កម្ពុជាមានអត្រាស្ត្រីស្លាប់ ដោយសារជំងឺមហារីកស្បូន ដល់ ៩០០នាក់ ក្នុងចំណោម អ្នកកើតជំងឺ ប្រមាណជាង ១.៥០០នាក់ ក្នុងមួយឆ្នាំៗ ដែលភាគច្រើន ជាពលរដ្ឋក្រីក្រ។
អ្នកឯកទេសជំងឺមហារីកស្បូននៅមន្ទីរពេទ្យកាល់ម៉ែត លោកវេជ្ជបណ្ឌិត សុខ សុធា បានប្រាប់កាសែតក្នុងស្រុកថា អត្រាស្ត្រីដែលកើតជំងឺមហារីកស្បូន បច្ចុប្បន្ន មានចំនួនខ្ពស់ ដោយសារតែកង្វះការផ្សព្វផ្សាយព័ត៌មាន ស្ដីពីមូលហេតុ រោគសញ្ញា វិធីការពារ និងព្យាបាលជាដើម។
ក្នុងសន្និសីទសារព័ត៌មានស្ដីពីការណែនាំ និងបង្ហាញផលិតផលឱសថថ្មីៗ ប្រឆាំងជំងឺមហារីកស្បូន កាលពីថ្ងៃទី២១ ខែមេសាថា លោកវេជ្ជបណ្ឌិត សុខ សុធា បញ្ជាក់ថា មន្ទីរពេទ្យនៅកម្ពុជាសព្វថ្ងៃនេះ មានគ្រូពេទ្យឯកទេសនិងឧបករណ៍ទំនើបៗ និងឱសថព្យាបាលដូចជានៅប្រទេសក្រៅដែរ រួមមាននៅមន្ទីរពេទ្យកាល់ម៉ែត និងមន្ទីរពេទ្យមិត្តភាពខ្មែរ-សូវៀត។ លោកឲ្យដឹងទៀតថា ស្ត្រីដែលកើតជំងឺមហារីកស្បូន អាចមកទទួលការព្យាបាលនៅមន្ទីរពេទ្យទាំងពីរនេះ ដោយមិនចាំបាច់ចំណាយថវិកាច្រើន ដើម្បីចេញទៅព្យាបាលនៅក្រៅប្រទេសឡើយ។
របាយការណ៍របស់អង្គការសុខភាពពិភពលោកបានឱ្យដឹងថា កម្ពុជាគឺប្រទេសដែលមានស្ត្រីកើតជំងឺមហារីកមាត់ស្បូនច្រើនជាងគេ នៅបណ្ដាប្រទេសអាស៊ានទាំង១០ ដោយក្នុងមួយឆ្នាំៗ ស្ត្រីខ្មែរប្រមាណជាង១.៥០០នាក់ រកឃើញថា មានកើតជំងឺមហារីកមាត់ស្បូន ដែលបណ្ដាលឲ្យស្លាប់ដល់ទៅ៩០០នាក់៕
