បុរសខ្មែរអាមេរិក អាយុ ៣០ឆ្នាំម្នាក់ ត្រូវបានតុលាការនៅក្រុងឡូសអែនជឺឡេស (Los Angeles) រដ្ឋកាលីហ្វរនីញ៉ា (California) សហរដ្ឋអាមេរិក កាត់ទោសឲ្យជាប់ពន្ធនាគារ ពី ២៥ឆ្នាំ រហូតដល់អស់មួយជីវិត ពីបទមនុស្សឃាត។
កាសែត PressTelegram ចុះផ្សាយ កាលពីថ្ងៃ១៦ ខែកុម្ភៈ ឲ្យដឹងថា ទណ្ឌិត សំ ធារ័ត្ន បានសារភាពថា លោកពិតជាបានបាញ់សម្លាប់ ជនរងគ្រោះឈ្មោះ លោក ឆយ សំបូរ អាយុ៣៣ឆ្នាំ ក្នុងទំនាស់ឈ្លោះប្រកែកគ្នា នៅកន្លែងជប់លៀងមួយ នៅទីក្រុងខ្មែរ (Cambodian town) កាលពីថ្ងៃទី២០ ខែមករា ឆ្នាំ២០១៤។ រដ្ឋអាជ្ញាទីក្រុង Los Angeles ឲ្យដឹងថា ជនល្មើសនិងជនរងគ្រោះ ត្រូវបានអ្នកចាត់ចែងកម្មវិធីជប់លៀងបណ្ដេញចេញ ក្រោយមានជម្លោះនឹងគ្នា។
ក្រោយមកទណ្ឌិត សំ ធារ័ត្ន ក៏បានដើរតាមពីក្រោយ លោក ឆយ សំបូរ រួចក៏បាញ់សម្លាប់តែម្ដង។ លោក ឆយ សំបូរ ស្លាប់ភ្លាមៗនៅកន្លែងកើតហេតុ ហើយប៉ូលិស ក៏បានចាប់ឃាត់ខ្លួន ជនដៃដល់ ១ខែក្រោយមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។