តុលាការកំពូលបានចេញសាលដីកាតម្កល់សេចក្ដីសម្រេចរបស់សាលាឧទ្ធរណ៍ ផ្ដន្ទាទោសអ្នកស្រី ថាក់ ឡានី ដាក់ពន្ធនាគារចំនួន ១ឆ្នាំ ៦ខែ និងពិន័យជាប្រាក់ ៨លានរៀល ពីបទបរិហារកេរ្តិ៍ លោក ហ៊ុន សែន ជាសាធារណៈ និងញុះញង់ឲ្យប្រព្រឹត្តិអំពើហិង្សាបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
ឧបករណ៍បំពងសំឡេងរបស់លោក ហ៊ុន សែន ចុះផ្សាយថា តុលាការកំពូលបានចេញសាលដីកាជាស្ថាពរ ផ្ដន្ទាទោសអ្នកស្រី ថាក់ ឡានី នៅថ្ងៃទី២៦ កុម្ភៈ តាមបណ្ដឹងរបស់លោក គី តិច ជាមេធាវីរបស់លោក ហ៊ុន សែន និងបង្គាប់សមត្ថកិច្ចចាប់ខ្លួនអ្នកស្រី ថាក់ ឡានី ជាសមាជិកព្រឹទ្ធសភាជាប់ឆ្នោតគណបក្ស សម រង្ស៊ី។ លោក ហ៊ុន សែន ក្រៅពីឲ្យតុលាការផ្ដន្ទាទោសដាក់ពន្ធនាគារនោះ លោកក៏បានប្ដឹងទារសំណងជំងឺចិត្តចំនួន ១០០រៀលថែមទៀត។
មេធាវីរបស់លោក ហ៊ុនសែន បានប្ដឹងអ្នកស្រី ថាក់ ឡានី ដោយចោទថា អ្នកស្រី បានថ្លែងប្រាប់អ្នកគាំទ្រគណបក្សសង្គ្រោះជាតិ នៅភូមិប៉ាតាង ឃុំប៉ាតាង ស្រុកលំផាត់ ខែត្ររតនគិរី កាលពីថ្ងៃទី២៩ កក្កដា ឆ្នាំ២០១៦ ថា លោក ហ៊ុន សែន ជាឃាតកសម្លាប់លោក បណ្ឌិត កែម ឡី។ អ្នកស្រី ថាក់ ឡានី ក៏ភៀសខ្លួនទៅក្រៅប្រទេសភ្លាមៗ ក្រោយពីលោក ហ៊ុន សែន ប្ដឹងឲ្យតុលាការចាប់ខ្លួនអ្នកស្រី។
ក្រៅពីនេះ ក្នុងសំណុំរឿងឃាតកម្មលើលោក បណ្ឌិត កែម ឡី នេះដែរ លោក ហ៊ុន សែន ក៏ប្ដឹងលោក សម រង្ស៊ី ប្រធានចលនាសង្គ្រោះជាតិ ពីបទបរិហារកេរ្តិ៍ ជាសាធារណៈ និងញុះញង់ឲ្យប្រព្រឹត្តិអំពើហិង្សា បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ដែលលោក សម រង្ស៊ី ចោទលោក ហ៊ុន សែន ជាអ្នកនៅពីក្រោយខ្នងនៃឃាតកម្មលោក បណ្ឌិត កែម ឡី នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។