ក្រុមអង្គការឃ្លាំមើលការបោះឆ្នោតមួយចំនួនចាត់ទុកការបោះឆ្នោតព្រឹទ្ធសភាថា បានធ្វើឡើងមិនស្របតាមគោលការណ៍ ប្រជាធិបតេយ្យ ដោយសារមិនមានគូប្រកួតពិតប្រាកដ។ ពួកគេរិះគន់ថាចាប់ពីពេលនេះតទៅ គណបក្សប្រជាជនកម្ពុជា នឹងលែងខ្វល់ អំពីការអនុម័តច្បាប់ទាំងឡាយទៀតហើយ។
ក្រុមសង្គមស៊ីវិលដែលបានធ្វើពហិការមិនចូលរួមអង្កេតការណ៍ ក្នុងដំណើរការបោះឆ្នោតព្រឹទ្ធសភានៅកម្ពុជាអះអាងថា ជ័យជំនះ របស់គណបក្សប្រជាជនកម្ពុជាដែលបានគ្រប់គ្រងអាសនៈ ព្រឹទ្ធសភាទាំងអស់ ទៅតាមការចង់បានរបស់លោក ហ៊ុន សែន នោះ នឹងធ្វើឲ្យស្ថាប័ននីតិប្បញ្ញត្តិមួយនេះ ធ្វើការអនុម័តច្បាប់ទាំងឡាយដោយគណបក្សតែមួយ។
អង្គការឃ្លាំមើលការបោះឆ្នោតធំៗចំនួនពីរ គឺអង្គការខុមហ្វ្រែល (Comfrel) និងអង្គការ និកហ្វិច (Nicfec) ដែលតែងសកម្មក្នុងការបញ្ជូន អ្នកសង្កេតការណ៍ រាប់រយនាក់ ដាក់ពង្រាយនៅតាមមណ្ឌលបោះឆ្នោត នីមួយៗកន្លងមកនោះ សម្រាប់ការបោះឆ្នោត ព្រឹទ្ធសភា លើកនេះ ពួកគេបានធ្វើពហិការ ជាលើកដំបូង ដោយសារ ពួកគេយល់ឃើញថា ការបោះឆ្នោតព្រឹទ្ធសភា កាលពីថ្ងៃទី២៥ កុម្ភៈ គឺជាការបោះឆ្នោតមួយ ដែលមហាជនទូទៅអាចប៉ាន់ស្មានទុកជាមុននូវលទ្ធផលពីការបោះឆ្នោតនោះ។
មន្ត្រីអង្កេតជាន់ខ្ពស់របស់អង្គការខុមហ្វ្រែល (COMFREL) លោក កន សាវាង្ស អះអាងថា លោកមានការសោកស្ដាយចំពោះការបោះឆ្នោត មួយដែលធ្វើឡើងខ្វះគូប្រកួតពិតប្រាកដ៖ «អ្វីដែលយើងមើលឃើញគឺយើងមានការសោកស្ដាយដែលមិនមាន ការចូលរួមពីខាងគណបក្សប្រឆាំងដ៏ធំដែលមានសមាជិកក្រុមប្រឹក្សាជាប់ឆ្នោតកាលពីឆ្នាំ២០១៧ ហើយនិងតំណាងរាស្ត្រជាប់ឆ្នោត កាលពីឆ្នាំ២០១៣ ដែលត្រូវបានគេប្ដឹងរំលាយ។ នេះហើយជាការសោកស្ដាយ»។
បើទោះបីជាគ្មានវត្តមានសង្គមស៊ីវិលមួយចំនួន ចូលរួមឃ្លាំមើលការបោះឆ្នោតព្រឹទ្ធសភានេះក៏ដោយ ប៉ុន្តែក៏មានតំណាងស្ថានទូតជប៉ុន ម៉ាឡេស៊ី និង អ្នកសង្កេតការណ៍របស់អង្គការសមាគមក្នុងស្រុកចំនួន១២ ដែលស្និទ្ធនឹងគណបក្សកាន់អំណាចបានចូលរួមអង្កេតការណ៍។
ជាលទ្ធផលគណបក្សប្រជាជនកម្ពុជាបានបានគ្រប់គ្រងអាសនៈព្រឹទ្ធ សភា ទាំងស្រុងបន្ទាប់ពីបានឈ្នះការបោះឆ្នោតព្រឹទ្ធសភាកាល ពីថ្ងៃទី២៥ កុម្ភៈ ដែលមានការចូលរួមរបស់គណបក្សរណបបង្គ្រប់កិច្ចចំនួនបីទៀត គឺគណបក្សហ៊្វុនស៊ិនប៉ិច គណបក្សយុវជនកម្ពុជា និងគណបក្សខ្មែររួបរួមជាតិ។
គណបក្សប្រជាជនកម្ពុជាបានសម្រេចតាមគោលបំណងរបស់ខ្លួន ហើយគឺពួកគេគ្រប់គ្រងអាសនៈរបស់ព្រឹទ្ធសភា ដល់៥៨ អាសនៈ ក្នុងចំណោមអាសនៈព្រឹទ្ធសភាចំនួន៦២ ដែលអាសនៈចំនួនពីរ តែងតាំងដោយព្រះមហាក្សត្រ ហើយពីរទៀត ជ្រើសតាំងដោយរដ្ឋសភា។
ប្រធានអង្គការឃ្លាំមើលការបោះឆ្នោត និកហ្វិច លោក សំ គន្ធាមី បានប្រាប់អាស៊ីសេរីតាមទូរស័ព្ទថា បើទោះបីជាអង្គការរបស់លោកបានធ្វើពហិការមិនចូលរួមឃ្លាំមើលការបោះឆ្នោតព្រឹទ្ធសភា ក៏ដោយ ប៉ុន្តែលោកយល់ឃើញថា ការបោះឆ្នោតនេះ ធ្វើឡើងដោយមិនតម្លាភាព មិនមានភាពស្មើគ្នា និងមិនយុត្តិធម៌ នោះឡើយ ដោយសារតែអវត្តមានរបស់គណបក្សសង្គ្រោះជាតិ។
លោកបន្តថា ជ័យជំនះដោយគ្មានគូប្រកួតពិតប្រាកដរបស់គណបក្ស ប្រជាជនកម្ពុជានឹងធ្វើឲ្យបក្សកាន់អំណាចមួយនេះ ជិះសេះលែងដៃ ក្នុងអនុម័តច្បាប់ទាំងឡាយដោយគ្មានការរារាំងអ្វីនោះឡើយ៖ «តួនាទីព្រឹទ្ធសភាហ្នឹងសំខាន់ណាស់គឺអាចផ្ទៀងផ្ទាត់ច្បាប់ ពេលសភា អនុម័តច្បាប់ហើយ។ ព្រឹទ្ធសភាអាចកែតម្រូវ និងពិនិត្យរាល់អ្វីៗ សព្វគ្រប់បែបយ៉ាងទាំងអស់ពាក់ព័ន្ធនឹងការងារច្បាប់មុនដាក់ទៅ ព្រះមហាក្សត្រអនុម័តអីហ្នឹង។ តែដល់ពេលឥឡូវគណបក្សប្រជាជន លោកកាន់កាប់ទាំងអស់តែម្ដង គឺទាំងស្រុង១០០%តែម្ដង»។
ប៉ុន្តែប្រធានគណៈកម្មាធិការជាតិរៀបចំការបោះឆ្នោត លោក ស៊ិក ប៊ុនហុក បានប្រាប់ក្រុមអ្នកសារព័ត៌មានកាលពីថ្ងៃអាទិត្យថា ការបោះឆ្នោតព្រឹទ្ធសភា ធ្វើឡើងផ្អែកទៅតាមច្បាប់របស់កម្ពុជា ដូច្នេះ គ.ជ.ប មិនចាប់អារម្មណ៍លើការរិះគន់ទាំងនោះទេ។
ទោះជាយ៉ាងណាក៏ដោយ ក្រុមសមាជិកសភាអាស៊ានដើម្បីសិទ្ធិមនុស្ស (APHR) កាលពីទី២៣ កុម្ភៈ ប្រកាសថា ការបោះឆ្នោតនេះ មិនអាចចាត់ទុកថា មានភាពស្របច្បាប់តាមលក្ខណៈប្រជាធិបតេយ្យបាននោះឡើយ ដោយសាររបបលោក ហ៊ុន សែន បានរម្លាយគណបក្សប្រឆាំងធំជាងគេ គឺគណបក្សសង្គ្រោះជាតិ និងការរឹតត្បិតសិទ្ធិសេរីភាពជារួមក្នុងប្រទេសកម្ពុជាជាបន្តបន្ទាប់នៅរយៈពេលប៉ុន្មានឆ្នាំចុងក្រោយនេះ៕