណង ហៃ លោក ប៉ាង ញ៉ច មានប្រសាសន៍បញ្ជាក់ថា ប្រជាពលរដ្ឋក្នុងភូមិសុទ្ធសឹងតែជាជនជាតិដើមភាគតិចចង់ឲ្យកូនគាត់គ្រប់ៗគ្នាគ្រប់អាយុចូលសាលារៀន បានចូលរៀន និងចង់ឲ្យគ្រូមកបង្រៀនសិស្សជាប់លាប់។ គាត់បន្តថា កូនចៅប្រជាពលរដ្ឋដែលបានសិក្សានៅសាលាបឋមសិក្សាក្នុងភូមិនេះមិនបានទទួលចំណេះដឹងត្រឹមត្រូវតាមកម្មវិធីសិក្សាប្រចាំឆ្នាំទេ ដោយសារតែគ្រូភាគច្រើនអវត្តមានច្រើនខែក្នុងមួយឆ្នាំសិក្សាកន្លងទៅនេះ។
លោក ប៉ាង ញ៉ច៖ «ឆ្នាំមុនបានរៀនខ្លះ ឆ្នាំនេះអត់បានរៀនទេ បើមិនជឿទេមកសួរប្រជារាស្ត្រនៅនេះទៅ។ គេអត់ចង់បង្រៀនធ្វើម៉េច ? អាហ្នឹងហើយខ្ញុំនិយាយជាមួយប្រធានភូមិខ្ញុំថា ល្មមបដិសេធហើយ»។
ដូចគ្នានេះដែរ ប្រជាពលរដ្ឋឈ្មោះ លៀង ខែមភី អះអាងដែរថា គ្រូពិតជាមិនមកបង្រៀនសិស្សច្រើនខែ ហើយសាលារៀនបានក្លាយជាកន្លែងបន្ទោបង់ដោយគ្មានការថែរក្សា និងគ្រប់គ្រងត្រឹមត្រូវ៖ «ខ្ញុំថាឆ្នាំនេះចាប់ពីខែមួយខែពីរមកអត់ឃើញរៀនទេ។ មិនមែនអត់ទៅរៀនទេ អត់គ្រូបង្រៀន។ លោកចុះទៅត្រួតពិនិត្យខ្លួនឯង សូម្បីសាលាសុទ្ធតែអាចម៍ទាំងអស់ហ្នឹង ហើយព្រៃជុំវិញតែម្ដង ខ្ញុំមិនមែនចេះតែនិយាយទេ ខ្ញុំចង់ឲ្យកូនខ្ញុំចេះអក្សរ»។
សាលាបឋមសិក្សា ណង ហៃ មានមួយអគារប្រាំបន្ទប់ បើកបង្រៀនសិស្សពីថ្នាក់ទី១ ដល់ថ្នាក់ទី៦ ក៏ប៉ុន្តែសាលានេះមាននាយកសាលាម្នាក់ និងគ្រូជាប់កិច្ចសន្យា ៤នាក់ ទទួលភារៈបង្រៀនសិស្សប្រមាណជិត ២០០នាក់។
នាយកសាលា ណង ហៃ លោក ធំ ប៊ុនថុង ចាត់ទុកសេចក្ដីរាយការណ៍របស់អ្នកភូមិថា ជាការមិនពិត។ យ៉ាងនេះក្តី ប្រធានការិយាល័យអប់រំស្រុកលំផាត់ លោក ជា វ៉ន អះអាងថា សេចក្ដីរាយការណ៍របស់ប្រជាពលរដ្ឋថា ជាការភ័ន្តច្រឡំ ពីព្រោះក្រុមអធិការកិច្ចអប់រំបានចុះស្រង់ព័ត៌មាននៅសាលានោះ ហើយមិនឃើញមានរបាយការណ៍ថា គ្រូមិនមកបង្រៀននោះទេ។
លោកទទួលស្គាល់ថា គ្រូខកខានមិនបង្រៀនសិស្សខ្លះមែន ដោយសារនាយកសាលាត្រូវធ្វើដំណើរទៅចូលរួមប្រជុំថ្នាក់ខេត្ត៖ «មិនមែនអ៊ីចឹងទេ ព្រោះខ្ញុំបានចុះទៅដែរ សកម្មភាពការងារជួនកាលវាគ្រាន់តែរអាក់រអួលបន្តិចបន្តួចទេ គ្រូក្របខ័ណ្ឌយើងតែម្នាក់ ជួនកាលនាយកសាលាគាត់ម្នាក់ឯងគេហៅមកប្រជុំអ៊ីចឹងទៅ វាត្រូវគាត់សម្រាក ហើយបងប្អូនយើងមួយចំនួនឃើញគ្រូឈប់មួយថ្ងៃពីរថ្ងៃអ៊ីចឹងជួនកាលគាត់អត់មក»។
ស្រុកលំផាត់ មានសាលាបឋមសិក្សាចំនួន ២៦ និងអនុវិទ្យាល័យចំនួន១។ ប្រជាពលរដ្ឋជាឪពុកម្ដាយសិស្សបានកត់សំគាល់ថា សាលាមួយចំនួនក្នុងស្រុកនេះ គឺគ្រូមិនមកបង្រៀនសិស្សភាគច្រើននៃថ្ងៃបង្រៀនហើយនៅសាលារៀនមួយចំនួនទៀត គ្រូមិនមកបង្រៀនច្រើនខែក្នុងឆ្នាំសិក្សាច្រើនឆ្នាំកន្លងទៅនេះ។
ប្រជាពលរដ្ឋភូមិណងហៃ សំណូមពរឲ្យក្រុមអធិការកិច្ចអប់រំចុះស្រាវជ្រាវករណីនេះដើម្បីចាត់វិធានការឲ្យគ្រូមកបង្រៀនសិស្សតាមកម្មវិធីសិក្សាកំណត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
