សមាជិកសភាអូស្ត្រាលី ស្នើឲ្យរដ្ឋាភិបាលអូស្ត្រាលី រកវិធានការដាក់ទណ្ឌកម្មលើរបបលោក ហ៊ុន សែន ឲ្យដូចអ្វីដែលសហគមន៍អន្តរជាតិកំពុងធ្វើដែរ ដើម្បីទប់ស្កាត់ ស្ថានភាពរំលោភសិទ្ធិមនុស្ស និងប្រជាធិបតេយ្យនៅកម្ពុជា ដែលកាន់តែរីករាលដាល និងប្រឆាំងការដឹកនាំរបស់លោក ហ៊ុន សែន បែបផ្ដាច់ការ ដែលផ្ទុយទាំងស្រុង ទៅនឹងស្មារតីនៃកិច្ចព្រមព្រៀងសន្តិភាព ទីក្រុងប៉ារីស។
តំណាងរាស្ត្រអូស្ត្រាលី ពីខាងគណបក្សពលករ គឺលោក ម៉ាក បាត់លើរ (Mark Butler) ថ្លែងនៅថ្ងៃទី ២៦ ខែមីនានេះ ថារដ្ឋាភិបាលអូស្ត្រាលី មិនត្រូវអនុញ្ញាតឲ្យលោកនាយករដ្ឋមន្ត្រី ហ៊ុន សែន រួចខ្លួនពីការទទួលខុសត្រូវ ចំពោះការរំលោភសិទ្ធិមនុស្ស និងប្រជាធិបតេយ្យនៅកម្ពុជា នោះឡើយ។ លោក ម៉ាក បាត់លើរ សង្កត់ធ្ងន់លើការដែលមិនអាចអត់ឱនឲ្យបាន ទៅលើសារគំរាមកំហែងរបស់លោក ហ៊ុន សែន គំរាមបិទផ្លូវចរចា ដោយសារពលរដ្ឋបញ្ចេញមតិតវ៉ា តាមរយៈការដុតទីងមោងរូបលោកនោះ៖ «អ្នកទោសនយោបាយទាំងអស់ ដែលកំពុងជាប់ឃុំ មិនមែនតែរូបលោក កឹម សុខា ប៉ុណ្ណោះទេ គឺក្នុងនោះក៏មានអ្នកផលិតខ្សែភាពយន្តជាជនអូស្ត្រាលីម្នាក់ផងដរ គឺលោក ជេមស៍ រីកខិតសិន (James Ricketson)។ ចំពោះពួកគាត់ សារគំរាមកំហែងរបស់លោក ហ៊ុន សែន បែបនេះ គឺគ្រោះថ្នាក់ខ្លាំងណាស់។ ក្នុងស្ថានភាពបែបនេះ ប្រទេសអូស្ត្រាលី ត្រូវតែក្រោកឈរឡើង ដើម្បីបង្ហាញអំពីភាព នៅតែជាអ្នកយកចិត្តទុកដាក់ខ្លាំង ទៅលើស្មារតីនៃកិច្ចព្រមព្រៀងសន្តិភាពទីក្រុងប៉ារីស។ យើងត្រូវតែហ៊ានតតាំងនឹងរបបលោក ហ៊ុន សែន ដើម្បីគាំទ្រពលរដ្ឋខ្មែរ។ ម្យ៉ាងទៀត គេត្រូវតែដោះលែងលោក កឹម សុខា និង ជេមស៍ រីកខិតសិន។ យើងមិនត្រូវអនុញ្ញាតឲ្យលោក ហ៊ុន សែន រួចខ្លួនពីការទទួលខុសត្រូវ ចំពោះការរំលោភស្មារតីនៃកិច្ចព្រមព្រៀងសន្តិភាពទីក្រុងប៉ារីស ដូចសព្វថ្ងៃនេះបាននោះឡើយ។ សហគមន៍អន្តរជាតិ រួមមានសហរដ្ឋអាមេរិក និង សហភាពអឺរ៉ុប បានចាត់ការដាក់ទណ្ឌកម្មជាបណ្តើរៗហើយ។ ដូច្នេះ ខ្ញុំសង្ឃឹមថា រដ្ឋាភិបាលអូស្ត្រាលី នឹងធ្វើតាមដែរ»។
មុនទៅអូស្ត្រាលីលោក ហ៊ុន សែន គំរាមតាមវាយអ្នកតវ៉ា ដល់ផ្ទះ ឲ្យតែអ្នកណាហ៊ានធ្វើ និងដុតរូបទីងមោងរបស់គាត់។ ប៉ុន្តែ ពលរដ្ឋខ្មែរអូស្ត្រាលី នៅតែតវ៉ាដុតរូបលោកដដែល។ ទោះមិនបានវាយពលរដ្ឋខ្មែរណាម្នាក់ដល់ផ្ទះ ដូចអ្វីដែលលោកបានគំរាម បើទោះជាពួកគាត់នាំគ្នាដុតរូបទីងមោងរបស់លោកក៏ដោយ ប៉ុន្តែ ពេលត្រឡប់មកដល់ស្រុកខ្មែរវិញ លោក ហ៊ុន សែន បានខឹងសម្បាយ៉ាងខ្លាំង និងគំរាមបន្ថែមទៀត។ ម្តងនេះ លោកគំរាមក្នុងរូបភាពផ្សេង៖ «ហ៊ុន សែន អត់ត្រូវការចរចាជាមួយនរណាទេ។ ចរចាជាមួយអាអ្នកជាប់គុក មិនចរចាទេជាមួយអាក្រុមជាប់គុក ដែលត្រូវគេរំលាយហើយ គឺគ្មានការចរចា អ្នកណាចង់ធ្វើអីធ្វើទៅ។ ដឹងថា គន្លឹះនៅលើដៃ ហ៊ុន សែន ហើយទៅដុតរូប ហ៊ុន សែន វាមិនចប់។ មិនមែន ហ៊ុន សែន ដាក់អន្ទាក់ទេ ក៏ប៉ុន្ដែអ្នកឯងទៅផុតគំនូសក្រហមទៅហើយ»។
ការអំពាវនាវរបស់តំណាងរាស្ត្រអូស្ត្រាលី ដែលស្នើឲ្យរដ្ឋាភិបាលអូស្ត្រាលី ដាក់ទណ្ឌកម្មរបបលោក ហ៊ុន សែន នេះ គឺធ្វើឡើងក្រោយពីលោក ហ៊ុន សែន គំរាមបិទផ្លូវចរចា ជាមួយមន្ត្រីបក្សប្រឆាំង ដោយសារតែលោកខឹងសម្បារទៅនឹងក្រុមអ្នកតវ៉ាដុតរូបទីងមោងរបស់លោក ទាំងនៅប្រទេសអូស្ត្រាលី និងសហរដ្ឋអាមេរិក ដែលលោកចោទថា ជាមនុស្សរបស់បក្សប្រឆាំង។
ទោះជាយ៉ាងនេះក្តី ប្រធានចលនាសង្គ្រោះជាតិ លោក សម រង្ស៊ី អះអាងថា ការធ្វើបាតុកម្មតវ៉ា ដុតរូបទីងមោងលោក ហ៊ុន សែន គឺជាសិទ្ធិបញ្ចេញមតិរបស់ពលរដ្ឋខ្មែរ ដែលមិនពេញចិត្តទៅនឹងការដឹកនាំរបស់លោក ហ៊ុន សែនប៉ុណ្ណោះ។ លោក សម រង្ស៊ី មិនភ្ញាក់ផ្អើលទេ ដែលលោក ហ៊ុន សែន តែងតែចោទ ថាគណបក្សប្រឆាំង នៅពីក្រោយការតវ៉ាប្រឆាំងរបបក្រុងភ្នំពេញនោះ។
ប្រទេសអូស្ត្រាលី កាលពីថ្ងៃទី២១ ខែមីនា កន្លងទៅនេះ បានបញ្ជាក់ជំហរថ្កោលទោសរបបក្រុងភ្នំពេញ តាមរយៈសេចក្ដីថ្លែងការណ៍រួមគ្នាមួយរបស់ប្រទេសទាំង៤៥ ដែលជាសមាជិកក្រុមប្រឹក្សាសិទ្ធិមនុស្សអង្គការសហប្រជាជាតិ។ បើទោះបី រដ្ឋាភិបាលអូស្ត្រាលី នៅមិនទាន់ចាត់វិធានការក្ដៅណាមួយ ក្នុងការដាក់ទណ្ឌកម្មលើរបបលោក ហ៊ុន សែន ឲ្យដូចសហរដ្ឋអាមេរិក និងសហភាពអឺរ៉ុប នៅឡើយក៏ដោយ ក៏រដ្ឋាភិបាលអូស្ត្រាលី ដែលជាហត្ថលេខីមួយ នៃកិច្ចព្រមព្រៀងសន្តិភាពទីក្រុងប៉ារីសនេះ បានបញ្ជាក់ជំហរព្រួយបារម្ភរបស់ខ្លួន ចំពោះស្ថានការណ៍រំលោភសិទ្ធិមនុស្ស និងប្រជាធិបតេយ្យនៅកម្ពុជា និងបានថ្កោលទោសរបបលោក ហ៊ុន សែន ជាចំហរួចហើយ។
តំណាងរាស្ត្រអូស្ត្រាលី ពីខាងគណបក្សប្រឆាំងជាច្រើនរូប សុទ្ធតែបានសម្ដែងការតវ៉ា ចំពោះការដឹកនាំបែបផ្ដាច់ការរបស់លោក ហ៊ុន សែន ជាពិសេសនៅមុនដំណើរទស្សនកិច្ចរបស់លោក ហ៊ុន សែន ទៅកាន់ប្រទេសអូស្ត្រាលី ដើម្បីទៅចូលរួមកិច្ចប្រជុំកំពូលអាស៊ាន-អូស្ត្រាលី កាលពីពាក់កណ្ដាលខែមីនា កន្លងទៅនេះ។ សារអំពាវរបស់តំណាងរាស្ត្រអូស្ត្រាលី ដែលស្នើឲ្យរដ្ឋាភិបាលអូស្ត្រាលី ដាក់ទណ្ឌកម្មលើរបបលោក ហ៊ុន សែន នេះ គឺស្របពេលដែលសហរដ្ឋអាមេរិក និង សហភាពអឺរ៉ុប កំពុងពិចារណាវិធានការទណ្ឌកម្មបន្ថែម ប្រសិនបើស្ថានការណ៍នយោបាយអាក្រក់បច្ចុប្បន្ននៅកម្ពុជា មិនវិវត្តទៅរកភាពល្អប្រសើរឡើងវិញឆាប់ៗទេនោះ៕