Clik here to view.
អូស្ត្រាលី និងប្រទេសជាសមាជិកអាស៊ាន កាលពីថ្ងៃសៅរ៍ ទី១៧ មីនា ក្នុងកិច្ចប្រជុំកំពូលអាស៊ាន អូស្ត្រាលី បានចុះហត្ថលេខាសន្យាចែករំលែកព័ត៌មានសំងាត់ដើម្បីទប់ស្កាត់អំពើភេរវកម្ម ។ នាយករដ្ឋមន្ត្រី អូស្ត្រាលី លោក ម៉ាលខុម ថឺនប៊ុល (Malcolm Turnbull) បានប្រកាសពីការចុះហត្ថលេខានៃអនុសារណៈយោគយល់គ្នា ជាមួយបណ្ដាប្រទេសទាំង១០ នៃសមាគមអាស៊ាន អំពីការចែករំលែកភ្នាក់ងារស៊ើបអង្កេតសំងាត់ និងសហប្រតិបត្តិការរួមគ្នា ស្ដីពីច្បាប់ ព្រមទាំងវិធានការនានា ប្រឆាំងក្រុមភេរវកម្ម និងក្រុមជ្រុលនិយមនៅលើបណ្ដាញសង្គម។
លោក Malcolm Turnbull ក៏បានលើកឡើងពីការពង្រឹងកិច្ចសហប្រតិបត្តិការផ្នែកនយោបាយ និងសេដ្ឋកិច្ច ជាមួយអាស៊ាន ខណៈដែលប្រទេសចិន កំពុងមានឥទ្ធិពលយ៉ាងខ្លាំង នៅក្នុងតំបន់។ លោកនាយករដ្ឋមន្ត្រី អូស្ត្រាលី Turnbull គូសបញ្ជាក់ថា ក្រុមយោធាឥស្លាមជ្រុលនិយម នៅអាស៊ីអាគ្នេយ៍ កំពុងរីកដុះដាលនិងហ្វឹកហាត់យ៉ាងសកម្ម អាស្រ័យហេតុនេះសហប្រតិបត្តិការជាដៃគូ រវាងអូស្ត្រាលី និងអាស៊ាន គឺជាភាពចាំបាច់ ដើម្បីប្រឆាំងនឹងក្រុមជ្រុលនិយមទាំងនេះ រួមមានកាត់ផ្ដាច់ផ្នែកហិរញ្ញវត្ថុផងដែរ។
រដ្ឋមន្ត្រីក្រសួងមហាផ្ទៃអូស្ត្រាលី លោក ភីធ័រ ដាត់ថិន (Peter Dutton) ថ្លែងថា រដ្ឋាភិបាលអូស្ត្រាលី នឹងណែនាំអំពីសេចក្ដីព្រាងច្បាប់ថ្មី ដើម្បីបង្ខំឲ្យក្រុមហ៊ុន ដែលផ្ដល់សេវាទំនាក់ទំនង និងផ្នែកគ្រឿងអេឡិចត្រូនិក ដូចជាទូរស័ព្ទដៃ និងកុំព្យូទ័រជាដើម នៅក្នុងប្រទេសអូស្ត្រាលី ត្រូវផ្ដល់ព័ត៌មានដល់ក្រុមការងារស៊ើបអង្កេត ដើម្បីស្វែងរកប្រភពដើម ឬព័ត៌មាននានា ក្នុងការបង្ក្រាប ដល់ក្រុមភេរវករឲ្យមានប្រសិទ្ធភាព៕
