ប្រធានគម្រោងអប់រំសន្តិភាពរបស់អង្គការទស្សនៈពិភពលោកកម្ពុជា លោក សន សុទ្ធារ៉ូ បានបញ្ជាក់ថា សៀវភៅ«វិថីសន្តិភាពសម្រាប់កុមារ» ត្រូវបានចងក្រងឡើងដោយអង្គការទស្សនៈពិភពលោកប្រចាំកម្ពុជា រួចបានដាក់ជូនក្រសួងអប់រំ យុវជននិងកីឡា ពិនិត្យ ហើយក្រសួងក៏បានអនុញ្ញាតឲ្យបោះពុម្ពផ្សព្វផ្សាយជាសាធារណៈកាលពីថ្ងៃទី១៣ ខែមីនា ឆ្នាំ២០០៩។
មន្រ្តីដដែលបានបន្ដថា ដើម្បីឲ្យខ្លឹមសារនៃសៀវភៅនេះបានជ្រួតជ្រាបដល់ស្រទាប់កុមារ ឬយុវវ័យឲ្យបានល្អប្រសើរនោះ គេចាំបាច់ត្រូវការគ្រូដែលប៉ិនប្រសប់ក្នុងការអប់រំពន្យល់ ដូច្នេះទើបអង្គការនិងក្រសួងអប់រំបានសហការគ្នានឹងបើកវគ្គបំប៉នគ្រូបង្គោល។
លោក សន សុទ្ធារ៉ូ មានប្រសាសន៍ដូច្នេះថា ៖ «សៀវភៅវិថីសន្តិភាពសម្រាប់កុមារហ្នឹង យើងមានសកម្មភាពច្រើនណាស់ គ្រាន់តែយើងមិនរើសអើងមួយ យល់ដឹងពីទុក្ខអ្នកដទៃ អ្នកណាខ្វះខាតចេះជួយចែករំលែកអីអ៊ីចឹងទៅ ហ្នឹងក៏ជាផ្នែកមួយនៃការកសាងសន្តិភាពដែរ»។
អនុប្រធានការិយាល័យអភិវឌ្ឍន៍កម្មវិធីសិក្សានៃនាយកដ្ឋានអភិវឌ្ឍន៍កម្មវិធីសិក្សារបស់ក្រសួងអប់រំ យុវជននិងកីឡា លោកស្រី ជិន យ៉ាហន បានបញ្ជាក់ប្រាប់ដែរថា សៀវភៅ«វិថីសន្តិភាពសម្រាប់កុមារ»ដែលក្រសួងអប់រំបានអនុញ្ញាតឲ្យប្រើប្រាស់នោះ ខ្លឹមសារនៃសៀវភៅនោះត្រូវបានគេដាក់បញ្ចូលទៅក្នុងកម្មវិធីសិក្សាបំណិនជីវិតតាមមូលដ្ឋានចំនួនពី២ម៉ោង ទៅ ៥ម៉ោងប្រចាំថ្ងៃព្រហស្បត៍នៅរៀងរាល់សប្ដាហ៍។
លោកស្រី ជិន យ៉ាហន មានប្រសាសន៍ដូច្នេះថា ៖ «នៅបឋម រៀនពីថ្នាក់ទី៥ ទៅទី៦ ព្រោះថា សៀវភៅនេះមានខ្លឹមសាររាងជ្រៅបន្តិចហើយ ហើយចំពោះអនុវិទ្យាល័យអាចអនុវត្តពេញតែម្ដង ពីទី៧ ទី៨ ទី៩ ចំណែកនៅវិទ្យាល័យ សិស្សអាចអនុវត្តបាននៅថ្នាក់ទី១០ ពីព្រោះថ្នាក់ទី១០ គេមានឱកាសនឹងអាចរៀនបានច្រើន»។
មន្រ្តីអង្គការទស្សនៈពិភពលោកកម្ពុជា បានឲ្យដឹងទៀតដែរថា ចំពោះវគ្គបំប៉នគ្រូបង្គោលស្ដីពីរបៀបប្រើប្រាស់សៀវភៅ«វិថីសន្តិភាពសម្រាប់កុមារ» នឹងប្រព្រឹត្តទៅនៅទីក្រុងភ្នំពេញអស់រយៈពេល ៥ថ្ងៃ គឺចាប់ពីថ្ងៃទី៣១ ខែសីហា ដល់ថ្ងៃទី៤ ខែកញ្ញា ឆ្នាំ២០០៩។
លោកបានបន្ថែមទៀតថា ក្រោយពីបញ្ចប់វគ្គ គេរំពឹងថា ខ្លឹមសារនៃសៀវភៅនេះនឹងបានជ្រួតជ្រាបដល់ស្រទាប់កុមារឬយុវវ័យខ្មែរទូទាំងប្រទេស ហើយពេលនោះ ពួកគេនឹងទទួលបានភាពប៉ិនប្រសប់ក្នុងជីវិតឬបំនិនជីវិតដែលអាចកសាងសមត្ថភាពប្រកបទៅដោយសន្ដិភាពនិងសីលធម៌រស់នៅល្អសម្រាប់ខ្លួនផ្ទាល់ក៏ដូចសម្រាប់សង្គមជាតិកម្ពុជាទាំងមូល៕
