Clik here to view.
មន្ត្រីអង្គការមូលនិធិសកល សម្រាប់អភិរក្សធនធានធម្មជាតិ ប្រចាំប្រទេសកម្ពុជា (WWF-Cambodia) បានស្នើដល់ប្រជាពលរដ្ឋទូទៅឲ្យបញ្ឈប់ទទួលទានមុខម្ហូបដែលចម្អិនពីសាច់សត្វព្រៃគ្រប់ប្រភេទ ដើម្បីរួមគ្នាអភិរក្សសត្វព្រៃដែលស្ទើរផុតពូជនៅកម្ពុជា ឲ្យបានគង់វង្ស។
អ្នកស្រាវជ្រាវរបស់អង្គការ WWF ប្រចាំកម្ពុជា បានរកឃើញថា មានសត្វទន្សោងគោព្រៃមួយហ្វូងធំកំពុងមានវត្តមានរស់នៅក្នុងដែនជម្រកសត្វព្រៃស្រែពក ស្រុកកោះញែក ខេត្តមណ្ឌលគិរី ក្នុងខែកុម្ភៈ ឆ្នាំ២០១៨ នេះ។
មន្ត្រីអង្គការ WWF បានឲ្យដឹងថា សត្វទន្សោងគោព្រៃដែលរដ្ឋបាលខេត្តមណ្ឌលគិរី បានសង់ធ្វើរូបសំណាកសម្គាល់អត្តសញ្ញាណខេត្តនៅលើរង្វង់មូលកណ្ដាលក្រុងសែនមនោរម្យរាល់ថ្ងៃនេះ គឺមិនទាន់ផុតពូជនោះទេ។
សមាជិកស្រាវជ្រាវរបស់អង្គការ WWF បានឲ្យដឹងថា សកម្មភាពចុះល្បាតព្រៃក្នុងដែនជម្រកសត្វព្រៃស្រែពក ស្រុកកោះញែក ខេត្តមណ្ឌលគិរី កាលពីសប្ដាហ៍មុននេះ បានឃើញសត្វទន្សោងគោព្រៃមួយហ្វូងធំ ប៉ុន្តែមិនទាន់អាចកំណត់ចំនួនសត្វទន្សោងទាំងនោះឲ្យពិតប្រាកដទេ។
បណ្ដាញសង្គមហ្វេសប៊ុក (Facebook) ឬ ផេក (Page) ផ្លូវការរបស់អង្គការ WWF បានបង្ហោះរូបថត និងរូបវីដេអូឃ្លិបនៃសត្វទន្សោងគោព្រៃមួយហ្វូង និងបានបញ្ជាក់ថា រូបថតសត្វទន្សោងទាំងនេះត្រូវបានក្រុមអ្នកស្រាវជ្រាវថតបាននៅក្នុងដែនជម្រកសត្វព្រៃស្រែពក កាលពីសប្ដាហ៍មុន ក្នុងពេលពួកគាត់កំពុងដើរល្បាតតាមខ្សែបន្ទាត់ត្រង់ Line Transect ដើម្បីកត់ត្រាចំនួនសត្វក្នុងតំបន់ការពារ។
មន្ត្រីអង្គការ WWF ប្រចាំកម្ពុជា បង្ហាញក្តីរំភើបនៅគ្រាពួកគេបានឃើញហ្វូងសត្វទន្សោងគោព្រៃមិនទាន់ផុតពូជ និងមានចំនួនច្រើនក្នុងដែនជម្រកសត្វព្រៃដែលអង្គការនេះកំពុងអភិរក្សនាខេត្តមណ្ឌលគិរី។
អង្គការ WWF ចាត់ទុកការបង្ហាញខ្លួននៃសត្វទន្សោងនៅក្នុងដែនជម្រកសត្វព្រៃស្រែពក ខេត្តមណ្ឌលគិរី ថាជាសញ្ញាវិជ្ជមានមួយក្នុងការងារអភិរក្សដែលមានការចូលរួមពីរាជរដ្ឋាភិបាល អង្គការWWF កម្ពុជា និងដៃគូអភិរក្សនានា។
មន្ត្រីអង្គការអភិរក្សសត្វព្រៃ បានស្នើដល់សាធារណជនទូទៅ ពិសេសក្រុមមនុស្សដែលនិយមទទួលទានមុខម្ហូបចម្អិនពីសាច់សត្វព្រៃ ឲ្យបញ្ឈប់ទទួលទានមុខម្ហូបចំអិនពីសត្វព្រៃជាបន្តទៀត ដើម្បីរួមគ្នាអភិរក្សការពារសត្វព្រៃគ្រប់ប្រភេទឲ្យបានគង់វង្ស និងសម្បូរបែបដូចពេលមុនវិញ។
ងាកមកអ្នកស្រី ជៀប សុធារី អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ ឯណោះវិញ បានរិះគន់សមត្ថកិច្ចជំនាញគ្រប់ស្ថាប័ន ដែលព្រងើយកន្តើយមិនព្រមរួមសហការគ្នាចុះបង្ក្រាបបទល្មើសជួញដូរសត្វព្រៃឲ្យមានប្រសិទ្ធភាព។ អ្នកស្រីអះអាងថា អាហារចម្អិនពីសាច់សត្វព្រៃជាច្រើនប្រភេទ ត្រូវគេជួញដូរ និងដាក់ជាចំហនៅតាមហាងផឹកស៊ី និងភោជនីយដ្ឋានភាគច្រើននៅទូទាំងប្រទេសកម្ពុជា ប៉ុន្តែសមត្ថកិច្ចមិនចុះបង្ក្រាបទេ ពិសេសនៅខេត្តព្រះសីហនុ។
អ្នកឃ្លាំមើលសង្គមរូបនេះបានកត់សម្គាល់ថា នៅតាមភោជនីយដ្ឋាន ពិសេសហាងផឹកស៊ីភាគច្រើននាខេត្តព្រះសីហនុ មានលក់មុខម្ហូបចម្អិនពីសត្វព្រៃយ៉ាងអនាធិបតេយ្យ ហើយមិនដែលឃើញសមត្ថកិច្ចជំនាញស្ថាប័នពាក់ព័ន្ធចុះបង្ក្រាបទេកន្លងមក៖ «រឿងការបរបាញ់ ឬការសម្លាប់សត្វព្រៃដែលជាធនធានដ៏កម្រមួយ គឺនៅក្នុងច្បាប់របស់កម្ពុជាយើង បានចូលជាធរមានរួចហើយ ហើយបានផ្សព្វផ្សាយជាសាធារណៈ ឲ្យសាធារណជន ប្រជាពលរដ្ឋ និងអ្នកប្រកបមុខរបរលក់ដូរនៅតាមភោជនីយដ្ឋានផ្សេងៗ ចូលរួមក្នុងការអនុវត្តច្បាប់ឲ្យបានទាំងអស់គ្នា ដើម្បីលើកកម្ពស់ថែរក្សាអភិរក្សសត្វព្រៃគ្រប់ប្រភេទឲ្យគង់វង្ស ព្រោះជាធនធានដ៏កម្រ ដែលសត្វព្រៃនៅក្នុងប្រទេសកម្ពុជា ពេលបច្ចុប្បន្នស្ទើរតែបាត់បង់ ឬផុតពូជអស់ទៅហើយ»។
មន្ត្រីអង្គការ WWF បានឲ្យដឹងថា កន្លងមកនេះ សត្វទន្សោងពិតជាបានរងការគំរាមកំហែងដោយសារបាត់បង់ជម្រកដែលបណ្ដាលមកពីបទល្មើសកាប់ព្រៃឈើខុសច្បាប់ ការទាញយកធនធានរ៉ែ ការអភិវឌ្ឍហេដ្ឋារចនាសម្ព័ន្ធផ្សេងៗ ការទន្ទ្រានយកដីធ្វើកម្មសិទ្ធិ ការដាក់អន្ទាក់ និងការបរបាញ់សត្វព្រៃខុសច្បាប់ជាដើម។
មន្ត្រីអង្គការមូលនិធិសកលសម្រាប់អភិរក្សធនធានធម្មជាតិ ឬហៅថា WWF-Cambodia បានស្នើដល់ប្រជាពលរដ្ឋ មន្ត្រីរាជការ និងស្ថាប័នពាក់ព័ន្ធ នៃរាជរដ្ឋាភិបាលទាំងអស់ត្រូវ «រួមគ្នាការពារសត្វព្រៃឈើ មិនបរិភោគសាច់សត្វព្រៃ និងមិនប្រើប្រាស់ឈើប្រណិត» ដើម្បីថែរក្សាការពារសត្វព្រៃគ្រប់ប្រភេទឲ្យបានគង់វង្សឡើងវិញនៅថ្ងៃអនាគត៕