សមាគមគ្រូបង្រៀនកម្ពុជាឯករាជ្យ នៅថ្ងៃច័ន្ទ ទី១២ កុម្ភៈ នេះ បានហៅការបណ្ដេញលោក រ៉ុង ឈុន អតីតប្រធានសមាគមគ្រូបង្រៀនកម្ពុជា និងជាអតីតសមាជិក គ.ជ.ប ចេញពីក្របខ័ណ្ឌរបស់ក្រសួងអប់រំ នោះថា ជាការធ្វើឡើងក្រោមហេតុផលនយោបាយ និងជាការរើសអើងទៅលើសកម្មភាពតស៊ូមតិរបស់លោក។
នៅក្នុងលិខិតមួយច្បាប់របស់ប្រធានសមាគមន៍គ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី ដែលបានផ្ញើទៅកាន់លោក ហ្កាយ រ៉ាយដឺ (Guy Ryder) អគ្គនាយករបស់អង្គការអន្តរជាតិខាងផ្នែកការងារ (ILO) និងលោក ហ្វ្រ៊ែត វ៉ាន់ លូវិន ( Fred Van Leeuwen) អគ្គលេខាធិការនៃអង្គការអប់រំអន្តរជាតិ បានជំរុញឲ្យស្ថាប័នទាំងពីរនេះធ្វើយ៉ាងណាអន្តរាគមន៍ឲ្យលោក រ៉ុង ឈុន អាចមានឈ្មោះក្នុងក្របខ័ណ្ឌមន្ត្រីរាជការដូចមុនវិញ។
រដ្ឋមន្ត្រីក្រសួងអប់រំ លោក ហង់ ជួនណារ៉ុន កាលពីថ្ងៃទី៣០ ខែមករា បានលើកហេតុផលថា ការបណ្ដេញលោក លោក រ៉ុង ឈុន ចេញពីក្របខ័ណ្ឌមន្ត្រីរាជការរបស់ក្រសួងអប់រំនេះ ដោយសារលោក រ៉ុង ឈុន បានអវត្តមានពីការងារដោយ «គ្មានច្បាប់អនុញ្ញាត» តាំងពីថ្ងៃទី១ ខែមករា ឆ្នាំ២០១៨ មក។
អ្នកស្រី អ៊ុក ឆាយ៉ាវី បញ្ជាក់ថា មុននឹងសម្រេចចិត្តធ្វើការបណ្ដេញលោក រ៉ុង ឈុន ចេញពីក្របខ័ណ្ឌរបស់ក្រសួងអប់រំ រដ្ឋមន្ត្រីរូបនេះគួរមានការសួរនាំម្តង ឬពីរដងទៅតាមនីតិវិធី ឬដាក់ទណ្ឌកម្មវិន័យ ប្រសិនបើរកឃើញថា មានកំហុស ប៉ុន្តែក្រសួងអប់រំ មិនបានធ្វើដូច្នេះទេ។
អ្នកស្រីបានរិះគន់ការ សម្រេចចិត្តរបស់លោក ហង់ ជួនណារ៉ុន រដ្ឋមន្ត្រីក្រសួងអប់រំ ថាជាការបំពានទៅនឹងច្បាប់ស្តីពីសហលក្ខន្តិកៈមន្ត្រីរាជការស៊ីវិល និងជាការធ្វើឡើងខុសនីតិវិធី។
លោក រ៉ុង ឈុន ធ្លាប់បានបម្រើការងារនៅក្នុងនាយកដ្ឋានស្រាវជ្រាវវិទ្យាសាស្ត្ររបស់ក្រសួងអប់រំ យុវជន និងកីឡា នៅមុនពេលដែលលោកបានព្យួរការងារទៅបម្រើការងារជាសមាជិកនៃគណៈកម្មាធិការជាតិរៀបចំការបោះឆ្នោត កាលពីខែឧសភា ឆ្នាំ២០១៥។ បន្ទាប់មកលោក រ៉ុង ឈុន បានលាឈប់ពីស្ថាប័នរៀបចំការបោះឆ្នោតមួយនេះកាលពីខែវិច្ឆិកា ឆ្នាំ២០១៧ ដែលជាការប្រឆាំងទៅនឹងការសម្រេចរបស់តុលាការកំពូល ដែលរំលាយគណបក្សសង្គ្រោះជាតិ។
លោក រ៉ុង ឈុន ធ្លាប់មានប្រសាសន៍ថា វិធានការរបស់ក្រសួងអប់រំ មកលើរូបលោក គឺជាការរើសអើង និងជាការសងសឹកដោយសារតែសកម្មភាពសហជីពរបស់លោកកាលពីពេលកន្លេងទៅ និងការសងសឹកដែលលោកបានលាឈប់ពីសមាជិករបស់ គ.ជ.ប៕