មេដឹកនាំរបបក្រុងភ្នំពេញ លោក ហ៊ុន សែន ថ្លែងថា កងកម្លាំងប្រដាប់អាវុធទាំងអស់មានតួនាទីតែមួយក្នុងរក្សាការពាររដ្ឋាភិបាលមួយ ដែលកើតចេញពីការបោះឆ្នោតតែប៉ុណ្ណោះ មិនអាចអព្យាក្រឹត្យរវាងបក្សនយោបាយនិងរដ្ឋាភិបាលបានឡើយ។
លោក ហ៊ុន សែន លើកឡើងថា ដោយសារតែដាក់កងទ័ពឲ្យកាន់យកអព្យាក្រឹត្យ ទើបនាំឲ្យមានបដិវត្តន៍ពណ៌តាមប្រទេសមួយចំនួន។ ការប្រកាសរបស់លោក ហ៊ុន សែន ចំពោះមុខនិស្សិតខ្មែរជាង២០០នាក់នៅទីក្រុងតូក្យូ នៃប្រទេសជប៉ុន នៅថ្ងៃទី៧ ខែតុលា ទំនងជាការឆ្លើយតបទៅនឹងសាររបស់អតីតមេបក្សប្រឆាំង លោក សម រង្ស៊ី ដែលបានអំពាវនាវតាមបណ្ដាញសង្គមហ្វេសប៊ុក ឲ្យកងកម្លាំងកម្លាំងប្រដាប់អាវុធ ដកលោក ហ៊ុន សែន ពីអំណាច ជាបន្ទាន់ដើម្បីកុំឲ្យប្រទេសជាតិរងការដាក់ទណ្ឌកម្មពីអន្តរជាតិ៖ «កងទ័ពគេបង្កើតឡើងដើម្បីការពាររដ្ឋ គ្មានរឿងអព្យាក្រឹត្យទេ។ អព្យាក្រឹត្យចំពោះមុខគណបក្សនយោបាយ ការពារឲ្យដូចៗគ្នា តែរវាងរដ្ឋនិងបក្សនយោបាយគឺអត់បានដាច់ខាត។ គេឲ្យអ្នកឯងមកការពាររដ្ឋ មិនមែនឲ្យអ្នកឯងអព្យាក្រឹត្យរវាងបក្សនយោបាយដែលមកផ្ដួលរំលំរដ្ឋនោះទេ។ សូមកុំភាន់ច្រឡំ។ ចំណុចហ្នឹងដែលពួកវាខឹងខ្ញុំណាស់ ព្រោះធ្វើបដិវត្តន៍ស្រុកខ្មែរកាលពីឆ្នាំ២០១៣ ធ្វើអត់បាន។ ដល់ធ្វើអត់បានតាមរករឿង ហ៊ុន សែន រហូត តាមអីតាមទៅ ប្រទេសនេះនៅជាប្រទេសរបស់ប្រជាជនខ្មែរ»។
នៅក្នុងសារលើទំព័រហ្វសប៊ុករបស់អតីតមេបក្សប្រឆាំងនៅកម្ពុជា កាលពីថ្ងៃទី៦ តុលា លោក សម រង្ស៊ី ថាលោក ហ៊ុន សែនជាមនុស្សកំសាក និងថោកទាបជាទីបំផុត ពីព្រោះគាត់ប្រើអំណាចផ្ដាច់ការ ដើម្បីចាប់ប្រជារាស្ត្រ ធ្វើជាចំណាប់ខ្មាំង ហើយបង្ខំឲ្យពលរដ្ឋ ទទួលទណ្ឌកម្មអន្តរជាតិជំនួសលោកហ៊ុន សែន។ ក្នុងសារនោះ លោក សម រង្ស៊ី លើកឡើងថា ដើម្បីឲ្យកម្ពុជា រួចផុតពីទុក្ខសោកគ្រប់បែបយ៉ាង ប្រជារាស្ត្រខ្មែរទាំងមូល មានទាំងកម្លាំងប្រដាប់អាវុធផង ត្រូវតែដកលោក ហ៊ុន សែន ជាបន្ទាន់ បើសិនជាជាចង់ឲ្យប្រទេសមានជីវិតរុងរឿងទៅមុខ។
ការអំពាវនាវ លោក សម រង្ស៊ី ធ្វើឡើងក្រោយពេលដែលសហភាពអឺរ៉ុបចាប់ផ្ដើមរៀបចំដាក់ទណ្ឌកម្មពាណិជកម្ម លើរបបក្រុងភ្នំពេញ បន្ទាប់ពីរបបក្រុងភ្នំពេញមិនធ្វើតាមសំណើរបស់សហគមន៍អន្តរជាតិអោយស្តារឡើងវិញនូវការគោរពសិទ្ធិមនុស្ស និងប្រជាធិបតេយ្យនៅកម្ពុជា៕