ក្រសួងការងារ និងបណ្ដុះបណ្ដាលវិជ្ជាជីវៈបានជូនដំណឹងឱ្យកម្មករ និយោជិកទាំងអស់ឈប់សម្រាកចំនួន ៤ថ្ងៃ ក្នុងឱកាសបុណ្យចូលឆ្នាំខ្មែរប្រពៃណីជាតិខាងមុខនេះ។
លិខិតជូនដំណឹងរបស់រដ្ឋមន្ត្រីក្រសួងការងារ លោក អ៊ិត សំហេង ចុះកាលពីថ្ងៃទី១៩ ខែមីនា បានឱ្យដឹងថា ថៅកែ ឬម្ចាស់សហគ្រាស គ្រឹះស្ថានទាំងអស់ដែលស្ថិតក្នុងដែនអនុវត្តនៃច្បាប់ការងារត្រូវអនុញ្ញាតឱ្យកម្មករនិយោជិកទាំងអស់ឈប់សម្រាកដោយមានប្រាក់ឈ្នួល គឺចាប់ពីថ្ងៃទី១៤ ទី១៥ ទី១៦ និងទី១៧ ខែមេសា ឆ្នាំ២០១៨។ ប៉ុន្តែ ក្នុងករណីចាំបាច់បំផុតដែលសហគ្រាស គ្រឹះស្ថានត្រូវការកម្មករធ្វើការអំឡុងពេលឈប់សម្រាកនេះ ម្ចាស់រោងត្រូវសម្របសម្រួលជាមួយកម្មករឱ្យមានការស្ម័គ្រចិត្ត ព្រមទាំងបែងចែកឱ្យមានពេលវេលាឱ្យបានសមស្រប។
លោក អ៊ិត សំហេង ឱ្យដឹងបន្តថា កម្មករដែលធ្វើការក្នុងថ្ងៃឈប់បុណ្យចូលឆ្នាំខ្មែរ នឹងទទួលបានប្រាក់បំណាច់បន្ថែមមានចំនួនស្មើនឹងប្រាក់ឈ្នួលថ្ងៃធ្វើការធម្មតា។
ស្របពេលគ្នានេះដែរ ក្រសួងការងារ ក៏ស្នើឱ្យម្ចាស់រោងចក្រ សហគ្រាស គ្រឹះស្ថាន ទាំងអស់ គួរចាត់តាំងឱ្យមានការលេងល្បែងកម្សាន្តប្រពៃណីខ្មែរ ដើម្បីចូលរួមអបអរសាទរពិធីបុណ្យចូលឆ្នាំខ្មែរខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។