ពលរដ្ឋបដិសេធមិនទទួលសំណង ពីក្រុមហ៊ុនទំនប់វារីអគ្គិសនីសេសានក្រោមពីរ រស់នៅឃុំក្បាលរមាស ស្រុកសេសាន ខែត្រស្ទឹងត្រែង ឲ្យដឹងថា អាជ្ញាធរខែត្រ និងតំណាងក្រុមហ៊ុនបានឯកភាព ឲ្យអ្នកភូមិរស់នៅភូមិចាស់ ធ្វើប្លង់ដីសមូហភាព និងអភិវឌ្ឍន៍ហេដ្ឋារចនាសម្ព័ន្ធនានាក្រោយអាជ្ញាធរខែត្រស្ទឹងត្រែង និងតំណាងក្រុមហ៊ុនបានចុះជួបពលរដ្ឋ ដើម្បីស្រង់យកព័ត៌មាន និងទទួលយកការសំណូមពរនានារបស់ពលរដ្ឋមកដោះស្រាយ។
អ្នកភូមិក្បាលរមាស និងភូមិស្រែគរចាស់ជាង ១រយគ្រួសារ ថា នេះ ជាពន្លឺលទ្ធផលថ្មីមួយ ទាក់ទិនការអនុវត្តអនុសាសន៍លោកនាយករដ្ឋមន្ត្រី ហ៊ុន សែន ដែលអនុញ្ញាតឲ្យអ្នកភូមិអាចតាំងទីលំនៅថ្មីបាន ហើយអាជ្ញាធរ និងតំណាងក្រុមហ៊ុនត្រូវសហការ និងដោះស្រាយផ្ដល់សំណងនានា។
ជនជាតិដើមភាគតិច រស់នៅភូមិក្បាលរមាសចាស់ លោកស្រី ស្រាំង ឡាញ់ ឲ្យដឹងនៅថ្ងៃទី១០ កុម្ភៈថា អាជ្ញាធរខែត្រស្ទឹងត្រែង និងតំណាងក្រុមហ៊ុន បានជួបពលរដ្ឋជាថ្មីនេះ ពុំមែនផ្សព្វផ្សាយពីគោលនយោបាយសំណងដូចមុននោះឡើយ គឺអនុវត្តតាមប្រសាសន៍ប្រមុខរដ្ឋាភិបាលដែលធ្លាប់សន្យា។ លោកស្រីថា លទ្ធផលនៃការពិភាក្សារវាងសហគមន៍ តំណាងក្រុមហ៊ុន និងអាជ្ញាធរខែត្រ បង្ហាញសញ្ញាវិជ្ជមានមួយចំនួន ពាក់ព័ន្ធធ្វើប្លង់ដីសមូហភាព និងការផ្ដល់សេវាសាធារណៈជាដើម។ តែយ៉ាងណាលោកស្រីបារម្ភថា អាជ្ញាធរមិនបានកំណត់ពេលស្ថាបនាសាលារៀនមណ្ឌលសុខភាព ផ្លូវ និង វាស់វែងកំណត់ទីតាំងថ្មីនៅឡើយទេ អាចនឹងអូសបន្លាយពេលយូរខាតប្រយោជន៍ពួកគាត់។ «»
កាលពីចុងឆ្នាំ២០១៧ លោកនាយករដ្ឋមន្ត្រី ហ៊ុន សែន បានសម្ពោធចុចកុងតាក់បិទទ្វារទឹកទំនប់វារីអគ្គិសនីសេសានក្រោមពីរជាស្ថាពរ ដោយលោកបញ្ជាក់ថា រដ្ឋាភិបាលនឹងអនុញ្ញាតឲ្យអ្នកភូមិដែលបដិសេធមិនទទួលសំណងរស់នៅភូមិស្រែគរ និងភូមិក្បាលរមាសចាស់ អាចតាំងទីលំនៅភូមិថ្មីបាន។
មេឃុំស្រែគរមកពីគណបក្សសង្គ្រោះជាតិ លោក សៀក មេគង្គ ដែលទើបរដ្ឋាភិបាលដកពីតំណែង ឲ្យដឹងថា អ្នកភូមិដែលមិនទទួលសំណង សំណូមពរឲ្យអាជ្ញាធរពន្លឿនកសាងសាលារៀន អណ្ដូងទឹក និងផ្លូវ ដើម្បីផ្ដល់ឱកាសឲ្យកុមារចូលរៀនឡើងវិញ។ លោកពុំមានជំនឿទាំងស្រុងលើការសន្យារបស់អាជ្ញាធរនោះទេ ព្រោះកន្លងទៅអាជ្ញាធរតែងតែពន្យារពេលក្នុងការដោះស្រាយបញ្ហាសំណងជូនពលរដ្ឋ រហូតឈានដល់ថ្ងៃជិតបោះឆ្នោតទើបភ្ញាក់ខ្លួន មករំឭកស្មារតីពលរដ្ឋឡើងវិញ។ «»
អ្នកឃ្លាំមើលបរិស្ថាន លោក ភូ ប៊ុនថាន់ ដែលតែងចុះតាមដានបញ្ហានេះ មើលឃើញថា មកទល់ពេលនេះពលរដ្ឋដែលបដិសេធមិនទទួលសំណងមួយចំនួន បានចាប់ផ្ដើមកសាងផ្ទះនៅចម្ការ និងទីទួលខ្ពស់ដោយខ្លួនឯង ហើយទីតាំងថ្មីដែលអ្នកភូមិកសាងផ្ទះនោះ អាចមិនឋិតក្នុងប្លង់ដែលអាជ្ញាធរអនុញ្ញាតឲ្យអ្នកភូមិបង្កើតភូមិថ្មីនោះទេ។ បញ្ហានេះ គឺជាចំណោទមួយដែលអាជ្ញាធរ និងក្រុមហ៊ុនត្រូវពន្លឿនដោះស្រាយ និងកំណត់ទីតាំងនៅកន្លែងណាឲ្យប្រាកដ ដើម្បីឲ្យពលរដ្ឋមានលទ្ធភាព សង់ជម្រកថ្មីបាន។ «»
អ្នកភូមិក្បាលរមាសចាស់បន្ថែមថា ការស្វែងរកដំណោះស្រាយបញ្ហានេះ បានអូសបន្លាយរហូតបច្ចុប្បន្ន ដោយសារតែអាជ្ញាធរនៅតែព្យាយាមផ្សព្វផ្សាយពីគោលនយោបាយសំណង ដែលពួកគាត់មិនពេញចិត្ត។ អ្នកភូមិប្រកាន់ជំហរមិនចាកចេញពីភូមិកំណើត ដោយសារបាត់បង់ប្រពៃណីវប្បធម៌ ផ្នូរដូនតា ព្រៃឈើ និងទន្លេដែលជាប្រភពប្រាក់ចំណូលមិនចេះរីងស្ងួត។
របាយការណ៍អាជ្ញាធរឃុំស្រែគរ ឲ្យដឹងថា មកទល់ពេលនេះ ពលរដ្ឋរស់នៅឃុំក្បាលរមាស ៥៧គ្រួសារ និងឃុំស្រែគរ ៥០គ្រួសារ រាប់បញ្ចូលពលរដ្ឋបំបែកគ្រួសារ នៅមិនទាន់យល់ព្រមទទួលសំណងពីក្រុមហ៊ុននៅឡើយ៕