អ្នកសម្របសំរួលរបស់សមាគមខ្មែរក្នុងប្រទេសអូស្រ្តាលី ដែលប្រចាំនៅកម្ពុជា កញ្ញា តារា នីតា បានភៀសខ្លួនទៅដល់ប្រទេសញូវ ហ្សីលែន (New Zealand) ហើយក្រោយពីលោក ហេង ឡុង ប្តីរបស់អ្នកស្រី ចន ចាន់លក្ខិណា ប្រធានសមាគម មិត្តសិល្បៈស្ម័គ្រចិត្តជួយសង្គម បានដាក់ពាក្យបណ្តឹងទៅតុលាការ កាលពីថ្ងៃចន្ទ ចោទប្រកាន់កញ្ញាថា ជាអ្នកបញ្ចុះបញ្ចូល និងបោកប្រាស់សិល្បករ សិល្បការី ពីប្រទេសកម្ពុជាទៅសម្តែងក្នុងប្រទេសអូស្រ្តាលី ដែលបង្កប់ទៅដោយសកម្មភាពនយោបាយខុសច្បាប់ជាមួយក្រុមរបស់ លោក ហុង លីម តំណាងរាស្រ្តអូស្ត្រាលីដើមកំណើតខ្មែរ និងលោក ជា យូហន ប្រធាសសមាគមខ្មែរសាជីវកម្មក្នុងរដ្ឋវីកតូរីយ៉ា (Victoria)។
កញ្ញា តារា នីតា កាលពីថ្ងៃអង្គារបានប្រាប់អាស៊ីសេរីតាមទូរស័ព្ទ ដោយច្រានចោលការចោទប្រកាន់របស់លោក ហេង ឡុង។ កញ្ញាអះអាងថា រាល់ការដឹកនាំក្រុមតារាចម្រៀងពីកម្ពុជាទៅសម្តែងនៅក្រៅប្រទេសតែងមានការចុះកិច្ចសន្យាច្បាស់លាស់ អំពីការសម្តែងនៅក្រៅប្រទេសនោះ៖ «កន្លងមកនាងខ្ញុំជាអ្នកសម្របសំរួលនៅសមាគមខ្មែរក្នុងប្រទេសអូស្រ្តាលី គឺយើងមានតួនាទីច្បាស់លាស់ ហើយរាល់ការសំដែងនៅទីនោះ គឺយើងមានការចុះកុងត្រាច្បាស់លាស់ ហើយយើងបានឲ្យគាត់ដឹងថា យើងទៅសំដែងក្នុងគោលបំណងអ្វី ហើយតួនាទីប្រធានរបស់នាងខ្ញុំមានតួនាទីជាអ្វីនោះ។ ហើយតារារបស់យើងគាត់ទៅសម្តែងក្នុងន័យសប្បុរសធម៌មិនមានជាប់ពាក់ព័ន្ធនឹងរឿងនយោបាយនោះទេ។»
កញ្ញាបញ្ជាក់ថា ប្រធានសមាគមខ្មែរសាជីវកម្មក្នុងប្រទេសអូស្រ្តាលី លោក ជា យូហន បានប្រាប់កញ្ញាថា ក្រុមរបស់លោកនឹងស្វែងរកលទ្ធភាពក្នុងការជួយសង្គ្រោះរូបនាងទៅតាមលទ្ធភាព ដែលអាចធ្វើទៅបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។