សកម្មជនដីធ្លី និងការពារធនធានធម្មជាតិនៅស្រុកក្រគរ លោក គុជ វ៉េង រស់នៅភូមិក្រឡាញ់ ឃុំក្បាលត្រាច ស្រុកក្រគរ ខេត្តពោធិ៍សាត់ ត្រូវបានសាលាដំបូងខេត្ត ចោទពីបទបរិហារកេរ្តិ៍ជាសាធារណៈ ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងបទធ្វើឲ្យបាត់ជំនឿលើសេចក្ដីសម្រេចរបស់តុលាការ ដែលបានប្រព្រឹត្តនៅសាលាឧទ្ធរណ៍ កាលពីថ្ងៃទី១៧ ឧសភា ឆ្នាំ២០១៦។ កាលពីថ្ងៃទី៥ ខែមករា ឆ្នាំ២០១៧ លោក គុជ វ៉េង បានចូលបំភ្លឺជុំវិញបទចោទនេះម្ដងរួចមកហើយ តាមពាក្យបណ្ដឹងរបស់មេឃុំស្នាអន្សា គឺលោក មោក កោ។
លោក គុជ វ៉េង ធ្លាប់បានឲ្យដឹងថា ភស្តុតាងដែលដើមបណ្ដឹងយកជាសំអាងក្នុងពាក្យបណ្ដឹង នោះគឺបទសម្ភាសន៍របស់លោកជាមួយអាស៊ីសេរី ទាក់ទងរឿងដីធ្លីដែលអាជ្ញាធរឃុំដកហូតដីធ្លីពលរដ្ឋចំនួន ២១គ្រួសារទៅដាក់ជាព្រៃសហគមន៍ ហើយតុលាការសម្រេចឲ្យភាគីពលរដ្ឋ មានទោសកាលពីថ្ងៃទី១៧ ខែឧសភា ឆ្នាំ២០១៦។ លោកថា កាលណោះលោកមិនបាននិយាយថា តុលាការមិនអើពើ ឬអយុត្តិធម៌នោះទេ គឺគ្រាន់តែស្នើឲ្យតុលាការចុះពិនិត្យជាក់ស្ដែងលើដីមានជម្លោះ មុនកាត់សេចក្ដី ពីព្រោះពលរដ្ឋរស់នៅតាំងពីឆ្នាំ១៩៨៣ ហើយព្រៃសហគមន៍បង្កើតនៅឆ្នាំ២០១៣។ អ្វីដែលលោកបាននិយាយទាក់ទងនឹងជម្លោះដីធ្លីរវាងអាជ្ញាធរឃុំ និងពលរដ្ឋជារឿងពិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។