Clik here to view.
ក្រសួងមហាផ្ទៃនៅថ្ងៃទី១៥ កុម្ភៈនេះ បានដាក់ពាក្យប្ដឹងមន្ត្រីជាន់ខ្ពស់គណបក្សសង្គ្រោះជាតិ ចំនួន៥រូប ទៅសាលាដំបូងរាជធានីភ្នំពេញ ពីបទធ្វើសកម្មភាពនយោបាយខុសច្បាប់។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា បានឲ្យកាសែតក្នុងស្រុកដឹងថា មន្ត្រីទាំង៥រូប ដែលក្រសួងមហាផ្ទៃប្ដឹងនោះ រួមមានលោក សម រង្ស៊ី ប្រធានចលនាសង្គ្រោះជាតិ អ្នកស្រី ជូឡុង ស៊ូមូរ៉ា តំណាងរាស្ត្រជាប់ឆ្នោតមណ្ឌលភ្នំពេញ កញ្ញា កឹម មនោវិទ្យា អនុប្រធានកិច្ចការសាធារណៈនៃគណបក្សសង្គ្រោះជាតិ ព្រមទាំងអនុប្រធានគណបក្សប្រឆាំងពីររូបទៀត គឺលោក អេង ឆៃអ៊ាង និងអ្នកស្រី មូរ សុខហួរ។
លោក លី សុផាណា អះអាងថា តុលាការកំពុងពិនិត្យ និងចាត់ការបណ្ដឹងនេះហើយ ព្រោះថា មន្ត្រីទាំង៥រូបនេះ បានធ្វើសកម្មភាពនៅក្រៅប្រទេស ខុសនឹងសាលដីកាតុលាការកំពូល ដែលហាមប្រាមមិនឲ្យធ្វើនយោបាយរយៈពេល៥ឆ្នាំ ក្នុងចំណោមមន្ត្រីបក្សប្រឆាំងចំនួន ១១៨រូបផ្សេងទៀត។
បន្ថែមពីនេះទៀត លោកឧបនាយករដ្ឋមន្ត្រី ស ខេង និងជារដ្ឋមន្ត្រីក្រសួងមហាផ្ទៃ ថ្លែងក្នុងឱកាសបិទសន្និបាតបូកសរុបការងារ ប្រចាំឆ្នាំ២០១៧ និងលើកទិសដៅឆ្នាំ២០១៨ នៅខែត្រតាកែវ នៅរសៀលថ្ងៃទី១៥ ខែកុម្ភៈ អះអាងថា ចលនាសង្គ្រោះជាតិ មិនអាចនឹងមានដង្ហើមរស់បានទេ ព្រោះចលនានេះគ្មានពលរដ្ឋគាំទ្រនៅក្នុងស្រុក ហើយថា ចលនានេះ បង្កើតឡើងដើម្បីផ្ដួលរំលំរដ្ឋាភិបាលជាដើម។
សូមស្ដាប់បទសម្ភាសន៍បន្ថែមជាមួយលោកមេធាវី ផែង ហេង ជុំវិញផ្លូវច្បាប់ដាក់ពាក្យប្ដឹងមន្ត្រីជាន់ខ្ពស់គណបក្សសង្គ្រោះជាតិនៅក្រៅប្រទេសដូចតទៅ។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
