Clik here to view.
កម្មកររោងចក្រកាត់ដេរចំនួន ៣ ក្នុងខណ្ឌពោធិ៍សែនជ័យ រាជធានីភ្នំពេញ នៅព្រឹកថ្ងៃទី៨ ខែកុម្ភៈ បាននាំគ្នាធ្វើកូដកម្មនៅមុខរោងចក្ររៀងៗខ្លួន ក្រោយពួកគេដឹងថា ថៅកែរបស់ពួកគេបានរត់ចោលរោងចក្រដោយមិនទាន់ទូទាត់ប្រាក់ឈ្នួលឲ្យកម្មករ។
ក្រុមកម្មករ-កម្មការិនីទាំង ៣រោងចក្រ មានចំនួនប្រហែល ១.៥០០នាក់ បានឈរតវ៉ានៅមុខច្រកទ្វាររោងចក្រ ដើម្បីសម្ដែងការខឹងសម្បាចំពោះថៅកែរោងចក្រ។ ពួកគេអះអាងថា ថៅកែធំរបស់រោងចក្រទាំង៣នេះ គឺជាមនុស្សតែម្នាក់ គឺជាជនជាតិចិន ហើយបានរត់ចោលរោងចក្រជាយូរមកហើយ ខណៈកម្មករទើបដឹង និងនាំគ្នាតវ៉ាភ្លាមៗតែម្ដង។
រោងចក្រទាំង៣ ដែលថៅកែរត់ចោលកម្មករ ដោយមិនទាន់ទូទាត់ប្រាក់ឈ្នួល និងប្រាក់បំណាច់មានរោងចក្រ អេហ្វ.អ.អ៊ី. ហ្គាមេន (FRE Garment) និងរោងចក្រ យូដា ហ្គាមេន អ៊ិនដាស់ស្ទ្រាល (UDA Garment Industrial) មានកម្មករជាង ៧០០នាក់ ស្ថិតនៅភូមិត្រពាំងជ្រៃ សង្កាត់ចោមចៅ ឯរោងចក្រ អ៊ីហ្វា ហ្គាមេន អ៊ិនដាស់ស្ទ្រាល (EFA Garment Industrial) មានកម្មករប្រហែល ៨០០នាក់ ស្ថិតនៅក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។
កម្មករផ្នែកដេរម្នាក់នៃរោងចក្រ UDA Garment Industrial លោក ស្រន ស្រស់ ឲ្យដឹងថា ថៅកែរោងចក្រមិនទាន់បើកប្រាក់ឈ្នួលឲ្យកម្មករសម្រាប់ខែមករា នៅឡើយទេ។ លោកថា នៅយប់ថ្ងៃទី៨ កុម្ភៈ កម្មករនឹងនាំគ្នាបោះតង់ដេកលើចិញ្ចើមផ្លូវមុខរោងចក្រ ដើម្បីការពារសម្ភារៈ ខ្លាចមានកូនចៅរបស់ថៅកែរោងចក្រមកលួចដឹកសម្ភារៈចេញក្រៅ។ បើទោះជាបែបនេះក្ដី កម្មកររូបនេះមិនរំពឹងថា សម្ភារៈក្នុងរោងចក្រអាចមានតម្លៃលក់ឡាយឡុងគ្រប់ចំនួនប្រាក់ឈ្នួលរបស់បុគ្គលិកនោះទេ ខណៈដែលរោងចក្រ យូហ្វា មានកម្មករជាង ៨០០នាក់៖ «»។
កម្មកររោងចក្រទាំង៣ បានជ្រួលច្របល់បាត់ថៅកែរោងចក្រតាំងពីយប់ថ្ងៃទី៧ ខែកុម្ភៈ។ កម្មករប្រាប់ថា មូលហេតុដែលកម្មករជ្រួលច្របល់ដឹងថា បាត់ថៅកែរោងចក្រ គឺនៅពេលដែលឃើញអ្នករកស៊ីជាមួយរោងចក្រទាំង៣ បានមកទាមទារលុយថៅកែដែលបានចូលហ៊ុនរកស៊ីជាមួយគ្នា។
ជាងនេះទៅទៀត កម្មករឲ្យដឹងថា ថៅកែរោងចក្រជាជនជាតិចិន តែងតែបើកលុយឲ្យកម្មករនៅរៀងរាល់ដើមខែ គឺថ្ងៃទី៦ ប៉ុន្តែនៅក្នុងខែមករា ថៅកែបានបើកលុយឈ្នួលសម្រាប់ខែធ្នូ ឲ្យតែ ៧០ភាគរយ នៅ ៣០ភាគរយ មិនទាន់បើកឲ្យដោយសន្យាថា រង់ចាំបើកសរុបជាមួយប្រាក់ឈ្នួលប្រចាំខែមករា នៅដើមខែកុម្ភៈ។ ប៉ុន្តែនៅដើមខែកុម្ភៈនេះ កម្មករប្រាប់ថា បាត់ទាំងថៅកែ បាត់ទាំងបុគ្គលិកជាជនជាតិចិន ដែលជាថ្នាក់ដឹកនាំនៃរោងចក្រទាំង៣។
កាលពីយប់ថ្ងៃទី៧ កុម្ភៈ កម្មករបាននាំគ្នាជ្រួលច្របល់ដល់យប់ជ្រៅ ប៉ុន្តែកម្មការិនីបាននាំគ្នាទៅសម្រាកនៅផ្ទះជួល ចំណែកកម្មករវិញ នាំគ្នាយាមនៅរោងចក្រ ខ្លាចមានការដឹកម៉ាស៊ីនដេរ និងសម្ភារៈចេញបន្ថែមទៀត។ កម្មករអះអាងថា ចាប់ពីពេលនេះតទៅ ពួកគេនឹងមិនអនុញ្ញាតឲ្យនរណាដឹកម៉ាស៊ីន ឬសម្ភារៈចេញពីរោងចក្រទាំង៣នេះទេ ដោយរង់ចាំការដោះស្រាយប្រាក់ឈ្នួលជាមុនសិន។
ប្រធានសហព័ន្ធកម្មករខ្មែរជួយខ្មែរ លោក ល៉ាំង សំបូរ ដែលត្រូវបានកម្មករខ្លះ ស្នើសុំឲ្យជួយឃ្លាំមើល និងទាមទារផលប្រយោជន៍ឲ្យកម្មករ សម្រាប់រោងចក្រទាំង៣ និយាយថា មន្ត្រីនៃក្រសួងការងារ និងបណ្ដុះបណ្ដាលវិជ្ជាជីវៈ បានមកដោះស្រាយជាមួយកម្មករកាលពីព្រឹកថ្ងៃទី៨ កុម្ភៈ ប៉ុន្តែរហូតដល់ល្ងាចថ្ងៃដដែលនេះ នៅមិនទាន់មានដំណោះស្រាយនោះទេ។ លោកថា មន្ត្រីក្រសួងការងារ បានប្រាប់កម្មករថា ក្រសួងទុកពេលឲ្យថៅកែ ៤៨ម៉ោង ដើម្បីចូលខ្លួនមកដោះស្រាយមុននឹងកម្មករប្ដឹងទៅតុលាការ ដើម្បីសុំសិទ្ធិលក់សម្ភារៈរោងចក្រឡាយឡុង៖ «»។
ករណីថៅកែរត់ចោលរោងចក្រនេះ មិនមែនជារឿងថ្មីទេនៅក្នុងវិស័យកាត់ដេរនៅកម្ពុជា។ ក្រុមកម្មកររិះគន់រដ្ឋមន្ត្រីក្រសួងការងារ ថា បានបណ្ដែតបណ្ដោយឲ្យករណីនេះកើតឡើងម្ដងហើយម្ដងទៀតស្ទើរគ្រប់រោងចក្រ ដោយគ្មានវិធានការទប់ស្កាត់។ កម្មករមួយចំនួនបានព្រមានថា ប្រសិនបើពួកគេមិនទទួលបានប្រាក់ឈ្នួល និងប្រាក់បំណាច់នោះទេ ពួកគេនឹងទាមទារឲ្យរដ្ឋមន្ត្រីក្រសួងការងារ ចុះចេញពីតំណែង ព្រោះគ្មានសមត្ថភាពទប់ស្កាត់ករណីថៅកែរត់ចោលរោងចក្រ៕
