សហគមន៍ព្រៃឡង់ រស់នៅឃុំកំពង់ចាម ស្រុកសំបូរ ខែត្រក្រចេះ បារម្ភជាថ្មីទៀតពីអនាគតដែនជម្រកសត្វព្រៃឡង់ ថានៅតែទទួលរងគ្រោះ ខណៈសកម្មភាពកាប់ឈើ និងការចូលរួមមកតាំងទីលំនៅក្នុងដែនអភិរក្សមួយនោះ នៅតែបន្តកើតមាន។
ក្តីបារម្ភកើតឡើងជាថ្មីដោយសារតែសហគមន៍ព្រៃឡង់ ជិត ២០នាក់ សហការជាមួយឆ្មាំអភិរក្សរបស់ក្រសួងបរិស្ថាន បានបញ្ចប់បេសកកម្មចុះល្បាតរបស់ខ្លួននៅថ្ងៃសៅរ៍ ទី២៤ កុម្ភៈ ហើយពួកគេប្រទះឃើញជនល្មើសចូលកាប់ឈើ និងសកម្មភាពទន្ទ្រានព្រៃរានយកដីសហគមន៍ការពារព្រៃឡង់ ខែត្រក្រចេះ ឲ្យដឹងនៅថ្ងៃទី២៤ ខែកុម្ភៈ ថា ពលរដ្ឋ ៦គ្រួសារថ្មីទៀតបានមកតាំងទីលំនៅខុសច្បាប់នៅតំបន់ព្រៃឡង់ និងបានកាប់រានព្រៃយកដីធ្វើចម្ការជាបន្តបន្ទាប់។ ពួកគាត់អំពាវនាវឲ្យក្រសួងបរិស្ថាន ពន្លឿនដោះស្រាយបញ្ហានេះ ប្រយោជន៍ទប់ស្កាត់ការរីករាលដាលនៃការលួចចូលមករស់នៅក្នុងព្រៃអភិរក្ស បង្កប៉ះពាល់បរិស្ថាន និងសត្វព្រៃ។
អ្នកសម្របសម្រួលការពារព្រៃឡង់ ខែត្រក្រចេះ លោក ថៃ ប៊ុនលៀង ឲ្យដឹងថា ពលរដ្ឋមកពីខែត្រឆ្ងាយៗនៅតែបន្តលួចកាប់ឈើ និងទន្ទ្រានព្រៃរានយកដីជាបន្តបន្ទាប់ ក្នុងដែនជម្រកព្រៃឡង់ បង្កហានិភ័យខ្ពស់ ហេតុនេះលោកអំពាវនាវឲ្យក្រសួងបរិស្ថាន ពន្លឿនដោះស្រាយបញ្ហានេះ ដោយផ្ដល់ជាដីសម្បទានសង្គមកិច្ចនៅតំបន់ផ្សេង និងបញ្ឈប់ការមកតាំងទីលំនៅខុសច្បាប់។
លោកបន្ថែមថា សហគមន៍ព្រៃឡង់ រកឃើញពលរដ្ឋបានមកតាំងទីលំនៅខុសច្បាប់ចំនួន ៣៤គ្រួសារ និង ៦គ្រួសារថ្មីទៀតទើបមករស់នៅក្នុងចំណុចត្រពាំងទា នៃឃុំបឹងចារ ស្រុកព្រែកប្រសប់ ខែត្រក្រចេះ។ ការចូលមកតាំងទីលំនៅនេះ បង្កគ្រោះថ្នាក់ធ្ងន់ធ្ងរដល់បរិស្ថានធម្មជាតិ ដ្បិតពលរដ្ឋទាំងនោះតែងលួចកាប់ព្រៃលក់ និងទន្ទ្រានព្រៃធ្វើចម្ការ៖ «គាត់នៅតែកាប់រានបន្ត តែការស្ម័គ្រចិត្តចុះល្បាតរបស់យើងមួយខែម្តង ឃើញគាត់កាប់ចេះតែរីកបន្តិចៗ គាត់រំលំបួនទៅដប់ និងម្ភៃដើម។ ខ្ញុំគិតថា បើក្រសួងបរិស្ថាន មិនរកវិធានការផ្តល់ដីសម្បទានសង្គមកិច្ច វានឹងរីកបន្ត»។
កាលពីថ្ងៃទី២១ ខែកុម្ភៈ ក្រុមស្នូលព្រៃឡង់ ខែត្រក្រចេះ ១៧នាក់ និងឆ្មាំអភិរក្សរបស់ក្រសួងបរិស្ថាន ២នាក់ ប្រើប្រាស់ម៉ូតូជាមធ្យោបាយចុះល្បាត ១៦គ្រឿង ចុះល្បាតរយៈពេល ៣ថ្ងៃ ក្នុងបំណងទប់ស្កាត់បទល្មើសព្រៃគ្រប់ប្រភេទ និងធ្វើរបាយការណ៍ទៅក្រសួងសាមី។ លទ្ធផលនៃការចុះល្បាតនោះ សហគមន៍ចាប់ម៉ាស៊ីនអារឈើស្វ័យប្រវត្តិ ២គ្រឿង ឃាត់ខ្លួនជនសង្ស័យ ៤នាក់ ឲ្យធ្វើកិច្ចសន្យាបញ្ឈប់ និងអប់រំណែនាំ រួចដោះលែងវិញ។ រីឯវត្ថុតាងសហគមន៍បានប្រគល់ជូនមន្ទីរបរិស្ថានខែត្រក្រចេះ។
សហគមន៍ព្រៃឡង់ ម្នាក់ទៀត លោក រ៉ា ស្មាក់ បារម្ភពីបទល្មើសព្រៃឡង់ កើតឡើងឥតឈប់ឈរ ហើយសហគមន៍ និងឆ្មាំអភិរក្សពុំមានសមត្ថភាពទប់ស្កាត់ឲ្យគ្រប់ជ្រុងជ្រោយទេ ព្រោះព្រៃឡង់ ធំធេង និងមានច្រកចេញចូលច្រើន។ លោកថា លទ្ធផលនៃការចុះល្បាតនេះ ជាការរួមចំណែកទប់ស្កាត់បទល្មើសបានមួយកម្រិតតួចប៉ុណ្ណោះ ព្រោះសហគមន៍នៅខ្វះសម្ភារៈចុះល្បាត ថវិកា និងខូចខាតម៉ូតូជាដើម។ លើសពីនេះ បេសកកម្មចុះល្បាតព្រៃម្ដងៗ ទាល់តែមានគ្នាច្រើនទើបអាចទប់ស្កាត់បទល្មើសបាន ព្រោះក្រុមជនល្មើសមានគ្នាច្រើន៖ «សហគមន៍យើងខ្ញុំព្រួយបារម្ភយ៉ាងខ្លាំង ព្រោះបទល្មើសនៅតែលួចកាប់បន្ត។ ចុះល្បាតម្ដងៗវេទនា ខូចម៉ូតូហែហូរច្រើនណាស់»។
អាស៊ីសេរី បានព្យាយាមទាក់ទងអ្នកនាំពាក្យក្រសួងបរិស្ថាន លោក សៅ សុភាព ដើម្បីសុំការបំភ្លឺរឿងនេះ តែទូរស័ព្ទហៅចូលពុំមានអ្នកទទួល។ អ្នកនាំពាក្យសមាគមអាដហុក (ADHOC) លោក ស៊ឹង សែនករុណា ចាត់ទុកការចូលមករស់នៅក្នុងតំបន់អភិរក្សរបស់ពលរដ្ឋថា គឺជាទង្វើខុសច្បាប់ ក៏ប៉ុន្តែលោកលើកទឹកចិត្តឲ្យអាជ្ញាធរអនុវត្តគោលនយោបាយផ្ដល់ដីសម្បទានសង្គមកិច្ចជូនពលរដ្ឋក្រីក្រពិតប្រាកដ។ លោកយល់ថា យន្តការអប់រំណែនាំផ្នែកច្បាប់ជូនពលរដ្ឋទាំងនោះ គឺជាដំណោះស្រាយដ៏ត្រឹមត្រូវ ដើម្បីរួមចំណែកទប់ស្កាត់បទល្មើសព្រៃឈើ និងបញ្ឈប់ការមកតាំងទីលំនៅខុសច្បាប់៖ «យើងចង់ឲ្យការទាំងអស់នេះ ឲ្យអាជ្ញាធរមានតួនាទីធ្វើយ៉ាងណាមិនមែនតែតំបន់ហ្នឹងទេ! ការកាប់រានដីព្រៃមានច្រើន យើងចង់ឲ្យអាជ្ញាធរទប់ស្កាត់ ព្រោះប៉ះពាល់ធនធានធម្មជាតិ»។
ព្រៃឡង់ ឋិតក្នុងចន្លោះខែត្រចំនួនបួន គឺខែត្រក្រចេះ ស្ទឹងត្រែង ព្រះវិហារ និងខែត្រកំពង់ធំ ត្រូវរដ្ឋាភិបាលប្រកាសបង្កើតជាដែនជម្រកសត្វព្រៃ កាលពីថ្ងៃទី៩ ខែឧសភា ឆ្នាំ២០១៦ មានផ្ទៃដីជាង ៤៣ម៉ឺនហិកតារ (៤៣១.៦៨៣ហិកតារ) ឋិតក្រោមការគ្រប់គ្រងរបស់ក្រសួងបរិស្ថាន ដែលមានកាតព្វកិច្ចធានាគាំពារបរិស្ថាន ការអភិរក្សជីវចម្រុះ និងកិច្ចការពារធម្មជាតិក្នុងតំបន់ព្រៃឡង់ និងត្រូវសហការជាមួយក្រសួងរៀបចំដែនដី និងស្ថាប័នពាក់ព័ន្ធ៕