រដ្ឋមន្ត្រីក្រសួងសាធារណការ និងដឹកជញ្ជូន ធ្វើយុទ្ធនាផ្សព្វផ្សាយឲ្យយល់ដឹងពីច្បាប់ចរាចរដល់លោកគ្រូអ្នកគ្រូ និងសិស្សានុសិស្សនៅខេត្តសៀមរាប នៅព្រឹកថ្ងៃទី១៩ មីនា។
យុទ្ធនាការនេះ ដើម្បីចូលរួមកាត់បន្ថយគ្រោះថ្នាក់ចរាចរនៅលើដងផ្លូវ។ មន្ត្រីអង្គការសង្គមស៊ីវិលនិងប្រជាពលរដ្ឋនៅខេត្តសៀមរាបលើកឡើងថា យុទ្ធនាការរបស់លោករដ្ឋមន្ត្រីនេះមិនអាចកាត់បន្ថយគ្រោះថ្នាក់ចរាចរបានទេ ប្រសិនបើសមត្ថកិច្ចមិនបានអនុវត្តន៍ច្បាប់ឲ្យបានត្រឹមត្រូវនោះ។
រដ្ឋមន្ត្រីក្រសួងសាធារណការ និងដឹងជញ្ជូន លោក ស៊ុន ចាន់ថុល មានប្រសាសន៍ខណៈចុះធ្វើយុទ្ធនាការ អប់រំច្បាប់ចរាចរដល់លោកគ្រូ អ្នកគ្រូ សិស្សានុសិស្ស នៅសាលាបឋមសិក្សាគ្រួស ក្រុងសៀមរាប កាលពីព្រឹកថ្ងៃទី១៩ មីនា ថា គ្រោះថ្នាក់ចរាចរនៅលើដងផ្លូវភាគច្រើន ដោយសារអ្នកបើកបរមិនគោរពច្បាប់ចរាចរ ដូចជាការធ្វេសប្រហែសក្នុងពេលបើកបរ មិនពាក់មួកសុវត្ថិភាព ការផឹកគ្រឿងស្រវឹងនៅពេលបើកបរ ការបើកបរប្រជែងគ្នា និងការបើកបរក្នុងល្បឿនលឿនជាដើម៖ «នេះហើយជាបញ្ហានៃការគ្រោះថ្នាក់ចរាចរ ដូច្នេះខ្ញុំសូមអំពាវនាវដល់សិស្សានុសិស្សទាំងអស់ទៅផ្ទះវិញប្រាប់ឪពុកម្ដាយយើងឲ្យពួកគាត់គោរពច្បាប់ចរាចរទាំងអស់គ្នា គឺជិះម៉ូតូត្រូវពាក់មួកជាដាច់ខាត ទោះបីជាធ្វើដំណើរទៅទីជិត ឬឆ្ងាយក៏ដោយ ព្រោះបញ្ហាគ្រោះថ្នាក់ចរាចរនេះវាអត់ប្រាប់យើងឲ្យដឹងមុនទេ»។
អតីតគ្រូបង្រៀនម្នាក់នៅខេត្តសៀមរាប លោក ច័ន្ទ សុភា លើកឡើងថា ត្រឹមតែការអប់រំប្រជាពលរដ្ឋរបស់លោករដ្ឋមន្ត្រីរូបនេះមិនអាចកាត់បន្ថយគ្រោះថ្នាក់ចរាចរបានជាដុំកំភួនទេ ព្រោះការនេះអប់រំមានរយៈពេលខ្លី ហើយមិនបានទូលំទូលាយទៅដល់ប្រជាពលរដ្ឋនៅតាមមូលដ្ឋាន។
អតីតគ្រូបង្រៀនរូបនេះអះអាងទៀតថា ដើម្បីអប់រំយល់ដឹងពីគ្រោះថ្នាក់ចរាចរទៅដល់ពលរដ្ឋឲ្យបានទូលំទូលាយ លុះណាតែរដ្ឋាភិបាលលោក ហ៊ុន សែន បន្ថែមកម្មវិធីសិក្សាស្ដីពីច្បាប់ចរាចរសម្រាប់សិស្សសិក្សាចាប់ពីថ្នាក់បឋមសិក្សា ឬអនុវិទ្យាល័យឡើងទៅ ទើបអាចកាត់បន្ថយគ្រោះថ្នាក់ចរាចរបានប្រសើរ៖ «គ្រោះថ្នាក់ចរាចរនៅតែមានការកើនឡើងពីមួយឆ្នាំទៅមួយឆ្នាំមិនមានការថមថយទេ ទោះបីមានរបាយការណ៍ប្រចាំឆ្នាំរបស់ក្រសួងមហាផ្ទៃថា មានអ្នកស្លាប់ថយចុះក៏ដោយ ប៉ុន្តែបើឃើញពិនិត្យជាក់ស្ដែងទៅ នៅតែមានការកើនឡើងនៃអ្នកស្លាប់ដោយសារគ្រោះថ្នាក់ចរាចរ»។
ចំណែកឯមន្ត្រីស៊ើបអង្កេតសមាគមការពារសិទ្ធិមនុស្សអាដហុក (Adhoc) ខេត្តសៀមរាប លោក ច័ន្ទ ចំរើន សាទរទៅនឹងការអប់រំច្បាប់ចរាចរដល់ពលរដ្ឋដោយលោករដ្ឋមន្ត្រីក្រសួងសាធារណការ និងដឹកជញ្ជូននេះ ក៏ប៉ុន្តែលោកកត់សំគាល់ថា ការអប់រំតែមួយផ្នែកតូចនេះ មិនគ្រប់គ្រាន់ទេ គឺអាជ្ញាធរពាក់ព័ន្ធត្រូវមានការផ្សព្វផ្សាយទៅដល់ប្រជាពលរដ្ឋនៅតាមមូលដ្ឋានឲ្យបានច្រើនបន្ថែមទៀត។បន្ថែមពីនេះ លោកថា សមត្ថកិច្ចត្រូវតែអនុវត្តន៍ច្បាប់ឲ្យបានតឹងរ៉ឹង និងដោយស្មើភាពគ្នាទាំងប្រជាពលរដ្ឋក្រីក្រ និងអ្នកមានលុយនិងមានអំណាច៖ «ហើយចំណុចដែលសំខាន់នោះយើងត្រូវពង្រឹងច្បាប់ចរាចរគ្មានការយោគយល់ ជាពិសេសត្រូវបោសសំអាតពីថ្នាក់លើមកមុន ហើយអ្នកមានអំណាចមានលុយប្រព្រឹត្តខុសច្បាប់ ត្រូវតែចាប់មកផ្ដន្ទាទោសតាមផ្លូវច្បាប់ គ្មានការលើកលើកលែង ខ្ញុំជឿថា ការកាត់បន្ថយគ្រោះថ្នាក់ចរាចរនឹងអាចធ្វើទៅបាន ហើយសិនការអនុវត្តច្បាប់នៅតាមស្តង់ដារ២ និងនៅមានការយោគយល់ រឿងនេះខ្ញុំថាគ្រោះថ្នាក់ចរាចរនៅតែកើតមានឡើង»។
របាយការណ៍រដ្ឋមន្ត្រីក្រសួងសាធារណការនឹងដឹកជញ្ជូនឲ្យដឹងថា សព្វថ្ងៃអត្រានៃចំនួនមនុស្សស្លាប់ដោយសារគ្រោះថ្នាក់ចរាចរ ក្នុងពេលធ្វើដំណើរតាមដងផ្លូវនៅកម្ពុជា គិតជាមធ្យមប្រមាណ ៥នាក់ក្នុងមួយថ្ងៃ ចំណែកឯអ្នករងរបួសមួយថ្ងៃចំនួន ១៥នាក់ ហើយក្នុងចំណោមអ្នកស្លាប់នោះចំនួន៧៧ភាគរយ គឺអ្នកធ្វើដំណើរដោយម៉ូតូ៕